ၾႆးမႆႈၼႂ်းၵၢတ်ႇသျူဝ်ႊထၼႃႊ ပႃႊသႃႊ (ၸၢင်ႉၽိူၵ်ႇ) ဢိူင်ႇသီၽုမ်း ၵုၼ်သိၼ်ၵႃႉၶူဝ်းၶၢႆ လူႉသုမ်း ဢမ်ႇယွမ်းႁူဝ်သိပ်းလၢၼ်ႉဝၢတ်ႉ ယွၼ်ႉၾႆးၾႃႉသျွတ်ႉ မႆႈႁၢၼ်ႉၶၢႆၶူဝ်းၶွင် လူႉသုမ်းတင်းၼမ် ။

ဝၼ်းတီႈ 23/01/2016 ၶၢဝ်းယၢမ်း 22:00 မူင်းပၢႆ ၾႆးမႆႈၼႂ်းၵၢတ်ႇသျူဝ်ႊထၼႃႊပႃႊသႃႊ (ၸၢင်ႉၽိူၵ်ႇ) ဢိူင်ႇသီၽုမ်း ဝဵင်းၵဵင်းမႆႇ ၸိုင်ႈထႆး ယွၼ်ႉၾႆးၾႃႉသျွတ်ႉလႄႈမႆႈၶူဝ်းၶွင်လူႉသုမ်း ဢမ်ႇယွမ်း 40 လၢၼ်ႉဝၢတ်ႇ ႁၢၼ်ႉၶၢႆၶူဝ်းလူႉသုမ်း 50 ႁၢၼ်ႉပၢႆ ။


ၸၢႆးၼုမ်ႇသႂ် ၽူႈႁဵတ်းၵၢၼ် ႁိမ်းၵၢတ်ႇသျူဝ်ႊထၼႃႊ ပႃႊသႃႊလၢတ်ႈဝႃႈ ယွၼ်ႉၾႆးၾႃႉသျွတ်ႉလႄႈ မႆႈ ၶူဝ်းၶွင် ဢၼ်ၶၢႆၼႂ်းၵၢတ်ႇ ဢမ်ႇလိူဝ်သင်သေၸိူဝ်ႉသေပိူင် မႆႈပႃးၵႂႃႇမူတ်း ၊ ၵူၼ်းၶၢႆၶူဝ်းၼႂ်းၵၢတ်ႇ ဢၼ်ၼွၼ်းပႂ်ႉၵေႃႈ ဢွၼ်ၵၼ်လႅၼ်ႈဢွၵ်ႇ ဢဝ်တူဝ်ၽႂ်မၼ်းလွတ်ႈ ဢမ်ႇတၢၼ်းလႆႈဢဝ်ၶူဝ်းၶွင်ၵုၼ်သိၼ်ၵႃႉၶၢႆ ဝႃႈၼႆ ။


သိုပ်ႇလၢတ်ႈထႅင်ႈဝႃႈ တီႈတၢင်းလင်ႁၢၼ်ႉၶႃႈၶဝ် ႁဵတ်းၵၢၼ်ၼႆႉ ထုၵ်ႇၾႆးမႆႈပႃးၵႂႃႇၵမ်ႈၽွင်ႈ လူႉသုမ်းၵႂႃႇ မွၵ်ႈငိုၼ်း 3-4 သႅၼ်ဝၢတ်ႇ တေႃႈလဵဝ်တႄႉ ႁဝ်းၶႃႈ ဢွၼ်ၵၼ်ပတ်းၽဵဝ်ႈယူႇ ၼႂ်းၶၢဝ်းတၢင်း ႁၢင်လိူၼ်ၼႆႉ တေပႆႇၸင်ႈႁဵတ်းၵၢၼ်လႆႈ ယွၼ်ႉတိုၵ်းထႅဝ် တီႈႁဝ်းၶႃႈ ႁဵတ်းၵၢၼ်ၼႆႉ ၸဝ်ႈၼႃႈတီႈၾၢႆႇၾႆးၾႃႉၶဝ် တတ်းၾႆးၾႃႉဝႆႉ ၸူဝ်ႈၶၢဝ်း ။ လိူဝ်ၼၼ်ႉ ပီႈၼွင်ႉႁႅင်းၵၢၼ်တႆးႁဝ်း ဢၼ်ၵိၼ်ၸင်ႈ ႁဵတ်းၵၢၼ်တီႈၼႂ်းၵၢတ်ႇၼႆႉ တေမီး မွၵ်ႈ 10 ပၢႆး ၊ ၵူၺ်းၵႃႈ ဢမ်ႇတၢၼ်းပဵၼ်သင်သေၵေႃႉ  ဝႃႈၼႆ ။


ပီႈၼွင်ႉၵူၼ်းထႆး ဢၼ်ၶၢႆၶူဝ်းၼႂ်းၵၢတ်ႉၵေႃႉၼိုင်ႈတႄႉလၢတ်ႈဝႃႈ ၾႆးၼႆႉ မၼ်းမႆႈမႃးၸိူင်ႉႁိုဝ် ဢၼ်ဝႃႈၼၼ်ႉ ႁဝ်းဢမ်ႇလႆႈႁူႉလွင်ႈမၼ်းလီလီ ၊ ႁဝ်းလႆႈႁၼ်မၼ်းမႆႈမႃး လၢမ်းမႃးဝႆးပူၼ်ႉတီႈလႄႈ ႁဝ်းၵေႃႈ ဢွၼ်ၵၼ်လႅၼ်ႈဢွၵ်ႇၼွၵ်ႈၵၢတ်ႇၵမ်းလဵဝ် ၶူဝ်းၶွင်တႄႉ ဢမ်ႇတၢၼ်းလႆႈသင်သေယၢင်ႇ သေၸိူဝ်ႉသေပိူင်  တေႃးတႄႉဢဝ်တူဝ်လွတ်ႈပူၼ်ႉၵူၺ်း။ ၵူၺ်းၵႃႈ ၵူၼ်းဝၢတ်ႇၸဵပ်းလူႉတၢႆတႄႉ ဢမ်ႇမီးသေၵေႃႉ ဝႃႈၼႆ ။ တေႃႈလဵဝ်ၸဝ်ႈၼႃႈတီႈပလိၵ်ႈၶဝ် တိုၵ်ႉၵူတ်ႇထတ်းယူႇ လွင်ႈၾႆးမႆႈပဵၼ်မႃးၼႆႉငဝ်ႈတႄႇလုၵ်ႉတီႈလႂ်မႃး ။


ၼႂ်းဝၼ်းတီႈ 23 ၼၼ်ႉ ရူတ်ႉၶႄၾႆး တင်းမူတ်း မီးမွၵ်ႈ 10 ပၢႆ လႆႈၸႂ်ႉၶၢဝ်းယၢမ်း မွၵ်ႈ 2 ၸူဝ်းမူင်းပၢႆသေ ႁူတ်ႉၾႆးမွတ်ႇ ရူတ်ႉၾႆးဢၼ်မႃးၶႄၾႆးၼၼ်ႉ လုၵ်ႈတၢင်းမႄႈရိမ်း ၊ ၵၢတ်ႇမိူင်းမႂ်ႇ ၊ ၽၵ်းတူၵဵင်းမႆႇ ၊ သၼ်တိထမ်းလႄႈ ၸၢင်ႉၽိူၵ်ႇ ၸိူဝ်းၼႆႉ မႃးၸွႆႈၶႄႁူတ်းၾႆးယူႇ ။


ႁၢၼ်ႉၶၢႆၶူဝ်းတီႈၼႂ်းၵၢတ်ႇၼႆႉ တင်းမူတ်း တေမီးမွၵ်ႈ 50 ပၢႆ ၵမ်ႈၼမ်တေၶၢႆၶူဝ်းၶွင် မိူၼ် သွၵ်းတိၼ် ၊ ၶႅပ်းတိၼ် ၊ တင်း ၶူဝ်းၼုင်ႈတၢင်းဝႆ သိူဝ်ႈၽႃႈ ၊ ၽႃႈႁူမ်ႇၶူဝ်းၼွၼ်း  ၸိူဝ်းၼႆႉ ။