ပီႈၼွင်ႉၵူၼ်းဝၢၼ်ႈၵူၼ်းမိူင်း ၸႄႈဝဵင်းၵျွၵ်ႉမႄး ၸတ်းႁဵတ်းပၢင်ပွႆး ယုၵ်ႉယွင်ႈၸဝ်ႈၶူးမေႃ ၸဝ်ႈမိူင်းၼွင် တီႈဝၢၼ်ႈၵွင်းမူး ဝတ်ႉၸေႃးတိၵရူင်ႇ ၸႄႈဝဵင်းၵျွၵ်ႉမႄး ။ တေသၢင်ႈႁုၼ်ႇႁၢင်ႈ ၸဝ်ႈမိူင်းၼွင် ၸၢမ်းၶဵၼ်းႁူဝ်တင်ႈၶိုၼ်ႈသွင်ၾၢႆႇ ။

မိူဝ်ႈဝၼ်းတီႈ 24-25/01/2016 ၶၢဝ်းတၢင်း 2 ဝၼ်းၼၼ်ႉ ပီႈၼွင်ႉၵူၼ်းဝၢၼ်ႈၵူၼ်းမိူင်း ၸႄႈဝဵင်းၵျွၵ်ႉမႄး ၽွမ်ႉလႆႈၸႂ်ၵၼ် ႁူမ်ႈၵၼ်ၸတ်းႁဵတ်းပၢင်ပွႆး ယုၵ်ႉယွင်ႈၸဝ်ႈၶူးမေႃ ၸဝ်ႈမိူင်းၼွင် တီႈဝတ်ႉၸေႃးတိၵရူင်ႇ တီႈဝၢၼ်ႈၵွင်းမူး ဢိူင်ႇဝၢၼ်ႈၵျွင်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ။ ပၢင်ပွႆးယုၵ်ႉယွင်ႈၸဝ်ႈၶူးမေႃၼႆႉ ၸတ်းႁဵတ်းမႃးပဵၼ်ပွၵ်ႈၵမ်းထူၼ်ႈ 41 - ၼႆယဝ်ႉ ။


ၵဵဝ်ႇၵပ်းပၢင်ပွႆးၼႆႉ မိူဝ်ႈဝၼ်းတီႈ 24 ၼၼ်ႉ ပီႈၼွင်ႉၵူၼ်းမိူင်းၼႂ်းဝဵင်းၵျွၵ်ႉမႄး ၼႂ်းပွၵ်ႉၼႂ်းဝၢၼ်ႈၵူႈတီႈတီႈ ၶွၼ်ႈႁူမ်ႈတုမ်ၵၼ်တီႈဝိႁၢရ် ၵၢမ်ႇပေႃးၸ ဢမ်ႇၼၼ် ဝိႁၢရ်ၵျွင်းၽႃႉပွတ်းသေ ၶဝ်ႈထႅဝ်ယဝ်ႉ ဢဝ်တင်းၶႅပ်းႁုၼ်ႇႁၢင်ႈၸဝ်ႈၶူးမေႃၼမ်းၼႃႈသေ ပႆၵႂႃႇတီႈဝၢၼ်ႈၵွင်းမူး ဢိူင်ႇဝၢၼ်ႈၵျွင်း ၊ ဢၼ်မီးၸမ်ၶုမ်ၵုတ်း (ပႃႇႁဵဝ်ႈ) ၸဝ်ႈမိူင်းၼွင် ။


တီႈဝၢၼ်ႈၵွင်းမူးၼႆႉ ၵူၼ်းမႃးၶဝ်ႈႁူမ်ႈပၢင် ၵမ်ႈၼမ်ပဵၼ်ပီႈၼွင်ႉၸၢဝ်းတႆး မီးမွၵ်ႈ 2,000 ပၢႆ ။ သိုပ်ႇၼၼ်ႉ လုၵ်ႉတီႈဝၢၼ်ႈၵွင်းမူးသေ ဢွၼ်ၵၼ်ၵႂႃႇၵႃရဝလမ်ႁူဝ် (ၵၼ်ႇတေႃး) တီႈၶုမ်ပႃႈႁဵဝ်ႈ ၸဝ်ႈၶူးမေႃ ၸဝ်ႈမိူင်းၼွင် ၊ ဢၼ်မီးတီႈၾၢႆႇႁွင်ႇဝၢၼ်ႈၵွင်းမူး ။ ဝၢႆးၼၼ်ႉ ၽူႈလူင်ႉလႅၼ်ႇလွင်ႈပိုၼ်းၶဝ်မႃးၶႆႈၼႄ ပိုၼ်းၸဝ်ႈမိူင်းၼွင် လႄႈၽူႈလူင်ႉလႅၼ်ႇၾၢႆႇလိၵ်ႈလၢႆးမေႃလိၵ်ႈလူင် (ၸရေး) ၶဝ် မႃးႁေႃးလိၵ်ႈထမ်းတီႈ ဝတ်ႉၸေႃးတိၵႃရူင်ႇ ဢၼ်မီးၼႂ်းဝၢၼ်ႈၵွင်းမူး ။ ဝၼ်းတီႈ 24 ၼၼ်ႉ ႁေႃးလိၵ်ႈထမ်းတင်းဝၼ်း ။ ဝၼ်းတီႈ 25 ၵၢင်ၼႂ် မီးပၢင်ႁေႃးထမ်းမၸၵ်ႈၵျႃႇၾၢႆႇတႆး ။


ၶုမ်ၵုတ်း ပႃႇႁဵဝ်ႈၸဝ်ႈမိူင်းၼွင်ၼႆႉ မီးၾၢႆႇႁွင်ႇဝၢၼ်ႈၵွင်းမူး ၼႂ်းဢိူင်ႇဝၢၼ်ႈၵျွင်း ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ။


ဢၼ်လၢၵ်ႇလၢႆးမၼ်းသမ်ႉ ၸုမ်းၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းၵျွၵ်ႉမႄး မီးၶေႃႈတႅပ်းတတ်းဝႆႉဝႃႈ - တေႁဵတ်းသၢင်ႈႁုၼ်ႇႁၢင်ႈၸဝ်ႈမိူင်းၼွင် ၊ ၶဵၼ်းႁူဝ်ၸဝ်ႈမိူင်းၼွင်ၼႆႉ တေႁဵတ်းၸၢမ်းမၼ်းတင်ႈၶိုၼ်ႈသွင်ၾၢႆႇ - ၼႆယဝ်ႉ ။