ႁူင်းႁဵၼ်း Beam ႁူင်းႁဵၼ်းသိုဝ်ႇသၢၼ်ပၢႆးပၺ်ႇၺႃႇ ႁႅင်းၵၢၼ်ယၢၼ်မိူင်း ၵဵင်းမႆႇ ၸတ်းႁဵတ်းပၢင်ၶွပ်ႈၶူပ်ႇ 6 ပီ ၽူႈယႂ်ႇၵူၼ်းလူင် လႄႈ လုၵ်ႈႁဵၼ်း ၶႅၵ်ႇတီႈၸမ် ၊ ၵႆၶဝ်ႈႁူမ်ႈ 100 ပၢႆ ။

မိူဝ်ႈဝၼ်းတီႈ 10/01/2015 ႁူင်းႁဵၼ်း Beam (BEAM Education Foundation) ၸတ်းပၢင်ၶွပ်ႈၶူပ်ႇတဵမ် 6 ပီ မီးၽူႈယႂ်ႇၵူၼ်းလူင်ၸုမ်းၼႅင်ႈသၢၼ် ၊ ၶႅၵ်ႇတီႈၸမ် ၊ ၵႆ လႄႈလုၵ်ႈႁဵၼ်းၶဝ်ႈ ႁူမ်ႈတင်းသဵင်ႈ 100 ၵေႃႉပၢႆ ၸတ်းႁဵတ်းၵႂႃႇတီႈ ႁူင်းလိုဝ်ႈသဝ်း ထႃႈလိၼ်း ၵဵင်းမႆႇ ၸိုင်ႈထႆး ။


ၶူးၸၢႆးဢွင်ႇလိုၼ်း ၶူးသွၼ်ၶွမ်ႊၽိဝ်ႊၻိူဝ်ႊ  လၢတ်ႈဝႃႈ - ႁူင်းႁဵၼ်းႁဝ်းၶႃႈၼႆႉ သွၼ်ပၼ် General Educational Development (GED) ၼိုင်ႈၸုပ်ႈလႂ် မီးလုၵ်ႈႁဵၼ်း 80 ၵေႃႉပၢႆ သွၼ်တႃႇၶၢဝ်း တၢင်း 1 ပီ ၶၢဝ်းယၢမ်းသွၼ် ၵၢင်ၼႂ် 09:00 – 12:00 လႄႈ ၵၢင်ၶမ်ႈ 18:00 – 21:00 မူင်း လုၵ်ႈႁဵၼ်းၸိူဝ်းမႃးၶိုၼ်းႁဵၼ်း မီးလၢႆၸၢဝ်းၶိူဝ်း မိူၼ်ၼင်ႇ တႆး ၊ မၢၼ်ႈ ၊ ယၢင်း ၊ ၶၢင် ၊ မွၼ်း ၊ ဢႃႇၶႃႇ ၊ ရၶိုင် ၸိူဝ်းၼႆႉ လိူဝ်ၼၼ်ႉ ယင်းသွၼ် ပၼ်ပႃး ယဵပ်ႉၶူဝ်း ၊ လၢႆးမေႃတိၼ်မေႃမိုဝ်း ၸိူဝ်းၼႆႉ မိူဝ်ႈလဵဝ်ၼႆႉႁဝ်းၶႃႈတိုၵ်ႉ ၶတ်းၸႂ်တွၼ်ႈတႃႇႁူမ်ႈမိုဝ်း ၵၼ်တင်ႈ ႁူင်းႁဵၼ်းလူင်ပွင်ၸိုင်ႈထႆး  ၵေႃးသေႃႇၼေႃႇ ၼၼ်ႉယူႇၶႃႈ ။ လိူဝ်ၼၼ်ႉ ပုၼ်းတႃႇၵၢၼ်ႁဵၼ်းမေႃတိၼ်မေႃမိုဝ်းၼႆႉ သင်ဝႃႈပီႈၼွင်ႉႁဝ်းၶဝ်ၵေႃႉလႂ် ယူႇၸွမ်းၵၼ်ၼမ်သေ ဢမ်ႇၸၢင်ႇမႃးတီႈႁူင်းႁဵၼ်းၸိုင်ႁဝ်းၶႃႈ ယင်းတေလူင်းၵႂႃႇသွၼ်ပၼ်ထိုင်တီႈ လႆႈလူးၵွၼ်ႇ ။


ၶူးသၢႆလိူၼ်ၶမ်း ၶူးသွၼ် ႁူင်းႁဵၼ်းႁႅင်းၵၢၼ်ယၢၼ်မိူင်း MLC လၢတ်ႈဝႃႈ - “ ၵူၼ်းႁဝ်းၼႆႉၽႅဝ်ၵႂႃႇတီႈလႂ်ၵေႃႈ ႁဝ်းလူဝ်ႇၵႆႉဢၢၼ်ႇလိၵ်ႈလၢႆး လႄႈ လူဝ်ႇၵႆႉ ထွမ်ႇၶၢဝ်ႇ ၊ ထွမ်ႇတၢင်းႁူႉၼမ်တၢင်းႁၼ်ၵႂၢင်ႈ လဵပ်ႈႁဵၼ်းလွင်ႈ ၵၢၼ်ဝၢၼ်ႈၵၢၼ်မိူင်း ပိူဝ်ႈတႃႇမႃးပူၵ်းပွင်မိူင်းႁဝ်း ၼင်ႇႁိုဝ်ႁဝ်းတေဢမ်ႇတူၵ်းလိုၼ်းၼၼ်ႉ လူဝ်ႇလႆႈၶတ်းၸႂ် လွင်ႈပၢႆးမိူင်း ၊ ပၢႆးပၺ်ႇၺႃႇ ၊ ပၢႆးမၢၵ်ႈမီး ၸိူဝ်းၼႆႉ မိူဝ်ႈလဵဝ်ပဵၼ်ၵၢပ်ႈပၢၼ် ၶွမ်ႊၽိဝ်ႊၻိူဝ်ႊ ၼႆလႄႈႁဝ်း မီးတိုဝ်ႉတၢင်းတႄႉတႄႉ ဢဝ်ၶၢဝ်းယၢမ်းဢၼ်ႁဝ်းၵႂႃႇ လဵၼ်ႈၵဵမ်းလဵၼ်ႈတၢင်းလဵၼ်ႈၼၼ်ႉ သေဢွၼ်ၵၼ် ၶတ်းၸႂ်လဵပ်ႈႁဵၼ်းၶေႃႈမုၼ်း တၢင်းႁူႉတၢင်းႁၼ်ၸိူဝ်းၼႆႉ တေမီးၽွၼ်းလီတွၼ်ႈတႃႇတူဝ်ႁဝ်း တႃႇဝၢၼ်ႈ မိူင်းႁဝ်းတႃႇၸိူဝ်ႉၶိူဝ်းႁဝ်းတႄႉတႄႉ ၼႆယဝ်ႉ ”။


ႁူင်းႁဵၼ်း Beam ( BEAM Education Foundation) ၼႆႉတႄႇပိုတ်ႇသွၼ်မိူဝ်ႈဝၼ်းတီႈ 04 /01/2010 မႃး တေႃႇထိုင်ယၢမ်းလဵဝ် မီးလုၵ်ႈႁဵၼ်း 400 ပၢႆ လုၵ်ႈႁဵၼ်းဢၼ်ႁဵၼ်းယဝ်ႉသေၵႂႃႇသိုပ်ႇ ၶိုၼ်ႈတီႈၸၼ်ႉၸွမ်မီးယူႇ 40 ၵေႃႉပၢႆၼႆယဝ်ႉ ။