တႄႇဢဝ်ႁူဝ်ပီ 2016 မႃးၼႆႉ လွင်ႈၵႃႉၶၢႆၸွမ်းလႅၼ်လိၼ် ထႆး - မၢၼ်ႈ ၶိုၵ်ႉတွၼ်းမႃးလိူဝ်ၵဝ်ႇ ၊ ၽူႈၵွၼ်းႁွင်ႈၵၢၼ်ၵူတ်ႇထတ်းၵုၼ်ႇသိၼ်ၵႃႉ လၢၼ်ႇမႄႈသၢႆ လၢတ်ႈ ။

ၼၢင်းသီႊရီႊၽၼ်ႊ ဝိသုထိၽွၼ်ႊၽူလ် ၽူႈၵွၼ်းႁွင်ႈၵၢၼ်ၵူတ်ႇထတ်းၵုၼ်ႇသိၼ်ၵႃႉ လၢၼ်ႇမႄႈသၢႆ လၢတ်ႈဝႃႈ - လွင်ႈၵႃႉၶၢႆၸွမ်းလႅၼ်လိၼ်ၶိုၼ်ႈယႂ်ႇၶိုၵ်ႉတွၼ်းမႃးလိူဝ်ၵဝ်ႇ ။ ၼႂ်းပီၼႆႉ လွင်ႈၵႃႉၶၢႆတေတိူဝ်းတွၼ်းမႃး မွၵ်ႈ 50 % ၼႆယဝ်ႉ ။


လၢၼ်ႇလႅၼ်လိၼ်ထႆး - မၢၼ်ႈ ၼႆႉ ၾင်ႇထႆး တိတ်းၸပ်းၸႄႈဝဵင်းမႄႈသၢႆ ၸႄႈတွၼ်ႈၵဵင်းႁၢႆး လႄႈ ၾင်ႇမၢၼ်ႈ တိတ်းၸပ်း ၸႄႈဝဵင်းတႃႈၶီႈလဵၵ်း ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ။


လၢၼ်ႇလႅၼ်လိၼ်မႄႈသၢႆ - တႃႈၶီႈလဵၵ်းၼႆႉ ပိုတ်ႇမႃးမီးၶၢဝ်းတၢင်း 40 ပီပၢႆယဝ်ႉ ၊ ၵူၼ်းမိူင်းတၢင်းသွင်ၾၢႆႇၵႂႃႇမႃး ဢႅဝ်ႇလၢဝ်းၵၼ်တႃႇသေႇ ။ ယွၼ်ႉၼၼ် လွင်ႈၵႃႉၶၢႆတႃႇႁပ်ႉတွၼ်ႈ AEC (တူင်ႇဝူင်းၵၢၼ်ၵႃႉဢႃႊသျႅၼ်ႊ) ၼႆၵေႃႈ တေတိူဝ်းတွၼ်းမႃးလိူဝ်ၵဝ်ႇ - ၼၢင်းၽၢႆႊမၢသ်ႉ ၽူႈၵွၼ်းႁွင်ႈၵၢၼ်ၵႃႉၶၢႆ ၸႄႈဝဵင်းမႄႈသၢႆ လၢတ်ႈ ။


လွင်ႈႁၢင်ႈႁႅၼ်းၾၢႆႇထႆးၼႆႉ တေလႆႈဝႃႈၶႂ်ႈၶႅမ်ႉလႅပ်ႈၵူႈၾၢႆႇယဝ်ႉ ၊ ၵူၺ်းၵႃႈတင်းၾင်ႇမိူင်းမၢၼ်ႈသမ်ႉ ယွၼ်ႉပိူဝ်ႈမိူဝ်ႈလဵဝ်တိုၵ်ႉမီးၵၢၼ်လိူၵ်ႈတင်ႈယဝ်ႉၵူၺ်းလႄႈ လွင်ႈၸတ်းတင်ႈလူင်ပွင်ၸိုင်ႈမႂ်ႇၵေႃႈပႆႇယဝ်ႉတူဝ်ႈ ပႆႇၶဝ်ႈတီႈၶဝ်ႈတၢင်းၼႆလႄႈလွင်ႈႁၢင်ႈႁႅၼ်းယင်းတိုၵ်ႉဢေႇ ၊ ထုၵ်ႇလႆႈႁၢင်ႈႁႅၼ်းထႅင်ႈတင်းၼမ် ။