ႁႅင်းၵၢၼ်ၵူၼ်းပၢၵ်ႇပၢႆ ၸိူဝ်းႁဵတ်းၵၢၼ်ဢမ်ႇလႆႈငိုၼ်း ၊ ယွၼ်ႉၸဝ်ႈၶွင်ၶူင်းၵၢၼ် ဢမ်ႇပၼ်ၵႃႈႁႅင်းၼၼ်ႉ ႁူမ်ႈၵၼ်ထႅမ်ဝႅပ်ႊၾွမ်ႊ ၵႂႃႇတၢင်ႇလၢတ်ႈ တုၵ်းယွၼ်းလူင်ပွင်ၸိုင်ႈထႆး ႁွင်ႈၵၢၼ်လူင်ၾၢႆႇလူလွမ်ႁႅင်းငၢၼ်း ႁႂ်ႈလႆႈၶိုၼ်းၵႃႈႁႅင်းလႄႈ ၵႃႈသၢႆႈတႅၼ်း ။

ပီႈၼွင်ႉႁႅင်းၵၢၼ် ၸိူဝ်းၵႂႃႇတၢင်ႇလၢတ်ႈတုၵ်းယွၼ်းၵႃႈႁႅင်း တီႈႁွင်ႈၵၢၼ်ၾၢႆႇလူလွမ်ႁႅင်းငၢၼ်း တီႈၵဵင်းမႆႇ

ဝၼ်းတီႈ 27/01/2016 (မိူဝ်ႈၼႆႉ) ၶၢဝ်းယၢမ်း 09:00 မူင်း ၊ ႁႅင်းၵၢၼ် ၸိူဝ်းႁဵတ်းၵၢၼ်တီႈႁၢင်ႈႁုၼ်ႉသူၼ်ႇ ပိူဝ်ႊၾဵတ်ႊတူဝ်ႊ ၼႂ်းၵဵင်းမႆႇ ၸိူဝ်းဢမ်ႇလႆႈၵႃႈႁႅင်း ၵူၼ်းပၢၵ်ႇပၢႆ ၊ ႁူမ်ႈၵၼ်ၵႂႃႇတၢင်ႇလၢတ်ႈ တုၵ်းယွၼ်း တီႈႁွင်ႈၵၢၼ်လူင်ၾၢႆႇလူလွမ်ႁႅင်းငၢၼ်း ဢၼ်မီးၼိူဝ်သဵၼ်ႈတၢင်းၶျူဝ်းတၼႃး ဢိူင်ႇၸၢင်ႉၽိူၵ်ႇ မိူင်းၵဵင်းမႆႇ ၸိုင်ႈထႆး ။ တုၵ်းယွၼ်း ပိူဝ်ႈတႃႇႁႂ်ႈၸဝ်ႈၶွင် ႁၢင်ႈႁုၼ်ႈသူၼ်ႇ / ၶူင်းၵၢၼ် ဢၼ်ပၢႆႈပႅတ်ႈၼၼ်ႉ ႁပ်ႉပုၼ်ႈၽွၼ်း မႃးၸၢႆႇပၼ်ၵႃႈႁႅင်းလႄႈ ပၼ်ၵႃႈသၢႆႈတႅၼ်း ၶၢဝ်းယၢမ်းဢၼ်လႆႈလုတ်ႈၵၢၼ်လုတ်ႈငၢၼ်းၵႂႃႇ - ၼႆယဝ်ႉ ။


ၵူၼ်းႁဵတ်းၵၢၼ် တီႈႁၢင်ႈႁုၼ်ႈသူၼ်ႇၼႆႉ ၸိူဝ်းဢမ်ႇလႆႈငိုၼ်း တင်းမူတ်းမီး 200 ပၢႆ ။ ႁၢင်ႈႁုၼ်ႈသူၼ်ႇၼႆႉ မီး 3 ၶူင်းၵၢၼ် - 1. ၶူင်းၵၢၼ်သတႃႊ ဢေႊဝီႊၼိဝ်ႊ 5 ၊ တင်ႈယူႇတီႈမူႇဝၢၼ်ႈပႃႇတၢၼ် မူႇ 4 ၊ ဢိူင်ႇသၼ်ၽၵ်းဝၢၼ် ၸႄႈဝဵင်းႁၢင်ၻူင်း ၸႄႈတွၼ်ႈၵဵင်းမႆႇ ။ 2. ၶူင်းၵၢၼ်တီႇဢႃးမွင်း ၶွၼ်ႊတူဝ်ႊမိၼဵမ်ႊ ၊ တင်ႈယူႇတီႈသဵၼ်ႈတၢင်း သူႊပိူဝ်ႊႁၢႆႊဝေႊ ဢိူင်ႇၾႃႉႁၢမ်ႈ မိူင်းၵဵင်းမႆႇ ။ 3. ၶူင်းၵၢၼ် The spring condominium မၢႆတီႈ 34 မူႇ 4 ၊ ဢိူင်ႇၾႃႉႁၢမ်ႈ မိူင်းၵဵင်းမႆႇ ၸိူဝ်းၼႆႉ ။


ဢၼ်ႁႅင်းၵၢၼ်ၶဝ်ဢမ်ႇလႆႈၵႃႈၸၢင်ႈၼႆႉ ပဵၼ်ဢၼ်လႆႈႁဵတ်းၵၢၼ်ၵႂႃႇ တင်ႈတႄႇဝၼ်းတီႈ 16/12/2015 တေႃႇထိုင်ဝၼ်းတီႈ 15/01/2016 ၶၢဝ်းတၢင်းၼိုင်ႈလိူၼ်။ ပဵၼ်ငိုၼ်းတင်းမူတ်း 906,988.80 ဝၢတ်ႇ ။ ၵႃႈသုၼ်ႇလႆႈတၢင်ႇဢၼ် ၸွမ်းၼင်ႇမၢႆမီႈလူလွမ်ႁႅင်းၵၢၼ် ၵႃႈဢမ်ႇၸႅင်ႈလူင်ႈၼႃႈ 554,850 ဝၢတ်ႇ ။ ၵႃႈသၢႆႈတႅၼ်းလွင်ႈၵိုတ်းၵၢၼ်ၸၢင်ႈ (လိူၵ်ႈၸၢင်ႈ) ပဵၼ်ငိုၼ်း 2,036,100 ဝၢတ်ႇ ။ ႁူမ်ႈတင်းမူတ်းမႅၼ်ႈငိုၼ်း 3,497,938.80 ဝၢတ်ႇ - ၼႂ်းသိုဝ်ႇထႆး လၢတ်ႈဝႆႉၼင်ႇၼႆ ။


လိူဝ်သေၼၼ်ႉ တင်ႈတႄႇဝၼ်းတီႈ 22/01/2016 ၼႆႉမႃး တီႈလိုဝ်ႈသဝ်း / ၶႅမ်ႊၵူၼ်းႁဵတ်းၵၢၼ် ဢၼ်ၼၢႆႊၸၢင်ႈ / ပေႃႈလဵင်ႉမႄႈလဵင်ႉ ၶၢတ်ႈဝႆႉတီႈလိၼ်ပိူဝ်ႈတႃႇပဵၼ်တီႈလိုဝ်ႈသဝ်း ၵူၼ်းႁဵတ်းၵၢၼ်ၼၼ်ႉၵေႃႈ လႆႈထုၵ်ႇတတ်းၼမ်ႉတတ်းၾႆး ။ ၵူၼ်းႁဵတ်းၵၢၼ်ၶဝ် ဢမ်ႇၸၢင်ႈသိုပ်ႇယူႇသဝ်းၵႂႃႇထႅင်ႈလႆႈလႄႈ ႁႅင်းၵၢၼ်ၶဝ်ၵမ်ႈၼမ်ၵႂႃႇႁႃတီႈယူႇမႂ်ႇ ။ ႁဵတ်းႁႂ်ႈၵူၼ်း 200 ပၢႆယၢႆႈၽၢတ်ႇၵၼ်ၵေႃႉႁူႉၵေႃႉတၢင်း ၊ ဢၼ်မႃးၶွၼ်ႈတုမ်ၵၼ်လႆႈသေ ႁူမ်ႈၵၼ်တုၵ်းယွၼ်းသုၼ်ႇလႆႈပွၵ်ႈၼႆႉ ၸင်ႇမီးၵူၼ်း 121 ၵေႃႉၵူၺ်း - ၼႆယဝ်ႉ ။


ၼၢင်းမူၺ်ၽူး မုၵ်ႉၸုမ်းၸၢဝ်းၶိူဝ်းတႆး လၢတ်ႈဝႃႈ - မိူဝ်ႈၼႆႉ ႁဝ်းၶႃႈဢွၼ်ၵူၼ်းႁဵတ်းၵၢၼ် ၸိူဝ်းဢၼ်ဢမ်ႇလႆႈႁပ်ႉၵႃႈၸၢင်ႈ မႃးတုၵ်းယွၼ်းၵႃႈၸၢင်ႈ ၊ ယွၼ်ႉပိူဝ်ႈဝႃႈပေႃႈလဵင်ႉ ၸဝ်ႈၶွင်ၶွမ်ႊပၼီႊၶဝ်ပၢႆႈၵႂႃႇပႅတ်ႈ ။ ႁႅင်းၵၢၼ်ၸိူဝ်းဢမ်ႇလႆႈၵႃႈၸၢင်ႈၼၼ်ႉ တင်းမူတ်းမီး 200 ပၢႆ ။ ၵူၺ်းၵႃႈ ဢၼ်ႁဝ်းမႃးတၢင်ႇယိုၼ်ႈယွၼ်းမိူဝ်ႈၼႆႉ မီး 121 ၵေႃႉၵူၺ်း ။ ၵမ်ႈၽွင်ႈၵေႃႈ ၺႃးၽေးဢုပၢတ်ႈ ရူတ်ႉၵႃးၽႃႇၺႃးသေဢမ်ႇမႃးလႆႈၵေႃႈမီး ။ ၸိူဝ်းတူၵ်းၵၢၼ်တူၵ်းငၢၼ်းၸိူဝ်းၼႆႉ မိူဝ်ႈလဵဝ် ၵမ်ႈၽွင်ႈၵေႃႈၵႂႃႇပိုင်ႈယူႇသဝ်း ၸွမ်းပီႈၸွမ်းၼွင်ႉ ၊ ၵမ်ႈၽွင်ႈၵေႃႈၵႂႃႇႁႃၵၢၼ်မႂ်ႇ ။ မိူဝ်ႈလဵဝ်ၵေႃႈ ယၢႆႈၵၼ်ၵႂႃႇယူႇၵေႃႉတီႈၵေႃႉတၢင်း ။


ႁႅင်းၵၢၼ်ၶဝ် ဢမ်ႇၶဝ်ႈၸႂ်လွင်ႈမၢႆမီႈ ဢၼ်တၢင်းၸဝ်ႈၼႃႈတီႈၶဝ် ၶဝ်ႈမိူဝ်းသပ်းလႅင်းပၼ် ။ ၵွပ်ႈၼၼ် ႁဝ်းၶႃႈလႆႈၵႂႃႇသပ်းလႅင်းၼႄ လွင်ႈမၢႆမီႈႁႅင်းၵၢၼ် မီးၸိူင်ႉႁိုဝ်လၢႆလၢႆ ၊ လွင်ႈႁႅင်းၵၢၼ် မီးသုၼ်ႇလႆႈသင်လၢႆလၢႆၸိူဝ်းၼႆႉ ။ လႆႈၸွႆႈဢဝ်ဝႅမ်ႊၾွမ်ႊၵႂႃႇပၼ်ၶဝ် တႅမ်ႈထႅမ်ၸိုဝ်ႈ တဵၵ်းလၢႆးမိုဝ်း ၊ ႁၢင်ႈႁႅၼ်းၽိုၼ်မိူၼ် (ဝႂ်) ၸိူဝ်းၼႆႉ ပိူဝ်ႈတႃႇမႃးတၢင်ႇတီႈႁွင်ႈၵၢၼ်လူင်ၾၢႆႇတူၺ်းလွမ် ႁႅင်းၵၢၼ် - ၼၢင်းမူၺ်ၽူး လၢတ်ႈ ။


ႁႅင်းၵၢၼ်ၵေႃႉၼိုင်ႈ ယူႇလၢင်းၶိူဝ်း ၊ လုင်းသႅင်ဝဝ်း ၵေႃႉၶဝ်ႈႁဵတ်းၵၢၼ်ၼႂ်းမိူင်းထႆး လႆႈ 7 ပီ ၊ ဢၼ်လိုဝ်ႈယူႇတီႈ သၼ်ၽီသိူဝ်ႉ လၢတ်ႈဝႃႈ - ဢၼ်ႁဝ်းၶႃႈမႃးဝၼ်းမိူဝ်ႈၼႆႉ ၵွပ်ႈပိူဝ်ႈဝႃႈႁဝ်းႁဵတ်းၵၢၼ်ဢမ်ႇလႆႈငိုၼ်းလႄႈ ႁဝ်းမႃးတၢင်ႇယွၼ်း တႃႇတေလႆႈၵႃႈႁႅင်း ။ ဢၼ်ဢမ်ႇလႆႈငိုၼ်းၼႆႉ မီးၶၢဝ်းတၢင်းလိူၼ်ၼိုင်ႈယဝ်ႉ ၊ မႅၼ်ႈ 33 ႁႅင်း ၊ ငိုၼ်းမွၵ်ႈမိုၼ်ႇပၢႆ ။ မီးလုင်းၵေႃႉလဵဝ်ၵူၺ်း တိုၵ်ႉယူႇဝႆႉတီႈၶႅမ်ႉ ၊ ပိူၼ်ႈၸိူဝ်းၼၼ်ႉတႄႉ ဢွၵ်ႇၵႂႃႇႁႃၵၢၼ်မႂ်ႇမူတ်းယဝ်ႉ ။ ယိူင်းဢၢၼ်း ဢၼ်မႃးမိူဝ်ႈၼႆႉၵေႃႈ ၶႂ်ႈလႆႈငိုၼ်းၵႃႈႁႅင်း - ဝႃႈၼႆ ။