ဝၼ်းတီႈ 15-26/01/2016 ၸွမ်သိုၵ်းယွတ်ႈသိုၵ်း ဢွၼ်ၼမ်းလုၵ်ႈၸုမ်း 14 ၵေႃႉ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး RCSS/SSA ၵႂႃလဵပ်ႈႁဵၼ်း လၢႆးၵေႃႇတင်ႈမိူင်းႁူမ်ႈတုမ် လွၵ်းပိူင်ၾႄႊၻရေႊလ် တီႈၸိုင်ႈမိူင်း သဝိတ်ႉသီႊလႅၼ်ႊ ။

ၸဝ်ႈၶိုၼ်းသႂ် ၸႂ်ယဵၼ် တီႈၵိူဝ်းၵုမ် ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး  ၸဝ်ႈယွတ်ႈသိုၵ်း ဢွၼ်ႁူဝ်လုၵ်ႈၸုမ်းၵႂႃႇလဵပ်ႈႁဵၼ်း လွၵ်းပိူင်ၾႄႇၻရေႊလ် ႁဵတ်းႁိုဝ် ပဵၼ်မႃး ၊ ထႅင်ႈၾၢႆႇၼိုင်ႈၵေႃႈ တေလႆႈလဵပ်ႈႁဵၼ်းပႃးဝႃႈ တီႈၼႂ်းမိူင်း သဝိတ်ႉသီႊလႅၼ်ႊ ၼႆႉ ၵဵဝ်ႇၵပ်းလွင်ႈၽုၵ်ႇသွမ်ႈ လႄႈ ၸၢဝ်းၶိူဝ်း ဢၼ်ယူႇႁူမ်ႈၵၼ် ၼႂ်းမိူင်း သဝိတ်ႉသီႊလႅၼ်ႊ ၼႆႉ တင်းမူတ်း မီး 4 ၸၢဝ်းၶိူဝ် ၶဝ်ႁဵတ်းႁိုဝ် ယူႇသဝ်းၵိၼ်သၢင်ႈ ပူၵ်းပွင်ဝၢၼ်ႈမိူင်းၵႂႃႇၸွမ်းၵၼ်ၸိူင်ႉႁိုဝ် ၊ လိူဝ်ၼၼ်ႉ တၢင်းၵႂၢင်ႈမိူင်း သဝိတ်ႉသီႊလႅၼ်ႊ ၼႆႉ ပေႃးမႃးတႅၵ်ႈတူၺ်းၼႆႉ တေၵႂၢင်ႈပဵင်းၼႂ်းမိူင်းတႆး ႁဝ်းပွတ်းဢွၵ်ႇၶူင်းၵူၺ်း ဝႃႈၼႆ ။


သိုပ်ႇလၢတ်ႈထႅင်ႈဝႃႈ လွင်ႈၽုၵ်ႇသွမ်ႈၼႂ်းမိူင်း သဝိတ်ႉသီႊလႅၼ်ႊ ၼႆႉ မီး 1 ပိူဝ်ႊသႅၼ်ႊၵူၺ်း ၊ လွင်ႈမေႃတိၼ်မေႃမိုဝ်း ဢၼ်ႁဵတ်းဢွၵ်ႇၶူင်ဢွၵ်ႇၼႂ်းမိုဝ်းၵူၼ်းမိူင်းၶဝ်သမ်ႉ မီး 27 ပိူဝ်ႊသႅၼ်ႊ ၊  တီႈလိူဝ်ၼၼ်ႉတႄႉ ပဵၼ်ၵၢၼ် ႁပ်ႉတွၼ်ႈၶႅၵ်ႇသူင်ႇၶႅၵ်ႇ ၼႂ်းမိူင်းၶဝ်ၸဵမ်ၸိူဝ်းၼႆႉၵူၺ်း ဝႃႈၼႆ ။


ၸၢႆးၽူးမိူင်း လၢတ်ႈဝႃႈ ဝၼ်းတီႈ 16 ၼႆႉ ႁွတ်ႈၽႅဝ် တီႈ သဝိတ်ႉသီႊလႅၼ်ႊ ဝၼ်းတီႈ 17 သမ်ႉ တေလဵပ်းႁဵၼ်း လွင်ႈပိူင်မိူင်းၾႄႊၻရေႊလ် ၊ ဝၼ်းတီႈ 18 သမ်ႉ တေၵႂႃႇႁူပ်ႉ ဢႅမ်ႊပၢၼ်ႊသတိူဝ်ႊ ၵျွတ်ႉမတိၼ် ၽွင်းလူင် ႁွင်ႈၵၢၼ်ၾၢႆႇၼွၵ်ႈမိူင်းလႄႈ တူဝ်တႅၼ်းၾၢႆႇလူင်ပွင်ၸိုင်ႈမိူင်း သဝိတ်ႉသီႊလႅၼ်ႊ ဝႃႈၼႆ ။


ၾၢႆႇႁွင်ႈၵၢၼ်လူင် ၾၢႆႇတိတ်းတေႃႇ မိူင်း သဝိတ်ႉသီႊလႅၼ်ႊ ယိုၼ်ႈလိၵ်ႈမွၵ်ႇထိုင်မႃး တီႈ ၸုမ်းၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး လႄႈ ၸင်ႇလႆႈၵႂႃႇလဵပ်ႈႁဵၼ်း ၶၢဝ်းတၢင်း 10 ဝၼ်း ။ ဢွၼ်ၼႃႈၼႆႉ လုၵ်ႈၸုမ်း UNFC ၶွင်ႊသီႊႁူမ်ႊတုမ်ၾႄႊၻရေႊလ်ၸၢဝ်းၶိူဝ်းၵေႃႈ ၵႂႃႇလဵပ်ႈႁဵၼ်းမႃးၽွင်ႈယဝ်ႉ ဝႃႈၼႆ ။