ဝၼ်းတီႈ 12/1/2016 ၼႆႉဝဵင်းငဝ်ႈငုၼ်း မိူင်းႁူမ်ႈတုမ်မၢၼ်ႈ ၼေႇပျီႇတေႃႇ တေၸတ်းႁဵတ်းပၢင်ၵုမ်လူင် ငမ်းယဵၼ် ၸၼ်ႉမိူင်းႁူမ်ႈ။ ပၢင်ဢုပ်ႇဢူဝ်းၵၢၼ်မိူင်းၵေႃႈ တေၵပ်းတၢမ်းမႃးပဵၼ်ၶၵ်ႉပဵၼ်တွၼ်ႈ ။ ၼႂ်းတႆး ဢၼ်တေ ၶဝ်ႈႁူမ်ႈ မီးလၢႆမူႇလၢႆၸုမ်း ။ ၼႂ်းၼၼ်ႉ တပ်ႉသိုၵ်ၸိုင်ႈတႆး RCSS/SSA ၵေႃႈၶဝ်ႈပႃးၸုမ်းၼိုင်ႈ ။ ၵွပ်ႈၼၼ် လႄႈ ငဝ်းလၢႆးၵၢၼ်မိူင်း  လႄႈ ယိူင်းဢၢၼ်းသုင်သုတ်း RCSS/SSA မီးသင်ၼႆ ၸုမ်းၶၢဝ်ႇၽူႈတွႆႇႁွၵ်ႈ တိတ်းတေႃႇ တွင်ႈထၢမ် ၸဝ်ႈသိုၵ်းၸၢႆးငိုၼ်း ၽူႈၶၢၼ်ပၢၵ်ႇမူႇၸုမ်း ဝႆႉၼင်ႇၼႆ ။

ထၢမ် - ဢွၼ်တၢင်းသုတ်း ယွၼ်းထၢမ် ၶၢဝ်ႇငၢဝ်းတၢင်း မိူင်းပူးလူင် ( ၸႄႈဝဵင်းမိူင်းပဵင်း ၊ ၸေႈတွၼ်ႈၵဵင်းတုင် ၊ ပွတ်းဢွၵ်ႇၶူင်း ) ၼၼ်ႉ ဝၢႆးလင်ပၢင်တိုၵ်းယဝ်ႉ ၸွင်ႇလႆႈမီးသင်ၵိူတ်ႇၶိုၼ်ႈထႅင်ႈၶႃႈ ?။


တွပ်ႇ - တၢင်ႇပိူင်တႄႉဢမ်ႇမီး ၊ တေႃႈလဵဝ်ၼႆႉ ယဵၼ်ဝႆႉ ၊ ပႆႇမီးၵၢၼ်လႅၵ်ႈလၢႆႈသင်ၶႃႈ ။


ထၢမ် - လွင်ႈတိတ်းတေႃႇၵပ်းသိုပ်ႇၵူၼ်းလူင် သွင်ၾၢႆႇၶႃႈလူး ၊ ပၼ်ႁႃၼႆႉ ဢုပ်ႇဢူဝ်းၵႄႈလိတ်ႈ ၸိူင်ႉႁိုဝ်ဝႆႉ ၽွင်ႈၶႃႈ ?။


တွပ်ႇ - ဢၼ်ၼႆႉ ပေႃးဝၼ်းထီႉ 10/01/2016 တေမီး တႃႇတေၶွတ်ႇၽွတ်ႈ ( ၶွမ်ႊမတီႊပၵ်းတႃပႂ်ႉတူၺ်း Joint Monitoring Committee ) JMC ၸၼ်ႉၸႄႈမိူင်း တီႈၶူဝ်လမ် ။ လွင်ႈၼႆႉၵေႃႈ တေဢဝ်ဢုပ်ႇၵၼ်ပႃးၼႂ်း တီႈပၢင်ၵုမ် မိူဝ်ႈႁူပ်ႉထူပ်းၵၼ် တီႈၶူဝ်လမ် ။ ယဝ်ႉၵေႃႈၼႂ်း JMC ၸၼ်ႉမိူင်းႁူမ်ႈတုမ်ၼႆႉၵေႃႈ ၶဝ်တေႁူပ်ႉ ထူပ်းၵၼ် ၼႂ်း 2-3 ဝၼ်းၼႆႉ ။ လွင်ႈၼႆႉၵေႃႈ တေဢဝ်ဢုပ်ႇပဵၼ်တၢင်းၵၢၼ် ၼႂ်းပၢင်ၵုမ်ပႃးယူႇၶႃႈ ။


ထၢမ် - ဢၼ်တေႁဵတ်း JMC ၼႆႉ လၢႆးဢၼ်သွင်ၾၢႆႇတေၶဝ်ႈပႃးၼႂ်း JMC ၸၼ်ႉၸႄႈမိူင်းၼႆႉ မီးၸိူင်ႉႁိုဝ်ၶႃႈ ?။


တွပ်ႇ - ၸၼ်ႉၸႄႈမိူင်းၼႆႉ ပေႃးၼႂ်းမိူင်းတႆး တေပႃးၾၢႆႇလူင်ပွင်ၸိုင်ႈၽွင်ႈ၊ ၾၢႆႇႁဝ်းၶႃႈ ၶွင်ႊသီႊဢဝ်ၶိုၼ်းၸိုင်ႈတႆး ။ သမ်ႉတေပႃးၾၢႆႇပီႈၼွင်ႉပဢူဝ်း PNLO ၶဝ်ၵေႃႈတေပႃး ။ ၼႂ်းၼၼ်ႉ ၵူၼ်းမိူင်းၵေႃႈတေပႃးၽွင်ႈ ။


ထၢမ် - ၼိုင်ႈၾၢႆႇလၢႆၵေႃႉ ၸွင်ႇပႃႈလႆႈႁူႉၶႃႈ ?။


တွပ်ႇ - တူၺ်းၶၢဝ်ႉၶၢဝ်ႉ ၼိုင်ႈၾၢႆႇတေပဵၼ် 7 ၵေႃႉ ၊ ႁူမ်ႈတေပဵၼ် 14 ၵေႃႉ ၊ ႁူႉၶၢဝ်ႉၶၢဝ်ႉဝႆႉၸိူင်ႉၼၼ်ၶႃႈဢေႃႈ ။


ထၢမ် - မိူဝ်ႈၵမ်းပူၼ်ႉၼၼ်ႉ မိူဝ်ႈၽွင်းတႄႇၵိုတ်းတိုၵ်းၵၼ် ၸၼ်ႉၸႄႈမိူင်းၼၼ်ႉ ၵဵဝ်ႇၵပ်းလွင်ႈ ၶွမ်ႊမတီႊ ပႂ်ႉတူၺ်း ပၢင်တိုၵ်းၼႆႉ လႆႈငိၼ်း RCSS ၶွတ်ႇၽွတ်ႈၵမ်းၼိုင်ႈယဝ်ႉ၊ ဢၼ်ၼၼ်ႉ တေသိုပ်ႇဝႆႉ ၵႂႃႇၸိူင်ႉ ႁိုဝ်ၶႃႈ?။


တွပ်ႇ - ဢၼ်ၼၼ်ႉ ၾၢႆႇႁဝ်းၶႃႈတူဝ်ႈတၼ်းၵူၺ်း ။ မိူဝ်ႈၼၼ်ႉ ၾၢႆႇလူင်ပွင်ၸိုင်ႈပႆႇတူဝ်ႈတၼ်းၼႆလႄႈ ႁဝ်းၵေႃႈဢမ်ႇလႆႈႁဵတ်းၵၢၼ်မႃးတႄႉတႄႉ ၊ လႆႈၶွတ်ႇၽွတ်ႈ ယႃႇဝႆႉယိူင်းဝႆႉၸိူင်ႉၼၼ်ႉၵူၺ်း ။ ၵမ်းၼႆႉတႄႉ ၵွပ်ႈပိူဝ်ႈဝႃႈ လူင်းလၢႆးမိုဝ်း ( ၵၢၼ်ၵိုတ်းတိုၵ်းပတ်းပိုၼ်ႉတူဝ်ႈမိူင်း ) NCA ယဝ်ႉလႄႈ ၸွမ်းၼင်ႇ NCA တတ်းမၵ်းဝႆႉၼၼ်ႉ မၼ်းတေလႆႈၶွတ်ႇၽွတ်ႈ ၊ ၼႂ်းလိူၼ်ၼႆႉတႄႉ တေၶွတ်ႇၽွတ်ႈၸၼ်ႉၸႄႈမိူင်း ၼႂ်းမိူင်းတႆးဢွၼ်တၢင်း ၼႆၶႃႈဢေႃႈ ။ ၼႂ်းၸၼ်ႉမိူင်းႁူမ်ႈတုမ်တႄႉ လႆႈၶွတ်ႇၽွတ်ႈမႃးယဝ်ႉၶႃႈ ။


ထၢမ် - ထႅင်ႈၶေႃႈၼိုင်ႈ ၊ ၵဵဝ်ႇၵပ်းလူၺ်ႈၶေႃႈထတ်းသၢင် သုၼ်ႇတူဝ်ၵေႃႈလီ ၊ ဢမ်ႇၼၼ်ၵေႃႈ မူႇၸုမ်းၵေႃႈလီ ။ လွင်ႈၼႆႉ  ဢမ်ႇႁိုင်ဢမ်ႇၼၢၼ်း ၼႂ်းၵၢင်လိူၼ်ၵျႅၼ်ႊၼိဝ်ႊရီႊ (2016) ၼႆႉ ပေႃးဝၼ်းထီႉ 12 တေႁဵတ်းပၢင်ၵုမ်လူင် လွင်ႈငမ်းယဵၼ်ယဝ်ႉ ၊ ၵွပ်ႈၼၼ် ဝၢႆးၼၼ်ႉသမ်ႉတေပဵၼ်ပၢင်ၵုမ်လူင်ၵၢၼ်မိူင်း ။ ဢၼ်ၼႆႉ ယူႇတီႈ RCSS ၵေႃႈတေၶဝ်ႈပႃးၵမ်းသိုဝ်ႈ ။ လွင်ႈၼႆႉ ယူႇတီႈၾၢႆႇ RCSS သေ တေမီးလွင်ႈတေႃႇလွင်း (သဵတ်ႈၵႃႈသဵတ်ႈႁူဝ် ) ဢုပ်ႇဢူဝ်းၵၢၼ်မိူင်းၸိူင်ႉႁိုဝ် ၊ ယူႇတီႈၾၢႆႇၸိူဝ်ႉၸၢတ်ႈတႆးႁဝ်းသေ ၸွင်ႇပႃႈတူဝ်ႈတၼ်းၶႃႈ ?။


တွပ်ႇ - ဢၼ်ၼႆႉ ယူႇတီႈသုၼ်ႇတူဝ်ထတ်းသၢင်ၶႃႈၼေႃႈ ။ ၵွပ်ႈပိူဝ်ႈဝႃႈ ႁဝ်းၶႃႈႁဵတ်းလၢႆးလုၵ်ႉၽိုၼ်ႉၼႆႉၵေႃႈ ယိူင်းဢၢၼ်းလူင်တႄႉ ႁဝ်းၶႃႈလၢတ်ႈၵၼ်မႃးယူႇတႃႇသေႇဝႃႈ တႃႇလႆႈဢုပ်ႇဢူဝ်းၵၢၼ်မိူင်း ၊ ဢုပ်ႇဢူဝ်းၼိူဝ်ၽိူၼ်သေ ၵႄႈၶႆပၼ်ႁႃ ။ ၵမ်းၼႆႉ ထိုင်မႃးၶၢဝ်းယၢမ်းမၼ်းယဝ်ႉလႄႈ ၾၢႆႇႁဝ်းၶႃႈၵေႃႈ တူဝ်ႈတၼ်းယဝ်ႉ ။ ၸွမ်းၼင်ႇဢၼ်တႃႇတေၵႂႃႇၶဝ်ႈဢုပ်ႇဢူဝ်းၼႆႉၵေႃႈ လုၵ်ႉတီႈမုၵ်ႉၸုမ်းႁဝ်းၶႃႈ လႆႈၶွတ်ႇၽွတ်ႈဝႆႉၸုမ်းဢုပ်ႇဢူဝ်းၵၢၼ်မိူင်း မီး 19 ၵေႃႉ ။ တေဢုပ်ႇသင်ၼႆၼၼ်ႉၵေႃႈ လႆႈႁၢင်ႈႁႅၼ်းဝႆႉၽွင်ႈယဝ်ႉ ။ ယဝ်ႉၵေႃႈ တင်းပႃႊတီႊၵေႃႈလီ ၊ တင်းၸုမ်းဢူၺ်းလီႁဝ်းၶႃႈၵေႃႈလီ ၊ တင်းၵူၼ်းမိူင်းႁဝ်းၶႃႈၵေႃႈလီ ၊ ၸုမ်းတူင်ႇဝူင်းၵူၼ်းၵေႃႈလီ ၊ ႁဝ်းၶႃႈတေဢုပ်ႇသင်ၼႆ ႁဝ်းၶႃႈလႆႈဢုပ်ႇၵၼ်ဝႆႉၶၢဝ်ႉၶၢဝ်ႉယဝ်ႉၶႃႈဢေႃႈ ။


ထၢမ် - ဢၼ် RCSS ၶႂ်ႈလႆႈၶႂ်ႈပဵၼ်ၼႆႉ ပိူင်လူင်မၼ်း သမ်ႉပဵၼ်သင်ၶႃႈ ?။


တွပ်ႇ - ၼင်ႇယိူင်းဢၢၼ်း ဢၼ်ႁဝ်းၶႃႈလၢတ်ႈမႃးတႃႇသေႇၼၼ်ႉ ၊ ၸွမ်းၼင်ႇၵၢပ်ႈပၢၼ်ငဝ်းလၢႆးမိူဝ်ႈလဵဝ် တုၵ်းယွၼ်းၼၼ်ႉ ၶႂ်ႈပဵၼ်မိူင်းႁူမ်ႈတုမ်ၾႅတ်ႊၻရႄႊလ် / မိူင်းႁူမ်ႈတုမ်ၸိုၼ်ႈၸၢင်ႇၼႆ ဢုပ်ႇၵၼ်မႃးယဝ်ႉၶႃႈ ။ ယိူင်းဢၢၼ်းလူင်တႄႉ ႁႂ်ႈဢဝ်လၢႆးၵၢၼ်မိူင်းၵႄႈၶႆၵၢၼ်မိူင်း ၊ ႁႂ်ႈမီးလွင်ႈသုၼ်ႇလႆႈၽဵင်ႇပဵင်းၵၼ် ၊ ပိူင်လူင်မၼ်း ဢၼ်ၼႆႉပဵၼ်လၵ်းဝႆႉၶႃႈဢေႃႈ ။


ထၢမ် - ထႅင်ႈလွင်ႈၼိုင်ႈ ၾၢႆႇၸၢဝ်းၶိူဝ်းၵေႃႈ လႆႈငိၼ်းဝႃႈ ၶႂ်ႈပဵၼ်ပၢင်ၵုမ်လူင်ပၢင်လူင် ၵမ်းထူၼ်ႈ 2 ။ မိူၼ်ၼင်ႇၼၢင်းဢွင်ႇသၢၼ်းၸုၵျီႇ ဢၼ်ပဵၼ်ႁူဝ်ၼႃႈပႃႊတီႊ NLD ဢၼ်ပေႉၵၢၼ်လိူၵ်ႈတင်ႈၼႆႉၵေႃႈ လၢတ်ႈဝႃႈတေႁဵတ်းပၢင်ၵုမ်လူင် 21 ၸူဝ်ႈႁူဝ်ပၢၵ်ႇပီမိူင်း (21st Century)  ဝႃႈၼႆၵေႃႈဝႃႈ ။ ၵွပ်ႈၼႆလႄႈ ပၢင်ၵုမ်ၵမ်းၼႆႉ တေၵႂႃႇႁဵတ်းတီႈၼေႇပျီႇတေႃႇ ။ မၼ်းဢမ်ႇမိူၼ်ၼင်ႇမိူဝ်ႈပီ 1947 ယဝ်ႉလႄႈ ၵမ်ႈၽွင်ႈ ၵေႃႈထတ်းသၢင်ဝႃႈ - တႃႇတေတေႃႇလွင်း ( သဵတ်ႈၵႃႈသဵတ်ႈႁူဝ် ) သုၼ်ႇလႆႈၸိူဝ်ႉၸၢတ်ႈၸၢဝ်းၶိူဝ်းႁဝ်းၼႆႉ မၼ်းတေႁႅင်းဢေႇ ၊ ယွၼ်ႉဝႃႈ မၼ်းဢမ်ႇၸႂ်ႈပိုၼ်ႉတီႈႁဝ်း ။ ၵွပ်ႈၼၼ် ပေႃးဝႃႈႁဝ်းၶႃႈထတ်းသၢင်တူၺ်းၼႆ တႃႇတေတုၵ်းယွၼ်း သုၼ်ႇလႆႈၸၢဝ်းၶိူဝ်း / ၸိူဝ်ႉၸၢတ်ႈတႆးႁဝ်းၼႆႉ ယူႇတီႈသုၼ်ႇတူဝ် (ၸဝ်ႈသိုၵ်းၸၢႆးငိုၼ်း) ႁၼ်ထိုင်ၸိူင်ႉႁိုဝ်ၶႃႈ ?။


တွပ်ႇ - ႁၼ်ထိုင်ဝႃႈ ဢၼ်ၼႆႉမၼ်းပဵၼ်တိုဝ်ႉတၢင်းဢၼ်ၼိုင်ႈ ။ တႃႇတေတေႃႇသူႈဢုပ်ႇၵႂႃႇၵေႃႈ မၼ်းတေလႆႈၸႂ်ႉၶၢဝ်းယၢမ်းပီယၢဝ်းၶၢဝ်းႁိုင် ၊ ၵွပ်ႈပိူဝ်ႈဝႃႈ ပၢင်ၵုမ်လူင်ငမ်းယဵၼ်ၵမ်းၼႆႉ မၼ်းတေႁဵတ်းၸွမ်း သဵၼ်ႈတၢင်း NCA ၵူၺ်း ။ သင်ၸိူဝ်ႉဝႃႈ လူင်ပွင်ၸိုင်ႈမႂ်ႇ ဢွင်ႇသၢၼ်းၸုၵျီႇၶဝ်ၶိုၼ်ႈမႃးၼႆ ၶဝ်ၵေႃႈဝႃႈတေၵႂႃႇၸွမ်းၼႆႉယူႇ ၊ ၵူၺ်းၵႃႈ မၼ်းတေၸၢင်ႈလႅၵ်ႈလၢႆႈ ။ မၼ်းတေလႆႈၸႂ်ႉၶၢဝ်းယၢမ်း ၊ တေလႆႈဢုပ်ႇဢူဝ်းၵၼ်လၢႆၾၢႆႇ ၊ တေလႆႈမီးလွင်ႈယွၼ်ႇယၢၼ်း ၶဝ်ႈႁႃၵၼ် ။ ငဝ်းလၢႆးၵူႈမူႇၵူႈၸုမ်းၼႆႉ မၼ်းၵႃႈလႆႈႁဵတ်းၼၼ်ၵူၺ်း ။ ၵွပ်ႈပိူဝ်ႈဝႃႈ မိူဝ်ႈလဵဝ်ၼႆႉ ၽၵ်းတူမၼ်းပိုတ်ႇမႃးဢိတ်းၼိုင်ႈယဝ်ႉလႄႈ ႁဝ်းၵေႃႈၽိုတ်ႉတူၺ်း ၊ ပေႃးဝႃႈမီးၼမ်ႉၵတ်ႉၼႆၵေႃႈ မၼ်းတေလႆႈၽွင်ႈယူႇ - ႁၼ်ထိုင်ၸိူင်ႉၼႆၶႃႈဢေႃႈ ။


ထၢမ် - ၵမ်ႈၽွင်ႈၵေႃႈဝႃႈ ၾၢႆႇလူင်ပွင်ၸိုင်ႈ ၊ ပိူင်လူင်မၼ်းၾၢႆႇသိုၵ်းမၢၼ်ႈ (တပ်ႉမတေႃႇ) ၶဝ်ၼႆႉ ၽႅၼ်ၵၢၼ်လပ်ႉလပ်ႉၶဝ် တိုၼ်းၶႂ်ႈႁႂ်ႈဝၢင်းၶိူင်ႈၵူၺ်း ၊ ၶႂ်ႈႁႂ်ႈႁဵတ်း DDR ၵူၺ်း ၊ ၵူၺ်းၵႃႈ ဝၢႆးမႃးၵေႃႈဝႃႈတေႁဵတ်းၵႂႃႇ SSR ယူႇၼႆ ။ ၵဵဝ်ႇၵပ်းၵၢၼ်ယိပ်းၶိူင်ႈၵွင်ႈၵၢင်ႇၼႆႉဢၼ် RCSS ဝူၼ်ႉဝႆႉတီႈသုတ်း ထိုင်မွၵ်ႈၸၼ်ႉလႂ်ၶႃႈ ?။


တွပ်ႇ - မိူဝ်ႈလႂ်ဝႃႈ ႁဝ်းၶႃႈလႆႈၶေႃႈတူၵ်းလူင်းၵၢၼ်မိူင်းယဝ်ႉယႃႇလီယဝ်ႉ ႁဝ်းၸင်ႇၵွႆႈဢုပ်ႇဝႃႈ ၵဵဝ်ႇၵပ်းတပ်ႉႁဝ်းၼႆႉ ႁဝ်းတေႁဵတ်းၸိူင်ႉႁိုဝ် ၊ ႁဝ်းၶႃႈတႄႉတႅပ်းတတ်းဝႆႉၸိူင်ႉၼႆ ။ ၼႂ်း NCA ၵေႃႈ မၼ်းတႅမ်ႈဝႆႉတႅၵ်ႇလႅင်းလီယူႇဝႃႈ ၵဵဝ်ႇၵပ်းတေၶွၼ်ႈတပ်ႉ ၊ တေႁဵတ်း DDR, SSR ၼႆႉ မိူဝ်ႈလႂ်သွင်ၾၢႆႇလႆႈၸႂ်ငူပ်ႉငီႉၵၼ်လီယဝ်ႉ ၸင်ႇတေၸၢင်ႈဢုပ်ႇဢူဝ်း ။ တႃႇတေၽေႃႇၼမ်ႉၼႄတူဝ်ၼၼ်ႉ ၶႅၼ်းၵႆ ၊ တင်းသွင်ၾၢႆႇလႆႈၸႂ်သေၸင်ႇမႃးဢုပ်ႇလွင်ႈၼႆႉ မၼ်းမီးဝႆႉၸိူင်ႉၼႆတႅၵ်ႇလႅင်းယူႇၶႃႈဢေႃႈ ။


ထၢမ် - ပေႃးဝႃႈယူႇတီႈ RCSS ၵဵဝ်ႇၵပ်းလွင်ႈတပ်ႉသိုၵ်းၼႆႉ သမ်ႉၶႂ်ႈႁႂ်ႈမၼ်းပဵၼ်ၸိူင်ႉႁိုဝ်ၶႃႈ ဝၢၼ်ႈမိူင်းႁဝ်းၶႃႈၼႆႉ ?။


တွပ်ႇ - ပေႃးဢဝ်ပိူင်ႁဝ်းဝႃႈၼႆႉ တပ်ႉသိုၵ်းႁဝ်းၼႆႉ မၼ်းထုၵ်ႇလႆႈပဵၼ်တပ်ႉတႃႇၵႅတ်ႇၶႄဝၢၼ်ႈမိူင်းႁဝ်း ။ ပိူင်လူင်မၼ်း ႁႂ်ႈၸုၵ်းၾၢႆႇၵူၼ်းမိူင်း ၊ ႁႂ်ႈၵႅတ်ႇၶႄႁႄႉၵင်ႈပၼ်ၵူၼ်းမိူင်း ၊ ၼႆႉပဵၼ်ဢၼ်ႁဝ်းၶႃႈၸုၵ်းမၼ်ႈ ၊ တပ်ႉႁဝ်းၶႃႈၼႆႉ ႁဝ်းၶႃႈၶႂ်ႈႁႂ်ႈမၼ်းပဵၼ်ၸိူင်ႉၼၼ် ၊ ယိူင်းဢၢၼ်းဝႆႉၸိူင်ႉၼၼ်ၶႃႈဢေႃႈ ။


ထၢမ် - ပၢင်ၵုမ်လူင်ဢၼ်တေႁဵတ်းၼႆႉ တေမီးၽူႈၶဝ်ႈႁူမ်ႈပဵၼ် 700 ၵေႃႉ ဝႃႈၼႆသေတႃႉၵေႃႈ ၵမ်ႈၽွင်ႈၵေႃႈထတ်းသၢင် ။ လွင်ႈၼႆႉယင်းလႆႈငိၼ်းႁူဝ်ပဝ်ႈ SNLD တူၵ်ႇလၢတ်ႈဝႃႈ လၢႆးမၼ်းၵႂႃႇၸူး ပၢင်ၵုမ်လူင်သွင်တူၼ်ႈႁုင်း ၊ ၶႂ်ႈငၢႆးပၢင်ၵုမ်လူင် NC ၵူၺ်း ၊ မၼ်းတေဢမ်ႇပေႃးပႅၵ်ႇပိူင်ႈလၢၵ်ႇလၢႆးသင် ။ ၵွပ်ႈၼၼ် ယူႇတီႈ RCSS လႆႈၶဝ်ႈပႃးၼႂ်းၼႆႉ သမ်ႉႁၼ်ထိုင်ၸိူင်ႉႁိုဝ်ၶႃႈ ?။


တွပ်ႇ - ဢၼ်ၼႆႉၵေႃႈ မီးတီႈၼမ်ႉၵတ်ႉႁဝ်း မေႃႁဵတ်းမေႃသၢင်ႈၽွင်ႈ ၊ မေႃၶဝ်ႈဢုပ်ႇဢူဝ်းငူပ်ႉငီႉ လႆႈၾၢႆႇၽွင်ႈ ။ ပေႃး ဢဝ်ႁူဝ်ၵူၼ်းဝႃႈ ၾၢႆႇလူင်ပွင်ၸိုင်ႈၶဝ်တေၼမ် ၊ ၾၢႆႇၸၢဝ်းၶိူဝ်းတေဢေႇ ၊ ၾၢႆႇပႃႊတီႊတေဢေႇ မၼ်းပဵၼ်ၸိူင်ႉၼႆ ။ ၵွပ်ႈၼၼ်လႄႈ မၼ်းတေလႆႈငူပ်ႉငီႉၶဝ်ႈႁႃ ၸႂ်ႉလၢႆးဢုပ်ႇဢူဝ်း ၊ ႁဝ်းတေႁူၺ်းပိူၼ်ႈ လႆႈၵႃႈႁိုဝ် ၊ ပိူၼ်ႈတေပႃးၾၢႆႇႁဝ်းလႆႈၵႃႈႁိုဝ်ၼႆ မၼ်းမီးတီႈၼမ်ႉၵတ်ႉႁဝ်း ။ ႁဝ်းၶႃႈႁဵတ်းလႆႈလီၵေႃႈ တေလႆႈလီ ၊ တၢင်းၵတ်ႉၶႅၼ်ႇႁဝ်းၼမ်လိူဝ်ၵေႃႈ ႁဝ်းတေလႆႈလိူဝ် သုၼ်ႇတူဝ်ၶႃႈတႄႉႁၼ်ထိုင်ၸိူင်ႉၼႆၶႃႈဢေႃႈ ။


ထၢမ် - ၵဵဝ်ႇၵပ်း လွင်ႈဢၼ်မီးၵၢင်ၸႂ်ၶႂ်ႈႁႂ်ႈၶဝ်ႈပႃးၵူႈမူႇၵူႈၸုမ်း ၊  ၾၢႆႇဢၼ်ဢမ်ႇလူင်းလၢႆးမိုဝ်းၵေႃႈ ၶႂ်ႈႁႂ်ႈၶဝ်ႈပႃးၵူႈမူႇၵူႈၸုမ်းၼၼ်ႉ ယူႇတီႈ RCSS ၶႂ်ႈထတ်းသၢင်ၸိူင်ႉႁိုဝ် ၽွင်ႈၶႃႈ ?။


တွပ်ႇ - လွင်ႈၼႆႉတႄႉၼႄႉၼွၼ်းယူႇ ၊ ၸုမ်းၸိူဝ်းပႆႇလူင်းလၢႆးမိုဝ်း ၸိူဝ်းၼၼ်ႉၵေႃႈထုၵ်ႇလႆႈၶဝ်ႈပႃး ။ ဢၼ်တေၸတ်းပၢင်ၵုမ်လူင် ၼႂ်းဝၼ်းထီႉ 12 ၼႆႉၵေႃႈ ၶဝ်ၸဝ်ႈတေမွၵ်ႇထိုင် ပႃးၶႅၵ်ႇၶိုၵ်ႉတွၼ်းၼႆ ဝႃႈဝႆႉၸိူင်ႉၼႆ ။ ပေႃးဝႃႈၶဝ်ၸဝ်ႈၶဝ်ႈပႃးမႃးဢုပ်ႇဢူဝ်းၼႆၵေႃႈ ႁႅင်းၾၢႆႇၸုမ်းယိပ်းၵွင်ႈၵၢင်ႇၸၢဝ်းၶိူဝ်း ႁဝ်းၶႃႈၵေႃႈ တေၼမ် ၊ မၼ်းၼႄလွင်ႈၽွမ်ႉႁူမ်ႈႁဝ်း ၊ ႁႅင်းသဵတ်ႈႁဝ်းၵေႃႈတေၼမ် ၊ ႁဝ်းၶႃႈႁၼ်ထိုင်ၼင်ႇၼႆ ။


ထၢမ် - ဢိင်ၼိူဝ်တိုဝ်ႉတၢင်း ၽွင်းၶၢဝ်းပီမႂ်ႇတႆးၵေႃႈ ၶၢႆႉလၢႆႈပူၼ်ႉမႃး ၊ ပီမႂ်ႇလုမ်ႈၾႃႉၵေႃႈသိုပ်ႇတၢမ်ၶၢမ်ႈမႃးထႅင်ႈ ၊ ၵၢၼ်ဝၢၼ်ႈၵၢၼ်မိူင်းၵေႃႈ သိုပ်ႇၵႂႃႇယူႇဢမ်ႇလိုဝ်ႈဢမ်ႇယင်ႉ ။ ၵွပ်ႈၼၼ် ငဝ်းလၢႆးၶၢဝ်းယၢမ်းတေႃႈလဵဝ်ၼႆႉ ၶႂ်ႈမွၵ်ႇလၢတ်ႈထိုင်ပီႈၼွင်ႉၵူၼ်းမိူင်းတႆး ၸိူင်ႉႁိုဝ်ၽွင်ႈၶႃႈ ?။


တွပ်ႇ - ယူႇတီႈမုၵ်ႉၸုမ်းႁဝ်းၶႃႈ (RCSS) တႄႉ ၸွမ်းၼင်ႇၵူႈသိုပ်ႇၵူႈပၢၼ် လၢႆးလုၵ်ႉၽိုၼ်ႉႁဝ်းၶႃႈမုင်ႈမွင်းမႃး ၶႂ်ႈဢုပ်ႇၵၢၼ်မိူင်း ၊ တုၵ်းယွၼ်းဢုပ်ႇၵၢၼ်မိူင်းၼၼ်ႉ မိူဝ်ႈလဵဝ်တိုဝ်ႉတၢင်းမၼ်းၽႅဝ်မႃးယဝ်ႉ ။ ၵွပ်ႈၼႆ ၸွမ်းၼင်ႇတိုဝ်ႉတၢင်းမီးၼၼ်ႉ ယူႇတီႈမုၵ်ႉၸုမ်းႁဝ်းၶႃႈ တေၶတ်းၸႂ်ႁႂ်ႈပေႃးလႆႈၼင်ႇ ပီႈၼွင်ႉၵူၼ်းမိူင်း ႁဝ်းၶႃႈၶႂ်ႈႁႂ်ႈပဵၼ်ၼၼ်ႉ တွၼ်ႈၼိုင်ႈ ။ ထႅင်ႈၾၢႆႇၼိုင်ႈတၢင်းၼိုင်ႈၵေႃႈ ၸွမ်းၼင်ႇပေႃႇလသီႇမုၵ်ႉၸုမ်းႁဝ်း မီးဝႆႉဝႃႈ ၵၢၼ်ၽွမ်ႉႁူမ်ႈၸၢဝ်းၶိူဝ်းပဵၼ်ထီႉ 1 ၼႆၼၼ်ႉ ၵဵဝ်ႇၵပ်းၵၢၼ်ၽွမ်ႉႁူမ်ႈၸၢဝ်းၶိူဝ်းၼႆႉၵေႃႈ ႁဝ်းၶႃႈတေၶတ်းၸႂ် ၶိုင်ပွင်ႁဵတ်းသၢင်ႈၵႂႃႇယူႇ - ၶႂ်ႈၾၢၵ်ႇထိုင်ပီႈၼွင်ႉၵူၼ်းမိူင်းတႆးႁဝ်း ၼႂ်းတိုဝ်ႉတၢင်းၶၢဝ်းတၢင်းပီမႂ်ႇၼႆႉ မီးၼင်ႇၼႆၶႃႈဢေႃႈ ။
ဢေႃႈၶႃႈ ။ ယိၼ်းၸူမ်းတႄႉၶႃႈဢေႃႈ ။