ဢိင်ၼိူဝ် ၾိင်ၾႃႉ (ဢုတု) ၶၢဝ်းတၢင်း သွင်သၢမ်ဝၼ်းၼႆႉ ၼႂ်းၸိုင်ႈတႆး တၢင်းပွတ်းဢွၵ်ႇၶူင်း ၾူၼ်မၢၵ်ႇႁႅပ်းတူၵ်း ၵတ်းႁႅင်းမႃးလိူဝ်ၵဝ်ႇ ၵၢၼ်ၵႃႉၶၢႆ ဢမ်ႇပဵၼ် ။

ဝၼ်းတီႈ 24/01/2016 ၸိုင်ႈတႆးပွတ်းဢွၵ်ႇၶူင်း ၼႂ်းၸႄႈဝဵင်းၵဵင်းတုင် ၾူၼ်မၢၵ်ႇႁဵပ်းတူၵ်းႁႅင်း ႁဵတ်းႁႂ်ႈၵူၼ်းသိုဝ်ႉၸၢႆႇၶၢႆၶွင် ၼႂ်းၵၢတ်ႇၵဵင်းတုင် ၵမ်ႈၼမ် ဢွၼ်ၵၼ်ဢိုတ်းႁၢၼ်ႉၶၢႆၶူဝ်း ဢမ်ႇမီးၵူၼ်းၶဝ်ႈၵၢတ်ႇၼမ် ။


ၸၢႆးၶမ်းၵႅဝ်ႈ ၵူၼ်းဝဵင်းၵဵင်းတုင် လၢတ်ႈဝႃႈ  ဝၼ်းတီႈ 25 ၼႆႉ ၾူၼ်တူၵ်းတင်းဝၼ်းဢမ်ႇထၢတ်ႇ ဢမ်ႇၵိုတ်းသေၵမ်း ၵတ်းၵေႃႈၵတ်းႁႅင်း မိူဝ်ႈလဵဝ်တင်းၵတ်းလိူဝ် 6  ၻီႊၷရီႊသဵလ်ႊသျဵသ်ႊ (degrees Celsius။) ၵူၺ်း ။  ထႅင်ႈပိူင်ၼိုင်ႈၵေႃႈ ၼႂ်းၵဵင်းတုင် ဝၼ်းမိူဝ်ႈၼႆႉ ၵၢတ်ႇပေႃး ဢမ်ႇမီးၽႂ်ၶဝ်ႈသိုဝ်ႉၸၢႆႇၶူဝ်းၵုၼ်ႇသင်  ၸဝ်ႈၶွင်ႁၢၼ်ႉၵေႃႈ ဢမ်ႇပိုတ်ႇႁၢၼ်ႉၵမ်ႈၼမ် ယွၼ်ႉၵတ်းလိူဝ်ႁႅင်း ။


တၢင်းၵတ်းၼႆႉ ဢမ်ႇၸႂ်ႈၵတ်းမိူၼ်ၵူႈပွၵ်ႈ ၼႂ်းၶၢဝ်းတၢင်း သွင်ဝၼ်းၼႆႉ ၵတ်းၸီးႁႅင်းၶဝ်ႈၼႂ်းၼိူဝ်ႉ ၼႂ်းလုပ်ႇ ထိုင်ၸိၵ်းႁူဝ်ပေႃးၸဵပ်းၶိုၼ်ႈလူင်ဝႆႉ မွၵ်ႈၵုမ်ၵေႃႈသုမ်ႇမိုတ်ႈတိုပ်းၼႃ ၾူၼ်ၵေႃႈတူၵ်း ဢမ်ႇထၢၵ်ႇ လူမ်းၵေႃႈသမ်ႉထွင်းပႃးၸွမ်း ဝႃႈၼႆ ။


ၼွၵ်ႈလိူဝ်သေတီႈၵဵင်းတုင်ယဝ်ႉ ၼႂ်းဝၼ်းတီႈ 25/01/2016 ၶၢဝ်းယၢမ်း ၵၢင်ၼႂ် မွၵ်ႈ 7 မူင်းၼႆႉ ၾူၼ်မၢၵ်ႇႁႅပ်းတူၵ်းတၢင်းၸႄႈဝဵင်းမိူင်းသူႈ ၊ ပၢင်လူင်လႄႈ ပၢင်လွင်း ၸဵမ်ၸိူဝ်းၼႆႉ ႁၢဝ်ႈႁႅင်း ။


တၢင်းပွတ်းပၢင်လူင်ၼၼ်ႉ သူၼ်ၽၵ်းယိူဝ်ႈၼၢင်းၶဵဝ်ၸိူဝ်းၼႆႉ လူႉၵွႆၼမ် ၊ တၢင်းပွတ်းၸႄႈဝဵင်းမိူင်းသူႈ တီႈၵူၼ်းပၢႆႈၽေးသိုၵ်း ဢိၵ်ႇတင်းၸိူဝ်းယူႇတီႈႁၢႆးပႃၸိူဝ်းၼႆႉ ႁူပ်ႉတၢင်းယၢပ်ႇၽိုတ်ႇ တုၵ်ႉယၢၵ်ႈလိူဝ်ၸႂ်တႄႉတႄႉ ဝႃႈၼႆ ။