ဢိင်ၼိူဝ်ရူတ်ႉၵႃးၵႂႃႇမႃး ဢမ်ႇပဵၼ်ပၵ်းပိူင် ၊ တၢင်ႇၶူဝ်းၵုၼ်ႇသိၼ်ၵႃႉၵၢတ်ႇမိုတ်း ၽိတ်းမၢႆမီႈ ၸိူဝ်းၼႆႉလႄႈ တၢင်းၵၢၼ်ၶႄႇၶဝ် မႃးၵေႃႇတႅၼ်ႈႁႄႉဢိုတ်းတၢင်းလူင် ဢၼ်ရူတ်ႉၵႃးလႅၼ်ႈၸွမ်းလႅၼ်လိၼ် ဝူင်ႈၵၢင် ၼမ်ႉၶမ်း တင်းမိူင်းၶႄႇ ။

သဝ်ၶွၼ်ႊၵရိတ်ႊ ဢၼ်ၵေႃႇသၢင်ႈဢိုတ်းႁႄႉတၢင်းၵႃး တီႈဝၢၼ်ႈၵုၼ်ႁႆး

မိူဝ်ႈဝၼ်းတီႈ 14/01/2016 ပွတ်းၼႂ်ၼၼ်ႉ ယူႇတီႈလူင်ပွင်ၸိုင်ႈၶႄႇၶဝ် မႃးႁဵတ်းတႅၼ်ႈဢိုတ်းႁႄႉပႅတ်ႈ သဵၼ်ႈတၢင်းလူင်တီႈလႅၼ်လိၼ် ဝူင်ႈၵၢင်ၼမ်ႉၶမ်း တင်းမိူင်းၶႄႇ ဢၼ်ပဵၼ်လႅၼ်ၶႅၼ်ႈမိူင်းတႆး လႄႈမိူင်းၶႄႇ ။ ပိုၼ်ႉတီႈဢၼ်တၢင်းၵၢၼ်ၶႄႇၶဝ် မႃးႁဵတ်းတႅၼ်ႈဢိုတ်းႁႄႉသဵၼ်ႈတၢင်းၼႆႉ ပဵၼ်ဝူင်ႈၵၢင် 2 ဝၢၼ်ႈ ၊ ၾင်ႇမိူင်းတႆး ပဵၼ်ဝၢၼ်ႈၵုၼ်ႁႆး (ၾၢႆႇၼိူဝ်) ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ။ ၾင်ႇမိူင်းၶႄႇ ပဵၼ်ဝၢၼ်ႈတိုင်းၶဵဝ် ။


ၶႄႇၶဝ်မႃးၵေႃႇတႅၼ်ႈဢိုတ်းႁႅတ်ႉပႅတ်ႈသဵၼ်ႈတၢင်း ပွတ်းဢၼ်ရူတ်ႉၵႃးလႅၼ်ႈၸွမ်းလႅၼ်လိၼ် ႁႄႉတၢင်းရူတ်ႉၵႃးၵႂႃႇမႃး ။ ပိူင်လူင်တႄႉ ၶႄႇၶဝ်ဢိုတ်းႁႄႉပႅတ်ႈၵႃး ဢၼ်ၵႂႃႇတေႃႉၶူဝ်းၵုၼ်ႇ / သိၼ်ၵႃႉ မိူင်းၶႄႇသေ ဢဝ်ဢွၵ်ႇမႃးဢမ်ႇပဵၼ်တၢင်းၵၢၼ်ၸိူဝ်းၼၼ်ႉ - ပႃႈၼၢင်းလႃႉ ၵူၼ်းဝၢၼ်ႈၵုၼ်ႁႆး လၢတ်ႈ ။


ၵူၼ်းဝၢၼ်ႈၵူၼ်းမိူင်း ဢၼ်ယူႇၼႂ်းပိုၼ်ႉတီႈၼႆႉ ၵမ်ႈၼမ်လႆႈၸႂ်ယႂ်ႇၶူဝ်းၵုၼ်ႇ / သိၼ်ၵႃႉ ဢၼ်လုၵ်ႉမႃးတၢင်းမိူင်းၶႄႇ ။ ၵွပ်ႈၼၼ် ပေႃးဝႃႈၶႄႇၶဝ်မႃးဢိုတ်းႁႅတ်ႉၸိူင်ႉၼႆၵေႃႈ ၵၢၼ်ၵႃႉၵၢၼ်ၶၢႆၵေႃႈလီ ၊ ၶူဝ်းၶွင်ၸႂ်ႉသွႆ ၊ လွင်ႈၵိၼ်ယႅမ်ႉၸိူဝ်းၼႆႉ ႁဵတ်းႁႂ်ႈၵူၼ်းၼႂ်းပိုၼ်ႉတီႈ ထူပ်းတၢင်းယၢပ်ႇၽိုတ်ႇ ။


ပႃႈၼၢင်းလႃႉ ယင်းသိုပ်ႇလၢတ်ႈ ထႅင်ႈဝႃႈ - ပေႃးဝႃႈမႃးပိတ်းဢိုတ်းၼႆ ပိူင်ၼိုင်ႈလီယူႇသေတႃႉၵေႃႈ ပိူင်ၼိုင်ႈသမ်ႉဢမ်ႇလီ ။ ဢၼ်ဢမ်ႇလီၼႆႉ ၵူၼ်းဝၢၼ်ႈတႆးၸိူဝ်းယူႇၸွမ်းလႅၼ်လိၼ် ဢၼ်ဢမ်ႇၸႂ်ႈ ၾၢႆႇမိူင်းၶႄႇၸိူဝ်းၼၼ်ႉ ပေႃးတေႁဵတ်းႁိူၼ်းယေးၼႆ တႃႇတေၵႂႃႇသိုဝ်ႉပုၼ် ၊ လဵၵ်း ၊ ၶိူင်ႈၵေႃႇသၢင်ႈၸိူဝ်းၼႆႉ ထူပ်းတၢင်းယၢပ်ႇၽိုတ်ႇ ။ ၵွပ်ႈၼၼ် ၶႄႇၶဝ်မႃးပိတ်းဢိုတ်း ဢမ်ႇပၼ်ၵႃးလူင်ၵႂႃႇမႃးၸိူင်ႉၼႆၼႆႉ ၵူၼ်းမိူင်းထူပ်းတၢင်းယၢပ်ႇၽိုတ်ႇတႄႉတႄႉ ။ ၵူၺ်းၵႃႈ ဢၼ်လီမၼ်းသမ်ႉ မိူၼ်ၼင်ႇၵႃးလူင် ဢၼ်လုၵ်ႉတၢင်းမိူင်းၶႄႇၶဝ်ႈမႃးၼႂ်းမိူင်းႁဝ်း ဢမ်ႇပဵၼ်တၢင်းၵၢၼ် ၊ ဢၼ်ႁေႃႈဝႆး ႁေႃႈဢမ်ႇမီးပၵ်းမီးပိူင်ၸိူဝ်းၼႆႉ တေဢေႇယွမ်းၵႂႃႇ ၊ ၽေးၵေႃႈလူတ်းယွမ်းၵႂႃႇ - ဝႃႈၼႆ ။


ၾၢႆႇၼိုင်ႈၵေႃႈ ၽူႈႁၢပ်ႇၵၢၼ်ၶုၼ်ၼႂ်းၶႄႇၵေႃႉၼိုင်ႈ ဢၼ်ယူႇတီႈလႅၼ်လိၼ်ၼၼ်ႉ လၢတ်ႈဝႃႈ - တေႃႈလဵဝ်ၼႆႉ ဢမ်ႇပၼ်ၵႃးလူင်ၵႂႃႇမႃးလတ်းၽၢၼ်ႇသေတႃႉၵေႃႈ တွၼ်ႈတႃႇၵႃးဢွၼ်ႇ ၶွင်ၵူၼ်းမိူင်းၸိူဝ်းဢၼ်ယူႇႁိမ်းႁွမ်းၸွမ်းလႅၼ်လိၼ် ၊  ဢၼ်ဢမ်ႇၸႂ်ႈၾင်ႇမိူင်းၶႄႇၸိူဝ်းၼႆႉ ယင်းတိုၵ်ႉပၼ်ၵႂႃႇမႃးလႆႈယူႇ ။ ၵႃးဢွၼ်ႇၸိူဝ်းၼႆႉ ၵူၼ်းဝၢၼ်ႈၵူၼ်းသူၼ်ၶဝ် ၵိုင်ႇလီႁူႉၵႃႈၶၼ်မၼ်းယူႇ ။ လႅၼ်လိၼ်ဢၼ်ဝႃႈၼႆႉ မၼ်းထုၵ်ႇလီႁဵတ်းႁႂ်ႈပဵၼ်ပၵ်းပဵၼ်ပိူင်သေ ၶဝ်ႈဢွၵ်ႇပဵၼ်ပၵ်းပဵၼ်ပိူင် ။ ၵွပ်ႈၼၼ်လႄႈ ၼင်ႇႁိုဝ်ပေႃးတေႁႄႉၵင်ႈလႆႈၶူဝ်းၶွင်ၼွၵ်ႈမၢႆမီႈၸိူဝ်းၼႆႉ တီႈဢၼ်ဢမ်ႇၸႂ်ႈလႅၼ်လိၼ် ၸိူဝ်းၼႆႉၵေႃႈ ၵိုင်ႇလီႁဵတ်းႁူဝ်ႉ ႁဵတ်းၶူးမိူင်းႁႄႉႁၢမ်ႈဝႆႉလူးၵွၼ်ႇ -  ဝႃႈၼႆ ။


ဝၢၼ်ႈႁိမ်းႁွမ်းလႅၼ်လိၼ် ဢၼ်ယူႇၼႂ်းၵႄႈၼမ်ႉၶမ်း (မိူင်းတႆး) တင်းမိူင်းၶႄႇ ၊ တီႈထုင်ႉဢၼ် ၶႄႇၵေႃႇတႅၼ်ႈဢိုတ်းႁႄႉရူတ်ႉၵႃးၵႂႃႇမႃးၼႆႉ ပဵၼ်ဝၢၼ်ႈၼွင်ၶိင် ၊ ႁၢတ်ႇႁိၼ် ၊ ၵေးၶုၼ်ႇ ၊ ၵုၼ်ႁႆး (ၾၢႆႇၼိူဝ်) ၊ ၼွင်ၶမ်း ၊ ၼွင်မႃႉတႃ ၊ မၢၼ်ႈၵုၼ် (တႂ်ႈ) ၸိူဝ်းၼႆႉ ။


ထႅင်ႈၾၢႆႇၼိုင်ႈ တၢင်းပွတ်းမူႇၸေႈၵေႃႈ ၵႃးမိူင်းၶႄႇ ဢၼ်သႂ်ႇပၢႆႉလိၵ်ႈၶႄႇသေ ၶဝ်ႈမႃးၾင်ႇမိူင်းတႆးၼႆႉ ၽူႈမီးဢမ်းၼၢၸ်ႈၼႂ်းပိုၼ်ႉတီႈ လူင်ပွင်ၸိုင်ႈမၢၼ်ႈၶဝ်ၵေႃႈ တီႉၺွပ်းမၢပ်ႇမႂ်ငိုၼ်းယဝ်ႉသူင်ႇၶဝ်ႈ ၼႂ်းမိူင်းၶႄႇၶိုၼ်းၵေႃႈမီး ၊ ၸိူဝ်းဢၼ်တီႉၺွပ်းဝႆႉၵေႃႈမီး - ၼႆယဝ်ႉ ။