ႁွင်ႈၵၢၼ်ၾၢႆႇတေႃႉသူင်ႇၸိုင်ႈထႆး ဢွၵ်ႇပၵ်းပိူင် ႁေႃႈရူတ်ႉၵႃးဢၼ်မႂ်ႇဝႃႈ ၵူၼ်းၸိူဝ်းယိပ်းဝႂ် ပၢႆႈၶဝ်ႈမိူင်းထႆး 14 ၸုမ်းလႄႈ ၵူၼ်းဢၼ်ယိပ်းဝႂ် 10 ပီ ႁဵတ်းဝႂ်ၶပ်းၶီႇ လႆႈယဝ်ႉ ။

မိူဝ်ႈဝၼ်းတီႈ 12/01/2016 ႁွင်ႈၵၢၼ်ၾၢႆႇတေႃႉသူင်ႇမိူင်းထႆး လႆႈပိုၼ်ၽၢဝ်ႇႁဵတ်းပၼ်ဝႂ်ႁေႃႈရူတ်ႉ / ၵႃးတႃႇၵူၼ်းဢၼ်ပၢႆႈၶဝ်ႈမႃးယူႇမိူင်းထႆးႁိုင် မိူၼ်ၼင်ႇဝႂ်ပိုၼ်ႉတီႈသုင် ၊ ဝႂ်ၶဵဝ်ၶွပ်ႇလႅင်လႄႈဝႂ် 10 ပီ ၸိူဝ်းၼႆႉတၢင်ႇႁဵတ်းဝႂ်ဢၼုၺၢတ်ႉႁေႃႈရူတ်ႉ / ၵႃးလႆႈယဝ်ႉဝႃႈၼႆ ။


ၵူၼ်းၸိူဝ်းယိပ်းဝႂ်ပၢႆႈၶဝ်ႈမိူင်းထႆး 14 ၸုမ်းၼၼ်ႉ မၢႆတူဝ်ထီႉၼိုင်ႈၼၼ်ႉ တေပဵၼ်မၢႆ 6 တင်းမၢႆ 7 ။ ၵူၼ်းဢၼ်ယိပ်းဝႂ် 10 ပီသမ်ႉတေပဵၼ်တူဝ်ၼပ်ႉ 0 (သုၼ်) ။


ၵူၺ်းၵႃႈတွၼ်ႈတႃႇၵူၼ်းဢၼ်ယိပ်းဝႂ် 10 ပီၼၼ်ႉသမ်ႉ မၢႆတူဝ်ထီႉ 6 တင်းထီႉ 7 ၼၼ်ႉ တူဝ်ၼပ်ႉတေလႆႈပဵၼ်8တင်း9 ၸင်ႇႁဵတ်းလႆႈၼႆယဝ်ႉ ။ တူဝ်ႇယၢင်ႇမိူၼ်ၼင်- 0-0000-89000-00 ။


ၸၢႆးပိူင်း ၸဝ်ႈၼႃႈတီႈ ၾၢႆႇမၢႆမီႈ ၸုမ်းၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း (HRDF) လၢတ်ႈဝႃႈ - ပေႃးတေႁဵတ်းဝႂ်ၶပ်းၶီႇၼႆၸိုင် တူဝ်ၸဝ်ႈၵဝ်ႇထုၵ်ႇလီ ၵႂႃႇၶဝ်ႈပၢင်သွၼ် (ဢူပ်းလူမ်း) ႁင်းၵူၺ်း ၊ ဢမ်ႇထုၵ်ႇလီၸၢင်ႈပိူၼ်ႈႁဵတ်း ။ ပေႃးႁဝ်းၸၢင်ႈပိူၼ်ႈၸိုင် သင်မီးပၼ်ႁႃပဵၼ်ၽေးၵိုင်ႉၵၢင်ႉမႃးၼႆ ၸဝ်ႈၼႃႈတီႈၶဝ် တေထတ်းထၢမ် ပေႃးႁဝ်းဢမ်ႇတွပ်ႇလႆႈ လွင်ႈပၵ်းပိူင်မၢႆမီႈ ရူတ်ႉၵႃးၼႆၸိုင်ႈ ၸၢင်ႈတေပဵၼ်ၽွၼ်းတုမ်ႉယွၼ်ႈ တေႃႇပီႈၼွင်ႉတႆးႁဝ်းမိူဝ်းၼႃႈ ၊ ပိူၼ်ႈၸၢင်ႈယူၵ်ႉလိူၵ်ႈလႄႈ ဢမ်ႇႁဵတ်းပၼ်ဝႂ်ၶပ်းၶီႇႁဝ်း ၵေႃႈၸၢင်ႈပဵၼ်လႆႈ ” ၼႆယဝ်ႉ ။


တႃႇတေႁဵတ်းဝႂ်ႁေႃႈရူတ်ႉၼႆႉတေလႆႈႁဵတ်းတီႈ ႁွင်ႈၵၢၼ်ၾၢႆႇတေႃႉသူင်ႇ ပိုၼ်ႉတီႈဢၼ်ႁဝ်း ႁဵတ်းဝတ်းဝႂ်ၼၼ်ႉ ၼႆယဝ်ႉ ။