ဝၼ်းတီႈ 07/02/2016 ပဵၼ်ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇတဵမ် 69 ပီ ၸုမ်းၸၢဝ်းၶိူဝ်းတႆး သၢႆၵဵင်းမႆႇ မိူင်းၵွၵ်ႇလႄႈ ရယွင်း တေဢွၼ်ဢဝ် ပီႈၼွင်ႉႁႅင်းၵၢၼ်တႆး ၼႂ်းၸိုင်ႈထႆး ၵႂႃႇၶဝ်ႈႁူမ်ႈ ပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး တီႈငဝ်ႈငုၼ်း လွႆတႆးလႅင်း ။

ၸၢႆးၶိတ်ႉ ၵႅမ်ႁူဝ်ပဝ်ႈ ၸုမ်းၸၢဝ်းၶိူဝ်းတႆး သၢႆၵဵင်းမႆႇ လၢတ်ႈဝႃႈ တေႃႈလဵဝ်ၸုမ်းႁဝ်းၶႃႈ လႆႈၵဵပ်းသၢႆမၢႆၸိုဝ်ႈ ပီႈၼွင်ႉႁႅင်းၵၢၼ်တႆး ဝႆႉ 200 ပၢႆယဝ်ႉ ။ မိူဝ်ႈၽုၵ်ႈတႄႉ တေလႆႈႁူႉသၢႆမၢႆၸိုဝ်ႈ ၵူၼ်းတေၶိုၼ်ႈလွႆတႆးလႅင်း ၼႄႉၼွၼ်းဝႃႈ တေမီးၵူၼ်းၶိုၼ်ႈ ၵႃႈႁိုဝ် ရူတ်ႉလၢႆလမ်း တေၵႂႃႇဝၼ်းတီႈ 6 ၵၢင်ၼႂ် ဝၼ်းတီႈ 8 ပွၵ်ႈၶိုၼ်း  ဝႃႈၼႆ ။


ၼၢင်းမႂ်ႇ ၽူႈၵပ်းသၢၼ် ၸုမ်းၸၢဝ်းၶိူဝ်းတႆး သၢႆမိူင်ၵွၵ်ႇ (ၵုင်းထဵပ်ႈ) လၢတ်ႈဝႃႈ တေႃႈလဵဝ် သဵၼ်ႈသၢႆမၢႆ ႁူဝ်ၵူၼ်းဢၼ်တေၵႂႃႇၶဝ်ႈႁူမ်ႈ ဝၼ်းၸိူဝ်ႉၸၢတ်ႈၸိုင်းတႆး လွႆတႆးလႅင်းၼႆႉ ပႆႇၼႄႉၼွၼ်းလီ ပေႃးဝၼ်းတီႈ 1 လိူၼ်ၾႅပ်ႉပိဝ်ႊရီႊတႄႉ တေၼႄႉၼွၼ်းယဝ်ႉ ဢၼ်လႆႈႁူႉသဵၼ်ႈသၢႆမၢႆရူတ်ႉ တေၵႂႃႇမီး မွၵ်ႈ 8 လမ်း  တေပႃးၶူဝ်းၶွင် ဢၼ်တေၵႂႃႇၸႅၵ်ႇပၼ် လုၵ်ႈႁဵၼ်းလႄႈ ၵူၼ်းသိုၵ်း ဝႃႈၼႆ ။


ၸၢႆးလႅင်းပၢင်ႇ ႁူဝ်ပဝ်ႈၸုမ်းၸၢဝ်းၶိူဝ်းတႆး သၢႆရယွင်း ၵေႃႈလၢတ်ႈဝႃႈ တီႈရယွင်း ႁၢင်ႈႁႅၼ်းရူတ်ႉ တေႃႉၶူဝ်းၶွင် တႃႇၶိုၼ်ႈလွႆတႆးလႅင်း ၼင်ႇၵဝ်ႇ ဝႃႈၼႆ ။


ၸုမ်းၸၢဝ်းၶိူဝ်းတႆး လႆႈဢွၼ်ပီႈၼွင်ႉႁႅင်းၵၢၼ် ၼႂ်းၸိုင်ႈထႆးလႄႈ မိူင်းတႆး ၵႂႃႇၶဝ်ႈႁူမ်ႈ ပွႆးဝၼ်းၸိူဝ်ႉၸၢတ်ႈၸိုင်ႈတႆး ၵူႈပီ ။


ၸုမ်းၸၢဝ်းၶိူဝ်းတႆး သၢႆရယွင်း ၊ မိူင်းၵွၵ်ႇ (ၵုင်းထဵပ်ႈ) လႄႈၵဵင်းမႆႇ တေၶွၼ်ႈတုမ်သေ ၵႂႃႇၸွမ်းၵၼ် သဵင်ႈသဵင်ႈဝႃႈၼႆ ။