သင်ၶၸဝ်ႈၾၢႆႇတႆး တင်းပွတ်းဢွၵ်ႇၶူင်း တေတႄႇၶဝ်ႈဝၢတ်ႈ တီႈဝတ်ႉထမ်းမပႃလ ဝၢၼ်ႈယၢင်းႁၢဝ်ႉ ဢိူင်ႇယၢင်းၵဵင်  တေၶဝ်ႈၵမ် တႃႇ 10 ဝၼ်း ပူႇၵႄႇဝၢၼ်ႈယၢင်းႁၢဝ်ႉလၢတ်ႈ ။

ဝၼ်းတီႈ 14-25/01/2016  သင်ၶၸဝ်ႈၾၢႆႇတႆး တင်းပွတ်းဢွၵ်ႇၶူင်း တႄႇၶဝ်ႈဝၢတ်ႈ တီႈဝတ်ႉထမ်းမပႃလ ဝၢၼ်ႈယၢင်းႁၢဝ်ႉ ဢိူင်ႇယၢင်းၵဵင် ဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ပွၵ်ႈၵမ်းတီႈ (5) ၊ ၵမ်းထူၼ်ႈ (66) ပီ ။


ၸၢႆးလူင်ထုၼ်း ပူႇၵႄႇဝၢၼ်ႈယၢင်းႁၢဝ်ႉ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ ၶွမ်ႊမတီႊႁဝ်းၶႃႈ လႆႈယေႃးဢဝ်သင်ၶၸဝ်ႈ ၼႂ်းႁူဝ်ဝတ်ႉ ၵဵင်းတုင် 28 ဝတ်ႉ ၊ ၼွၵ်ႈလိူဝ်သေၼၼ်ႉၵေႃႈ မိူင်းပဵင်း ၊ မိူင်းပူးဢွၼ်ႇ ၊ လွႆမူၺ် ၊ မိူင်းယၢင်း ၊ မိူင်းၶၢၵ်ႇလႄႈ ဝဵင်းတႃႈၶီႈလဵၵ်း တင်းမူတ်းႁူဝ်ဝတ်ႉ ဢၼ်လႆႈၼိမၼ်တၼ မႃး မီး 44 ဝတ်ႉ ၊ ပေႃးပႃးၸဝ်ႈတူၼ်ႈၶူး (ပၵ်းၵတတ်ႈ) ၸိုင်  ႁူမ်ႈမီးႁိမ်း 100 ဝတ်ႉ ။


သိုပ်ႇလၢတ်ႈထႅင်ႈဝႃႈ ၼႂ်းၶၢဝ်းတၢင်း 10 ဝၼ်းၼႆႉ ႁဝ်းၶႃႈ တမ်း ငိုၼ်းၸႂ်ႉၸၢႆႇ 120-150 သႅၼ်ပျႃး တႃႇၶဝ်ႈၽၵ်းလဵင်ႉၽဵလ်း (ၵၢပ်ႈသွမ်း) သင်ၶၸဝ်ႈလႄႈ လဵင်ႉလူပီႈၼွင်ႉ ဝႃႈၼႆ ။


သင်ၶၸဝ်ႈၾၢႆႇမိူင်းၵေႃႈ တေတႄႇၶဝ်ႈဝၢတ်ႈ ဝၼ်းတီႈ 13-23/01/2016 ၶၢဝ်းတၢင်း 10 ဝၼ်း တေၶဝ်ႈတိုဝ်းၵမ် 3 တီႈ ဝတ်ႉၼွင်ၵူင်ႈ ၊ ဝတ်ႉၵဵင်းၽွင်း ဢိူင်ႇယၢင်းလေႃး ၊ ဝတ်ႉၼွင်ဢေႃႈ ဢိူင်ႇၵၢတ်ႇတဝ်ႇ ၸိူဝ်းၼႆႉ ။

                                                                                           
                                                                                                      လႅင်ႇၶၢဝ်ႇ လႅတ်ႇၼုမ်ႇ မင်းရၢႆး