မိူင်းၼိုင်ႈလုၵ်ႈၼႆႉ ဢမ်ႇၵွမ်ႉၵႃႈၵူၼ်းၶိူဝ်းလဵဝ်ၵူၺ်း တၵ်းမီးလၢႆၶိူဝ်းၵူၼ်းယူႇႁူမ်ႈၵၼ် ၊ ၵူၼ်းၶိူဝ်းလဵၵ်ႉၶိူဝ်းဢွၼ်ႇ ၶိူဝ်းယႂ်ႇၶိူဝ်းလူင်ၼၼ်ႉၵေႃႈ မိူဝ်ႈၼပ်ႉသွၼ်ႇႁူဝ်ၵူၼ်းလႆႈၵွၼ်ႇၸင်ႇလၢတ်ႈလႆႈဝႃႈ ၵူၼ်းၶိူဝ်းၼမ်ၵူၼ်းၶိူဝ်းဢေႇ ။

လွင်ႈၼႆႉၸဝ်ႈႁၢၼ် ယွင်ႁူၺ်ႈ ယၢမ်ႈလၢတ်ႈၼႄဝႃႈ ၸူဝ်ႈၼိုင်ႈၽွင်းယူႇမိူင်းၼွၵ်ႈၼၼ်ႉ မၼ်းၸဝ်ႈလႆႈလၢတ်ႈၼႄ တၢင်ႇၸၢတ်ႈ (ၼႃႈၽိူၵ်ႇ) ၶဝ်ဝႃႈ တႆးဢၼ်မီးယူႇၼႂ်းမိူင်းမၢၼ်ႈၼၼ်ႉ ပဵၼ်ၵူၼ်းၶိူဝ်းဢွၼ်ႇၼႆ ဢမ်ႇထဵင် ၵူၺ်းၵႃႈ မၢၼ်ႈဢၼ်မီးၼႂ်းမိူင်းတႆးၼၼ်ႉ ဢေႇသေၵူၼ်းၼႂ်းပိုၼ်ႉတီႈလႄႈၸင်ႇဝႃႈၼႂ်းမိူင်းတႆးတႄႉ မၢၼ်ႈဢိူဝ်ႈပဵၼ်ၵူၼ်းၶိူဝ်း ဢွၼ်ႇ - ဝႃႈၼႆ ။


ပေႃးတေမႃးထတ်းတူၺ်းၼႂ်းၸိုင်ႈမိူင်းတႆးမိူဝ်ႈမိုၼ်ႉသိုၼ်းၵွၼ်ႇၸိုင် ႁူမ်ႈဝႃႈႁဵၵ်ႈၸိုဝ်ႈမိူင်းတႆးၼႆၵေႃႈ ဢမ်ႇမီးတႆးၶိူဝ်း လဵဝ် ဢမ်ႇၸႂ်ႈမိူင်းတႆးပဵၼ်ၶွင်တႆးႁင်းၵူၺ်း ၸိူင်ႉၼင်ႇၶိူဝ်းၵူၼ်းဢၼ်မီးယူႇၼႂ်းမိူင်းတႆး  20-30 ၶိူဝ်းၵူၼ်း တင်းလဵၵ်ႉ တင်းယႂ်ႇၼၼ်ႉ ယူႇၸွတ်ႇၸေးတူဝ်ႈၵႂႃႇသဵင်ႈ ၵူႈဝဵင်းၵူႈတီႈ တေႃႈဝႃႈမီးၶိူဝ်းၵူၼ်းလၢၵ်ႇလၢႆယူႇႁူမ်ႈၵိုၵ်းၵၼ်ၵႂႃႇၵူႈတီႈ မၢင်တီႈၵေႃႈ တေပဵၼ်ဝၢၼ်ႈၶိူဝ်းၵူၼ်းၼၼ်ႉ ၶိူဝ်းၼႆႉ ယူႇၵၼ်ပဵၼ်မုၵ်ႉပဵၼ်ၾုင် ပဵၼ်ၵုမ်ႇ ၸွမ်းၸိူဝ်ႉသၢႆပီႈၼွင်ႉ ၽႂ်မၼ်းမႃး ပီယၢဝ်းၶၢဝ်းႁိုင် ၼပ်ႉဢမ်ႇထူၼ်ႈ ။


ၸိူင်ႉၼင်ႇၵူၼ်းၶိူဝ်းဝႃႉ ၼႆၵေႃႈ မီးတီႈယူႇလၵ်းလႅင်ႇ မီးၸဝ်ႈၾႃႉတွၼ်ႈမၼ်း ပဢူဝ်းၼႆၵေႃႈ မီးပိုၼ်ႉတီႈလၵ်းလႅင်ႇ ၶွင်မၼ်း ပလွင်ႈ (တဢၢင်း) ၵေႃႈတေႃႈၼင်ႇၼၼ် ဢမ်ႇၵွမ်ႉၵႃႈၸိူဝ်းၼႆႉၵူၺ်း ထႅင်ႈလၢႆၶိူဝ်းၵူၼ်းဢၼ်ယူႇၼႂ်းပိုၼ်ႉတီႈ တူဝ်ၵဝ်ႇလႄႈသင် ပဵၼ်ဝၢၼ်ႈဢွၼ်ႇလဵၵ်ႉလဵၵ်ႉသေယူႇႁူမ်ႈႁွမ်းၸွမ်း ဢိူင်ႇလႂ်ဢိူင်ႇၼိုင်ႈ ဝဵင်းလႂ်ဝဵင်းၼိုင်ႈၸိူဝ်းၼၼ်ႉ မီးတင်းၼမ် ။ ၵူၺ်းၵႃႈၽွင်းၼၼ်ႉ ၶႃႈဝၢၼ်ႈၵူၼ်းမိူင်းယူႇၼႂ်းမိုဝ်းတႂ်ႈၽွင်းငမ်းၸဝ်ႈၾႃႉ ။


ၸိူင်ႉၼင်ႇ 1. ၸဝ်ႈၶုၼ်ၺုၼ်ႉ (ၸဝ်ႈၾႃႉၸၵွႆႇ) ၊ 2. ၸဝ်ႈၶုၼ်ဢူး (ၸဝ်ႈၾႃႉပၢင်မီ) ၊ 3. ၸဝ်ႈၶုၼ်းသွင်း (ၸဝ်ႈၾႃႉ ၵျူင်း) ၊ 4. ၸဝ်ႈၶုၼ်ၵျီႇ (ၸဝ်ႈၾႃႉၸၢမ်ၵႃး) ၊ 5. ၸဝ်ႈၸိင်ႇၺုၼ်ႉ (ၸဝ်ႈၾႃႉဝၢၼ်ႈယဵၼ်ႇ) ၊ 6. ၸဝ်ႈၶုၼ်ဢွင်ႇ (ၸဝ်ႈၾႃႉမေႃႇသၢႆး) ၊ 7. ၸဝ်ႈဢွင်ႇမူဝ်း (ၸဝ်ႈၾႃႉမိူင်းပၢႆး) ၊ 8. ၸဝ်ႈၶုၼ်ယီႈ (ၸဝ်ႈၾႃႉယႂႃႇငၢၼ်ႇ) ၊ 9. ၸဝ်ႈထုၼ်း ၸိင်ႇ (ၸဝ်ႈၾႃႉပူၺ်းလ) ၊ 10. ၸဝ်ႈတွင်းသူၺ်ႇ (ၸဝ်ႈၾႃႉၼမ်ႉၶူၵ်ႉ-ၼွင်မွၼ်) ၊ 11. ၸဝ်ႈသိူဝ်ႁူမ်ႈ (ၸဝ်ႈၾႃႉ မိူင်းပွၼ် - လုၵ်ႈၸဝ်ႈၾႃႉၸၢမ်ႇထုၼ်း) ၊ 12. ၸဝ်ႈၶုၼ်ဢူဝ်ႉ (ၸဝ်ႈၾႃႉႁူဝ်ပူင်း) ၊ 13. ၸဝ်ႈမူဝ်းၵျေႃႇ (ၸဝ်ႈၾႃႉ ပၢင်လွင်း) ၊ 14. ၸဝ်ႈဢွင်ႇမျိၼ်ႉ (ၸဝ်ႈၾႃႉသီႇသႅင်ႇ) ၊ 15. ၸဝ်ႈသူၺ်ႇမူင်ႇ (ၸဝ်ႈၾႃႉၵေးသီး) ၊ 16. ၸဝ်ႈမၢၼ်ႇၾႃႉ (ၸဝ်ႈၾႃႉမိူင်းသူႈ) ၊  17. ၸဝ်ႈဝုၼ်းၵျီႇ (ၸဝ်ႈၾႃႉပင်းတရ) ၊ 18. ၸဝ်ႈယၼ်ႇၵျိၼ်းသႆႇ (ၸဝ်ႈၾႃႉၵူဝ်းၵၢင်ႉ) ၊ 19. ၸဝ်ႈသူၺ်ၵျီႇ (ၸဝ်ႈၾႃႉမိူင်းပၼ်ႇ) ၊ 20. ၸဝ်ႈဢုင်းမွင်ႇ (ၸဝ်ႈၾႃႉမိူင်းၼွင်) ၊ 21. ၸဝ်ႈထုၼ်းဢေး (ၸဝ်ႈၾႃႉ သႃႇမိူင်းၶမ်း) ၊ 22. ၸဝ်ႈဢွင်ႇၵျီႇ (ၸဝ်ႈၾႃႉမိူင်းပၼ်ႇ) ၊ 23. ၸဝ်ႈဢွင်ႇၵျိၼ်ႇ ႁိုဝ် ၸဝ်ႈထုၼ်းၾႃႉ (ၸဝ်ႈၾႃႉမွၵ်ႇမႆႇ) ၊ 24. ၸဝ်ႈပျေႉ (ၸဝ်ႈၾႃႉမိူင်းၼၢႆး) ၊ 25. ၸဝ်ႈသိူဝ်ႁူမ်ႇ (ၸဝ်ႈၾႃႉသႅၼ်ဝီၸၢၼ်း-မိူင်းယႆ) ၊ 26. ၸဝ်ႈႁူမ်ႇၾႃႉ (ၸဝ်ႈၾႃႉသႅၼ်ဝီႁွင်ႇ) ၊ 27. ၸဝ်ႈၵျႃႇသႅင် (ၸဝ်ႈၾႃႉသီႇပေႃႉ) ၊ 28. ၸဝ်ႈၶုၼ်ပၢၼ်းၸိင်ႇ (ၸဝ်ႈၾႃႉၼမ်ႉသၼ်ႇ) ၊ 29. ၸဝ်ႈၼုမ်ႇ (ၸဝ်ႈၾႃႉလၢႆးၶႃႈ) ၊ ၸဝ်ႈၶုၼ်ၵျီႇ (ၸဝ်ႈၾႃႉမိူင်းၵိုင်) ၊ 31. ၸဝ်ႈသူၺ်ႇတႅၵ်ႈ (ၸဝ်ႈၾႃႉယွင်ႁူၺ်ႈ) ၊ 32. ၸဝ်ႈၶုၼ်ၶဵဝ် (ၸဝ်ႈၾႃႉမိူင်းမိတ်ႈ) ၊ 33. ၸဝ်ႈၸၢႆးလူင် (ၸဝ်ႈၾႃႉၵဵင်းတုင်) ၊ 34. ၸဝ်ႈၶုၼ်သႃႇ (ၸဝ်ႈၾႃႉလွၵ်ႉၸွၵ်ႇ) ၸိူဝ်းၼႆႉ ပဵၼ်ၸဝ်ႈၾႃႉၵေႃႉလိုၼ်းသုတ်း လႆႈမွပ်ႈဢမ်းၼၢၸ်ႈပၼ်လူင်ပွင်ၸိုင်ႈတႆးမိူဝ်ႈ ဝၼ်းတီႈ 29/04/1959 ဢၼ်မီးၸဝ်ႈၾႃႉလႄႈတင်း ၵူၼ်းမိူင်းႁူမ်ႈၵၼ်ၶွတ်ႇၽွတ်ႈလူင်ပွင်ၸိုင်ႈတႆး ယၢမ်းၼၼ်ႉ ။


ဝၢႆးသေမီးၼေႇဝိၼ်းႁုပ်ႈယိုတ်းဢမ်းၼၢၸ်ႈ ဢဝ်ၶိူဝ်းၵူၼ်း ဢဝ်မိူင်းတႄးႁူတ်ႈသၼ်လွႆ ဢၼ်ၶဝ်ႈပႃးၼႂ်းမိူင်းႁူမ်ႈတုမ် ၼၼ်ႉ ၶဝ်ႈၵႂႃႇပဵၼ်မိူင်းမၢၼ်ႈလုၵ်ႈလဵဝ်လုမ်းလုမ်းတင်းပိုၵ်းၵေႃႈ ၵူၼ်းၶိူဝ်းတႄးႁူတ်ႈသၼ်လွႆၸင်ႇလုၵ်ႉယိပ်းၵွင်ႈ ၵၢင်ႇ ၾိုၼ်ႉဝၢႆႇတိုၵ်း ပိူဝ်ႈသုၼ်ႇလႆႈၵွၼ်းၶေႃႁင်းၽႂ်ႁင်းမၼ်းမႃး ။


ဝၢႆးသေမီးလူင်ပွင်ၸိုင်ႈဢၼ်လိူၵ်ႈတင်ႈမႃး လိုၼ်းသုတ်းႁဝ်းၵေႃႈ ၶိုၼ်းမႃးႁိမ်တီႈယူႇထဵင်မေႃးၵၼ် တီႈၵဝ် တီႈမႂ်း ။ ၵွပ်ႈၼၼ် ပေႃးတူၺ်းၶိုၼ်းတီႈယူႇၵၼ် ၼႂ်းမိူင်းၸဝ်ႈၾႃႉတင်းသဵင်ႈ 34 ဝဵင်းၼႆႉၵူၺ်း ။ တီႈယူႇၽႂ်ၵူၼ်းၶိူဝ်းသင် ပဵၼ်တီႈလႂ် တေႁၼ်ၸႅင်ႈဢွၵ်ႇမႃး ။ ထႅင်ႈလွင်ႈၼိုင်ႈၵေႃႈ ၼႂ်းမိူင်းၸဝ်ႈၾႃႉၼိုင်ႈဝဵင်းဝဵင်းၼႆႉ မီးၶိူဝ်းၵူၼ်းလၢႆၶိူဝ်း ယူႇႁူမ်ႈၵၼ်ပဵၼ်ဝၢၼ်ႈ ပဵၼ်ပွၵ်ႉ ပဵၼ်ဢိူင်ႇ ဢမ်ႇၸႂ်ႈတင်းဝဵင်းၵေႃႈ ပဵၼ်ၵူၼ်းၶိူဝ်းၼၼ်ႉၶိူဝ်းၼႆႉတင်းပိၵ်း ၊ ၸင်ႇဝႃႈ တေလၢတ်ႈလႆႈၸိူင်ႉႁိုဝ်ဝႃႈ ပဵၼ်မိူင်းၶွင်ၵူၼ်းၶိူဝ်းၼၼ်ႉ ၶိူဝ်းၼႆႉ ။


ၶိုၼ်းတူၺ်းဢွင်ႈတီႈယူႇၵဝ်ႇၽႂ်မၼ်း ၽႂ်ယူႇၼႂ်းတွၼ်ႈၼႃႈလိၼ်လႂ် ၊ ၽႂ်ပဵၼ်ၵူၼ်းမိူင်းလႂ်၊ ၽႂ်ပဵၼ်လုၵ်ႈမိူင်း ၸဝ်ႈၾႃႉ မိူင်းလႂ် ၊ ၵူၼ်းၶိူဝ်းလႂ် ယူႇဝၢၼ်ႈ ယိူင်ႇ ၸႄႈဝဵင်း ပွတ်းတွၼ်ႈလႂ် ႁဝ်းသမ်ႉတေမႃးယႅၵ်ႈၽၢတ်ႇငၢၵ်ႇဢွၵ်ႇဝႃႈ မိူင်းၵဝ် မိူင်းမႂ်းၼႆ ၼိုင်ႈၸႄႈဝဵင်း ႁူဝ်ၵူၼ်းၸႃႇတိၶိူဝ်းလႂ်မီးၵႃႈႁိုဝ် လင်ႁိူၼ်းၸႃႇတိမီးၵႃႈႁိုဝ် ။ ဢမ်ႇၸႂ်ႈႁူဝ်ၵူၼ်းမီး ၵမ်ႈဢေႇ ၵူၺ်းသေ တေဝႃႈပဵၼ်ၶွင်ႁဝ်းတင်းဝၢၼ်ႈတင်းဝဵင်းတႄႉတေဢမ်ႇထုၵ်ႇ ။


ပၢၼ်သိုၵ်းမၢၼ်ႈၽွင်းငမ်းမိူင်းၼၼ်ႉ ၵွပ်ႈၶႂ်ႈႁႂ်ႈၵူၼ်းၶိူဝ်းၼိုင်ႈလႄႈၶိူဝ်းၼိုင်ႈၽိတ်းမေႃးၵၼ် ၶဵၼ်ႇၶႃႈႁႅမ်ၵၼ်  ႁိမ်တီႈယူႇၵၼ် ဢူၼ်ဢၢၼ်သုၵ်ႉယုင်ႈ ပိူဝ်ႈတႃႇၶဝ်ပေႃးၵမ်ငမ်းလႆႈလီ ဢမ်ႇပိၼ်ႇဝၢႆႇ ပၢၵ်ႇၵွင်ႈၸူးၶဝ်လႄႈယုၵ်ႉယၢႆႉ ၶၢႆႉဢဝ်ၵူၼ်းၶိူဝ်းၼိုင်ႈၵႂႃႇဝႆႉတီႈၼိုင်ႈ ၵွပ်ႈယိပ်းၵမ်ၵွင်ႈၵၢင်ႇ ဢဝ်ၵႂႃႇပေႉၵိၼ်ၵူၼ်းပိုၼ်ႉတီႈၼၼ်ႉသေႁဵတ်းၶုၼ်လႄႈ မိူဝ်ႈလဵဝ် ၵူၼ်းၶိူဝ်းၼၼ်ႉၶိူဝ်းၼႆႉ သမ်ႉဝႃႈတီႈၵဝ်ယူႇၼႆႉ ပဵၼ်တီႈယူႇၶွင်ၵဝ်ၼႆ ၊ ၸင်ႇပဵၼ်ပၼ်ႁႃလႄႈတေသိုပ်ႇပဵၼ် ပၼ်ႁႃၵႂႃႇထႅင်ႈ ။


မိူင်းၼိုင်ႈလုၵ်ႈၼႆႉတႃႇတေၽႄဢွၵ်ႇ ၽၢတ်ႇဢွၵ်ႇၼၼ်ႉ ၽႂ် ၵူၼ်းၶိူဝ်းလႂ်သမ်ႉမီးသူၼ်ႇၵႃႈႁိုဝ် တၵ်းလႆႈယင်ႇသဵင် ထၢမ်ၵၢင်ၸႂ်ၵူၼ်းမိူင်း ယွမ်း ဢမ်ႇယွမ်းၵွၼ်ႇ ဢမ်ႇၸႂ်ႈဢဝ်ၵွင်ႈၵၢင်ႇလွၵ်ႇငိုတ်ႈဢဝ် ၊ ဢမ်ႇၸႂ်ႈႁႂ်ႈလူင်ပွင်ၸိုင်ႈမၢၼ်ႈ ဢၼ်ဢမ်ႇမီးသူၼ်ႇၵဵဝ်ႇၶွင်ႈ ၼိူဝ်ၼင်လိၼ်ၽိုၼ်ၼၼ်ႉ ဢဝ်ဢမ်းၼၢၸ်ႈမႃးၸႅၵ်ႇဝၢၵ်ႈၽႄဝႅင်ႇပၼ်ၽႂ်ၵေႃႈလႆႈ ၊ ၶႂ်ႈဢဝ်ပၼ်ၽႂ်ၵေႃႈပၼ် ။ ပေႃးၵေႃႉၼိုင်ႈဢဝ်ပၼ် ၵေႃႉၼိုင်ႈဢမ်ႇယွမ်းၵေႃႈ ပၼ်ႁႃၵၢၼ်ၽိတ်းမေႃးတိုၵ်းတေႃးၵၼ် ၼၼ်ႉ တၵ်းၵိူတ်ႇၶိုၼ်ႈ ဢမ်ႇယဝ်ႉဢမ်ႇဝၢႆး မိူၼ်မိူဝ်ႈလဵဝ် ။ ၼႆႉၵေႃႈယွၼ်ႉသိုၵ်းမၢၼ်ႈႁုပ်ႈယိုတ်းဢဝ်မိူင်းတႆးၵႂႃႇလႄႈ ႁူဝ်တီး ငဝ်ႈႁၢၵ်ႈၵေႃႇၵဝ်ႉမၼ်းၸင်ႇၵိူတ်ႇပဵၼ်မႃးၵၢၼ်လုၵ်ႉၾိုၼ်ႉတႃႇဢဝ်မိူင်းတႆးၵွၼ်းၶေႃတႃႇဢဝ်ၶိုၼ်းတီႈယူႇၵဝ်ႇ ၼၼ်ႉယဝ်ႉ ။


ၸိူင်ႉႁိုဝ်ၵေႃႈလီ ၶႂ်ႈႁႂ်ႈၵူႈၾၢႆႇၵူႈၶိူဝ်းၵူၼ်းၼႂ်းမိူင်းတႆးဝူၼ်ႉထိုင် ပၼ်ႁႃဢၼ်တေၵိူတ်ႇၶိုၼ်ႈ ဢၼ်တေၵႄႈၶႅၼ်ႉ ဢၼ်တေၶိုၼ်းလုၵ်ႉၾိုၼ်ႉ ဢၼ်တေမီးၵၢၼ်တိုၵ်းၽၼ်းၵၼ်ၵႂႃႇထႅင်ႈၼၼ်ႉ တၵ်းမီး တၵ်းဢမ်ႇယဵၼ်ႁၢႆ မိူဝ်ႈမႂ်း မီးႁႅင်းမႂ်းပေႉၵဝ် မိူဝ်ႈၵဝ်မီးႁႅင်းၵဝ်ပေႉမႂ်းၼၼ်ႉၵူၺ်း ။ ၵွပ်ႈၼႆၵူၼ်းမိူင်းၼႂ်းၸိုင်ႈတႆးထုၵ်ႇလီဝူၼ်ႉလႄႈႁႃတၢင်း ဢွမ်ႇလွမ်ႈၽွမ်ႉၵၼ် ႁူမ်ႈၵၼ်ပူၵ်းပွင်ၸိုင်ႈမိူင်းတႆး ႁႂ်ႈႁဝ်းၵူၼ်းမိူင်းၵူႈၶိူဝ်းၵူၼ်းမီးသူၼ်ႇၽဵင်ႇပဵင်းၵၼ်  ၽႂ်ႁူႉၽႂ်မေႃ ၾၢႆႇလႂ် လွင်ႈလႂ်ၵေႃႈ ႁူမ်ႈၵၼ်ပူၵ်းပွင်ၵႂႃႇႁႂ်ႈယိုၼ်းယၢဝ်းမၼ်ႈၵိုမ်းၼၼ်ႉ ပဵၼ်ပုၼ်ႈၽွၼ်းၵူၼ်းမိူင်းတႆးၵူႈၶိူဝ်းၶိူဝ်း ဢၼ်ယူႇႁူမ်ႈၵၼ်မႃးလၢႆပၢၵ်ႇႁဵင်ပီၼၼ်ႉယဝ်ႉ ။


မၢႆတွင်း*
ၵွပ်ႈသင်လႄႈဢမ်ႇတႅမ်ႈဝႃႈၸၢဝ်းၶိူဝ်း သမ်ႉတႅမ်ႈဝႃႈၶိူဝ်းၵူၼ်းၼႆၼၼ်ႉ “ ပေႃးဝႃႈၸၢဝ်းၶိူဝ်းၼႆ ပဵၼ်သူၼ်ႇၼိုင်ႈ ဢၼ် ယူႇၼႂ်းၵႄႈၵူၼ်းၶိူဝ်းယႂ်ႇၶိူဝ်းလူင်၊ မိူၼ်မၢၼ်ႈႁွင်ႉႁဝ်းဝႃႈ ၸၢဝ်းၶိူဝ်း (တိုင်းရင်းသား) ၼႆၼၼ်ႉၵူၺ်း  ပေႃးဝႃႈၶိူဝ်းၵူၼ်း ဢမ်ႇၼၼ် ၵူၼ်းၶိူဝ်း ၼႆ ပွင်ႇဝႃႈဝႆႉၶိုၵ်ႉၼၵ်းသူၼ်ႇ ယႂ်ႇလဵၵ်ႉၽဵင်ႇပဵင်းၵၼ်တင်းၵူၼ်းၵူႈၶိူဝ်းၶိူဝ်း ”ၼႆလႄႈၸင်ႇဝႃႈ “ ၵူၼ်းၶိူဝ်း ႁိုဝ် ၶိူဝ်းၵူၼ်း ” ၼႆယဝ်ႉ ။