ၸုမ်း Miss Golden Land Myanmar ဢွၼ်ႁူဝ်တေၸတ်းႁဵတ်း ပၢင်ၶႄႉၶႅင်ႇ ၼၢင်းငၢမ်းတီႈဝဵင်းၵဵင်းတုင် ၼႂ်းႁၢင်လိူၼ်ၵျႅၼ်ႊၼိဝ်ႊရီႊ ။

တေထိုင် ဝၼ်းတီႈ 24/01/2016 ၶၢဝ်းယၢမ်း 18:00 မူင်း (ႁူဝ်ၶမ်ႈ) ၸုမ်း Miss Golden Land  Myanmar ပဵၼ်ၵဝ်ႉၵၼ်းသေ ၸတ်းႁဵတ်း ပၢင်ၶႄႉၶႅင်ႇ ၼၢင်းၼၢင်းငမ်း တီႈႁူင်းႁေႃလ် ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ။


ၸၢႆးဝုၼ်းတိပ်ႉ ၶွမ်ႊမတီႊၶတ်းလိူၵ်ႈ ၼၢင်းငၢမ်းၼႂ်းဝဵင်းၵဵင်းတုင်လၢတ်ႈဝႃႈ တင်းမူတ်းၽူႈတေၶဝ်ႈၶႄႉၶႅင်ႇ 20 ၵေႃႉ ၼႂ်း 20 ၵေႃႉၼႆႉ တေၶတ်းလိူၵ်ႈ ၶိုၼ်ႈမႃး 10 ၵေႃႉသေ ၼႂ်း 10 ၵေႃႉသမ်ႉ တေၶဝ်ႈလိူၵ်ႈၶႄႉၶႅင်ႇၸွမ်း ၸႄႈဝဵင်းတႃႈၶီႈလဵၵ်း ။ ၸႄႈဝဵင်းတႃႈၶီႈလဵၵ်းၵေႃႈ တေၶတ်းလိူၵ်ႈၶိုၼ်ႈမႃး 10 ၵေႃႉ  သွင်ၸႄႈဝဵင်းတေၶဝ်ႈၶႄႉၶႅင်ႇၵၼ် ၼႂ်းသွင်ၸႄႈဝဵင်းၼႆႉ တေၶတ်းလိူၵ်ႈၶိုၼ်ႈမႃး 2 ၵေႃႉ တႃႇၸိုင်ႈတႆး ပွတ်းဢွၵ်ႇၶူင်း ။


သိုပ်ႇလၢတ်ႈထႅင်ႈဝႃႈ ၼႂ်း 2 ၵေႃႉ တေတၢင်တူဝ် ၸိုင်ႈတႆးပွတ်းဢွၵ်ႇၶူင်းသေ ၵႂႃႇၶဝ်ႈၶႄႉၶႅင်ႇ တီႈမိူင်းႁူမ်ႈတုမ်မိူင်းမျၢၼ်ႇမႃႇထႅင်ႈ တေၶဝ်ႈၶႄႉၶႅင်ႇ ၵူႈၸႄႈမိူင်း မိူင်းႁူမ်ႈတုမ်မိူင်းမျၢၼ်ႇမႃႇ ပေႃးယဝ်ႉ ၼႂ်းမိူင်းႁူမ်ႈတုမ်မိူင်း သမ်ႉတေၶတ်းလိူၵ်ႈ ဢွၵ်ႇမႃး ထႅင်ႈၼိုင်ႈၵေႃႉ တႃႇမိူင်းႁူမ်ႈတုမ် မိူင်းမျၢၼ်ႇ ဝႃႈၼႆ ။


ၼၢင်းသီႁွမ် ၼၢင်းငမ်း / ၼၢင်းႁၢင်ႈလီ ဢၼ်တေၶဝ်ႈလိူၵ်ႈၶႄႉၶႅင်ႇ လၢတ်ႈဝႃႈ ဢၼ်ၶႃႈႁဝ်း လႆႈၶဝ်ႈမႃးၶႅင်ႇၼၢင်းငၢမ်းၵေႃႉၼိုင်ႈၼႆႉ ပဵၼ်ပွၵ်ႈၵမ်းဢွၼ်တၢင်းသုတ်း ။ ၶႃႈႁဝ်း လႆႈၾိုၵ်း လွင်ႈပႆ လွင်ႈလၢတ်ႈ လွင်ႈၵႃႈ ၸဵမ်ၸိူဝ်းၼႆႉ တေလႆႈဝႃႈ ယၢပ်ႇၽိုတ်ႇတႄႉတႄႉၶႃႈ ယွၼ်ႉဝႃႈ ဢမ်ႇယၢမ်ႈႁဵတ်းမႃးသေပွၵ်ႈ ဝႃႈၼႆ ။


ၼၢင်းငၢမ်း တီႈၸႄႈဝဵင်းၵဵင်းတုင် 20 ၵေႃႉၼႆႉ ၵမ်ႈၼမ် ပဵၼ်ၸၢဝ်းၶိူဝ်း ၼႂ်းၸႄႈဝဵင်းၵဵင်းတုင် / ပီႈၼွင်ႉမၢၼ်ႈ ၵေႃႈပႃးၽွင်ႈ။ ၼၢင်းငၢမ်းၼႆႉ တေလႆႈမီးၼမ်ႉၵတ်ႉ ၶိုၼ်ႈႁူင်းႁဵၼ်းထိုင်ၸၼ်ႉသိပ်း ၶိုၼ်ႈၼိူဝ် ၊ ဢႃယု တႄႇဢဝ် 16-26 ပီ ၼႆယဝ်ႉ ။