ပႃႊတီႊႁူဝ်သိူဝ် (SNLD) ၵႂႃႇတၢင်ႇယိုၼ်ႈလိၵ်ႈ တီႈၶွမ်ႊမသျိၼ်ႊၵၢၼ်လိူၵ်ႈတင်ႈ တီႈၼေႇပျီႇတေႃႇ ၊ လွင်ႈပႃႊတီႊသၢင်ႇသီႈ (USDP) ဢမ်ႇႁဵတ်းၸွမ်းထမ်း ၵဵဝ်ႇၵပ်းၵၢၼ်သူၼ်းတုမ်ႁႃသဵင် လႄႈ ဢဝ်ၶႅပ်းၵၢင်ၸႂ်လူင်ႈၼႃႈ ။

မိူဝ်ႈဝၼ်းတီႈ 05/01/2016 ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး (SNLD) ၸႄႈဝဵင်းၼမ်ႉၸၢင် ၵႂႃႇတၢင်ႇယိုၼ်ႈလိၵ်ႈတီႈ ၶွမ်ႊမသျိၼ်ႊၵၢၼ်လိူၵ်ႈတင်ႈ ၸိုင်ႈမိူင်းႁူမ်ႈတုမ် (UEC) တီႈၼေႇပျီႇတေႃႇ ၊ ၵဵဝ်ႇၵပ်းလူၺ်ႈ ပႃႊတီႊသၢင်ႇသီႈ (USDP) ႁဵတ်းဢမ်ႇၸွမ်းထမ်း တြႃးသေ ပေႉၵၢၼ်လိူၵ်ႈတင်ႈၵႂႃႇ တီႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း - ၼႆယဝ်ႉ ။


ၵဵဝ်ႇၵပ်းလွင်ႈၼႆႉ ႁူဝ်ပဝ်ႈ ပႃႊတီႊႁူဝ်သိူဝ် (SNLD) ၸႄႈဝဵင်းၼမ်ႉၸၢင် ၸၢႆးၸေႃႇဝိၼ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈ - လႆႈၵႂႃႇယိုၼ်ႈလိၵ်ႈမႃးမိူဝ်ႈဝႃး (05/01/2016) ၊ ပေႃးဝၼ်းတီႈ 12/01/2016 ဝၢႆးဝၼ်းယၢမ်း 1 မူင်းၶိုင်ႈၼႆႉ တေလႆႈၵႂႃႇၶိုၼ်ႈလုမ်းတြႃးသေ တေလႆႈႁွင်ႉၵႂႃႇပႃး ၽူႈတၢင်ၼႃႈ (ၽူႈတၢင်ဝႃႈၵႂၢမ်း) ၵႂႃႇၸွမ်း ။ ဢၼ် လႆႈၵႂႃႇတၢင်ႇယိုၼ်ႈလိၵ်ႈၼႆႉ ယွၼ်ႉပိူဝ်ႈဝႃႈ မိူဝ်ႈၼႃႈပၢင်လိူၵ်ႈတင်ႈၼၼ်ႉ ပႃႊတီႊသၢင်ႇသီႈ (USDP) ၽွင်းတႅၼ်းသၽႃးၵူၼ်းမိူင်း ဢူးထေးလုၼ်ႇ ႁွင်ႉဢူးတီႇလူင်း ၸႂ်ႉငိုၼ်းၵွင်ၵၢင်ၵမ်ႉၸွႆႈသၽႃး 1,000 သႅၼ်သေ ဢဝ်ၵႂႃႇၸွႆႈထႅမ်ၵူၼ်းဝၢၼ်ႈ ၼႂ်းဢိူင်ႇမၢၵ်ႇမူင်ႈမူၼ်းလႄႈတၢင်း ဝၢၼ်ႈၵုင်းသႃႇၸိူဝ်းၼႆႉ ။


သိုပ်ႇလၢတ်ႈဝႃႈ - မၼ်းၵႂႃႇၸွႆႈထႅမ် ႁဵတ်းပၼ်ၶူဝ် ၊ သဵၼ်ႈတၢင်း ၊ သဝ်ၾႆးၾႃႉ ႁႂ်ႈၵူၼ်းဝၢၼ်ႈလႆႈၾႆးၾႃႉ ၸိူဝ်းၼႆႉသေလၢတ်ႈဝႃႈ - ႁဝ်းၸွႆႈထႅမ်ပၼ်သူၵူၼ်းဝၢၼ်ႈ ၊ ၵုၼ်းမုၼ်ႁဝ်းမီးၼိူဝ်သူယႂ်ႇၼမ် ၊ ၵွပ်ႈၼၼ် ပေႃးထိုင်ပၢင်လိူၵ်ႈတင်ႈမႃး ႁႂ်ႈတွတ်ႈၶႅပ်းပၼ်ႁဝ်း ၊ ၸႂ်ႉလၢႆးၼႆႉ ဢၼ်ၼိုင်ႈ ။ ထႅင်ႈလွင်ႈၼိုင်ႈၵေႃႈ ပဵၼ်လွင်ႈဢဝ်ၶႅပ်းၵၢင်ၸႂ်လူင်ႈၼႃႈ ဢၼ်ၼမ်လူၼ်ႉလိူဝ် - ဝႃႈၼႆ ။


ပၢင်လိူၵ်ႈတင်ႈပတ်းပိုၼ်ႉၸိုင်ႈမိူင်း (ဝၼ်းတီႈ 08/11/2015) ၼႂ်းၸႄႈဝဵင်းၼမ်ႉၸၢင်ၼႆႉ ပႃႊတီႊၸိူဝ်းၶေႉၶႅင်ႇၵၢၼ်လိူၵ်ႈတင်ႈ မီး 4 ပႃႊတီႊ ။ ၼႂ်းၼၼ်ႉမီး ပႃႊတီႊသၢင်ႇသီႈ (USDP) ၊ ပႃႊတီႊႁူဝ်သိူဝ် (SNLD) ၊ ပႃႊတီႊသိူဝ်ၽိူၵ်ႇ (SNDP) ၊ ပႃႊၼူၵ်ႉယုင်း (NLD) ၊ ပႃႊတီႊၽွမ်ႉႁူမ်ႈ ၻီႊမူဝ်ႊၶရႅတ်ႊတိၵ်ႊ (မျၢၼ်ႇမႃႇ) UDP ၸိူဝ်းၼႆႉ ။


တီႈႁူင်းတွတ်ႈၶႅပ်းၵၢင်ၸႂ် ၼႂ်းတပ်ႉသိုၵ်းၼႆႉ ၶႅပ်းၵၢင်ၸႂ်ၼႆႉ မၼ်းၸႂ်ႉဝႆႉလၢႆးၵူတ်ႉလၢႆးငေႃး ။ ယူႇတီႈႁဝ်းၶႃႈသေ ဢမ်ႇႁၢၼ်ႉၸႂ် ။ ၼႂ်းတပ်ႉသိုၵ်းၼႆႉ သဵၼ်ႈမၢႆႁူဝ်ၵူၼ်းဢၼ်မီးသုၼ်ႇတွတ်ႈၶႅပ်းၵၢင်ၸႂ်လႄႈ  ၵူၼ်းဢၼ်မႃးတွတ်ႈၶႅပ်းၵၢင်ၸႂ် မၼ်းဢမ်ႇၽဵင်ႇၵၼ် ။ မိူၼ်ၼင်ႇ တီႈၼႂ်းသိုၵ်းၼႆႉ ၵူၼ်းသိုၵ်းဢၼ်ၵႂႃႇယူႇတီႈ ၵုၼ်ႁဵင်ၵေႃႈ ၶႅပ်းၵၢင်ၸႂ်ၶဝ်မႃးၶိုၼ်ႈတီႈၼမ်ႉၸၢင် ။ တီႈတႄႉမၼ်း တီႈၵုၼ်ႁဵင်ၵေႃႈ ၶဝ်တွတ်ႈၶႅပ်းယူႇ - ဢူးၼေႇၸေႃႇၼၢႆႇ လၢတ်ႈ ။


မိူၼ်ၸိူင်ႉၼင်ႇ ၽူႈမီးပုၼ်ႈၽွၼ်း ပၢင်တွတ်ႈၶႅပ်းၵၢင်ၸႂ်ၼႂ်းသိုၵ်းၼႆႉ မၼ်းၵေႃႉလဵဝ်ၵူၺ်း တွၵ်ႇၸုမ်ႈသေသႂ်ႇပၼ်ၵႂႃႇတင်းမူတ်း။ ၵဵဝ်ႇၵပ်းလွင်ႈၼႆႉ ႁဝ်းၶႃႈဢမ်ႇႁၢၼ်ႉၸႂ် ။ ၵွပ်ႈၼၼ်လႄႈ လႆႈတႅမ်ႈလိၵ်ႈထိုင် ၶွမ်ႊမသျိၼ်ႊ ၵၢၼ်လိူၵ်ႈတင်ႈယဝ်ႉ - ဢူးၼေႇၸေႃႇၼၢႆႇ လၢတ်ႈ ။


တီႈၸႄႈဝဵင်းၼမ်ႉၸၢင်ၼႆႉ ယွၼ်ႉၶႅပ်းၵၢင်ၸႂ်ဢၼ်ဢမ်ႇပဵၼ်ထမ်း ၊ ၶႅပ်းၵၢင်ၸႂ်ၵူတ်ႉငေႃးတေႃႇၵၼ်သေ ပႃႊတီႊသၢင်ႇသီႈ လႆႈပေႉၵႂႃႇၵမ်ႈၼမ် ။ ၵူၺ်းၵႃႈ ပေႉဝႆႉသေတႃႉ တၢင်ႇပႃႊတီႊၸိူဝ်းၼၼ်ႉ ဢမ်ႇယွမ်းလူင်းလၢႆးမိုဝ်းယွမ်းၵၢၼ်ႉပၼ်  ၸွမ်းၼင်ႇပိူင်ဝႅပ်ႊၾွမ်ႊမၢႆ 19 ။


ပၢင်လိူၵ်ႈတင်ႈ ၼႂ်းၸႄႈဝဵင်းၼမ်ႉၸၢင်ၼႆႉ ပႃႊတီႊႁူဝ်သိူဝ် (SNLD) ပေႉ 1 တီႈၵူၺ်း ။ လိူဝ်သေၼၼ်ႉ ပဵၼ်သၢင်ႇသီႈတင်းမူတ်း။ ၼႂ်းၸႄႈဝဵင်းၼမ်ႉၸၢင်ၼႆႉ သင်ဢမ်ႇၵူတ်ႉၵႅၵ်းတေႃႇၵၼ်ၸိုင် ဢၼ်တေပေႉၼႆႉ ပဵၼ်ပႃႊတီႊၼူၵ်ႉယုင်း (NLD) လႄႈ ပဵၼ်ပႃႊတီႊႁူဝ်သိူဝ်ၵူၺ်း - ဢူးၼေႇၸေႃႇၼၢႆႇ ယၢမ်ႈလၢတ်ႈၼင်ႇၼႆ ။


ႁူဝ်ႁုပ်ႈၶႅပ်းၵၢင်ၸႂ် ဝဵင်းၼမ်ႉၸၢင် ပၢင်လိူၵ်ႈတင်ႈ 08/11/2015

ပႃႊတီႊ/သၽႃး	SNLD	SNDP	USDP	NLD	UDP
သၽႃးၸိူဝ်ႉၸၢတ်ႈ	12215	1780	14770	9129	1039
သၽႃးၵူၼ်းမိူင်း	12388	2013	14211	8529	1030
သၽႃးၸႄႈမိူင်းမၢႆ1	5078	948	9989	1431	597
သၽႃးၸႄႈမိူင်းမၢႆ2	7840	763	4639	2719	348