ၸဝ်ႈႁႆႈၸဝ်ႈၼႃး ၵူၼ်းၼႂ်းပိုၼ်ႉတီႈ ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ၊ ၶွၼ်ႈတုမ်ၵၼ် တေယွၼ်းဢဝ်ၶိုၼ်း တီႈလိၼ်ႁႆႈၼႃး တၢင်းၵႂၢင်ႈၼပ်ႉႁူဝ်ႁဵင်ဢေႊၶိူဝ်ႊ ဢၼ်ထုၵ်ႇ တပ်ႉသိုၵ်းမၢၼ်ႈလႄႈ ၸုမ်းပီႇတုၸိတ်ႉ ႁုပ်ႈယိုတ်းဝႆႉ ။

ၸဝ်ႈႁႆႈၸဝ်ႈၼႃးၶဝ် တီႈဝဵင်းမိူင်းၼၢႆး ၶွၼ်ႈတုမ်ၵၼ် / တီႈလိၼ် ဢၼ်ထုၵ်ႇႁုပ်ႈယိုတ်း ၼႂ်းၸႄႈဝဵင်းမိူင်းၼၢႆး

ပိူဝ်ႈတႃႇ တေယွၼ်းဢဝ်ၶိုၼ်းတီႈလိၼ် ဢၼ်ၸုမ်းပီႇတုၸိတ်ႉ SSS (သိုၵ်းၵူၼ်းမိူင်း) လႄႈ တပ်ႉသိုၵ်းမၢၼ်ႈၶလယ 248 ၶဝ် ႁုပ်ႈယိုတ်းဝႆႉ တီႈလိၼ်ႁႆႈၼႃးၵူၼ်းဝၢၼ်ႈၵူၼ်းမိူင်း ၊ ဢၼ်မီးၼႂ်း ၸႄႈဝဵင်းမိူင်းၼၢႆး မိူၼ်ၼင်ႇဝၢၼ်ႈထိူၼ်ႇမွၵ်ႇၸလီႇ (မႄႇသလီမႅင်ႇ) ၊ ဝၢၼ်ႈၸွမ်မွၼ်း ၊ ဝဵင်းမႂ်ႇလႄႈ တီႈလိၼ်ႁႆႈၼႃး ဢၼ်မီးတီႈတၢင်းၵဵင်းတွင်းၼၼ်ႉ မိူဝ်ႈဝၼ်းတီႈ 19/01/2016 ၼႆႉၸဝ်ႈႁႆႈၸဝ်ႈၼႃးၶဝ် တီႈဝဵင်းမိူင်းၼၢႆး ၶွၼ်ႈတုမ်ၵၼ် - ၼႆယဝ်ႉ ။


ၸဝ်ႈႁႆႈၸဝ်ႈၼႃး ၼႂ်းပိုၼ်ႉတီႈမိူင်းၼၢႆး ၸၢႆးလၢဝ်ၶမ်း လၢတ်ႈဝႃႈ - တီႈလိၼ်ႁႆႈၼႃးၵူၼ်းဝၢၼ်ႈၼႆႉ ထုၵ်ႇႁုပ်ႈယိုတ်းမိူဝ်ႈၼႂ်းပီ 2008 သေ ဢမ်ႇပၼ်ႁဝ်းႁဵတ်းၵိၼ်ယဝ်ႉ ။ လၢတ်ႈဝႃႈ ႁဝ်းသိုဝ်ႉဢဝ်တီႈလိၼ်ႁႆႈၼႃးသူ တီႈလူင်ပွင်ၸိုင်ႈယဝ်ႉ ။ ၵူၺ်းၵႃႈ လိၵ်ႈလၢႆးလၵ်းထၢၼ်ဢၼ်ဝႃႈ ၶဝ်သိုဝ်ႉဢဝ်ယဝ်ႉၼၼ်ႉ ၶဝ်ဢမ်ႇၼႄသင် ။ ၶဝ်တေဢဝ်လိၼ်ၸိူဝ်းၼႆႉ ၸတ်းႁဵတ်းလွၵ်းသေ တေၽုၵ်ႇၵိၼ်တွၼ်ႈတႃႇၶဝ်ယဝ်ႉ - ဝႃႈၼႆ ။


ၼေႃႇၽွင်းတႅၼ်း သၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 မိူင်းၼၢႆး ၊ ၸၢႆးမဵဝ်းမိၼ်ႉ လၢတ်ႈဝႃႈ -  ၸဝ်ႈႁႆႈၸဝ်ႈၼႃး ဢၼ်ထုၵ်ႇႁုပ်ႈယိုတ်းတီႈလိၼ်ဝႆႉၼႆႉ မီးမွၵ်ႈ 500 ပၢႆ ။ မိူဝ်ႈလဵဝ် ပဵၼ်ၽွင်းတိုၵ်ႉလူင်းၵဵပ်းၶေႃႈမုလ်းယူႇ ၊ ပေႃးထိုင်မႃးလူင်ပွင်ၸိုင်ႈမႂ်ႇၼႆ တေတၢင်ႇလၢတ်ႈယွၼ်းတီႈလိၼ် ႁႆႈ ၼႃး ၶွင်ၸဝ်ႈႁႆႈၸဝ်ႈၼႃး ဢၼ်ထုၵ်ႇႁုပ်ႈယိုတ်း 500 ပၢႆၼႆႉယူႇ ။ တၢင်းၵႂၢင်ႈတီႈလိၼ် မီးမွၵ်ႈ 5,000 ဢေႊၶိူဝ်ႊပၢႆ ၊ ဢမ်ႇၼၼ် ၼမ်လိူဝ်သေႁႃႈႁဵင်ၵေႃႈပဵၼ်လႆႈ ။ သၢႆမၢႆဢၼ်တတ်ႈၼႅတ်ႈတႄႉ ပႆႇလႆႈႁူႉ ။ ၸွမ်းၼင်ႇဢၼ်ႁဝ်းလႆႈႁူႉတႄႉ ပဵၼ်ၸုမ်းပီႇတုၸိတ်ႉ ဢၼ်ႁွင်ႉဝႃႈသိုၵ်းၵူၼ်းမိူင်း SSS မႃးယိုတ်းၵႂႃႇ - ဝႃႈၼႆ ။


မိူဝ်ႈၼႂ်းလိူၼ်မေႊ ပီ 2015 ပူၼ်ႉမႃး ၊ ပႃႈၼွႆႇ ၵူၼ်းဝၢၼ်ႈၸွမ်မွၼ်းၵေႃႈ လႆႈထုၵ်ႇယိုတ်းတီႈလိၼ် 3 လွၵ်း ။


ၸဝ်ႈၵွၼ်းဝတ်ႉမိူင်းၼၢႆး ဝတ်ႉ (ၵျွင်း) ဝိၸ်ႉၸႃႇယေႇ မွၵ်ႇလၢတ်ႈပၼ်ၶေႃႈပွၼ်ႈသွၼ် တီႈၵူၼ်းမိူင်းၶဝ်ဝႃႈ - ၵူၼ်းၶိူဝ်းဢၼ်ယူႇ တီႈၼႂ်းၵုၼ်ဢေႊသျိူဝ်ႊၼႆႉ ၵိၼ်ၶဝ်ႈ ။ ၶဝ်ႈလႄႈၽၵ်းၼႆႉ လုၵ်ႈတီႈၸဝ်ႈႁႆႈၸဝ်ႈၼႃးမႃး ။ လႆႈငိၼ်းပိူၼ်ႈယိုတ်းတီႈလိၼ်ႁႆႈၼႃးၸိူင်ႉၼႆၼႆႉ ႁဵတ်းႁႂ်ႈၸဝ်ႈႁႆႈၸဝ်ႈၼႃးၶဝ် ထူပ်းတၢင်းယၢပ်ႇၽိုတ်ႇလႄႈ ပဵၼ်ၸႂ်ဢမ်ႇလီၸွမ်းလႄႈ လီဢီးလူၸဝ်ႈႁႆႈၸဝ်ႈၼႃးၶဝ်တႄႉတႄႉ ။ ၸဝ်ႈႁႆႈၸဝ်ႈၼႃးၶဝ်ၼႆႉ မီးၵုၼ်းမုၼ်ၼိူဝ်ၵူၼ်းဝၢၼ်ႈၵူၼ်းမိူင်းၵူၺ်းပႆႇပေႃး ၊ မီးၵုၼ်းမုၼ်တေႃႇပႃး သင်ၶၸဝ်ႈၶဝ်ၵွၼ်ႇ ။ ၵွပ်ႈၼႆ  ၶႂ်ႈႁႂ်ႈပၼ်ၶိုၼ်းတီႈလိၼ် ႁႂ်ႈၸဝ်ႈႁႆႈၸဝ်ႈၼႃးၶဝ် လႆႈႁဵတ်းၵိၼ်လွတ်ႈလွတ်ႈလႅဝ်းလႅဝ်း ၊ ဢမ်ႇၶႂ်ႈႁႂ်ႈၵူၼ်းယိုတ်းတီႈလိၼ်ၶဝ် မႃးၶီႇၼဵၵ်းတဵၵ်းတဵင်ၼိူဝ် ၵူၼ်းၽုၵ်ႇသွမ်ႈ ဢၼ်ပဵၼ်ၸဝ်ႈႁႆႈၸဝ်ႈၼႃးၶဝ် - ဝႃႈၼႆ ။


တီႈၼႂ်းၸႄႈဝဵင်းမိူင်းၼၢႆးၼႆႉ ၵၢၼ်ႁဵတ်းၵိၼ်ႁႃလဵင်ႉတွင်ႉၵူၼ်းမိူင်း  ပဵၼ်ၵၢၼ်ၽုၵ်ႇသွမ်ႈပဵၼ်ပိူင်လူင်။ ဝဵင်းႁိမ်းႁွမ်းမိူင်းၼၢႆး လၢႆလၢႆဝဵင်းၵေႃႈ လႆႈပိုင်ႈဢိင်ၵၢၼ်ၽုၵ်ႇသွမ်ႈ ၼႂ်းၸႄႈဝဵင်းမိူင်းၼၢႆးဝႆႉ ။ ၵႃႈပူၼ်ႉမႃး မီးၸုမ်းသိုၵ်းမၢၼ်ႈလႄႈ ၸုမ်းပီႇတုၸိတ်ႉၶဝ် ႁုပ်ႈယိုတ်းဝႆႉတီႈလိၼ်ႁႆႈၼႃးၵူၼ်းမိူင်း ၊ ပႃႊတီႊၵၢၼ်မိူင်းၶဝ်ၵေႃႈ တိုၵ်ႉၵဵပ်းၶေႃႈမုလ်းလွင်ႈၼႆႉယူႇ - ၼႆယဝ်ႉ ။