ပီ 2016 ၼႆႉ လုၵ်ႈႁဵၼ်းသင်ၶၸဝ်ႈ ၼႂ်းၸိုင်ႈတႆး ႁိမ်း 30 တူၼ် ဢၼ်တေၵႂႃႇၶိုၼ်ႈႁဵၼ်းၸၼ်ႉၸွမ် M.A,B.A တီႈၸၼ်ႉၸွမ် ၵေႊလၼီႊယ (University of Kelaniya) မိူင်းသီႇႁူဝ်ႇ ။

ၸၼ်ႉၸွမ် ၵေႊလၼီႊယ သီရိလင်းၵႃ (University of Kelaniya) မိူင်းသီႇႁူဝ် ဢၼ်တေတႄႇပိုတ်ႇ ၵၢၼ်ႁဵၼ်း / သွၼ် ၸၼ်ႉၶူး B.A ၼႂ်းဝၼ်းတီႈ 29/01/2016 ၊ ၸၼ်ႉၶူး M.A  ပဵၼ်ဝၼ်းတီႈ 13/02/2016 ။


ၸဝ်ႈၶူးပၺ်ၺႃၼၼ်တ ၵႅမ်ႁူဝ်ၼႃႈ လုၵ်ႈႁဵၼ်းသင်ၶတႆး မိူင်သီႇႁူဝ်လၢတ်ႈဝႃႈ တေႃႈလဵဝ် ၸၼ်ႉၸွမ် ၵေႊလၼီႊယ မိူင်းသီႇႁူဝ် ဢွၵ်ႇပိုၼ်ၽၢဝ်ႇ သၢႆမၢႆၸိုဝ်ႈသဵင်လုၵ်ႈႁဵၼ်းၸိူဝ်း ဢၼ်တေၶဝ်ႈႁဵၼ်းတီႈၸၼ်ႉၸွမ်ၼႆႉ တင်းမူတ်း မီး 30 တူၼ် ၊ သင်ၶၸဝ်ႈ 29 တူၼ် ၊ ၸဝ်ႈၶၢဝ် 1 ၸဝ်ႈ ဝႃႈၼႆ ။


ပီၼႆႉ တေလႆႈဝႃႈ သင်ၶတႆး ၸိူဝ်းၵႂႃႇႁဵၼ်းလိၵ်ႈတီႈမိူင်းသီႇႁူဝ် ၼမ်လိူဝ်ၵူႈပီ M.A  မီး (11) ၸဝ်ႈ ၊ B.A  (19) ၸဝ်ႈ ဝႃႈၼႆ ။


သင်ၶတႆး ၸိူဝ်းဢၼ်လုၵ်ႉမိူင်းတႆး တေၵႂႃႇသိုပ်ႇၶိုၼ်ႈႁူင်းႁဵၼ်း ၸၼ်ႉၸွမ် တီႈမိူင်းသီႇႁူဝ်ႇသမ်ႉ မိူၼ် လၢင်းၶိူဝ်း ၊ မိူင်းပၼ်ႇ ၊ လွႆလႅမ် ၊ ပၢင်လူင် ၊ ၵုၼ်ႁဵင် ၊ လၢႆးၶႃႈ ၊ မိူင်သူႈ ၊ သႅၼ်ဝီ ၊ လႃႈသဵဝ်ႈ ၊ တီႊပေႃႊ ၊ တၢင်ႉယၢၼ်း ၊ ၼွင်ၶဵဝ် ၊ ၵျႂၵ်ႉမႄး ၊ မိူင်းပႅင်း ပၢင်လွင်ႈ ။  ၼွၵ်ႈလိူဝ်သေၼၼ်ႉ ၸဝ်ႈသင်ၶတႆး ဢၼ်ယူႇတီႈ မိူင်းဢႃသမ်ႇ မိူင်းဢိၼ်ႊၻီႊယိူဝ်ႊ ၵေႃႈမီး ။


မိူဝ်ႈပီ 1991  ပႃရႃၵူႇၻွၵ်ႉတိူဝ်ႊသႃမိ ၶမ်းမၢႆ ထမ်မသႃမိ ၸဝ်ႈသင်ၶတႆး တူၼ်ဢၼ်ၽႅဝ်ၵႂႃႇသီႇႁူဝ်ႇ ႁဵၼ်းဢဝ် B.A, M.A ဝၢႆးမႃး ၶၢႆႉၵႂႃႇႁဵၼ်းလိၵ်ႈ မိူင်းဢိင်းလဵတ်ႈ ပဵၼ်သင်ၶၸဝ်ႈတႆး တူၼ်ႁႅၵ်ႈသုတ်း ဢၼ်လႆႈ(ၸုမ်ႈၶူးၻွၵ်းတိူဝ်ႊ) D.Phil တီႈၸၼ်ႉၸွမ် ဢွၵ်ႊၾိူတ်ႊသ် (Oxford) မိူင်းဢိင်းၵလဵတ်ႈ ၊ မၼ်းၸဝ်ႈပဵၼ်ၸဝ်ႈသိူဝ်ႇတၢင်း ၸီႉၼႄႁႂ်ႈသင်ၶၸဝ်ႈတႆး ၵႂႃႇႁဵၼ်းလိၵ်ႈၼွၵ်ႈမိူင်း ။