ၸိုင်ႈတႆးပွတ်းႁွင်ႇ ႁူဝ်ဝဵင်းၼွင် ၼွင်ၶဵဝ် ၼၼ်ႉ ႁူင်းႁုင်ၵိူဝ်ဝၢၼ် ငူၺ်ႇယီႇပလႄး ပွႆႇၼမ်ႉလၢႆႇ တူႇၼဝ်ႈ ဢၼ်မီးၵွင်ႉၽိတ်း ဢွၵ်ႇမႃးယူႇၵူႈဝၼ်းလႄႈ ႁဵတ်းႁႂ်ႈၵူၼ်းဝၢၼ်ႈ ယူႇယၢပ်ႇၶၢၼ်ၸႂ် ၊ သတ်းလဵင်ႉဝူဝ်းၵႂၢႆးၵိၼ်ၺႃးလူမ်ႉတၢႆ လႄႈ ၵူၼ်းဝၢၼ်ႈႁူမ်ႈမိုဝ်းၵၼ် တုၵ်းယွၼ်းႁႂ်ႈၵႄႈလိတ်ႈပၼ် ။

ႁူင်းႁုင်ၵိူဝ်ဝၢၼ် ငူၺ်ႇယီႇပလႄး ၼႆႉ ၵေႃႇတင်ႈပၵ်းသဝ်းဝႆႉ တီႈႁူဝ်ဝဵင်းၼွင်ၶဵဝ် တၢင်းၵႂႃႇ ဝၢၼ်ႈဢုမ်ႇတီး ဢုမ်ႇၶႃး။ ၼမ်ႉလၢႆႇဢၼ်ႁူင်းၸၢၵ်ႈၵိူဝ်ဝၢၼ် ပွႆႇဢွၵ်ႇမႃးၼၼ်ႉ တုမ်ႉယွၼ်ႈ ၵူၼ်းဝၢၼ်ႈသၢမ်သျႄႇ  ၵူၼ်းဝၢၼ်ႈၼပ်ႉသိပ်း ပဵၼ်တၢင်းပဵၼ်ႁူဝ်ၶႆႈ ႁူဝ်မဝ်း ၊ ပဵၼ်ၶူမ်းပဵၼ်ၵၢႆး ၊ တုၼ်ႉႁၢၵ်ႈ ယွၼ်ႉၼမ်ႉတူႇၼမ်ႉၼဝ်ႈ၊ ဝူဝ်းၵႂၢႆးၵူၼ်းဝၢၼ်ႈ တၢႆ 3 တူဝ် ယွၼ်ႉၵိၼ်ၺႃးၼမ်ႉမီးၵွင်ႉမီးသၢၼ် လၢႆႇ ႁူင်းၸၢၵ်ႈၵိူဝ်ဝၢၼ် ပွႆႇဢွၵ်ႇ ။


ရူတ်ႉၵႃးတေႃႉသူင်ႇၶဝ်ႈဢွၵ်ႇ ၼႂ်းႁူင်းၵိူဝ်ဝၢၼ်ၵေႃႈ ႁေႃႈဝႆး ၵႆႉတုမ်ႉလေႃႇၺႃး ၵူၼ်းဝၢၼ်ႈ ၊ သတ်းလဵင်ႉ ၊ မႆႈၸႂ်ၸွမ်းလုၵ်ႈဢွၼ်ႇ လဵၼ်ႈၸွမ်းၵိဝ်ႇၸွမ်းငႅၵ်ႈ - ၼႆ ၵူၼ်းၼႂ်းပိုၼ်ႉတီႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ ။


ၵူၼ်းပိုၼ်ႉတီႈ ၵူဝ်ႇၸေႃႇမူဝ်းလၢတ်ႈဝႃႈ - “ ႁဝ်းႁူပ်ႉဢုပ်ႇ ၽူႈတၢင်တူဝ်ႁူင်းၸၢၵ်ႈ မိူဝ်ႈလိူၼ်သႅပ်ႊထႅမ်ႊပိူဝ်ႊ 17 ဝၼ်း ။ ၵူၺ်းၵႃႈတေႃႇထိုင်တေႃႈလဵဝ် ဢမ်ႇႁၼ်ၶဝ် မႃးႁဵတ်းသင် ပၼ်သေလွင်ႈ ။ ၶဝ်ဢမ်ႇဢဝ်ပုၼ်ႈၽွၼ်းသင်ပၼ် လႄႈႁဝ်းၶႃႈၵေႃႈ လႆႈပိုၼ်ၽႄႈလွင်ႈၼႆႉ ၶိုၼ်ႈၼိူဝ် ၾဵတ်ႊၿုၵ်ႊ ၊ ၼင်ႇႁိူဝ်ၵူၼ်းတင်းၼမ်ပေႃးတေႁူႉၸွမ်းႁဝ်းၶႃႈ “ ဝႃႈၼႆ ။


ဢူးၵျေႃႇသိၼ်ႇထူၺ်း ၽူႈၸတ်းၵၢၼ် တီႈႁူင်းႁုင်ၵိူဝ်ဝၢၼ်ၼၼ်ႉဝႃႈ  “ ပႃႇတီႇ SNLD လႄႈ NLD ၶဝ်ၵေႃႈ မႃးထတ်းသၢင်တူၺ်းႁူင်းၵၢၼ်ႁဝ်းယဝ်ႉၶႃႈ ။ ႁဝ်းၶႃႈတင်းၵူၼ်းဝၢၼ်ႈ ၵေႃႈ လႆႈၶေႃႈတူၵ်းလူင်းၵၼ်ယဝ်.၊ တွၼ်ႈတႃႇၼမ်ႉၵိၼ်ၵူၼ်းဝၢၼ်ႈၶဝ်ၵေႃႈ ႁဝ်းတေဢဝ်ပုၼ်ႈၽွၼ်းပၼ်ၵူၺ်း ” - ဝႃႈၼႆ ။


ၵူၼ်းဝၢၼ်ႈၵူၼ်းသူၼ်လၢတ်ႈ တီႈၸုမ်းၶၢဝ်ႇၽူႈတွႆႇႁွၵ်ႈဝႃႈ ႁူင်းၸၢၵ်ႈၵိူဝ်ဝၢၼ် ငူၺ်ႇယီႇပလႄး ၼႆႉ ႁဵတ်းမႃးတင်းႁိူင် 8  ပီ ပၢႆယဝ်ႉလႄႈ လွင်ႈတုမ်ႉယွၼ်ႈၵေႃႈတိူဝ်ႉတေႃႇၵူၼ်းဝၢၼ်ႈၼမ် ။ ၵၢင်ၸႂ်ၵူၼ်းဝၢၼ်ႈတႄႉ ၶႂ်ႈႁႂ်ႈၶပ်းၶိုင်ပၼ်ၼမ်ႉလၢႆႇ ႁႂ်ႈလႆလီလီသေ ယႃႇႁႂ်ႈပွႆႇပႃးၼမ်ႉၵွင်ႉသၢၼ် ၼမ်ႉၶႄႊလ်မီႊ ဢၼ်ၸၢင်ႈပဵၼ်ၽေးတေႃႇ ၵူၼ်းဝၢၼ်ႈ တင်း သတ်းလဵင်ႉ ၊ ၾၢႆႇၶွမ်ႊပၼီႊ  ၶပ်းၶိုင်ပၼ်ၼႆသေတႃႉ ယင်းပႆႇဝၢင်းၸႂ်လႆႈ - ဝႃႈၼႆ ။


ႁူင်းၵၢၼ်ငူၺ်ႇယီႇပလႄး ၼႆႉ ငဝ်ႈၶွမ်ႊမၼီႊမၼ်းပၵ်းယူႇတီႈဝဵင်းလိူဝ်ႇ။ ၼွၵ်ႈသေ ႁူင်းႁုင်တူမ်ႈ ႁဵတ်းဢွၵ်ႇၵိူဝ်ဝၢၼ် ယင်းမီး ႁူင်းႁဵတ်းဢွၵ်ႇပုၼ်သီးမႅၼ်ႊ (ၽိလပ်ႉမေႇ) ထႅင်ႈလူးၵွၼ်ႇ ။ ႁူင်းၵိူဝ်ဝၢၼ် တႄႉတႄႇမႃး ၸဵမ် မိူဝ်ႈပီ 2008 ။