ပႃႊတီႊႁူဝ်သိူဝ် (SNLD) ၵၢဝ်ႇလၢတ်ႈၼႂ်းပၢင်ၵုမ်လွင်ႈငမ်းယဵၼ် မိူင်းႁူမ်ႈတုမ် တီႈၼေႇပျီႇတေႃႇ ။ တူၵ်ႇလၢတ်ႈၵဵဝ်ႇၵပ်းလွင်ႈ ၵေႃႇတင်ႈၸိုင်ႈမိူင်းႁူမ်ႈတုမ် ၾႅတ်ႊၻရႄႊလ် ဢၼ်မီးပိုၼ်ႉထၢၼ် ၸွမ်းလွၵ်းပိူင်တႆး လႄႈပိူင်ပၢင်လူင် ။

ပၢင်ၵုမ်လူင်လွင်ႈငမ်းယဵၼ် ဢၼ်ၸတ်းႁဵတ်းတီႈၼေႇပျီႇတေႃႇ ဝၼ်းထူၼ်ႈ 2 ဝၼ်းတီႈ 13/01/2016 (မိူဝ်ႈဝႃး) ၼႆႉ ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး (SNLD) ယိုၼ်ႈလိၵ်ႈၽိုၼ်ၼိုင်ႈ ၊ ဢိၵ်ႇတင်း လႆႈၵၢဝ်ႇလၢတ်ႈတီႈၼႂ်းပၢင်ၵုမ်လူင် ၸွမ်းၼင်ႇၼႂ်းၽိုၼ်လိၵ်ႈ တူၵ်ႇလၢတ်ႈလွင်ႈ ၵၢၼ်ၵေႃႇတင်ႈၸိုင်ႈမိူင်းႁူမ်ႈတုမ် ၾႅတ်ႊၻရႄႊလ် လူၺ်ႈလွၵ်းပိူင်တႆး ၊ ဢၼ်မီးပိုၼ်ႉထၢၼ် ပဵၼ်လိၵ်ႈၵိၼ်ၵႅၼ်ႇ ပၢင်လူင် ။


ၵဵဝ်ႇၵပ်းလွင်ႈၼႆႉ ၽူႈၼမ်းၼႂ်းတႃႇပွင်ပဵၼ်ပၢင်ၵုမ်လွင်ႈငမ်းယဵၼ် ၸၼ်ႉမိူင်းႁူမ်ႈတုမ်လႄႈပဵၼ်တင်းၽူႈၶဝ်ႈပႃးၼႂ်းၶွမ်ႊမတီႊငဝ်ႈငုၼ်း ပႃႊတီႊႁူဝ်သိူဝ် (SNLD) ၊ ယင်းပဵၼ်ပႃး ၽူႈဢၼ်ၶဵၼ်ႇတႅမ်ႈယူင်ႉၶၢပ်ႈၵၢၼ်မိူင်း တွၼ်ႈတႃႇၸုမ်းဢူၺ်းလီၸၢဝ်းၶိူဝ်းၽွမ်ႉႁူမ်ႈ (UNA) ၸၢႆးၵျေႃႇၺုၼ်ႉ ၵၢဝ်ႇလၢတ်ႈဝႃႈ - ႁဝ်းၶႃႈဢုပ်ႇလၢတ်ႈ လွင်ႈပိူင်တႆး ၊ လွင်ႈၵၢၼ်ၵေႃႇတင်ႈၸိုင်ႈမိူင်းႁူမ်ႈတုမ် ၾႅတ်ႊၻရႄႊလ် လူၺ်ႈလွၵ်းပိူင်တႆး ( ဢၼ်မၢၼ်ႈဝႃႈလွၵ်းပိူင်တႆး ) ဢၼ်ပဵၼ်မႃးလူၺ်ႈလိၵ်ႈၵိၼ်ၵႅၼ်ႇပၢင်လူင် ၊ လူၺ်ႈလွင်ႈတၢင်းဢၼ်ၶႂ်ႈလႆႈၶႂ်ႈပဵၼ် ပၢင်ၵုမ်လူင်တူၼ်ႈတီး ဢၼ်ၸတ်းႁဵတ်းမိူဝ်ႈပီ 1961 ဝႃႈလူၺ်ႈလွင်ႈလၢႆးၵေႃႇတင်ႈၸိုင်ႈမိူင်းႁူမ်ႈတုမ် ၾႅတ်ႊၻရႄႊလ် 8 ၸႄႈမိူင်း - ဝႃႈၼႆ ။


ၸိုင်ႈမိူင်းႁူမ်ႈတုမ်ၾႅတ်ႊၻရႄႊလ် လွၵ်းပိူင် 8 ၸႄႈမိူင်းၼႆႉ ၼွၵ်ႈၼိူဝ်သေၸၢဝ်းၶိူဝ်း 7 ၸႄႈမိူင်းယဝ်ႉ မိူင်းမၢၼ်ႈ 7 တိူင်းၵေႃႈ ႁႂ်ႈႁူမ်ႈၵၼ်တင်းမူတ်းပဵၼ်ၸႄႈမိူင်းဢၼ်ၼိုင်ႈ တွၼ်ႈတႃႇၸၢဝ်းၶိူဝ်းမၢၼ်ႈ ၊ ႁူမ်ႈၸၢဝ်းၶိူဝ်း 7 ၸႄႈမိူင်း ပဵၼ် 8 ၸႄႈမိူင်း ။


ၵၢၼ်ၵေႃႇတင်ႈၸိုင်ႈမိူင်းႁူမ်ႈတုမ် ၾႅတ်ႊၻရႄႊလ်ၼႆႉ ၵဵဝ်ႇၵပ်းလွင်ႈၸႅၵ်ႇၽႄဢမ်းၼၢၸ်ႈ (ဢႃႇၼႃႇ) ၊ လွင်ႈၸႅၵ်ႇၽႄၵၢၼ်ၸႂ်ႉတိုဝ်းၶူဝ်းၶွင်ၾိင်ႈသၽႃဝ ၼိူဝ်လိၼ်တႂ်ႈလိၼ် ၊ ၵၢၼ်ၵဵပ်းၶွၼ်ႇ ၊ ၵၢၼ်တမ်းဝၢင်းပၵ်းပိူင်မၢႆမီႈၸိုင်ႈမိူင်း လႄႈတင်း ၵၢၼ်ၶွတ်ႇၽွတ်ႈတပ်ႉသိုၵ်းမိူင်းႁူမ်ႈတုမ် ၸိူဝ်းၼႆႉ ႁႂ်ႈမီးသုၼ်ႇလႆႈၽဵင်ႇပဵင်းသေ ယူႇႁူမ်ႈၵၼ်လႆႈ ။


ပၢင်ၵုမ်လွင်ႈငမ်းယဵၼ် ဝၼ်းတီႈ 13/01/2016 ၼႆႉ လႆႈငိၼ်းဝႃႈ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ၵေႃႈ လႆႈယိုၼ်ႈလိၵ်ႈၽိုၼ်ၼိုင်ႈ ။


ၼွၵ်ႈသေၼၼ်ႉ မီးပႃႊတီႊၵၢၼ်မိူင်း 90 ၸုမ်းပၢႆၵေႃႈ လႆႈယိုၼ်ႈလိၵ်ႈသေ ဢုပ်ႇဢူဝ်းလၢတ်ႈလွင်ႈတၢင်းႁၼ်ထိုင် ၵၢင်ၸႂ်ၽႂ်မၼ်း 50 ၽိုၼ် ။ ၼႂ်းလိၵ်ႈၼၼ်ႉ ပႃးလွင်ႈပၢႆးပိူင်ၵူၼ်း ၊ ပၢႆးပၺ်ၺႃ ၊ လွင်ႈၾႅတ်ႊၻရႄႊလ် ၊ လွင်ႈၵူၼ်းပၢႆႈၽေးသိုၵ်း / ၽူႈႁၢမ်းႁႅၵ်းတီႈယူႇၼႂ်းမိူင်း (IDP) ၊ လွင်ႈပၢႆးမၢၵ်ႈမီး ၊ လွင်ႈၸႅၵ်ႇဝၢၵ်ႈၶူဝ်းၶွင်သၽႃဝ တေႃႇပေႃးထိုင်ပႃးလွင်ႈၸၼ်ႉႁူမ်ႇလူမ်ႈဝၢၼ်ႈမိူင်းၸိူဝ်းၼႆႉ လၢႆၸိူဝ်ႉလၢႆပိူင်ၸိူဝ်းၼႆႉ ။


ပၢင်ၵုမ်လူင်လွင်ႈငမ်းယဵၼ် မိူင်းႁူမ်ႈတုမ် ဝၼ်းႁႅၵ်ႈၼၼ်ႉ ႁူဝ်ပဝ်ႈငဝ်ႈငုၼ်း ၻီႊမူဝ်ႊၶရေႊၸီႊၸိူဝ်ႉၸၢတ်ႈ (NLD) ဢၼ်ပေႉၵၢၼ်လိူၵ်ႈတင်ႈ ၼႂ်းပီ 2015 ၼၢင်းဢွင်ႇသၢၼ်းၸုၵျီႇၵေႃႈ ၶဝ်ႈႁူမ်ႈၵၢဝ်ႇလၢတ်ႈၵႂၢမ်း မိူဝ်ႈပၢင်ပိုတ်ႇပၢင်ၵုမ်လူင်ဝႃႈ - ပိူဝ်ႈတႃႇတေၼႄၼမ်ႉၼႄတူဝ် ဢၼ်ၸၢဝ်းၶိူဝ်းတင်းလၢႆၾၼ်ယူႇၼၼ်ႉ ထုၵ်ႇလႆႈႁူမ်ႈၵၼ်သၢင်ႈၵူႈပႃႈၵူႈၾၢႆႇ ။ ၼင်ႇႁိုဝ်တေပဵၼ်မႃးပၢင်ၵုမ်ပၢင်လူင် ႁူဝ်ပၢၵ်ႇ 21 ပီမိူင်းၼၼ်ႉ မုင်ႈမွင်းဝႆႉယူႇ - ဝႃႈၼႆ ။