မၢၵ်ႇတႅၵ်ႈ လႅၼ်လိၼ် မိူင်းတႆး - မိူင်းၶၢင် တင်းပွတ်းဝၢၼ်ႈလွႆႈၸႄႈ ၊ ပီႈၼွင်ႉၸၢဝ်းၶိူဝ်းၶႄႇ 2 ၵေႃႉ လႆႈဝၢတ်ႇၸဵပ်းႁၢဝ်ႉႁႅင်ႈ သူင်ႇယူတ်းယႃတူဝ် ၼႂ်းမိူင်းၶႄႇ ။

ဝၼ်းတီႈ 20/01/2016 ၶၢဝ်းယၢမ်း ၵၢင်ၶိုၼ်း 12.30 မူင်း မၢၵ်ႇတႅၵ်ႇ ၼႂ်းၵႄႈသဵၼ်ႈတၢင်း ဝၢၼ်ႈလွႆၸႄႈလႄႈ ဝၢၼ်ႈၵုင်းသႃႇ  ဢိူင်ႇလွႆၸႄႈ (8) ဝၢၼ်ႈ ၸႄႈမိူင်းၶၢင် မၢၵ်ႇတႅၵ်ႇတိူဝ်ႉ ၵူၼ်းၶိူဝ်းၶႄႇ 2 ၵေႃႉ ဢၼ်လုၵ်ႉတၢင်းဝၢၼ်ႈလွႆၸႄႈမႃး တေၵႂႃႇတၢင်းဝၢၼ်ႈၵုင်းသႃ ။


ၵူၼ်းၼႂ်းပိုၼ်ႉတီႈ ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈလၢတ်ႈဝႃႈ မၼ်းတေပဵၼ်မၢၵ်ႇသိုၵ်းၶၢင်ၶဝ်ႁၢင်ႈဝႆႉ ၸွမ်းၼႂ်းသူၼ် ၼႂ်းၼႃး ၼိူဝ်သဵၼ်ႈတၢင်း ၵႂႃႇဝၢၼ်ႈလွႆၸႄႈလႄႈ ဝၢၼ်ႈၵုင်းသႃ ။


သိုပ်ႇလၢတ်ႈထႅင်ႈ တၢင်းႁၢင်ဝၢၼ်ႈၵုင်းသႃလႄႈ ႁူဝ်ဝၢၼ်ႈၵုင်းသႃၼႆႉ တေမီးတပ်ႉၽႄသိုၵ်းၶၢင် မႃးပၵ်းသဝ်းဝႆႉ ဢဵၼ်ႁႅင်းတပ်ႉသိုၵ်းၶၢင် ဢၼ်ပၵ်းဝႆႉ ႁူဝ်ဝၢၼ်ႈလႄႈႁၢင်ဝၢၼ်ႈ တေမီး 7-8 ၵေႃႉ - ဝႃႈၼႆ ။


ၵူၼ်းၶိူဝ်းၶႄႇ 2 ၵေႃႉဢၼ်တိူဝ်ႉထုၵ်ႇမၢၵ်ႇတႅၵ်ႇၼႆႉ တေႃႇလဵဝ်ဢဝ်တူဝ်ၶဝ် ၵႂႃႇယူတ်းယႃ တၢင်းမိူင်းၶႄႇယဝ်ႉ ။ ၵူၼ်းၸၢႆးဢၼ်တိူဝ်ႉဝၢတ်ႇၸဵပ်းႁၢဝ်းႁႅင်းသမ်ႉ ဢႃယု လႆႈ 32 ပီ ၊ ၼၢင်းယိင်း ဢႃယု 36 ပီ ၼၼ်ႉတႄႉ  ဢမ်ႇပေႃးၸဵပ်းၼၵ်းၵႃႈႁိုဝ် ဝႃႈၼႆ ။


ၸၢဝ်းၶိူဝ်းၶႄႇ 2 ၵေႃႉၼႆႉ ဢမ်ႇၸႂ်ႈပဵၼ်ၵူၼ်း ၼႂ်းပိုၼ်ႉတီႈ ပဵၼ်ၶႅၵ်ႇ လုၵ်တင်ႇတီႈမႃး ။ တေႃႈလဵဝ် ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈလႄႈ တပ်ႉသိုၵ်းၶၢင် လူင်းပိုၼ်ႉတီႈ ၵူတ်ႇထတ်းတူၺ်း ႁင်းၽႂ်မၼ်းယူႇ ဝႃႈၼႆ ။