ၸုမ်းႁႅင်းၵၢၼ် ၽွမ်ႉႁူမ်ႉ ၸတ်းႁဵတ်းဝၼ်းလုၵ်ႈဢွၼ်ႇ ၼႂ်းၸိုင်ႈထႆး တီႈပၢင်သဝ်း ၶီးႁူမ်း (ၶႅမ်ႉၵေႃႇသၢင်ႈ) ဝဵင်းၵဵင်းမႆႇ ။

ဝၼ်းတီႈ 09/01/2016 ၶၢဝ်းယၢမ်း 18:00 – 22:00 မူင်း ၸုမ်းႁႅင်းၵၢၼ် ၽွမ်ႉႁူမ်ႈ ၸတ်းႁဵတ်းဝၼ်းလုၵ်ႈဢွၼ်ႇ ၸိုင်ႈထႆး တီႈၶႅမ်ႉၵေႃႉသၢင်ႈ ၶႅမ်ႉၶီးႁူမ်း ၸႄႈဝဵင်းသႃရႃးၽီး ၸႄႈတွၼ်ႈၵဵင်းမႆႇ ၸိုင်ႈထႆး တွၼ်ႈတႃႇလုၵ်ႈဢွၼ်ႇ ပေႃးတေမိုတ်ႈၵိုဝ်းၸမ်ၸႂ်ၵၼ် လႄႈမေႃပူၵ်းပွင် တူဝ်ၵဝ်ႇ တင်းမူတ်းလုၵ်ႈဢွၼ်ႇ ၶဝ်ႈႁူမ်ႈ 30 ပၢႆ ။


ထွင်းၶမ်း ၽူႈၵိူဝ်းၵုမ် ၸုမ်းႁႅင်းၵၢၼ်ၽွမ်ႉႁူမ်ႈ လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ဝႃႈ တၢင်းယိူင်းဢၢၼ်းႁဝ်းၶႃႈတႄႉ မိူၼ်ၸိူင်ႉၼင်ႇဝႃႈ ၼႂ်းၸုမ်းႁဝ်းၶႃႈၵေႃႈ မီးလုၵ်ႈဢွၼ်ႇၼုမ်ႇၼမ် ၼင်ႇႁိုဝ် ၶဝ်ပေႃးတေလႆႈႁူႉဝႃႈ လုၵ်ႈဢွၼ်ႇဝၼ်းမိူဝ်ႈၼႆႉၵေႃႈ တေမီးၵႃႈၶၢၼ် တွၼ်ႈတႃႇတေပဵၼ်ၵူၼ်းလူင် ဝၼ်းမိူဝ်းၼႃႈ ။ ၵွပ်ႈၼၼ်လႄႈ လႆႈဢွၼ်ၵၼ် ၸတ်းႁႅၼ်းဝၼ်းလုၵ်ႈဢွၼ်ႇ မႃးၵူႈပီ ။ တေမီးလဵၼ်ႈၵဵမ်း ၊ ၸႅၵ်ႇၶူဝ်းၶွင် ၊ ၶဝ်ႈမုၼ်း ၊ ပပ်ႉတႅမ်ႈ ၊ ၵမ်ႉႁႅင်ႈ တွၼ်ႈတႃႇတေပဵၼ်တၢင်းတိုဝ်း လုၵ်ႈဢွၼ်ႇတေၶဝ်ႈႁူင်းႁဵၼ်း ဝႃႈၼႆ ။


ၼွၵ်ႈလိူဝ်သေၼႆႉ ယင်းမီးၸုမ်းႁူမ်ႈတုမ်ႁႅင်းၵၢၼ် ယၢၼ်မိူင်း လႆႈၸတ်းႁဵတ်းဝၼ်းလုၵ်ႈဢွၼ်ႇ ၼႂ်းဝၼ်းတီႈ 09 ၶၢဝ်းယၢမ်း 12:00-17:00 မူင်း မိူၼ်ၵၼ် ၸတ်းႁဵတ်းတီႈ လုမ်းႁူမ်ႈတုမ်ႁႅင်းၵၢၼ်ယၢၼ်မိူင်း ဝဵင်းသႃရႃးၽီး ၵဵင်းမႆႇ ၵေႃႈႁဵတ်း လုၵ်ႈဢွၼ်ႇလႄႈၽူႈယႂ်ႇၵူၼ်းလူင် မႃးၶဝ်ႈႁူမ်ႈ မီး မွၵ်ႈ 200 ၵေႃႉ ။


ၼၢင်းမူၺ်ဢူး ၽူႈၵိုဝ်းၵုမ် ၸုမ်းႁူမ်ႈတုမ်ႁႅင်းၵၢၼ် ယၢၼ်မိူင်းလၢတ်ႈဝႃႈ ဢၼ်လႆႈၸတ်းႁဵတ်းဝၼ်းလုၵ်ႈဢွၼ်ႇၼႆႉ ပဵၼ်ပွၵ်ႈၵမ်းတီႈ 4 ယဝ်ႉၶႃႈ ၊ ႁူဝ်ပဝ်ႈႁဝ်းၶႃႈ ၸုမ်းႁူမ်ႈတုမ်ႁႅင်းၵၢၼ်ယၢၼ်မိူင်း လႆႈလၢတ်ႈၶေႃႈၵႂၢမ်းပိုတ်ႇပၢင်ၵႂႃႇ ၊ လိူဝ်သေၼၼ်ႉၵေႃႈ မီးလွင်ႈၶႄႉၶဵၼ်ႇလဵၼ်ႈႁႅင်းၵၼ် ၊ ႁွင်ႉၵႂၢမ်း ၊ တၢင်းၵႃႈယိူင်း / ၸိူင်းလႄႈ လႅၵ်ႈလၢႆးၶွင်တွၼ်ႈၵၼ်  ၸဵမ်ၸိူဝ်ႉၼႆႉ ဝႃႈၼႆ ။