ၽူႈမီးၼမ်ႉၸႂ်လီ ဝဵင်းလၢင်းၶိူဝ်း ၸဝ်ႈၼိုင်ႈ ယုၵ်ႉဢဝ်တီႈလိၼ်သူၼ်ႇတူဝ်ၸဝ်ႈၵဝ်ႇ မွပ်ႈပၼ် ၸုမ်းၼမ်ႉၶူင်း ပူၵ်းသၢင်ႈဢွင်ႈတီႈႁွင်ႈၵၢၼ်မႂ်ႇ ပိူဝ်ႈတႃႇႁူင်းတီႈယူတ်းယႃ ၵူၼ်းမိူင်း ။

ဝၼ်းတီႈ 09/01/2016 ၸၢႆးတႃးလႄႈ ၸၢႆးဝႃႇလိင်ႇ သွင်ပီႈၼွင်ႉ (ၶႅၼ်ႈတွင်ႉ) ယုၵ်ႉဢဝ်တီႈလိၼ် သွင်လွၵ်း ႁူမ်ႈ 100 x 100 ထတ်း ဢၼ်မီးတီႈပွၵ်ႈဝၢၼ်ႈတႂ်ႈၼၼ်ႉ ယုၵ်ႉမွပ်ႈပၼ် ၸုမ်းၼမ်ႉၶူင်း မႃးပၵ်းဢွင်ႈတီႈႁူင်းႁွင်ႈၵၢၼ်ၼႂ်းဝဵင်းလၢင်းၶိူဝ်း ။


ၸၢႆးတႃး လၢတ်ႈဝႃႈ ၸုမ်းၼမ်ႉၶူင်းပရႁိတၼႆႉ တေႃႈလဵဝ် ဢွင်ႈတီႈၶဝ်ပႆႇမီး ယွၼ်ႉၼၼ်ၸင်ႇယုၵ်ႉဢဝ်တီႈလိၼ်သူၼ်ႇတူဝ်ႁဝ်းၶႃႈ မွပ်ႈပၼ်။ လွင်ႈဢွင်ႈတီႈလိၼ်ၼႆႉ သင်ဝႃႈ မီးႁူဝ်ၶေႃႈမၼ်းမႃးထႅင်ႈၵေႃႈ တေယုၵ်ႉမွပ်ႈပၼ်ထႅင်ႈ သင်ဝႃႈ ပေႃးပဵၼ်ႁလွင်ႈၶွင်ၸုမ်းၸိူဝ်း တေႁဵတ်းၵၢၼ်ၸွႆႈထႅမ် ႁႂ်ႈၵူၼ်းမိူင်းမီးၽွၼ်းလီၼႆၸိုင် ၸုမ်းၽႂ်မႃးၵေႃႈ တိုၼ်းတေယုၵ်ႉမွပ်ႈတီႈလိၼ် ပိူဝ်ႈတႃႇပဵၼ်ဢွင်ႈတီႈၸႂ်ႉၵၢၼ်ယူႇ ဝႃႈၼႆ ။


ဢွင်ႈတီႈႁွင်ႈၵၢၼ်ၸုမ်းၶႅၵ်ႇလီပၢင်ၸႃႉ ၼမ်ႉၶူင်း ဢၼ်လႆႈပိုတ်ႇတီႈလၢင်းၶိူဝ်းၼႆႉ မီးႁူဝ်ပဝ်ႈ ပဵၼ်ၸၢႆးၵျေႃႇထေး ၊ ၵႅမ်ႁူဝ်ပဝ်ႈ ၼၢင်းသူၺ်ႇထေး ၊ ၵႅမ်ႁူဝ်ပဝ်ႈ ၸၢႆးမွင်ႇ ၊ ၾၢႆႇၵဵပ်းၶေႃႈမုလ်း မၢဝ်ႇသူၺ်ႇပီႇ ။


မၢဝ်ႇသူၺ်ႇပီႇ ၾၢႆႇၵဵပ်းၶေႃႈမုလ်း ၸုမ်းၶႅၵ်ႇလီပၢင်ၸႃႉ ၼမ်ႉၶူင်း လၢတ်ႈဝႃႈ တေႃႈလဵဝ် တီႈလိၼ် တႃႇတေပူၵ်းသၢင်ႈဢွင်ႈတီႈႁဵတ်းၵၢၼ်ၼၼ်ႉ ၸၢႆးတႃးလႄႈ ၸၢႆးဝႃႇလိင်ႇ ပဵၼ်ၸဝ်ႈတႃႇၼ ယုၵ်ႉတီႈလိၼ်သူၼ်ႇတူဝ်ၶဝ်ပၼ် ၸုမ်းၼမ်ႉၶူင်း ႁဝ်းၶႃႈယဝ်ႉ တႃႇတေသၢင်ႈဢွင်ႈတီႈႁွင်ႈၵၢၼ်ၼႆႉ တေႃႈလဵဝ် တိုၵ်ႉႁၢင်ႈႁႅၼ်းဝႆႉယူႇ ၊ ပေႃးယဝ်ႉ တေလဝ်ႈယိုၼ်ႈထိုင်ငဝ်ႈငုၼ်းတီႈတူၼ်ႈတီးသေၵွၼ်ႇ ၸင်ႇတေပူၵ်းသၢင်ႈႁဵတ်းၵႂႃႇ ဝႃႈၼႆ ။


ၸုမ်းၶႅၵ်ႇလီပၢင်ၸႃႉ ၼမ်ႉၶူင်း ဢၼ်လႆႈပိုတ်ႇဝႆႉ ႁွင်ႈၵၢၼ်ငဝ်ႈငုၼ်းလူင် တီႈဝဵင်းတူၼ်ႈတီး၊ ၵိင်ႇၽႄႁွင်ႈၵၢၼ် ဢၼ်လႆႈပိုတ်ႇၸွမ်းၸႄႈဝဵင်းသမ်ႉ ႁၢႆးၵႆႇ ၊ ၵႃလိ ၊ မိူင်းၼွင် ၊ မိူင်းသူႈ ၊ လၢင်းၶိူဝ်း ၊ ဝၢၼ်ႈၼႃးၵူင်း ၊ မိူင်းၼၢႆး ၊ ၵဵင်းတွင်း ၊ မိူင်းပၼ်ႇ ၊ လၢႆးၶႃႈ ၊ ၵေးသီး ၊ ၵုၼ်ႁဵင် ၸဵမ်ၸိူဝ်းၼႆႉ ။ ၸွႆႈထႅမ်ပၼ် ၵၢၼ်လူႉၵၢၼ်တၢႆ ၽူႈထူပ်းၽေး သၽႃဝ ၊ ၽေးသိုၵ်း ၽေးသိူဝ် ၸိူဝ်းၼႆႉ ။