ဝၼ်းတီႈ 01-05/01/2016 ပၢင်ပွႆးဝၼ်းၵိူတ်ႇ ၸဝ်ႈၶူးၿႃးဝုၼ်းၸုမ်ႉ ဢႃယုၸဝ်ႈၶွပ်ႈတဵမ် 53 ပီ ဢၼ်ၸတ်းႁဵတ်းတီႈ ဝတ်ႉၻွၼ်းႁိူင်း ဢိူင်ႇမိူင်းၽူင်း (ၵ) ၸႄႈဝဵင်းတႃႈၶီႈလဵၵ်း ၸိုင်ႈပွတ်းဢွၵ်ႇၶူင်းၼၼ်ႉ ပီႈၼွင်ႉၵူၼ်းမိူင်းၸိူဝ်းမႃးဝၢႆႈသႃ ၶဝ်ႈႁူမ်ႈပွႆးဝၼ်းၵိူတ်ႇၸဝ်ႈၶူးဝႃး ပီၼႆႉ တေလႆႈဝႃႈ ယွမ်းလူင်းဢေႇမၢင်လိူဝ် မိူဝ်ႈပီၵႆ ။

ၸၢႆးၼုမ်ႇတုၺ်ႈ ၵႅမ်ႁူဝ်ပဝ်ႈ ပႃႊတီႊႁူဝ်သိူဝ် ဝဵင်းတႃႈၶီႈလဵၵ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ ပီၼႆႉ ပွႆးဝၼ်းၵိူတ်ႇၸဝ်ႈႁဝ်း တေလႆႈဝႃႈ ဢေႇလူင်းတႄႉတႄႉ ယွၼ်ႉဝႃႈ မိူဝ်ႈၵူႈပီၼႆႉ ရူတ်ႉၵႃး ဢမ်ႇပၼ်ၶဝ်ႈတီႈၼႂ်းဝၢင်းဝတ်ႉၻွၼ်းႁိူင်း၊ ၸႂ်ႉၵႂႃႇၵိုတ်းဝႆႉတၢင်းၼွၵ်ႈဝၢင်းဝတ်ႉ၊ ပီၼႆႉ ရူတ်ႉၵႃး ဢၼ်မႃးပွႆးဝၼ်းၵိူတ်ႇၸဝ်ႈႁဝ်း ၶဝ်ႈၵႂႃႇၼႂ်းဝၢင်းဝတ်ႉၻွၼ်းႁိူင်းသေ ၵိုတ်ႉဝႆႉၼႂ်းဝၢင်းဝတ်ႉၵေႃႈလႆႈ ဢမ်ႇပေႃးမီးရူတ်ႉၵႃးၼမ် - ဝႃႈၼႆ ။


ထႅင်ႈပိူင်ၼိုင်ႈၵေႃႈ တၢင်းၸႄႈဝဵင်းတႃႈၶီႈလဵၵ်းၼႆႉ ပလိၵ်ႈၾၢႆႇၵူတ်ႇထတ်း ရူတ်ႉ ၼႂ်းဝဵင်းတႃႈလဵၵ်ႈသမ်ႉ ၵူတ်ႇထတ်းရူတ်ႉ တင်ႈတႄႇၼႂ်းလိူၼ်ၵျႅၼ်ႊၼိဝ်ႊရီႊ ဝၼ်းတီႈ 2 ပီ 2016 ၵႂႃႇၼႆ ၊ ၵူၼ်းၸိူဝ်းဢၼ်မီးရူတ်ႉ ဢမ်ႇမီး (ဝႂ်) လၢႆႊသိၼ်ႊရူတ်ႉ ၸိူဝ်းၼၼ်ႉ ၽႂ်ဢမ်ႇႁတ်းႁေႃႈရူတ်ႉၵႂႃႇမႃး  - ဝႃႈၼႆ ။


ၸၢႆးၽူင်း ၽူႈၶၢႆၶူဝ်းၶွင်းၼႂ်းပွႆး လၢတ်ႈဝႃႈ ပီၼႆႉ ဢမ်ႇပေႃးၶႂ်ႈၶႅမ်ႉ လွင်ႈၶၢႆၶူဝ်း ယွၼ်ႉဝႃႈ ပီၼႆႉ ၼႂ်းမိူင်းႁဝ်းမၼ်းသုၵ်းသၵ်ႉ ။ မိူဝ်ႈၵူႈပီပူၼ်ႉမႃးတႄႉ ပေႃးဝၼ်းၵိူတ်ႇ ၸဝ်ႈၶူးဝႃးဝုၼ်းၸုမ်ႉ တႄႇ ဝၼ်းတီႈ 01 ၼႆၵေႃႈ ပီႈၼွင်ႉၵူၼ်းမိူင်းမႃးႁွတ်ႈတဵမ်ဝႆႉ ၼႂ်းဝၼ်းတီႈ 28-29 လိူၼ် 12 ယဝ်ႉ ။ ပီၼႆႉ ၼႂ်းဝၼ်းတီႈ 28-29 ပႆႇမီးၵူၼ်းမႃး ၊ တေႃႈၼင်ႇ ၼႂ်းဝၼ်းတီႈ 01-02/01/2016 ၵူၼ်းယင်းပႆႇမႃးၼမ် ဝႃႈၼႆ ။


သိုပ်ႇလၢတ်ႈထႅင်ႈဝႃႈ ၼႂ်းပီၼႆႉလွင်ႈၶၢႆၶူဝ်းၵေႃႈ တေလႆႈဝႃႈ ဢမ်ႇပေႃးလႆႈၶၢႆလီ ၊ ၵူၼ်းၶၢႆၶူဝ်းလၢႆၸဝ်ႈ ၽႂ်ၽႂ်ၵေႃႈဝႃႈ ပီၼႆႉ ဢမ်ႇပေႃးလႆႈၶၢႆလီ - ဝႃႈၼႆ ။ ပွႆးဝၼ်းၵိူတ်ႇၸဝ်ႈၶူးၿႃးဝုၼ်းၸုမ်ႉၼႆႉ ၸဵမ်သင်ၶၸဝ်ႈ ပီႈၼွင်ႉၼႂ်းမိူင်း / ၼွၵ်ႈမိူင်း မႃးၶဝ်ႈႁူမ်ႈဝၢႆႈသႃၵေႃႈဢေႇ ။


ၾၢႆႇၼိုင်ႈၵေႃႈ ၼႂ်းၸိုင်ႈတႆး ပွတ်းႁွင်ႇ ၊ ပွတ်းၵၢင် မီးလွင်ႈသုၵ်းသၵ်ႉ ပဵၼ်ပၢင်တိုၵ်းၵၼ်ယူႇလႄႈ ၵူၼ်းမိူင်းပွတ်းၼၼ်ႉ ဢမ်ႇၽၢတ်ႇလႆႈႁိူၼ်းယေးၸဝ်ႈၵဝ်ႇ မၢင်ၸိူဝ်းတိုၵ်ႉမီးယူႇၼႂ်းၶႅမ်ႉၽူႈပၢႆႈၽေး ဢိၵ်ႇတင်း သင်ၶၸဝ်ႈၵေႃႈ ဢမ်ႇတၼ်း ဢမ်ႇႁတ်းမႃး ၶဝ်ႈႁူမ်ႈ ဝၢႆႈသႃ ၵေႃႈ မီးတင်းၼမ် ။


ပီ 2016 ၼႂ်းဝၼ်းၵိူတ်ႇၸဝ်ႈၶူးၿႃးဝုၼ်းၸုမ်ႉ ၶွပ်ႈၶူပ်ႇတဵမ် 53 ပီၼႆႉ ၸဝ်ႈၶူးဝုၼ်းၸုမ်ႉ ဢတိထၢၼ်ႇ တေဢမ်ႇလၢတ်ႈၵႂၢမ်း တႃႇ 24 ၸူဝ်းမူင်း ၼႆယဝ်ႉ ။