ၸၼ်ႉၸွမ်မႄႈႁွင်ႈသွၼ် ဢွၼ်ႁူဝ်ၸတ်းႁဵတ်းပၢင်လဵပ်ႈႁဵၼ်းလွင်ႈတႆး တီႈႁူင်းႁေႃးလ် သုၼ်လဵပ်ႈႁဵၼ်းလွင်ႈတႆး ၸႄႈတွၼ်ႈဝဵင်းမႄႈႁွင်ႈသွၼ် ။

ဝၼ်းတီႈ 23-24/01/2016 ၶၢဝ်းယၢမ်း ၵၢင်ၼႂ်ထိုင် ၵၢင်ၶမ်ႈ ၸၼ်ႉၸွမ်ပိုၼ်ႉတီႈမႄႈႁွင်ႈသွၼ်သေ ဢွၼ်ႁူဝ်ၸတ်းႁဵတ်း ပၢင်ဢုပ်ႇၶႆႈလဵပ်ႈႁဵၼ်းလွင်ႈတႆး မိူၼ်ၼင်ႇ လွင်ႈပွႆးပီမႂ်ႇတႆးလႄႈ လွင်ႈၸဝ်ႈၶူးမေႃလိၵ်ႈတႆး ႁဵတ်းႁိုဝ်ပဵၼ်မႃး / မီးမႃး တီႈႁူင်းႁေႃးလ်သုၼ်လဵပ်ႈႁဵၼ်းလွင်ႈတႆး ၸႄႈတွၼ်ႈဝဵင်းမႄႈႁွင်ႈသွၼ် ၸိုင်ႈထႆး ၼႆယဝ်ႉ ။


ၼၢင်းသႅင်မိူင်းလီ ၽူႈၼမ်းၼႂ်း ၵူႈလွင်ႈလွင်ႈ သမႃးၶူမ်းပၢႆးပၺ်ၺႃလႄႈၾိင်ႈငႄႈတႆး ၵဵင်းမႆႇ လၢတ်ႈဝႃႈ ပၢင်ဢုပ်ႇၶႆႈ လွင်ႈလဵပ်ႈႁဵၼ်းတႆးၼႆႉ ၼင်ႇႁိုဝ်  ပီႈၼွင်ႉတႆးႁဝ်းတီႈၼိုင်ႈလႄႈ တီႈၼိုင်ႈပေႃးတေလႆႈလဵပ်ႈႁဵၼ်း လႅၵ်ႈလၢႆႈတင်းႁူႉၵၼ်  ပိူင်လူင်မၼ်း တေဢုပ်ႇၶႆႈလွင်ႈႁဵတ်းႁိုဝ်ပဵၼ်မႃး လွင်ႈပီမႂ်ႇတႆး ၊ ပွႆးယုၵ်ႉယွင်ႈၸဝ်ႈၶူးမေႃႇလိၵ်ႈတႆးၸိူဝ်းၼႆႉ လႆႈမၵ်းမၼ်ႈပဵၼ်မႃးၸိူင်ႉႁိုဝ် ၸိူဝ်းၼႆႉ ။ ထႅင်ႈၾၢႆႇ ၼိုင်ႈသမ်ႉ တေဢုပ်ႇၶႆႈ လွင်ႈယုမ်ႇယမ် လွင်ႈယူႇသဝ်းၵိၼ်သၢင်ႈ ပီႈၼွင်ႉတႆးမႄႈႁွင်ႈသွၼ်လႄႈ လွင်ႈတူင်ႇဝူင်းတႆး ဝႃႈၼႆ ။


ၼႂ်းပၢင်ဢုပ်ႇၶႆႈလဵပ်ႈႁဵၼ်းလွင်ႈတႆး တေမီးၽူႈလူင်ႉလႅၼ် ၼႂ်းဝဵင်းမႄႈႁွင်ႈသွၼ် ၊ ၶူးသွၼ်ၸၼ်ႉၸွမ် ၵဵင်းမႆႇ ၊ သမႃးၶူမ်းပၢႆးပၺ်ၺႃလႄႈၾိင်ႈငႄႈတႆး ၵဵင်းမႆႇ ႁူမ်ႈလူၺ်ႈ ၽူႈလူင်ႉလႅၼ်လွင်ႈတႆး ထႅင်ႈလၢႆလၢႆၵေႃႉ ။


ၼၢင်းသႅင်မိူင်းလီသမ်ႉ တေဢုပ်ႇၶႆႈၼႄလွင်ႈပဵၼ်မႃး ပွႆးယုၵ်ႉယွင်ႈၸဝ်ႈၶူမေႃလိၵ်ႈတႆး ဢၼ်ၸတ်းႁဵတ်းႁဵတ်းတီႈဝၢၼ်ႈမႂ်ႇမွၵ်ႇၸၢမ် ဢိူင်ႇတႃႇတွၼ်း ၸႄႈဝဵင်းမႄႈဢၢႆး ၸႄႈတွၼ်ႈ ၵဵင်းမႆႇ ႁဵတ်းႁိုဝ်ပဵၼ်မႃး ၊ ၶူးပၢႆးမိူင်း တေၸီႉၸႅင်ႈပွ်ႇလႅင်းလၢတ်ႈၼႄ လွင်ႈပဵၼ်မႃး ပွႆးပီမႂ်ႇတႆး ႁဵတ်းႁိုဝ်ပဵၼ်မႃး ၊ ၶူးၸၢႆးၶမ်း ႁူဝ်ၼႃႈ သိုပ်ႇသၢၼ်လၢႆးတႆး တေဢုပ်ႇၶႆႈၼႄလွင်ႈတၢင်း ၸဝ်ႈၶူးမေႃလိၵ်ႈတႆး ၊ ၶူးသွၼ်ၸၼ်ႉၸွမ် ၵဵင်းမႆႇသမ်ႉ တေဢုပ်ႇၶႆႈ လွင်ႈလႅၵ်ႈလၢႆႈၼႂ်းတူင်ႇဝူင်းတႆး ၊ ၽူႈလူင်ႉလႅၼ်ႇ ပီႈၼွင်ႉၵူၼ်း ဝဵင်းမႄႈႁွင်ႈသွၼ်သမ်ႉ တေဢုပ်ႇၶႆႈၼႄ လွင်ႈယုမ်ႇယမ် လွင်ႈယူႇသဝ်း ၵိၼ်သၢင်ႈ ပီႈၼွင်ႉမႄႈႁွင်ႈသွၼ် ။ ၼႂ်းဝၼ်းတီႈ 23 ႁူဝ်ၶမ်ႈသမ်ႉ တေမီးလွင်ႈတၢင်းၵိၼ်ၶွင်တႆး၊ ၼႄလွင်ႈ မေႃတိၼ်မေႃမိုဝ်း ပီႈၼွင်ႉတႆး မႄႈႁွင်ႈသွၼ်လႄႈ တၢင်းၵႃႈတၢင်းဝႅၼ် ၸဵမ်ၸိူဝ်းၼႆ ဝႃႈၼႆ ။


ပၢင်ဢုပ်ႇၶႆႈလွင်ႈတႆးၵမ်းၼႆႉ တေမီးၵူၼ်းၼႂ်းပိုၼ်ႉတီႈ ဝဵင်းမႄႈႁွင်ႈသွၼ် မိူၼ်ၼင်ႇပီႈၼွင်ႉတႆး ပီႈၼွင်ႉယူၼ်း ၊ ပီႈၼွင်ႉထႆးလႄႈ ပီႈၼွင်ႉၵူၼ်းၶိူဝ်း ဢၼ်ယူႇသဝ်းၼႂ်းမႄႈႁွင်ႈသွၼ် ၸိူဝ်းၼႆႉ တေၶဝ်ႈႁူမ်ႈ ထွမ်ႇ ၊ လဵပ်ႈႁဵၼ်းတင်းၼမ် ။