ၸဝ်ႈၼႃႈတီႈၾၢႆႇၵူတ်ႇထတ်းၵူၼ်းၶဝ်ႈမိူင်း ၾၢႆႇသိုၵ်း ၊ ၾၢႆႇပလိၵ်ႈ ၊ ႁူမ်ႈၵၼ် ၵူတ်ႇထတ်းတိၺွပ်းႁႅင်းၵၢၼ်ႁိမ်း 20 ၵေႃႉ ၵူၼ်းၸိူဝ်း ဢမ်ႇမီးဝႂ်ၵပ်းတူဝ်သေ လၵ်ႉယူႇသဝ်းၼႂ်းၵဵင်းမႆႇ ၸဵမ်ၵူၼ်းမီးဝတ်းသမ်ႉႁဵတ်းၵၢၼ်ၽိတ်းတီႈပေႃႈလဵင်ႉ ဢမ်ႇၸႂ်ႈၵေႃႉလဵဝ်ၵၼ်ၸိူဝ်းၼႆႉ ။

ဝၼ်းတီႈ 13/01/2016 ၾၢႆႇၵူတ်ႇထတ်းၵူၼ်းၶဝ်ႈမိူင်း ၵဵင်းမႆႇ ၊ ပလိၵ်ႈ ၽၢၵ်ႈ 5 မိူင်းထႆးတွၼ်ႈၼိူဝ် ၊ သိုၵ်း ၊ ႁွင်ႈၵၢၼ်ၾၢႆႇႁႅင်းၵၢၼ်ၵဵင်းမႆႇ ႁူမ်ႈၵၼ်သေၶဝ်ႈ ၵူတ်ႇထတ်းႁူင်းၵၢၼ် ၵေႃႇသၢင်ႈ တီႈဢိူင်ႇၼွင်ႇပႃႇၶင်ႉ ၸႄႈတွၼ်ႈၵဵင်းမႆႇ တီႉၺွပ်းလႆႈႁႅင်းၵၢၼ်ၽိတ်းမၢႆ မီႈ 6 ၵေႃႉသူင်ႇၵႂႃႇထဵတ်ႈထၢမ် ပၼ်တူတ်ႈတၢမ်ႇ တီႈႁူင်းပလိၵ်ႈ မႄႈပိင်း ဝဵင်းၵဵင်းမႆႇ လၢတ်ႈတီႈ ၶၢဝ်ႇ ASTV ၼင်ႇၼႆ ။


သိုပ်ႇၼၼ်ႉ လႆႈၶဝ်ႈၵူတ်ႇထတ်းၼႂ်းႁူင်းငၢၼ်း ႁူင်းႁဵတ်းၼိူဝ်ႉသတ်း တီႈ ဢိူင်ႇၼွင်ၶႂၢႆး ၸႄႈဝဵင်း ႁၢင်လူင် ဢၼ်မီးၵူၼ်းႁဵတ်းၵၢၼ် 300 ၵေႃႉ မီးႁႅင်း ၵၢၼ်ယၢၼ်မိူင်းမွၵ်ႈ 30 ၵေႃႉ ဢၼ်ႁဵတ်းၵၢၼ်ၽိတ်းတီႈမီး 5 ၵေႃႉ ။


လိူဝ်ၼၼ်ႉ တီႈႁူင်းၵေႃႇသၢင်ႈ ဢၼ်မီးၼႂ်းပိုၼ်ႉတီႈ ဢိူင်ၿၢၼ်ႉဝႅၼ် ၸႄႈဝဵင်း ႁၢင်လူင်း ၵေႃႈ တီႈၺွပ်းလႆႈထႅင်ႈ ႁႅင်းၵၢၼ် 8 ၵေႃႉယွၼ်ႉႁဵတ်းၵၢၼ်ၽိတ်းတီႈ။ ဝၢႆးၼၼ်ႉၸဝ်ႈၼႃႈတီႈႁွင်ႉဢဝ်တူဝ်ပေႃႈလဵင်ႉ (ၼၢႆးၸၢင်ႈ) လႄႈႁႅင်းၵၢၼ်သူင်ႇ ၵႂႃႇထဵတ်ႈထၢမ် လႄႈ ပၼ်တၢမ်ႇတီႈလုမ်းၾၢႆႇၵူတ်ႇထတ်းၵူၼ်းၶဝ်ႈမိူင်းယဝ်ႉ ဝႃႈၼႆ ။


ၸဝ်ႈၼႃႈတီႈ ၾၢႆႇၵူတ်ႇထတ်းၵူၼ်းၶဝ်ႈမိူင်း ၵဵင်းမႆႇ လၢတ်ႈဝႃႈ - “ တေႁူမ်ႈၵၼ် တင်ႈၸဝ်ႈၼႃႈတီႈလၢႆၾၢႆႇသေဢွၵ်ႇၵူတ်ႇထတ်းၸွမ်းပိုၼ်ႉတီႈၵေႃႇသၢင်ႈ၊ ႁူင်းငၢၼ်း (ၵၢၼ်) တူဝ်ႈမိူင်းၵဵင်းမႆႇသိုပ်ႇၵႂႃႇ ပိူဝ်ႈႁႄႉၵင်ႈဢမ်ႇႁႂ်ႈ ႁႅင်းၵၢၼ်ႁဵတ်း ၽိတ်းမၢႆမီႈ ” ဝႃႈၼႆ ။


ပၵ်းပိူင်မၢႆမီႈ ၼႂ်းမိူင်းထႆးၼႆႉသင်ပေႃႈလဵင်ႉ (ၼၢႆးၸၢင်ႈ) ႁပ်ႉၵူၼ်းႁဵတ်းၵၢၼ် ၽိတ်းမၢႆမီႈၸိုင်ႈ ၸွမ်းၼင်ႇမၢႆ (မၢတ်ႈတႃ 27) ဝႃႈတၵ်ႉၺႃးမႂ်ငိုၼ်း 10,000 – 100,000 ၿၢတ်ႇ တေႃႇႁႅင်းၵၢၼ်ၼိုင်ႈၵေႃႉ ။


တူတ်ႈတၢမ်ႇပုၼ်ႈတႃႇ လုၵ်ႈလဵင်ႉ (လုၵ်ႈၸၢင်ႈ) ဢမ်ႇမီးဝႂ်ၵပ်းတူဝ် (ဢၼုၺၢတ်ႈ) သေႁဵတ်းၵၢၼ်ၸိုင် ၸၢင်ႈတူၵ်းၶွၵ်ႈ 5 ပီတူတ်ႈငိုၼ်း 2,000 – 100,000 ၿၢတ်ႇ၊ ႁဵတ်းၵၢၼ်ၽိတ်းၼၢႆးၸၢင်ႈ ၊ ၽိတ်းတီႈ ၵေႃႈၸၢင်ႈၺႃးတူတ်ႈတၢမ်ႇမႂ်ငိုၼ်း 20,000 ၿၢတ်ႇ ။ ဢမ်ႇဢဝ်ဝတ်းဝႂ်ဝႆႉၵိုၵ်းတူဝ် ၼႄပၼ်ၸဝ်ႈၼႃႈတီႈလႆႈ မိူဝ်ႈၽွင်း ၺႃးၵူတ်ႇ ထတ်းၼၼ်ႉၵေႃႈတေၺႃးမႂ် ငိုၼ်း 10,000 ၿၢတ်ႇဝႃႈၼႆ ။


http://www.sueissaraloei.com/index.php?lay=show&ac=article&Id=539658902&Ntype=69