ပၢင်ၵုမ်လူင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် ၊ ဢၼ်တေၸတ်းႁဵတ်းဝၼ်းတီႈ 12/01/2015 ၼႆႉ ႁူဝ်ပဝ်ႈ ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး (SNLD) ၸဝ်ႈၶုၼ်ထုၼ်းဢူး တေဢမ်ႇၶဝ်ႈႁူမ်ႈ - ၽူႈၼမ်းၼႂ်းၵူႈလွင်ႈလွင်ႈ ၸၢႆးၼုတ်းလၢတ်ႈ ။

ၸဝ်ႈၶုၼ်ထုၼ်းဢူး ႁူဝ်ပဝ်ႈ SNLD

ၵဵဝ်ႇၵပ်းလွင်ႈၼႆႉ ၸၢႆးၼုတ်း လၢတ်ႈဝႃႈ - တူဝ်တႅၼ်းပႃႊတီႊႁဝ်းၶႃႈသေ တေသူင်ႇၵူၼ်းၼုမ်ႇ ၵႂႃႇၶဝ်ႈႁူမ်ႈ 4 ၵေႃႉ ၊ တူဝ်ႁူဝ်ပဝ်ႈၸဝ်ႈၶုၼ်ထုၼ်းဢူးလႄႈတင်း ၸၼ်ႉၽူႈၼမ်းတႄႉ တေဢမ်ႇၵႂႃႇ ။ ၵႂႃႇၶဝ်ႈႁူမ်ႈၵေႃႈ ၵွပ်ႈဢမ်ႇပႃးၵူႈမူႇၵူႈၸုမ်းလႄႈ မၼ်းတေဢမ်ႇလၢၵ်ႇလၢႆးသင် - လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ ။


ဝၼ်းတီႈ 12-16/01/2016 တေမီးၵၢၼ်ၸတ်းႁဵတ်းပၢင်ၵုမ်လူင် လွင်ႈငမ်းယဵၼ်ၸၼ်ႉမိူင်းႁူမ်ႈတုမ် တီႈၼေႇပျီႇတေႃႇ ။ တေမီးၸုမ်းယိပ်းၵွင်ႈၵၢင်ႇၸၢဝ်းၶိူဝ်း 8 ၸုမ်း ( ၸိူဝ်းလူင်းလၢႆးမိုဝ်း ၵၢၼ်ၵိုတ်းတိုၵ်း ပတ်းပိုၼ်ႉတူဝ်ႈမိူင်း NCA) ၊ ၾၢႆႇလူင်ပွင်ၸိုင်ႈမၢၼ်ႈ ၊ ၾၢႆႇပႃႊတီႊၵၢၼ်မိူင်း ၊ ၾၢႆႇသၽႃး ၸိူဝ်းၼႆႉ ၶဝ်ႈႁူမ်ႈတင်းမူတ်း 700 ၵေႃႉ ။ ၵူၺ်းၵႃႈ ပၢင်ၵုမ်လူင်လွင်ႈငမ်းယဵၼ်ၼႆႉ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၸိူဝ်းပႆႇလူင်းလၢႆးမိုဝ်း NCA ၶဝ် မီးသုၼ်ႇၶဝ်ႈႁူမ်ႈယူႇသေတႃႉ ဢမ်ႇမီးသုၼ်ႇဢုပ်ႇဢူဝ်း တႅပ်းတတ်းသင်ၸွမ်း ။


ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇပႃႊတီႊႁူဝ်သိူဝ် (SNLD) ၸၢႆးလဵၵ်ႉ ၵေႃႈလၢတ်ႈဝႃႈ - ၶဝ်ႈႁူမ်ႈၵေႃႈ တေဢမ်ႇလၢၵ်ႇလၢႆးသင် ၊ ယွၼ်ႉဝႃႈသဵင်ၵွင်ႈၵေႃႈ ယင်းတိုၵ်ႉတႅၵ်ႇယူႇ ။ ၵၢၼ်ၵိုတ်းတိုၵ်းၵၼ် ဢၼ်ဝႃႈၼၼ်ႉၵေႃႈယင်းပႆႇပဵၼ်မႃးတႄႉ - ဝႃႈၼႆ ။


ပၢင်ၵုမ်လူင်လွင်ႈငမ်းယဵၼ် ဢၼ်တေၸတ်းႁဵတ်းတီႈၼေႇပျီႇတေႃႇပွၵ်ႈၵမ်းၼႆႉ ႁူဝ်ပဝ်ႈပႃႊတီႊ NLD ၼၢင်းဢွင်ႇသၢၼ်းၸုၵျီႇၵေႃႈ တေဢမ်ႇၵႂႃႇၶဝ်ႈႁူမ်ႈ ၊ တေပွႆႇတူဝ်တႅၼ်းၵမ်ႈၽွင်ႈ ၵႂႃႇၶဝ်ႈႁူမ်ႈၸွမ်းၵူၺ်း ။ ၸိူင်ႉၼၼ်ၼင်ႇၵဝ်ႇ လႆႈငိၼ်းဝႃႈ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၵေႃႈ တေဢမ်ႇၵႂႃႇၶဝ်ႈႁူမ်ႈ - ၼႆယဝ်ႉ ။


ၵဵဝ်ႇၵပ်းပၢင်ၵုမ်လူင်ၼႆႉ ၸုမ်းတူင်ႇဝူင်းၵူၼ်း ႁိမ်း 130 ၸုမ်းၵေႃႈဢွၵ်ႇၶေႃႈပိုၼ်ၽၢဝ်ႇ ။ လၢတ်ႈဝႃႈ - ဝၢၼ်ႈမိူင်းႁဝ်းၼႆႉ ပေႃးၵဵဝ်ႇၵပ်းၵၢၼ်မိူင်းၸိုင် ပေႃးဝႃႈဢမ်ႇပႃးတပ်ႉသိုၵ်းလႄႈ ဢမ်ႇတႅပ်းတတ်းလႆႈၼႆ တႃႇတေၵေႃႇသၢင်ႈလႆႈမိူင်းႁူမ်ႈတုမ်ၸိုၼ်ႈၸၢင်ႇ ဢၼ်ဝႃႈၼၼ်ႉ တေဢမ်ႇပဵၼ်မႃးလႆႈ ။ ၾၢႆႇၼိုင်ႈၵေႃႈ ပၢင်ၵုမ်လူင်ဢၼ်ႁဵတ်းၼႆႉ မၼ်းၶိုၵ်ႉၶၵ်ႉၵိုင်ႉၵၢင်ႉမႃးၸတ်းလႄႈ တေလႆႈဝႃႈမၼ်းၸဝ်ႉပူၼ်ႉတီႈ ၊ တုၵ်းယွၼ်းႁႂ်ႈၶၢႆႉလိူၼ်ႈပၼ် - ၼႆယဝ်ႉ ။


ၵဵဝ်ႇၵပ်းလွင်ႈ ၽူႈၶဝ်ႈႁူမ်ႈပၢင်ၵုမ်လူင်ၼႆႉ ဢွၼ်ၼႃႈၼႆႉ လႆႈၸႂ်တူၵ်းလူင်းဝႆႉ 700 ၵေႃႉသေတႃႉ ထိုင်မႃးမိူဝ်ႈဝၼ်းတီႈ 05/01/2016 ၼႆႉ မီးပၢင်ၵုမ်တီႈၼေႇပျီႇတေႃႇသေလႆႈၸႂ်တႅပ်းတတ်း ၵူၼ်းၸိူဝ်းတေၶဝ်ႈႁူမ်ႈပၢင်ၵုမ်လူင် လွင်ႈငမ်းယဵၼ်ၼႆႉ ပဵၼ်ၵႂႃႇတင်းမူတ်း 1,136 ၵေႃႉ ။


ၼႂ်းၽူႈၶဝ်ႈႁူမ်ႈတင်းမူတ်း 1,136 ၵေႃႉၼၼ်ႉ ပဵၼ်ၾၢႆႇလူင်ပွင်ၸိုင်ႈ 75 ၵေႃႉ ၊ သၽႃး 75 ၵေႃႉ ၊ တပ်ႉသိုၵ်းမၢၼ်ႈ 150 ၵေႃႉ ၊ တပ်ႉသိုၵ်းၸၢဝ်းၶိူဝ်း 150 ၵေႃႉ ။ ပႃႊတီႊၵၢၼ်မိူင်း 150 ၵေႃႉ ၊  တူဝ်တႅၼ်းၸၢဝ်းၶိူဝ်း 50 ၵေႃႉ ၊ ၵူၼ်းၸိူဝ်းထုၵ်ႇၶဝ်ႈပႃး 50 ၵေႃႉ ၊ ၸုမ်းယိပ်းၵွင်ႈၵၢင်ႇ ၸိူဝ်းပႆႇလူင်းလၢႆးမိုဝ်း NCA 50 ၵေႃႉ ၊ လုမ်းၽွင်းတၢင် (ၸိူဝ်းပၵ်းၼႂ်းမိူင်းမၢၼ်ႈ) 80 ၵေႃႉ ၊ ၸဝ်ႈၼႃႈတီႈ UN 18 ၵေႃႉ ၊ ၸုမ်းၵူႈၸိုင်ႈမိူင်း (NGO) 59 ၵေႃႉ ၊ ၸုမ်းလူင်ပွင်ၸိုင်ႈမၢၼ်ႈ မၵ်းမၼ်ႈ 27 ၵေႃႉ ၊ ၸုမ်းတူင်ႇဝူင်းၵူၼ်း 50 ၵေႃႉ ၊ ၽူႈၼမ်းၸၢဝ်းၶိူဝ်း (EAO) 32 ၵေႃႉ ၊ ၽူႈၵမ်ႉၸွႆႈ (ႁူဝ်ၶေႃႈလႂ်ႁူဝ်ၶေႃႈၼၼ်ႉ) 20 ၵေႃႉ ၊ ၽူႈလဵပ်ႈႁဵၼ်း 50 ၵေႃႉ ၊ ၽူႈၵမ်ႉၸွႆႈ (ၸိူဝ်းၵမ်ႉထႅမ်လွင်ႈငမ်းယဵၼ်မႃး) 50 ၵေႃႉ ၸိူဝ်းၼႆႉ ။