ၽဵင်းၵႂၢမ်းမႂ်ႇ ၸၢႆးၽွၼ်းလီ ဢၼ်ဢွၵ်ႇမႂ်ႇသႂ်ႇၸိုဝ်ႈႁိၵ်ႈႁွင်ႉဝႃႈ “ ၵွပ်ႈၸၢႆးၶႂ်ႈႁၼ်သူ ” တႅမ်ႈ / ႁွင်ႉ / လမ်ႇသဵင် တူဝ်ၵဝ်ႇၼၼ်ႉ ဢွၵ်ႇမႃးယဝ်ႉ ၸဵမ်မိူဝ်ႈပီၵၢႆ (2015)သေတႃႉ တေႃႇထိုင်မိူဝ်ႈလဵဝ် ၸွမ်းႁၢၼ်ႉၶၢႆၶႅပ်း / ၽႅၼ်ႇၽဵင်းၵႂၢမ်းတႆး လၢႆလၢႆတီႈ ဢမ်ႇမီးဝၢင်းၶၢႆ ။ လူင်းတိုၼ်း ႁွင်ႉႁဵတ်းဢွၵ်ႇမႃး တႃႇၸႅၵ်ႇပၼ်လၢႆၵူၺ်း ။

ႁၢင်ႈၼႃႈသိူဝ်ႈလႄႈလင်ၽႅၼ်ႇ ၶႅပ်းၽဵင်းၵႂၢမ်း သုတ်းတီႈမွၵ်ႇႁူဝ်ၸႂ်

ႁၢင်ႈၼႃႈသိူဝ်ႈလႄႈလင်ၽႅၼ်ႇ ၶႅပ်းၽဵင်းၵႂၢမ်း ၵွပ်ႈၸၢႆးၶႂ်ႈႁၼ်သူ

ၽဵင်းၵႂၢမ်း Karaoke လႄႈ Music Video ၶွင်ၸၢႆးၽွၼ်းလီၼႆႉ တႄႇပိုၼ်ၽႄႈတၢင်း YouTube လႄႈ ဢဝ်တၢင်ႇၶိုၼ်ႈၼိူဝ် Facebook ၵူၺ်း ။ ပေႃးတႅမ်ႈလိၵ်ႈတႆး ယူႊၼီႊၶူတ်ႊ လူင်းၼႂ်းယူႊထုပ်ႊ (YouTube) ဝႃႈ ၸၢႆးၽွၼ်းလီ ၼႆၵေႃႈႁၼ်ဢွၵ်ႇမႃးယဝ်ႉ ။


ၵဵဝ်ႇၵပ်းၵၢၼ်ပိုၼ်ၽႄႈၽဵင်းၵႂၢမ်းၼႆႉ မွၵ်ႈၼႂ်းၵၢင်ပီ 2015 ၼၼ်ႉ လႆႈဢတ်းၽႅၼ်ႇ DVD တင်းၼမ်မွၵ်ႈ 150 ပၢႆသေ ဢဝ်ၸႅၵ်ႇပၼ်လၢႆ တီႈဢူၺ်းၵေႃႉဢူၺ်းသေႈ ၸိူဝ်းႁူႉၸၵ်းမိုတ်ႈၵိုဝ်းၸမ်ၸႂ်ၵၼ် ၊ လုၵ်ႈၸုမ်းၼႂ်း ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ၸိူဝ်းၼႆႉ ။ ၼွၵ်ႈသေၼၼ်ႉ မိူဝ်ႈပၢင်ပွႆးလူႇတၢၼ်းၶဝ်ႈဝႃႇသႃ တီႈဝတ်ႉၵူႇတဝ်ႈ ဝဵင်းၵဵင်းမႆႇ မိူင်းထႆး ၊ တၢင်းၵေႃလိၵ်ႈလၢႆး ႁွင်ႈၵၢၼ်ၾၢႆႇ IT ႁပ်ႉလူင်းၾွၼ်ႊယူႊၼီႊၶူတ်ႊတႆး (Shan Unicode) ၼႂ်းၶွမ်ႊၽိဝ်ႊတိူဝ်ႊ၊ ၼႂ်းၶိူင်ႈၾူၼ်ႊမိုဝ်းထိုဝ် ပၼ်ပီႈၼွင်ႉတႆး ၼၼ်ႉၵေႃႈ လႆႈၸႅၵ်ႇပၼ်ပီႈၼွင်ႉတႆး ၸိူဝ်းမႃးလူင်းၾွၼ်ႉတႆးၶဝ်ၵႂႃႇ တင်းၼမ် ။


ၼႂ်းၽႅၼ်ႇၽဵင်းၵႂၢမ်း “ ၵွပ်ႈၸၢႆးၶႂ်ႈႁၼ်သူ ” ၼႆႉ တင်းမူတ်းမီးၽဵင်းၵႂၢမ်း 8 ႁူဝ် (ပုၵ်ႈ)- 1. ၵွပ်ႈၸၢႆးၶႂ်ႈႁၼ်သူ ။ 2. ဝဵင်းၶူဝ်ၶမ်း (ၶူဝ်လမ်) ။ 3. ၵွင်းမူးလူင်ပေႃႇၵျူဝ်ႇလႄႈ ပီႈၼွင်ႉမိူင်းသီႇပေႃႉ ။ 4. သီႇယႅၵ်ႈၾႆးလႅင် ၵဵင်းမႆႇ ။ 5. ၽြႃႉထၢတ်ႈလွႆသုထဵပ်ႈ ၵဵင်းမႆႇ ။ 6. ယွၼ်းႁၵ်ႉၼွင်ႉၼႂ်းၸႂ် ။ 7. ၽဝတႆးတူၵ်းမိူင်းထႆး ။ 8. မႂ်ႇသုင်ၶႃႈပီႈၼွင်ႉ ၸိူဝ်းၼႆႉ ။ ဢွၼ်ၼႃႈၼႆႉ လႆႈႁဵတ်းဝႆႉ 10 ႁူဝ် ပႃးတင်းၽဵင်းၵႂၢမ်း မႄႈၼမ်ႉပၢင်လႄႈပီႈၼွင်ႉၵႃလိ - ၵုၼ်ႁဵင် ၊ ဢိၵ်ႇ ၼမ်ႉၶူင်းႁွင်ႉႁႆႈ ။ ၵူၺ်းၵႃႈ ဢိင်ၼိူဝ်ၶွမ်ႊသမ်ႉမီးပၼ်ႁႃလႄႈဢဝ်ၽဵင်းၵႂၢမ်း 2 ႁူဝ်ၼႆႉႁၢႆၵႂႃႇ ၊ ၵူႈၶိုၼ်းဢမ်ႇလႆႈ ။ ၸင်ႇလႆႈၵိုတ်းယင်ႉဝႆႉသေ ဢွၵ်ႇမႃး 8 ႁူဝ်ၼႆႉဢွၼ်တၢင်း ။


ၽဵင်းၵႂၢမ်းၼႆႉ ဢမ်ႇဢတ်း / ပမ်ႊ ပဵၼ်ၽႅၼ်ႇသေတမ်းဝၢင်းၶၢႆ ၸွမ်းႁၢၼ်ႉၶၢႆၶႅပ်းၽဵင်းၵႂၢမ်းမိူၼ်ၼင်ႇၵူႈပွၵ်ႈ ။ ၸႂ်ႉႁၢင်ႈၼိမ် ႁၢင်ႈတူင်ႉ ဢၼ်လႆႈထၢႆႇမႃးၸိူဝ်းၼၼ်ႉသေ တတ်းတေႃႇဢဝ်ႁင်းၵူၺ်း ၊ ဢမ်ႇၸၢင်ႈၽႂ်တတ်းတေႃႇပၼ် ။ ႁၢင်ႈၼိမ် ၵမ်ႈၼမ်ၸႂ်ႉႁၢင်ႈ ၸေႊၻီႊ / ၵွင်းမူးလူင်ပေႃႇၵျူဝ်ႇ (မေႃႇၵိူဝ်) မိူင်းသီႇပေႃႉ ။ ႁၢင်ႈတူင်ႉသမ်ႉ ၵမ်ႈၼမ် ပဵၼ်ၵၢၼ်တူင်ႉၼိုင် ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ဢိၵ်ႇ ၼုမ်ႇႁၢႆးၸၢႆးယိင်း ၼႂ်းၵေႃလိၵ်ႈလၢႆး ။ ၽဵင်းၵႂၢမ်းမၢင်ႁူဝ် ယင်းၸႂ်ႉႁၢင်ႈ မိူဝ်ႈၽွင်းၶိုၼ်ႈႁွင်ႉၵႂၢမ်း ၼိူဝ်ၶဵင်ႇႁွင်ႉၵႂၢမ်း မိူဝ်ႈပၢင်ပွႆးပီမႂ်ႇတႆး 2109 တီႈဝတ်ႉၵူႇတဝ်ႈ ဝဵင်းၵဵင်းမႆႇ ပႃးၸွမ်းလူးၵွၼ်ႇ ။


လွင်ႈတၢင်းဢၼ်ၶႅပ်းၽႅၼ်ႇၽဵင်းၵႂၢမ်း (Album) ၼႆႉ ဢမ်ႇလႆႈပမ်ႊ ပဵၼ်ၽႅၼ်ႇသေ ဢွၵ်ႇမႃးတမ်းဝၢင်းၶၢႆၼၼ်ႉ ၵွပ်ႈဝႃႈ ဢမ်ႇပေႃးႁွင်ႉမၢၵ်ႇလွင်ႈႁၵ်ႉလႄႈ ၵၢၼ်ဝၢၼ်ႈၵၢၼ်မိူင်းၼမ် ။ ဝူၼ်ႉဝႃႈတေဢမ်ႇထုၵ်ႇမႅၼ်ႈႁူဝ်ၸႂ်ၵူၼ်းၼုမ်ႇၶဝ်ၵႃႈႁိုဝ် ။ သမ်ႉႁွင်ႉမၢၵ်ႇ ၽြႃႉထၢတ်ႈလွႆသုထဵပ်ႈ မိူင်းၵဵင်းမႆႇ ၊ ၵွင်းမူးလူင်ပေႃႇၵျူဝ်ႇ ၸိူဝ်းၼႆႉလႄႈ ၶႂ်ႈႁႂ်ႈလႆႈႁဵတ်းၵၢၼ်သၢင်ႈတၢင်းလီ ၼႃးမုၼ်လႄႈ ႁဵတ်းဢွၵ်ႇမႃးၵေႃႈ ၸင်ႇၸႅၵ်ႇပၼ် ပီႈၼွင်ႉၽူႈႁပ်ႉတႃႇၼၶဝ်လၢႆလၢႆၵူၺ်း ။ ၾၢႆႇၼိုင်ႈတၢင်းၼိုင်ႈၵေႃႈ ၵၢၼ်ထၢႆႇႁၢင်ႈမၼ်းလႄႈသင် ၊ ၵၢၼ်တတ်းတေႃႇမၼ်းၸိူဝ်းၼႆႉလႄႈသင် ဢမ်ႇၸႂ်ႈယိင်ႈယႂ်ႇလူင်လၢင် ၊ ပေႃးပီႈၼွင်ႉၶဝ် ႁူမ်ၸူမ်းႁပ်ႉတူၺ်း ႁပ်ႉထွမ်ႇငိၼ်းၽဵင်းၵႂၢမ်းၵူၺ်းၵေႃႈ ပေႃးၸူမ်းလူင်လၢင်ယဝ်ႉ ။


ဢၼ်လႆႈပဵၼ်မႃး ၽႅၼ်ႇၽဵင်းၵႂၢမ်း (Album) ၵွပ်ႈၸၢႆးၶႂ်ႈႁၼ်သူၼႆႉ ၽူႈၶပ်းၶိုင်သဵင်တွႆႇတိုင်ႈ (Music) ပဵၼ်ၸၢႆးၵွင်သိူဝ်း၊ ၽူႈၸွႆႈၶပ်းၶိုင်သဵင်တွႆႇတိုင်ႈ ပဵၼ်ၸၢႆးမဵဝ်းဢွင်ႇ (မႅဝ်းဢွၼ်ႇ) ။ ဢတ်းသဵင်တီႈ ႁွင်ႈတီႉသဵင် HD musicroom Studio ၵဵင်းမႆႇ မိူင်းထႆး ။


ဢၼ်လႆႈႁွင်ႉဢွၵ်ႇမႃးၽဵင်းၵႂၢမ်းၼႆႉ ဢမ်ႇထၢၼ်ႇမီႈၵေႃႈၶီႈၶင်ႈ ၊ ၸွမ်းၼင်ႇလၢႆးၼူၵ်ႉၸွၵ်ႇပေႉသဵၼ်ႈၶႃး - ၸၢင်ႉငႃးပေႉတုမ်လူင်ၼၼ်ႉ ယွၼ်းႁဵတ်းၼူၵ်ႉၸွၵ်ႇမႅၵ်ႇသဵၼ်ႈၶႃးသေ မီးယိူင်းဢၢၼ်း ပိူဝ်ႈတႃႇဢဝ်ၵၢၼ်ပၢႆးမွၼ်း ႁၵ်ႉသႃပႂ်ႉပႃးဝႆႉၽႃသႃၵႂၢမ်းလၢတ်ႈ ၸိူဝ်ႉၶိူဝ်းႁဝ်းၵေႃႈပိူင်ၼိုင်ႈ ။ ဢၼ်လႆႈႁွင်ႉၽဵင်းၵႂၢမ်းမၢၵ်ႇ မိူင်း / ဝဵင်း ၊ တီႈထွတ်ႈမျၢတ်ႈတၢင်းသႃသၼႃပုတ်ႉထၸိူဝ်းၼႆႉ ပိူဝ်ႈတႃႇႁႂ်ႈပဵၼ်ၵၢၼ်တိုၵ်းသူၼ်းၵူၼ်းတင်းၼမ် ႁဵတ်းၵၢၼ်တၢင်းလီၼႃးမုၼ် ဢၼ်ပဵၼ်ၵၢၼ်ပႂ်ႉပႃးသႃသၼႃၵေႃႈပိူင်ၼိုင်ႈ ။


ဢွၼ်ၼႃႈတေဢွၵ်ႇၽဵင်းၵႂၢမ်း “ ၵွပ်ႈၸၢႆးၶႂ်ႈႁၼ်သူ ” Karaoke #2  (ၼႂ်းပီ 2015) ၼႆႉ ၽွင်းႁၢင်ပီ 2008 ယၢမ်ႈဢွၵ်ႇမႃးယဝ်ႉ Karaoke #1 ၸိုဝ်ႈႁွင်ႉဝႃႈ “ သုတ်းတီႈမွၵ်ႇႁူဝ်ၸႂ် ”။ ၵူၺ်းၵႃႈ မၢႆ 1 ၼႆႉမီးတၢင်းယူပ်ႈယွမ်းၼမ် ၊ ၵူၼ်းႁဵတ်းသဵင်တွႆႇတိုင်ႈ (Music) ပဵၼ်ၵူၼ်းထႆး ၊ ၸႂ်ႉၶၢဝ်းယၢမ်းဢေႇ ၊ ၵူၼ်းႁၢင်ႈၶိူင်ႈတႅင်ႇသဵင် (Mix) ၽဵင်းၵႂၢမ်းၵေႃႈ ပဵၼ်ၵူၼ်းထႆး ။ ႁႅင်းငိုၼ်းတွင်း ဢၼ်လူင်းတိုၼ်းၵူႈလွင်ႈလွင်ႈၵေႃႈဢေႇ ။ ၼွၵ်ႈသေၼၼ်ႉ မိူဝ်ႈပၢၼ်ၶႅပ်းၸၢၵ်ႈ (Tape) ၼၼ်ႉၵေႃႈ ယၢမ်ႈဢွၵ်ႇမႃးၶႅပ်းၼိုင်ႈၼင်ႇၵဝ်ႇ ။


မိူဝ်းၼႃႈၼႆႉ ၸွမ်းၼင်ႇဢဵၼ်ႁႅင်းတူဝ်ၵဝ်ႇမီးၼၼ်ႉ တေၶတ်းၸႂ်သႂ်ႇႁႅင်း ၵႂႃႇထႅင်ႈယူႇ ။ မိူဝ်ႈလဵဝ် ယိူင်းဢၢၼ်းဝႆႉ ပိူဝ်ႈတႃႇဢွၵ်ႇမႃးၽဵင်းၵႂၢမ်းၸိုဝ်ႈ “ ၼမ်ႉၶူင်းႁွင်ႉႁႆႈ ” ။ ၽဵင်းၼႆႉ ႁွင်ႉမၢၵ်ႇဝႆႉ ၶိူဝ်းတႆးႁဝ်းၸိူဝ်းတူၵ်းႁွတ်ႈၼွၵ်ႈမိူင်း ၊ ဝၢၼ်ႈပိူၼ်ႈမိူင်းပိူၼ်ႈ ၊ မိူၼ်ၼင်ႇတူၵ်းႁွတ်ႈထိုင်မိူင်းထႆးၸိူဝ်းၼႆႉ ။ ႁွင်ႉမၢၵ်ႇလွင်ႈ ၵူၼ်းမိူင်းၽၢတ်ႇယၢၼ်ၸိုင်ႈတႆးသေ ႁဵတ်းႁႂ်ႈၼမ်ႉၶူင်းၸႂ်ထိုင် ပေႃးႁွင်ႇသႅၼ်ႇႁႆႈ ။


ၽဵင်းႁူဝ်ၼႆႉ တီႈတွၼ်ႈသဵင်ၶိုၼ်ႈ တွၼ်ႈႁုၵ်ႉၼၼ်ႉ လၢတ်ႈဝႆႉဝႃႈ - “ ၼမ်ႉၶူင်း လႄႈၶိူဝ်းတႆးႁဝ်း ယူႇသဝ်းမႃးၸွမ်းၵၼ် ၼပ်ႉႁူဝ်ပၢၵ်ႇႁဵင်ပီ မိူဝ်ႈဢၼ်ၶိူဝ်းတႆးပၢႆႈမိူင်းၼႆ ၼမ်ႉၶူင်းယိၼ်းသဝ်ႈမွင် ၼမ်ႉၶူင်းၼမ်ႉတႃၼွင်း ၵွပ်ႈပိူဝ်ႈၶိူဝ်းတႆးႁဝ်း ပဵၼ်မၢၵ်ႇႁူဝ်ၸႂ် လုၵ်ႈႁၵ်ႉဢွၼ်ႇၼမ်ႉၶူင်း ”- ၼႆယဝ်ႉ ။


ၸၢႆးၽွၼ်းလီ (မိူင်းၶူဝ်ၶမ်း)

ဝၼ်းထီႉ 26/01/2016