ၸုမ်းၶႅၵ်ႇလီပၢင်ၸႃႉၼမ်ႉၶူင်း တေလူင်းပိုၼ်ႉတီႈၸွႆႈထႅမ်ၵူၼ်းထူပ်းၽေးသိုၵ်းၼႂ်းၸိုင်ႈတႆး ပွတ်းၵၢင်သေ တေၵဵပ်းပႃးၶေႃႈမုလ်း ဢၼ်ၵူၼ်းမိူင်းလႆႈထုၵ်ႇၽေးတုၵ်ႉယၢၵ်ႈၵွတ်းၽၢၼ် ယွၼ်ႉပၢင်တိုၵ်း ။

ဝၼ်းတီႈ 07/01/2016 ၸုမ်းၶႅၵ်ႇလီပၢင်ၸႃႉၼမ်ႉၶူင်းဝဵင်းတူၼ်ႈတီး တေလူင်းပိုၼ်ႉတီႈ ၸွႆႈထႅမ် ၵူၼ်းထူပ်းၽေးသိုၵ်းၼႂ်းၸိုင်ႈတႆးပွတ်းၵၢင် ၼိုင်ႈမုင်ႉႁေႃႁိူၼ်းလႂ်တေၸွႆႈငိုၼ်းၵမ်ႉထႅမ်ပၼ် 20000 ပျႃးၼင်ႇႁိုဝ်ၵူၼ်းထူပ်းၽေး ပေႃးတေတင်ႈလႆႈၶိုၼ်းႁိူၼ်းယေးၸဝ်ႈၵဝ်ႇ ဢၼ်လႆႈလူႉၵွႆၽွင်းပဵၼ်ပၢင်တိုၵ်း ။


ၼၢင်းၼူၼ်းမူဝ်ၽူႈၸွႆႈထႅမ်ၸုမ်းၼမ်ႉၶူင်းလၢတ်ႈဝႃႈ ၵူၼ်းထူပ်းၽေးသိုၵ်းၼိုင်ႈႁေႃႁိူၼ်း တေၵမ်ႉၸွႆႈငိုၼ်း 20000 ပျႃး ၊ ပေႃးဝႃႈၶဝ်ပွၵ်ႈမိူဝ်းၽႅဝ်တီႈဝၢၼ်ႈၶဝ်ၵေႃႈ ယွၼ်ႉပိူဝ်ႈ ၵူဝ်ဢမ်ႇမီးတႃႇၽုၵ်ႇသွမ်ႈ ၊ တႃႇႁႃ ၊ တႃႇယူႇလႄႈ တႃႇၵိၼ် ။


သိုပ်ႇလၢတ်ႈထႅင်ႈဝႃႈ ၵမ်းၼႆႉႁဝ်းတေၶႂ်ႈႁူႉဝႃႈ ၵူၼ်းၸိူဝ်းမီးယူႇတီႈသုၼ်ၵူၼ်းပၢႆႈၽေး ၼိုင်ႈပၢင်ၼိုင်ႈပၢင်ၼႆႉ ပွၵ်ႈမိူဝ်းၶိုၼ်းဝၢၼ်ႈလႂ် ၊ ပွၵ်ႈမိူဝ်းလၢႆႁိူၼ်း၊ ႁူဝ်ၵူၼ်းလၢႆၵေႃႉတေမိူဝ်းၵဵပ်းဢဝ်သၢႆမၢႆၶဝ် ဝႃႈၼႆ ။


ၵေႃၵမ်ၵၢၼ်ၾၢႆႇလူလွမ်ၵူၼ်းထူပ်းၽေးမိူင်းသူးလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ တေႃႈလဵဝ် ၵူၼ်းပၢႆႈၽေးသိုၵ်းတီႈသုၼ်ၵူၼ်းပၢႆႈၽေးၼႂ်းၸႄႈဝဵင်းမိူင်းသူႈၼႆႉ ယင်းတိုၵ်ႉၵိုတ်းဝႆႉမွၵ်ႈ 1500 ပၢႆ ပႆႇၸင်ႈပွၵ်ႈမိူဝ်းႁိူၼ်းၽႂ်မၼ်း ပဵၼ်ၵူၼ်းဝၢၼ်ႈၼမ်ႉပႃမုင်း ၊ ၵုင်းၼိမ်လႄႈတႃႈသၢမ်ပူးၸိူဝ်းၼႆႉ ဝႃႈၼႆ ။


ၸုမ်းၶႅၵ်ႇလီပၢင်ၸႃႉၼမ်ႉၶူင်း တေၸႅၵ်ႇၽႄႁဵတ်းသွင်ၸုမ်း တေလူင်းၵဵပ်းသၢႆမၢႆၵူၼ်းထူပ်းၽေးၵူႈဝၢၼ်ႈ ဢၼ်ထူပ်းၽေးသိုၵ်းတင်ႈတႄႇ 06/10/2015 တေႃႇ ႁၢင်လိူၼ် ၼူဝ်ႊဝႅမ်ႊၿိူဝ်ႊ ပီ 2015 ။ ဢၼ်သိုၵ်းမၢၼ်ႈႁႅၼ်းသိုၵ်းလေႃႇတိုၵ်း SSPP/SSA ။