ၸၼ်ႉၽူႈယႂ်ႇၵူၼ်းလူင် ၼႂ်းပႃႊတီႊမႂ်ႇသုင်ၸိုင်ႈတႆး တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ႁူပ်ႉဢုပ်ႇၵၼ် သၢင်ႈလွင်ႈမိုတ်ႈၵိုဝ်းၸမ်ၸႂ် ၵိၼ်ၶဝ်ႈႁူမ်ႈမူႇ တီႈမိူင်းၼွင် ။

ပႃႊတီႊမႂ်ႇသုင်ၸိုင်ႈတႆး တင်း လူင်ပွင်ၸိုင်ႈမၢၼ်ႈ ႁူပ်ႉဢုပ်ႇၵၼ်တီႈၼေႇပျီႇတေႃႇ ၽွင်းႁူဝ်လိူၼ်ၻီႊသႅမ်ႊၿိူဝ်ႊ 2015

ပူၼ်ႉမႃးမိူဝ်ႈဝၼ်းတီႈ 10/01/2016 ၼႆႉ ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ တင်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ႁူပ်ႉထူပ်းဢုပ်ႇဢူဝ်းၵၼ် တီႈမိူင်းၼွင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ။ ၾၢႆႇမၢၼ်ႈမီး ၽူႈၵွၼ်းၽႅၼ်ၵၢၼ်သိုၵ်းၶိုၵ်ႉတွၼ်း ( ၵသထ ) မၢႆ 2 ၸွမ်သိုၵ်းယႃႇပျေႉ ဢွၼ်ႁူဝ်သေ မီးၽူႈၵွၼ်းတိူင်းသိုၵ်း ဝၼ်းဢွၵ်ႇၵၢင် (ၶူဝ်လမ်) ၊ ၽူႈၵွၼ်းတိူင်းသိုၵ်းၸဵင်ႇႁွင်ႇဝၼ်းဢွၵ်ႇ (လႃႈသဵဝ်ႈ) ၸိူဝ်းၼႆႉ ။ ၾၢႆႇ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) မီးၵႅမ်ႁူဝ်ပဝ်ႈ ၸွမ်ႁၢၼ်ၶိူဝ်းတႆး ဢွၼ်ႁူဝ်လႄႈ ၸဝ်ႈႁၢၼ်ၸၢႆးသူႉၸိူဝ်းၼႆႉ ။


ၵဵဝ်ႇၵပ်းလွင်ႈၼႆႉ ၽူႈယႂ်ႇၵူၼ်းလူင် တီႈလုမ်းငဝ်ႈငုၼ်း SSPP/SSA ၸဝ်ႈၼိုင်ႈ လၢတ်ႈဝႃႈ - ဢၼ်ႁူပ်ႉၵၼ်ၼႆႉ ဢမ်ႇမီးၶေႃႈတႅပ်းတတ်းသင် ။ ႁူပ်ႉထူပ်းၵၼ် ပိူဝ်ႈတႃႇမိုတ်ႈၵိုဝ်းၸမ်ၸႂ်ၵၼ်သေ ၵိၼ်ၶဝ်ႈႁူမ်ႈမူႇၵၼ်ၵူၺ်း - ဝႃႈၼႆ ။


ၸွမ်းၼင်ႇသွင်ၾၢႆႇႁူပ်ႉဢုပ်ႇဢူဝ်းၵၼ် မိူဝ်ႈႁၢင်လိူၼ်ၼိူဝ်ႊဝႅမ်ႊၿိူဝ်ႊ (2015) ၼၼ်ႉ မီးၶေႃႈလႆႈၸႂ် တႅပ်းတတ်းဝႆႉဝႃႈ ပိူဝ်ႈတႃႇလူတ်းယွၼ်ႇလႆႈပၢင်တိုၵ်း ၊ ပိူဝ်ႈတႃႇပၵ်းတႃပႂ်ႉတူၺ်းသေ ၵႄႈလိတ်ႈပၼ်ႁႃ ပၢင်တိုၵ်းသိုၵ်းသိူဝ် လႆႈၽႂ်းၽႂ်းၼၼ်ႉ ႁႂ်ႈ SSPP/SSA ၶဝ်ႈပၵ်းလုမ်းတိတ်းတေႃႇၵပ်းသၢၼ် တီႈမိူင်းၼွင် ။


တင်ႈတႄႇမိူဝ်ႈႁူဝ်လိူၼ် ဢွၵ်ႊထူဝ်ႊၿိူဝ်ႊ (2015) ပူၼ်ႉမႃး တေႃႇပေႃးထိုင်ႁၢင်လိူၼ်ၼူဝ်ႊဝႅမ်ႊၿိူဝ်ႊ (2015) ၼၼ်ႉ ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ ႁၢင်ႈႁႅၼ်းသိုၵ်းလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) ၼႂ်းၸႄႈဝဵင်းမိူင်းသူႈ / မိူင်းၼွင် / ၵေးသီးၸိူဝ်းၼႆႉ ။ ၾၢႆႇတပ်ႉသိုၵ်းမၢၼ်ႈ ၸႂ်ႉႁိူဝ်းဝိၼ်တိုၵ်းသိုၵ်း သႅၼ်းႁိူဝ်းဝိၼ်မႅင်းမီႈ ၊ ႁိူဝ်းဝိၼ် MIG-29, MIG-35 ၸိူဝ်းၼႆႉမႃးလေႃႇတိုၵ်း ။


ယွၼ်ႉပိူဝ်ႈပၢင်တိုၵ်းသေ ၵူၼ်းဝၢၼ်ႈၵူၼ်းမိူင်း ၼႂ်းပိုၼ်ႉတီႈၸႄႈဝဵင်းမိူင်းသူႈ / မိူင်းၼွင် / ၵေးသီး ၸိုင်ႈတႆးပွတ်းၸၢၼ်း ၊ လႆႈပၢႆႈယၢၼ်ႁိူၼ်းယေးတီႈယူႇမိုၼ်ႇပၢႆ ။ ၾၢႆႇၼိုင်ႈၵေႃႈ မိူဝ်ႈႁူဝ်လိူၼ်ၻီႊသႅမ်ႊၿိူဝ်ႊ (2015)ၼၼ်ႉ သွင်ၾၢႆႇ ႁဵတ်းသၢင်ႈပၢင်ဢုပ်ႇဢူဝ်းၵုမ်ၵၼ် တီႈၼေႇပျီႇတေႃႇသေ လႆႈၸႂ်ၵၼ်ဝႃႈ တေထွၼ်သိုၵ်းဢွၵ်ႇ ။ ၵူၺ်းၵႃႈ တေႃႇထိုင်မိူဝ်ႈလဵဝ်ၼႆႉ ယင်းပႆႇထွၼ်ဢွၵ်ႇထိုင်ၸၼ်ႉ ဝႆႉဝၢင်းၸႂ်ဝႃႈ တေဢမ်ႇပဵၼ်ပၢင်တိုၵ်းထႅင်ႈ ။ ၵွပ်ႈၼၼ် ၵူၼ်းဝၢၼ်ႈၵူၼ်းမိူင်း ယင်းတိုၵ်ႉမႆႈၸႂ်ၵူဝ်ပဵၼ်ပၢင်တိုၵ်း သိုၵ်းသိူဝ်ယူႇလႄႈယင်းပႆႇဝၢင်းၸႂ်ဝၢင်းၶေႃး ပိူဝ်ႈတႃႇပွၵ်ႈယူႇၶိုၼ်းတီႈဝၢၼ်ႈသူၼ်ႁိူၼ်းယေး တူဝ်ၵဝ်ႇ ။