သင်ၶၸဝ်ႈၼႂ်းၸိုင်ႈတႆး ပွတ်းၸၢၼ်းသၢၼ်မိုဝ်းၵၼ်တႄႇ ၸတ်းႁဵတ်းပၢင်တြႃး ၼႂ်းၸႄႈဝဵင်းလွႆလႅမ် ယိူင်းဢၢၼ်းႁႂ်ႈၵူၼ်းၼုမ်ႇ တၵ်ႉၵႃႇသတ်ႉထႃးႁၢင်ႇၵႆ ၽေးယႃႈမဝ်းၵမ် ။

ဝၼ်းတီႈ 12/01/2016 ၸဝ်ႈၶူးသီရိထမ်မ ဝိႁၢရ်ဝဵင်းဢိၼ်း ၊ ၸဝ်ႈတူၼ်ၶူး ၵႃႇဝိင်ႇတ ဝိႁၢရ် (ၵျွင်း) တူၵ်း မိူင်းပွၼ် ၊ ၸဝ်ႈတူၼ်ၶူးသေႃးလိင်ႇတ ဝတ်ႉၵုၼ်ၼႃး ထုင်ႉပူင်း ၊ ၸဝ်ႈၶူးၼၼ်ႇတိသေႇၼ ဝတ်ႉထၢတ်ႈတေႃႇလွႆလႅမ် ၊ ၸဝ်ႈၶူးမူးလိင်ႇတ ဝတ်ႉမိူင်းယၢင်း မိူင်းၼွင် - ဢွၼ်ႁူဝ်ထူဝ်းၼႃႈ သင်ၶၸဝ်ႈတႆး သေ ၸတ်းႁဵတ်းပၢင်တြႃး ပိူဝ်ႈႁႂ်ႈၵူၼ်းၼုမ်ႇ၊ၵူၼ်းဝၢၼ်ႈၵူၼ်းမိူင်းယၢၼ်ၵႆ ယႃႈမဝ်း ၵမ် သႂ်ႇၸိုဝ်ႈပၢင်တြႃးဝႃႈ  “ပၢင်တြႃးတိုၵ်းၽေးယႃႈမဝ်းၵမ် လႄႈ ပၢင်တြႃးၵူၼ်းၼုမ်ႇ ” ၸတ်းႁဵတ်းၵႂႃႇတီႈ သုမ်ႉဝူင်းမႅတ်ႈတႃႇ ဝၢၼ်ႈၼွင်ၶဵဝ် ၸႄႈဝဵင်း လွႆလႅမ် ၸိုင်ႈတႆး ပွတ်းၸၢၼ်း မီးပီႈၼွင်ႉတႆး၊ပဢူဝ်း၊မၢၼ်ႈ ၶဝ်ႈႁူမ်ႈထွမ်ႇ မီးႁိမ်းပၢၵ်ႇ ။


ၸဝ်ႈၶူးသီရိထမ်မ ဝတ်ႉၾႃႉဝဵင်းဢိၼ်း လၢတ်ႈဝႃႈ - လၢႆသိပ်းပီမႃးယဝ်ႉဢၼ်ၵူၼ်းမိူင်းတႆးလႆႈ တူၵ်းပဵၼ်းယိူဝ်ႇ ၊ ၶီႈၶႃႈယႃႈမဝ်းၵမ် ႁဵတ်းႁႂ်ႈၵူၼ်းမိူင်းတႆး တၢင်းယၢမ်ႈလူႉ ၸပ်းတိတ်းယႃႈ ပေႃးၸပ်းယႃႈယဝ်ႉ ႁဵတ်းၵႃႈပဵၼ် ယဵၼ်းပဵၼ်ၵႂႃႇၶီႈလၵ်ႉၵူၼ်းၸူၼ်ၵေႃႈမီး မိူဝ်ႈလဵဝ် ၵႃႈၶၼ် ယႃႈမႃႉ 1 မဵတ်ႉလႂ် 500 ပျႃးၵူၺ်း တႃႇတေႁႃသိုဝ်ႉၵေႃႈငၢႆႈ ၵွပ်ႈၼၼ်လႄႈယႃႈမဝ်းၵမ်ၼႆႉမၼ်း လိူင်ႇၼမ်တႄႉတႄႉၶႃႈ သင်ပီႈၼွင်ႉတီႈလႂ်ၶႂ်ႈမီးပၢင်တြႃးၸိူင်ႉၼႆ ၸိုင်ယူႇတီႈၸဝ်ႈႁဝ်းၶဝ်ႁပ်ႉတွၼ်ႈယူႇဝႃႈၼႆ ။


သိုပ်ႇလၢတ်ႈထႅင်ႈဝႃႈ - မိူဝ်ႈလဵဝ်ၼႆႉၸုမ်းၵူၼ်းၼုမ်ႇၵေႃႈမီးမႃးယဝ်ႉ ၵူၼ်းၼုမ်ႇထုၵ်ႇလႆႈၶဝ်ႈ ပဵၼ်မူႇပဵၼ်ၸုမ်း သေလူဝ်ႇၵႅၼ်ႇၶႅင်ႇ ႁဵၼ်းႁူႉပၺ်ႇၺႃႇတၢင်းမေႃ ပိူဝ်ႈတႃႇပူၵ်းပွင်တူဝ်ၵဝ်ႇ လႄႈ တႃၸိူဝ်ႉၶိူဝ်းၸဝ်ႈၵဝ်ႇဝႃႈၼႆ ။


ပၢင်တြႃးတိုၵ်းတေႃးယႃႈမဝ်းၵမ်ၼႆႉၸတ်းမႃးပီၼႆႉပဵၼ်ပီတီႈ 4 ယဝ်ႉလႄႈလိူၼ်ၵမ်မႂ်ႇ 8 ၶမ်ႈၼႆႉ ၵေႃႈတေၵႃႇၸတ်းတီႈထုင်ႉပူင်း ယိူင်းဢၢၼ်းၼင်ႇႁိုဝ်ပီႈၼွင်ႉတႆးပေႃးတေလႆႈငိၼ်း ထမ်းတြႃးတႆး သေ ယူႇႁၢင်ႇၵႆယႃႈမဝ်းၵမ် ၊ ပၢင်တေႃႇပၢင်လွင်းၸိူဝ်းၼႆႉ ဝႃႈၼႆ ။