ၵူၼ်းမိူင်း 500 ပၢႆ ၼႂ်းၸႄႈဝဵင်းၵေးသီး ၊ မိူင်းသူႈ ၸိူဝ်းပၢႆႈၽေးသိုၵ်းမၢၼ်ႈ လေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) ၼၼ်ႉ တေဢမ်ႇပွၵ်ႈယူႇၶိုၼ်းဝၢၼ်ႈ ။

ၵူၼ်းဝၢၼ်ႈၵူၼ်းမိူင်းပၢႆႈၽေးသိုၵ်း ဢၼ်ႁွတ်ႈဝႆႉတီႈ ဝတ်ႉမုၼ်ၸဝ်ႈ တီႈႁၢႆးပႃ

ၵူၼ်းဝၢၼ်ႈၵူၼ်းမိူင်း ၼႂ်းၸိုင်ႈတႆးပွတ်းၸၢၼ်း ၸႄႈတွၼ်ႈလွႆလႅမ် ၸႄႈဝဵင်းၵေးသီး / မိူင်းသူႈ မိုၼ်ႇပၢႆ ၸိူဝ်းထုၵ်ႇၽေးသိုၵ်းသိူဝ် လႆႈပၢႆႈယၢၼ်ႁိူၼ်းယေးတီႈယူႇၸိူဝ်းၼၼ်ႉ တင်ႈတႄႇၵၢင်လိူၼ် ထိုင်ႁၢင်လိူၼ်ၻီႊသႅမ်ႊၿိူဝ်ႊ 2015 မႃး ၊ ဢွၼ်ၵၼ်ပွၵ်ႈမိူဝ်းယူႇၶိုၼ်း ဝၢၼ်ႈၽႂ်ႁိူၼ်းမၼ်း ၼပ်ႉႁူဝ်ႁဵင်ယဝ်ႉသေတႃႉ ၵူၼ်းဝၢၼ်ႈၼမ်ႉပႃမုင်း ၊ ၵုင်းၼိမ် ၸိူဝ်းပဵၼ်ၸၢဝ်းလွႆ တင်း ၸၢဝ်းလီႉသေႃး ႁူဝ်ၵူၼ်း 500 ပၢႆ တေဢမ်ႇ ပွၵ်ႈယူႇၶိုၼ်းဝၢၼ်ႈၶဝ်ယဝ်ႉ - ဝႃႈၼႆ ။


ၵူၼ်းဝၢၼ်ႈ ၼမ်ႉပႃမုင်း ၵုင်းၼိမ် ႁူဝ်ၵူၼ်း 500 ပၢႆ ၸိူဝ်းတေဢမ်ႇပွၵ်ႈယူႇၶိုၼ်း တီႈဝၢၼ်ႈသူၼ်ၸိူဝ်းၼႆႉ ၵမ်ႈၽွင်ႈပိုင်ႈဢိင်ယူႇသဝ်းဝႆႉတီႈ ဝၢၼ်ႈဝႃႉ ဢိူင်ႇဝၢၼ်ႈဝႃႉ ၸႄႈဝဵင်းၵေးသီး။ ၵမ်ႈၽွင်ႈပိုင်ႈဢိင်ယူႇသဝ်းဝႆႉ တီႈႁၢႆးပႃ ဢိူင်ႇႁၢႆးပႃ ၸႄႈဝဵင်းမိူင်းသူႈ။ တီႈဝၢၼ်ႈဝႃႉၼႆႉ ၵူၼ်းပၢႆႈၽေးၶဝ်ၵမ်ႈၼမ် ပွၵ်ႈၶိုၼ်းဝၢၼ်ႈၽႂ်မၼ်း ၵိုတ်းဝႆႉမွၵ်ႈပၢၵ်ႇပၢႆၵူၺ်းသေတႃႉ တီႈႁၢႆးပႃတႄႉ တေႃႇထိုင်မိူဝ်ႈလဵဝ် တိုၵ်ႉၵိုတ်းယူႇဝႆႉႁဵင်ပၢႆ - လႆႈႁူႉၼင်ႇၼႆ ။


“ ၵူၼ်းဝၢၼ်ႈ ၼမ်ႉပႃမုင်း တင်း ၵုင်းၼိမ် ပဵၼ်ၸၢဝ်းလွႆ တင်း လီသေႃး ၊ ၶဝ်ဝႃႈ ဢမ်ႇႁတ်းပွၵ်ႈယူႇၶိုၼ်းဝၢၼ်ႈၶဝ်ယဝ်ႉ။ ဝူဝ်းၵႂၢႆး တႃႇႁဵတ်းႁႆႈႁဵတ်းသူၼ်ၵေႃႈဢမ်ႇမီးယဝ်ႉ ။ ပေႃးလူင်းႁႆႈလူင်းသူၼ်ၵေႃႈ ၵူဝ်ယဵပ်ႇတိူဝ်ႉမၢၵ်ႇဢၼ်သိုၵ်းမၢၼ်ႈမႃးႁၢင်ႈၵၢင်ဝႆႉ ၊ ၵွပ်ႈၼၼ် ၶဝ်ယွၼ်းယူႇၵႂႃႇ ႁဵတ်းၼႆ ထႅင်ႈသွင်ပီၼႆလႄႈႁဝ်းၶႃႈတိုၵ်ႉဢုပ်ႇၵၼ်ယူႇ တေႁဵတ်းႁိုဝ် ၶိုင်ပၼ်ၶဝ် ” - ၼၢင်းၸိင်ႇ ၵူၼ်းၸွႆႈထႅမ်ၵူၼ်းပၢႆႈၽေးသိုၵ်း လၢတ်ႈ ။


ၼႂ်းပီ 2015 တင်ႈတႄႇ လိူၼ်ဢွၵ်ႊထူဝ်ႊၿိူဝ်ႊ တေႃႇထိုင် ႁၢင်လိူၼ်ၼူဝ်ႊဝႅမ်ႊၿိူဝ်ႊ သိုၵ်းမၢၼ်ႈ ႁႅၼ်းသိုၵ်းလေႃႇတိုၵ်း ပႃႊတီႊမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး (SSPP/SSA) ပွတ်း ၵေးသီး မိူင်းၼွင် မိူင်းသူႈ ၊ ၵူၼ်းဝၢၼ်ႈ 25 ဝၢၼ်ႈ ၊ ႁူဝ်ၵူၼ်း မိုၼ်ႇပၢႆ လႆႈပၢႆႈယၢၼ်ႁိူၼ်းယေးတီႈယူႇ ။


“ ၸိူဝ်းဢမ်ႇႁတ်းပွၵ်ႈ ဢမ်ႇၶႂ်ႈပွၵ်ႈၼၼ်ႉ ႁဝ်းၽႅၼ်ၵၢၼ်ဝႆႉ တေၸတ်းတမ်းပၼ်တီႈယူႇၶဝ် ၊ ႁႂ်ႈၶဝ် ၸၢင်ႈလႆႈယူႇသဝ်း ႁဵတ်းၵၢၼ်ႁႃၵိၼ်လဵင်ႉတွင်ႉၵႂႃႇ ၊ ၸိူဝ်းၶႂ်ႈမိူဝ်းၼၼ်ႉၵေႃႈ တေၶပ်းၶိုင်ပၼ် ” - ၽူႈမီးၸၼ်ႉ ႁွင်ႈၵၢၼ်လုမ်းငဝ်ႈငုၼ်း SSPP/SSA ၸဝ်ႈၼိုင်ႈလၢတ်ႈ ။


မိူဝ်ႈႁူဝ်လိူၼ်ၻီႊသႅမ်ႊၿိူဝ်ႊ 2015 ပူၼ်ႉမႃးၼၼ်ႉ ၽူႈၵုမ်းၵမ်ၽႅၼ်ၵၢၼ်သိုၵ်းၶိုၵ်ႉတွၼ်း မၢႆ# 2 ႁွင်ႈၵၢၼ်လူင် ၾၢႆႇၵႅတ်ႇၶႄ ၸွမ်သိုၵ်းယႃႇပျေႉ ႁူပ်ႉဢုပ်ႇ တူဝ်တႅၼ်းတပ်ႉသိုၵ်းၸိုင်ႈတႆး SSPP/SSA တီႈၼေႇပျီႇတေႃႇ ၊ သွင်ၾၢႆႇလႆႈၸႂ်ၵၼ်ဝႃႈ တေထွၼ်တပ်ႉဢွၵ်ႇၼႂ်းပိုၼ်ႉတီႈ ပဵၼ်ပၼ်ႁႃၵၼ်ၼၼ်ႉ တင်းသွင်ၾၢႆႇၼႆသေ ၵၢၼ်လေႃႇတိုၵ်းၵၼ် လႆႈၵိုတ်းၵႂႃႇ ။