Dr.ၸၢႆးၼေႃႇၶိူဝ်း ၼေႃႇၽူႈတႅၼ်း ပႃႊတီႊႁူဝ်သိူဝ် SNLD တိူင်းတႃႈလိူဝ်ႇ ၶိုၼ်ႈ လုမ်းတီႈၼေပျီႇတေႃႇ ၵမ်းတီႈသွင် သၢၼ်ၶတ်း ဢၼ်ပႃႊတီႊၼူၵ်ႉယုင်း NLD ပေႉဝႆႉ တီႈၼင်ႈၸၢဝ်းၶိူဝ်းတႆး ၼႂ်းတိူင်းတႃႈလိူဝ်ႇ ။

ဝၼ်းတီႈ 20/1/2016 ၼႆႉ Dr.ၸၢႆးၼေႃႇၶိူဝ်း ၼေႃႇၽူႈတႅၼ်း တီႈၼင်ႈၽူႈတႅၼ်းၸၢဝ်းၶိူဝ်းတႆး တိူင်းတႃႈလိူဝ်ႇ ၸႅင်ႈၵႂၢမ်းဝႆႉ သၢၼ်ၶတ်း ဢူးၵျေႃႇၸေႃး ပႃႊတီႊၻီႊမူဝ်ႊၶရေႊၸီႊၸိူဝ်ႉၸၢတ်ႈ (NLD) ၊ လွင်ႈဢမ်ႇၸႂ်ႈတႆးသေ ၶဝ်ႈၶႅင်ႇတီႈၼင်ႈ ၸၢဝ်းၶိူဝ်းတႆး ၼႂ်းတိူင်းတႃႈလိူဝ်ႇ ။


“ ပေႃႈမႄႈမၼ်းၵေႃႈဢမ်ႇၸႂ်ႈတႆး၊ ၶူၼ်ႉၶိုၼ်းပိုၼ်းပူႇယႃႈ ၶိင်းၼၢႆး မၼ်းၵေႃႈ ဢမ်ႇၸႂ်ႈတႆး၊ ဢဝ်ၸိုဝ်ႈတႆး မႃးသႂ်ႇပဵၼ် ၸၢႆးၵျေႃႇၸေႃးဝႆႉၵူၺ်း။ ၵွပ်ႈ ဢူးၵျေႃႇၸေႃးပဵၼ်ပႃႊတီႊ NLD လႄႈ သၢၼ်ၶတ်းဢမ်ႇၸႂ်ႈ ၊ ယွၼ်ႉဢမ်ႇၸႂ်ႈတႆး သမ်ႉမႃးဢဝ်သုၼ်ႇဝႅင်ႇၶွင်တႆး ။ လွင်ႈၼႆႉ ၵူဝ်မၼ်းပဵၼ်ပိုၼ်းၵႂႃႇမိူဝ်းၼႃႈ လႄႈ မိူဝ်းၼႃႈမႃးတေၸၢင်ႈယိူင်ႈၵၼ်ႁဵတ်းၵႂႃႇ ” - ၼႆ Dr.ၸၢႆးၼေႃႇၶိူဝ်း လၢတ်ႈ ။


ဢူးၵျေႃႇၸေႃးၼႆႉ ယွၼ်ႉဢမ်ႇၸႂ်ႈၸိူဝ်ႉၶိူဝ်းတႆး ၊ ဢမ်ႇမီးသုၼ်ႇလႆႈတွတ်ႈၶႅပ်းၵၢင်ၸႂ်ပၼ် ၵၢၼ်လိူၵ်ႈတင်ႈ ၽူႈတႅၼ်းၸၢဝ်းၶိူဝ်းတႆး၊ ၼႆႉသမ်ႉမႃးၶဝ်ႈၶႅင်ႇလိူၵ်ႈတင်ႈ တီႈၼင်ႈ ၽွင်းလူင်ၸၢဝ်းၶိူဝ်းတႆး၊ ၼႆႉပဵၼ် ၶေႃႈယူပ်ႈယွမ်း ပိူင်ငဝ်ႈပိုင်းမိူင်း (လၵ်းလိူင်း) 2008 ယဝ်ႉ - ဝႃႈၼႆ ။


ၸၢႆးလွႆၶမ်းပၢင်ႇ ၵူၼ်းဝဵင်းပၢင်ႇဢူ ၽူႈၵႂႃႇၵမ်ႉၸွႆႈလၢတ်ႈၸႃ ၼၼ်ႉလၢတ်ႈ - “ ၾၢႆႇ ပႃႊတီႊႁူဝ်သိူဝ်သေ တေပေႉဢမ်ႇပေႉၼၼ်ႉတႄႉ ပႆႇၸၢင်ႈလၢတ်ႈ ၊ တေလႆႈဢဝ် ၶၢဝ်းယၢမ်းယူႇ ၊ ၼႂ်းလိူၼ်ၼႃႈ ဝၼ်းတီႈ 4 တေလႆႈၵႂႃႇ ၶိုၼ်ႈလုမ်းထႅင်ႈၵမ်းၼိုင်ႈ ” - ဝႃႈၼႆ ။


ဢူးၵျေႃႇၸေႃး ၼႆႉ လႆႈၶႅပ်းၵၢင်ၸႂ် ၸၢဝ်းၶိူဝ်းတႆး ၼႂ်းတိူင်းတႃႈလိူဝ်ႇ ၼမ်လိူဝ် တွၵ်ႊတိူဝ်ႊၸၢႆးၼေႃႇၶိူဝ်း 2 ႁဵင်ပၢႆသေ ပေႉဝႆႉ ။ ဢူးၵျေႃႇၸေႃး ဝႃႈမၼ်းပဵၼ်တႆးၼႆသေ ၵိၼ်ႇၵႂၢမ်း တီႈၶွမ်ႊမသျႅၼ်ႊၵၢၼ်လိူၵ်ႈတင်ႈ မိူင်းႁူမ်ႈတုမ်ယဝ်ႉ ၶဝ်ႈၶႄႉၶႅင်ႇၵၢၼ်လိူၵ်ႈတင်ႈ ပၢင်လိူၵ်ႈတင်ႈ 2015 ။