လူင်ပွင်ၸိုင်ႈမၢၼ်ႈ / တပ်ႉသိုၵ်းမၢၼ်ႈ တင်းၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၸုမ်းတႆး (RCSS/SSA) ၊ ၸုမ်းယၢင်း (KNU) လႄႈၸုမ်းပဢူဝ်း (PNLO) ႁူပ်ႉဢုပ်ႇၵုမ် ၶွတ်ႇၽွတ်ႈၶွမ်ႊမတီႊ ပႂ်ႉတူၺ်းၵၢၼ်ၵိုတ်းတိုၵ်း (JMC) ၸႄႈမိူင်းတႆး တီႈၶူဝ်လမ် ။

ပူၼ်ႉမႃးမိူဝ်ႈဝၼ်းတီႈ 09/01/2016 မီးၵၢၼ်ၸတ်းပၢင်ၵုမ် ပိူဝ်ႈတႃႇၶွတ်ႇၽွတ်ႈ ၶွမ်ႊမတီႊပႂ်ႉတူၺ်း ၵၢၼ်ၵိုတ်းတိုၵ်း (Joint Monitoring Committee-JMC) တီႈဝဵင်းၶူဝ်လမ် ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း ၊ ဢၼ်ပဵၼ်ငဝ်ႈငုၼ်း တိူင်းသိုၵ်းဝၼ်းဢွၵ်ႇၵၢင် (ယလၶ) ။ မီးၽူႈယႂ်ႇၵူၼ်းလူင် ၾၢႆႇလူင်ပွင်ၸိုင်ႈမၢၼ်ႈ / တပ်ႉသိုၵ်းမၢၼ်ႈ ၊ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ၊ ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU)  ဢိၵ်ႇ ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO) ၸိူဝ်းၼႆႉ ၶဝ်ႈႁူမ်ႈ ။


ၽူႈၶဝ်ႈႁူမ်ႈဢုပ်ႇၵုမ် ပိူဝ်ႈတႃႇၶွတ်ႇၽွတ်ႈ JMC တီႈၶူဝ်လမ်ပွၵ်ႈၼႆႉ ၾၢႆႇလူင်ပွင်ၸိုင်ႈမၢၼ်ႈ ပဵၼ်ႁူဝ်ပဝ်ႈၶွမ်ႊမတီႊပၵ်းတႃပႂ်ႉတူၺ်း ၵၢၼ်ၵိုတ်းတိုၵ်း ၸၼ်ႉမိူင်းႁူမ်ႈတုမ် (JMCU) လႄႈပဵၼ်ပႃး ၽူႈၵွၼ်းၽႅၼ်ၵၢၼ်သိုၵ်းၶိုၵ်ႉတွၼ်း (ၵသထ) မၢႆ 2 (ပႃႈတႂ်ႈႁွင်ႈၵၢၼ်လူင်ၾၢႆႇၵႅတ်ႇၶႄ) ၸွမ်သိုၵ်းယႃႇပျေႉ ။ ၾၢႆႇၸုမ်းယၢင်း (KNU) ပဵၼ်ၵႅမ်ႁူဝ်ပဝ်ႈ ၶွမ်ႊမတီႊပႂ်ႉတူၺ်းၵၢၼ်ၵိုတ်းတိုၵ်း ၸၼ်ႉမိူင်းႁူမ်ႈတုမ် ၸေႃးဢၢႆးၸႅတ်ႉၽူဝ်း ။ ၾၢႆႇ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ပဵၼ်ၸဝ်ႈသိုၵ်းလူင်ဢွင်ႇမျႃႉ ဢွၼ်ႁူဝ် ။ ၾၢႆႇပဢူဝ်း (PNLO) ၸဝ်ႈသိုၵ်းၶုၼ်ႇၸွႆးထူဝ်ႇဢွၼ်ႁူဝ် ပႃးတင်းၸဝ်ႈႁၢၼ်ၼၢင်းၽိဝ်ႇပျႃႇ ။


တီႈပၢင်ၵုမ်တီႈၶူဝ်လမ်ပွၵ်ႈၼႆႉႁူဝ်ပဝ်ႈ JMCU ၸွမ်သိုၵ်းယႃႇပျေႉ တင်း ၵႅမ်ႁူဝ်ပဝ်ႈ ၸေႃးဢၢႆးၸႅတ်ႉၽူဝ်း ၶဝ်ၵၢဝ်ႇလၢတ်ႈၶေႃႈၵႂၢမ်းသေ ႁဵတ်းသၢင်ႈပၢင်ၵုမ်ၵၼ်ၵႂႃႇ ။ ၶွမ်ႊမတီႊပႂ်ႉတူၺ်းၵၢၼ်ၵိုတ်းတိုၵ်း JMC ၸႄႈမိူင်းတႆးၵေႃႈ ၶွတ်ႇၽွတ်ႈလႆႈၼႂ်းဝၼ်းတီႈ 09/01/2016 ၼၼ်ႉၵမ်းလဵဝ် ။ ႁူဝ်ပဝ်ႈပဵၼ်ၵႅမ်ၸွမ်ႁၢၼ် ဝိၼ်းမိၼ်းထုၼ်း ၽူႈၵွၼ်းတိူင်းသိုၵ်း ဝၼ်းဢွၵ်ႇၵၢင် (ၶူဝ်လမ်) ၊ ၸဝ်ႈသိုၵ်းလူင်ဢွင်ႇမျႃႉ (RCSS/SSA) ပဵၼ်ၵႅမ်ႁူဝ်ပဝ်ႈ ။


ပိူင်လူင်မၼ်း မီးၶေႃႈလႆႈၸႂ်တူၵ်းလူင်းၵၼ် 3 ၶေႃႈ - 1. တေႁဵတ်းၸွမ်းၶေႃႈလႆႈၸႂ် NCA ။ 2. တေဢုပ်ႇဢူဝ်း ၵဵဝ်ႇၵပ်း ပိူင်တိုဝ်းၵမ်သိုၵ်း (Code of conduct-CoC) ။ 3. တေႁဵတ်းၸွမ်း ၽႅၼ်တၢင်းၶွမ်ႊမတီႊပႂ်ႉတူၺ်း ၵၢၼ်ၵိုတ်းတိုၵ်း (JMC) - ၼႆယဝ်ႉ ။


ၶွမ်ႊမတီႊပႂ်ႉတူၺ်းၵၢၼ်ၵိုတ်းတိုၵ်း (JMC) ၸၼ်ႉၸႄႈမိူင်းတႆးၼႆႉ တိုၵ်ႉၶွတ်ႇၽွတ်ႈပွၵ်ႈၼႆႉၵူၺ်း ။ ၶွမ်ႊမတီႊႁူမ်ႈသၢင်ႈ ပႂ်ႉတူၺ်းၵၢၼ်ၵိုတ်းၸၼ်ႉမိူင်းႁူမ်ႈတုမ်တႄႉ ၶွတ်ႇၽွတ်ႈပူၼ်ႉမႃးမိူဝ်ႈဝၼ်းတီႈ 16/10/2016 ၊ ဝၢႆးလူင်းလၢႆးမိုဝ်းၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA) မိူဝ်ႈဝၼ်းတီႈ 15/10/2015 ၼၼ်ႉၵမ်းလဵဝ် ။