ၵူၼ်းဝၢၼ်ႈၵူၼ်းမိူင်း မိူင်းဝီးလႄႈ ႁူဝ်ပၢင်ႇ ႁူမ်ႈၵၼ်ၼပ်ႉႁူဝ်ပၢၵ်ႇ ၼႄၵၢင်ၸႂ် တီႈမိူင်းဝီး ၊ တုၵ်းယွၼ်းႁႂ်ႈ တပ်ႉသိုၵ်းတဢၢင်း TNLA ပွႆႇပၼ်ၵူၼ်းမိူင်း ၸိူဝ်းတီႉၺွပ်းဝႆႉ ႁူမ်ႈၵူၼ်းသိပ်းပၢႆ ။

မိူဝ်ႈဝၼ်းတီႈ 27/01/2016 ၵၢင်ၼႂ်ယၢမ်း 08:30 မူင်း ၊ ၵူၼ်းဝၢၼ်ႈၵူၼ်းမိူင်း မိူင်းဝီး လႄႈ ႁူဝ်ပၢင်ႇ (ၵူၼ်းဝၢၼ်ႈႁူဝ်ပၢင်ႇ 250 ပၢႆ ၸိူဝ်းပၢႆႈၽေး ၵႂႃႇယူႇသဝ်း ပိုင်ႈဢိင်ယူႇသဝ်းဝႆႉတီႈမိူင်းဝီး) ႁူမ်ႈၵၼ်ၵႂႃႇၼႄၵၢင်ၸႂ် ၼႃႈႁူင်းႁေႃ ၵေႃလိၵ်ႈလၢႆးလႄႈၾိင်ႈငႄႈတႆး မိူင်းဝီး ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။ တုၵ်းယွၼ်း ႁႂ်ႈတႅဝ်းႁူမ်ႈပူတ်းပွႆႇမိူင်းပလွင်ႈ / တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (PSLF/TNLA) ပွႆႇပၼ်ၵူၼ်းမိူင်း ၸိူဝ်းတီႉၺွပ်းဝႆႉ ႁူမ်ႈတင်းသဵင်ႈ သိပ်းၵေႃႉပၢႆ ။


ၵူၼ်းပိုၼ်ႉတီႈ မိူင်းဝီး လုင်းၸၢႆး လၢတ်ႈဝႃႈ - ၵူၼ်းဝၢၼ်ႈၵူၼ်းမိူင်း 12 ၵေႃႉ ဢၼ်ထုၵ်ႇတီႉၺွပ်းၵႂႃႇၼႆႉ ႁႂ်ႈပွႆႇပၼ်ၶိုၼ်း ၊ ယႃႇႁႂ်ႈမီးၽေးသင်။ ၽူႈယႂ်ႇၵူၼ်းလူင်ၶဝ် ဢၼ်ၵဵဝ်ႇၶွင်ႈတင်းသဵင်ႈၵေႃႈ ၶႂ်ႈႁႂ်ႈဝူၼ်ႉထိုင်ႁဝ်းသေ ပွႆႇပၼ်ၵူၼ်းၸိူဝ်းဢၼ် ထုၵ်ႇတီႉၺွပ်းၸိူဝ်းၼၼ်ႉ ။ ၵွပ်ႈၼႆလႄႈ ဢၼ်ပဵၼ်ပီႈၼွင်ႉ ၵူၼ်းၸိူဝ်းထုၵ်ႇတီႉၺွပ်းၵႂႃႇၼၼ်ႉ ၸင်ႇလႆႈမႃးၼႄၵၢင်ၸႂ် - ဝႃႈၼႆ ။


ၵူၼ်းဝၢၼ်ႈႁူဝ်ပၢင်ႇ ၼၢင်းၶမ်း လၢတ်ႈဝႃႈ - ၶဝ်တီႉၺွပ်းၵႂႃႇၼွင်ႉၸၢႆးၶႃႈ ၊ ႁဝ်းဢမ်ႇႁူႉဝႃႈတေၵႂႃႇႁႃတီႈလႂ် ၊ တၢႆႁိုဝ်လိပ်းႁိုဝ်ၵေႃႈဢမ်ႇႁူႉ ။ ၵူၼ်းဝၢၼ်ႈႁူဝ်ပၢင်ႇ 9 ၵေႃႉလႄႈ ၵူၼ်းဝၢၼ်ႈမိူင်းဝီး 3 ၵေႃႉ ႁူမ်ႈၵၼ် 12 ၵေႃႉၼႆႉ ထုၵ်ႇသိုၵ်းတဢၢင်း (TNLA) တီႉၺွပ်းၵႂႃႇမိူဝ်ႈဝၼ်းတီႈ 27/11/2015 ၼၼ်ႉ ။ ၵူၼ်းမိူင်းၸိူဝ်းၼႆႉ ၵမ်ႈၽွင်ႈထုၵ်ႇတီႉမိူဝ်ႈၵႂႃႇၵၢတ်ႇ ၊ ၵမ်ႈၽွင်ႈထုၵ်ႇတီႈမိူဝ်ႈၵႂႃႇၸႂ်းပေႃႈမႄႈ ပီႈၼွင်ႉဢၼ်မီးတၢင်းၵႆ ။ ၵမ်ႈၽွင်ႈထုၵ်ႇတီႉၽွင်းတိုၵ်ႉၵႂႃႇယွၼ်းမေး တႃႇႁဵတ်းပၢင်ၵူပ်ႉၵူႈပဵၼ်ႁိူၼ်း - ဝႃႈၼႆ ။


ၵူၼ်းဝၢၼ်ႈၵူၼ်းမိူင်း ၸိူဝ်းထုၵ်ႇတီႉၺွပ်းဝႆႉသေ ပႆႇလႆႈႁူႉၶၢဝ်ႇငၢဝ်း လွင်ႈပဵၼ်တၢႆႁၢႆႉလီၼႆႉ လိူဝ်သေၵူၼ်းဝၢၼ်ႈႁူဝ်ပၢင်ႇ 9 ၵေႃႉ ၊ ၵူၼ်းဝၢၼ်ႈမိူင်းဝီး 3 ၵေႃႉယဝ်ႉ ၵူၼ်းဝၢၼ်ႈမိူင်းၶၢၵ်ႇၵေႃႈ ၵိုတ်းဝႆႉ 3 ၵေႃႉ ။ ဢွၼ်ၼႃႈၼႆႉ ၵူၼ်းဝၢၼ်ႈ မိူင်းၶၢၵ်ႇ ထုၵ်ႇတီႉၺွပ်းၵႂႃႇတင်းမူတ်း 11 ၵေႃႉ ၊ ၵူၺ်းၵႃႈတႃႇ 8 ၵေႃႉၼၼ်ႉ ထုၵ်ႇပွႆႇတူဝ်ဢွၵ်ႇမႃးယဝ်ႉ ။


ၵဵဝ်ႇၵပ်းလွင်ႈၼႆႉ ၽွင်းႁၢင်လိူၼ်ၼူဝ်ႊဝႅမ်ႊၿိူဝ်ႊ (2015) ၼၼ်ႉ PSLF/TNLA ၵေႃႈ ယၢမ်ႈဢွၵ်ႇလိၵ်ႈပိုၼ်ၽၢဝ်ႇဝႃႈ တႅဝ်းႁူမ်ႈပူတ်းပွႆႇမိူင်းပလွင်ႈ / တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (PSLF/TNLA) ၼႆႉ ဢမ်ႇမီးပေႃႇလသီႇ တီႉမတ်ႉၵူၼ်း ၊ ဢမ်ႇတီႉၺွပ်းၵူၼ်းမိူင်း ၊ ၵွပ်ႈပိူဝ်ႈဝႃႈ သိုၵ်း TNLA လႆႈပိုင်ႈဢိင်ၸႂ်ယႂ်ႇပေႃႈမႄႈၵူၼ်းမိူင်း - ဝႃႈၼႆ ။


တင်ႈတႄႇႁၢင်လိူၼ်ၼူဝ်ႊဝႅမ်ႊၿိူဝ်ႊ (2015) မႃး တပ်ႉသိုၵ်းၸိုင်ႈတႆး (RCSS/SSA) လႄႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (PSLF/TNLA) မီးပၼ်ႁႃလွင်ႈပိုၼ်ႉတီႈတူင်ႉၼိုင်ၵၼ်သေ လႆႈပဵၼ်ပၢင်တိုၵ်းၵၼ် ၊ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်းၼႂ်းပိုၼ်ႉတီႈ ထုၵ်ႇတီႉၺွပ်း ။ ယွၼ်ႉပၢင်တိုၵ်းသေ ၵူၼ်းဝၢၼ်ႈႁူဝ်ပၢင်ႇ တင်းမူတ်းၵေႃႈ လႆႈၵႂႃႇယူႇသဝ်းဝႆႉတီႈမိူင်းဝီး တေႃႇထိုင်မိူဝ်ႈလဵဝ် ။


လွင်ႈတၢင်းသိုၵ်းသွင်ၾၢႆႇ လႆႈပဵၼ်ပၢင်တိုၵ်းၵၼ်ၼၼ်ႉ ၼႂ်းၶေႃႈပိုၼ်ၽၢဝ်ႇ PSLF/TNLA လၢတ်ႈပႃးဝႃႈ - မိူဝ်ႈဝၼ်းတီႈ 27/11/2015 ၾၢႆႇ RCSS/SSA ပူၼ်ႉပႅၼ်ၶဝ်ႈမႃးၼႂ်း ပိုၼ်ႉတီႈၼႃႈလိၼ်ၵုမ်းၵမ် TNLA ။ ၵူၺ်းၵႃႈၾၢႆႇ RCSS/SSA လၢတ်ႈဝႃႈ ၼႃႈလိၼ်သိုၵ်း 701 မႃးလဵပ်ႈႁဵၼ်းလွင်ႈ ၵၢၼ်ၵိုတ်းယိုဝ်း ပတ်းပိုၼ်ႉတူဝ်ႈမိူင်း (NCA) တီႈငဝ်ႈၸိုင်ႈလွႆတႆးလႅင်း သေပွၵ်ႈမိူဝ်းၶိုၼ်း ၼႃႈလိၼ် 701 တၢင်းထုင်ႉမၢဝ်း ၊ လႆႈထုၵ်ႇၸုမ်းသိုၵ်းတဢၢင်း ပႂ်ႉမူၵ်းယိုဝ်းၸွမ်းတၢင်း ပွတ်းမိူင်းဝီး ၼႂ်းၸႄႈဝဵင်းၼမ်ႉၶမ်း၊ သွင်ၾၢႆႇၸင်ႇလႆႈပဵၼ်ပၢင်တိုၵ်းၵၼ် - ၼႆယဝ်ႉ ။