တၵ်ႉၵႃႇသတ်ႉထႃး တေၸတ်းပၢင်ပွႆး လုမ်းလႃးၶၢပ်ႈတူဝ် သြႃႇၸဝ်ႈ / ၸဝ်ႈတူၼ်ၶူး ၽတ်ႉတၼ်ႇတ (ၵုသရ) ၸဝ်ႈၵွၼ်းဝတ်ႉ ၵဵင်းလိူၼ် ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း ။

ဝၼ်းတီႈ 17/1/2016 (ဝၼ်းလိူၼ်ၵမ်မႂ်ႇ 8 ၶမ်ႈ ) ၼႆႉ  တၵ်ႉၵႃႇသတ်ႉထႃးလႄႈ သင်ၶၸဝ်ႈ ၸိူဝ်းပဵၼ်လုၵ်ႈၼွင်ႉ ပွင်ႈပၢႆတင်းသဵင်ႈ တေၸတ်းႁဵတ်းပၢင်ပွႆး ၸႃႇပၼ လုမ်းလႃးၽဝ်ၶၢပ်ႈတူဝ် ၸဝ်ႈတူၼ်ၶူး ၽတ်ႉတၼ်ႇတ (ၵုသရ) ၸဝ်ႈၵွၼ်းဝတ်ႉ ၵဵင်းလိူၼ် ၸႄႈဝဵင်းၵေးသီး တီႈဝတ်ႉၵဵင်းလိူၼ် ဢိူင်ႇၵဵင်းလိူၼ်  ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း - ဝႃႈၼႆ ။


ၸဝ်ႈတူၼ်ၶူး ၽတ်ႉတၼ်ႇတ (ၵုသရ) ၼႆႉ လႆႈလူႉသဵင်ႈသုတ်းမုၼ်ၵႂႃႇမိူဝ်ႈဝၼ်းထီႉ 04/09/2015 လိူၼ်(10) လွင်ႈ (6) ၶမ်ႈ ယၢမ်းၵၢင်ၶိုၼ်း 10:30 မူင်း ။ တၵ်ႉၵႃႇသတ်ႉထႃး လႄႈသင်ၶၸဝ်ႈ လႆႈဢဝ်ၶၢပ်ႈတူဝ် ၸဝ်ႈတူၼ်ၶူး ဝႆႉတီႈ ဝတ်ႉမူၺ်ႇတေႃႇၵဵင်းလိူၼ် ၊ ၸႄႈဝဵင်းၵေးသီး ၊ ပုၼ်ႈတႃႇလုမ်းလႃးႁႅၼ်းတၢၼ်းပၼ်ၶၢပ်ႈတူဝ် ။


ၸဝ်ႈတူၼ်ၶူး ၽတ်ႉတၼ်ႇတ (ၵုသရ) ၼႆႉ ဢႃယု လႆႈ (81) ပီ ၊ ဝႃႇသႃၸဝ်ႈလႆႈ (27) ဝႃႇသေ  ပဵၼ်ၽူႈၵွၼ်းဝတ်ႉမူၺ်ႇတေႃႇ ၵဵင်းလိူၼ်  တီႈၼႂ်းၸႄႈဝဵင်းၵေးသီး ။ တူၼ်ၸဝ်ႈၼႆႉ လႆႈပဵၼ် ၽူႈၵွၼ်း ဝတ်ႉမူၺ်ႇတေႃႇလူင် ၵဵင်းလိူၼ်မႃး ၶၢဝ်းတၢင်း 26 ပီ ။ ၼႂ်းၶၢဝ်းတၢင်း ဢၼ်လႆႈပဵၼ်ၽူႈၵွၼ်းဝတ်ႉမႃးၼႆႉ လႆႈၸွႆႈထႅမ်ၵေႃႇသၢင်ႈပၼ်ဝႆႉ ဝတ်ႉ (ၵျွင်း) လူင်မူၺ်ႇတေႃႇ ၵဵင်းလိူၼ် 2 လင် ။ တူၼ်ၸဝ်ႈၼႆႉ မီးပီႈၼွင်ႉႁူမ်ႈတွင်ႉ3 ၵေႃႉ  ၸဝ်ႈပဵၼ်ၵေႃႉၵၢင် ။


ဝတ်ႉမူၺ်ႇတေႃႇလူင် ၵဵင်းလိူၼ်ၼႆႉ မီးသင်ၶၸဝ်ႈ တင်းသဵင်ႈ 11 တူၼ် ၊ ၸဝ်ႈၸၢင်း 2 တူၼ် ၊ ၸဝ်ႈသၢင်ႇ 9 တူၼ် ။