သိုၵ်းတဢၢင်း TNLA တင်း သိုၵ်းတႆး RCSS/SSA သိုပ်ႇပဵၼ်ပၢင်တိုၵ်းၵၼ် ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ။ ပိူဝ်ႈတႃႇၵႄႈလိတ်ႈပၼ်ႁႃလွင်ႈၼႆႉ တပ်ႉ RCSS/SSA ၼႂ်းပိုၼ်ႉတီႈ တႅမ်ႈလိၵ်ႈယိုၼ်ႈၸူး တပ်ႉ TNLA ၵေႃႈ ဢမ်ႇလႆႈႁပ်ႉ - ၵႅမ်ၽူႈၶၢၼ်ပၢၵ်ႇ RCSS/SSA လၢတ်ႈ ။

ဝၼ်းတီႈ 19/01/2016 ၼႆႉ တင်ႈတႄႇၶၢဝ်းယၢမ်း 7 မူင်းၵၢင်ၼႂ် ၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (TNLA) တင်း တပ်ႉသိုၵ်းၸိုင်ႈတႆး (RCSS/SSA) ပဵၼ်ပၢင်တိုၵ်းၵၼ်ထႅင်ႈ တီႈဝၢၼ်ႈလွႆယဵၼ်ႇ ၊ ၾၢႆႇၼိူဝ်ဝၢၼ်ႈပၢင်မၢၵ်ႇမိုဝ်း ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ။ ပၢင်တိုၵ်းပွၵ်ႈၵမ်းၼႆႉ ၾၢႆႇတပ်ႉသိုၵ်းၸိုင်ႈတႆး (RCSS/SSA) မီးႁႅင်းၵူၼ်း 200 ပၢႆ ၊ ၾၢႆႇတပ်ႉသိုၵ်းတဢၢင်း (TNLA) မီးႁႅင်းၵူၼ်း 100 ပၢႆ ။


ၵႅမ်ၽူႈၶၢၼ်ပၢၵ်ႇ (RCSS/SSA) ၸၢႆးသႅင်မိူင်း လၢတ်ႈဝႃႈ - ပၢင်တိုၵ်းဢၼ်ပဵၼ် မိူဝ်ႈဝၼ်းတီႈ 18/01/2016 ၼႆႉ မၼ်းယူႇတီႈသိုၵ်းတဢၢင်း ၶိုၼ်ႈမႃးလေႃႇတိုၵ်းတီႈၵုၼ်ထွတ်ႈ ပွတ်းသီႇပေႃႉ ပဵၼ်တီႈၵူၼ်းႁဝ်းၶႃႈယူႇဝႆႉ ။ တီႈၼႆႈ ၾၢႆႇသိုၵ်းတဢၢင်းလူႉတၢႆ 3 ၵေႃႉ ။ ပၢင်တိုၵ်း ဢၼ်ပဵၼ်တီႈၼႂ်းၸႄႈဝဵင်းၵျွၵ်ႉမႄးတႄႉ ၶဝ်ႁဵတ်းသိုၵ်းမုတ်းမႃးလွမ်ယိုဝ်းၵမ်းၼိုင်ႈသေပၢႆႈၵူၺ်း ၊ ဢမ်ႇမီးလွင်ႈတုမ်ႉတိူဝ်ႉသင် - ဝႃႈၼႆ ။


ၵဵဝ်ႇၵပ်းလွင်ႈၼႆႉ ႁွင်ႈၵၢၼ်ၾၢႆႇပိုၼ်ၽၢဝ်ႇတဢၢင်းၵေႃႈ လၢတ်ႈဝႃႈ - ၾၢႆႇတဢၢင်းမီးလွင်ႈလူႉသုမ်းယူႇ ၊ ၵူၺ်းၵႃႈ လူႉသုမ်းၸိူင်ႉႁိုဝ်လၢႆလၢႆၼၼ်ႉ ဢမ်ႇလၢတ်ႈပႃး ။


ၵဵဝ်ႇၵပ်းလွင်ႈပိူဝ်ႈတႃႇၵႄႈလိတ်ႈပၼ်ႁႃ ၼႂ်းဝူင်ႈၵၢင် RCSS/SSA တင်း PSLF/TNLA ဢၼ်သွင်ၾၢႆႇပဵၼ်ပၢင်တိုၵ်းၵၼ်မႃးၼႆႉ ၵႅမ်ၽူႈၶၢၼ်ပၢၵ်ႇ RCSS/SSA လၢတ်ႈၼႄဝႃႈ - လွင်ႈၼႆႉ တင်ႈတႄႇၵူၼ်း TNLA ၶဝ်ပႂ်ႉယိုဝ်းႁဝ်းၶႃႈ ၊ ၽွင်းၵူၼ်း RCSS/SSA ၶိုၼ်ႈမိူဝ်းၶိုၼ်း ၼႂ်းပိုၼ်ႉတီႈတၢင်းၼမ်ႉၶမ်းၼၼ်ႉ ၸုမ်းၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) ၶဝ်မႃးဢုပ်ႇဢူဝ်းၵေႃႈ ႁဝ်းၶႃႈလႆႈဢုပ်ႇဢူဝ်း လၢတ်ႈၼႄၵၢင်ၸႂ်ႁဝ်းၶႃႈၵႂႃႇ ။ ႁဝ်းၶႃႈၵေႃႈ ပိုၼ်ၽၢဝ်ႇမႃး ပိူဝ်ႈတႃႇဢုပ်ႇဢူဝ်းၵၼ်ယူႇ ။


ထႅင်ႈၾၢႆႇၼိုင်ႈၵေႃႈ မိူဝ်ႈၽွင်းၼၼ်ႉ ၸဝ်ႈၼႃႈတီႈ RCSS/SSA ၼႃႈလိၼ်သိုၵ်း 701 ၵေႃႈ လႆႈတႅမ်ႈလိၵ်ႈယိုၼ်ႈၸူးတပ်ႉ TNLA ယူႇ ။ ၼွၵ်ႈသေၼၼ်ႉ ပူၼ်ႉမႃး 1-2 ဝၼ်းၼႆႉၵေႃႈ ၸဝ်ႈၼႃႈတီႈႁဝ်း ၼႂ်းပိုၼ်ႉတီႈ လႆႈတႅမ်ႈလိၵ်ႈယိုၼ်ႈၸူး တပ်ႉတဢၢင်း ၼႂ်းပိုၼ်ႉတီႈယူႇ ၊ လွင်ႈဝႃႈႁႂ်ႈႁဝ်းၶႃႈ တူဝ်ႈတၼ်းပိူဝ်ႈတႃႇ ဢုပ်ႇဢူဝ်း ၵႄႈလိတ်ႈပၼ်ႁႃၵၼ် ၊ ယွၼ်ႉပိူဝ်ႈၼႂ်းၸၢဝ်းၶိူဝ်းႁဝ်းၼႆႉ ႁဝ်းဢမ်ႇၶႂ်ႈႁႂ်ႈပဵၼ်လွင်ႈတႅၵ်ႇယႅၵ်ႈၵၼ် ။ ၵူၺ်းၵႃႈ ႁဝ်းၶႃႈဢမ်ႇလႆႈလွင်ႈတုမ်ႉတွပ်ႇ ပုၼ်ႈတႃႇတေဢုပ်ႇဢူဝ်းသင် ။


ၸိူင်ႉႁိုဝ်ၵေႃႈလီ မိူဝ်ႈလဵဝ်ၼႆႉ TNLA ပႂ်ႉတိုၵ်းႁဝ်းၶႃႈ ၊ မႃးတိုၵ်းတီႈၵူၼ်းႁဝ်းယူႇ ၸိူဝ်းၼႆႉၵူႈဝၼ်းဝၼ်း ။ မိူဝ်ႈၼႆႉၵေႃႈ တင်ႈတႄႇဢဝ်ၶၢဝ်းယၢမ်း 7 မူင်းမႃး ၶဝ်ၶိုၼ်ႈလေႃႇတိုၵ်းႁဝ်းၶႃႈထႅင်ႈသေ ပဵၼ်ပၢင်တိုၵ်းထႅင်ႈ ၊ သဵင်ၵွင်ႈယင်းပႆႇယဵၼ် (ၽွင်းၵၢင်ဝၼ်း) - ၵႅမ်ၽူႈၶၢၼ်ပၢၵ်ႇ ၸၢႆးသႅင်မိူင်း လၢတ်ႈ ။


ဢိင်ၼိူဝ်မိူဝ်ႈလဵဝ် တိုၵ်ႉပဵၼ်ပၢင်တိုၵ်းယူႇလႄႈ ပိူဝ်ႈတႃႇသိုပ်ႇၵႂႃႇတၢင်းၼႃႈၼၼ်ႉ ၸၢႆးသႅင်မိူင်း လၢတ်ႈဝႃႈ - ႁဝ်းၶႃႈ ဢိင်ၼိူဝ်ငဝ်းလၢႆးဝၢၼ်ႈမိူင်းလႅၵ်ႈလၢႆႈမႃး ၊ ပၢင်ဢုပ်ႇဢူဝ်းၵၢၼ်မိူင်းၼႆၵေႃႈ ၵိူတ်ႇၶိုၼ်ႈမႃးယဝ်ႉ ။ ၸုမ်းၸိူဝ်းပႆႇလူင်းလၢႆးမိုဝ်း NCA ၼႆၵေႃႈ ႁႂ်ႈႁူမ်ႈၵၼ်ႁဵတ်းသၢင်ႈ ၊ လွၵ်းတွၼ်ႈတီႈဢၼ်ပႆႇလူင်းလၢႆးမိုဝ်း ၵေႃႈတွၼ်ႈၼိုင်ႈ ။ ပိူဝ်ႈတႃႇၵႄႈလိတ်ႈပၼ်ႁႃၵၢၼ်မိူင်းၵႂႃႇလႄႈသင် ၊ ၵၢၼ်မိူင်းၼႂ်းၸိုင်ႈတႆးလႄႈသင် ၊ ၵၢၼ်မိူင်းၼႂ်းၸိုင်ႈမိူင်းႁူမ်ႈတုမ် ပတ်းပိုၼ်ႉလႄႈသင် ၊ ႁဝ်းၶႃႈၵူၼ်းမိူင်းတင်းသဵင်ႈၼႆႉ ထုၵ်ႇလီႁူမ်ႈမိုဝ်းၵၼ်ၵႄႈၶႆ ၊ ႁႂ်ႈပဵၼ်ၸွမ်းၼင်ႇၵၢင်ၸႂ်ၵူၼ်းမိူင်းႁဝ်းၶႃႈၶႂ်ႈလႆႈၶႂ်ႈပဵၼ်ၼၼ်ႉ ။ ႁဝ်းၶႃႈတႄႉမုင်ႈမွင်း ၼင်ႇႁိုဝ်ပေႃးလႆႈႁူမ်ႈမိုဝ်း / သၢၼ်မိုဝ်းၵၼ်တင်းၵူႈၾၢႆႇၾၢႆႇသေ ၵႄႈၶႆပၼ်ႁႃၵၢၼ်မိူင်း ႁူမ်ႈႁဵတ်းၵႂႃႇ - ဝႃႈၼႆ ။


ၵဵဝ်ႇၵပ်းလွင်ႈပၢင်တိုၵ်းၼႆႉ ႁွင်ႈၵၢၼ်ပိုၼ်ၽၢဝ်ႇတဢၢင်း TNLA ဢၼ်ပိုၼ်ၽၢဝ်ႇ ၼႂ်း Social Media မိူဝ်ႈဝၼ်းတီႈ 18/01/2016 လၢတ်ႈဝႃႈ - သိုၵ်းတဢၢင်းလူင်းပိုၼ်ႉတီႈ ပိူဝ်ႈတႃႇၵူတ်ႇထတ်းၼႂ်းၼႃႈလိၼ် တဢၢင်းၵုမ်းၵမ်သေ ထုၵ်ႇတပ်ႉသိုၵ်းၸိုင်ႈတႆး (RCSS/SSA) ပႂ်ႉယိုဝ်းလႄႈ သွင်ၾၢႆႇၸင်ႇလႆႈပဵၼ် ပၢင်တိုၵ်းၵၼ် - ၼႆယဝ်ႉ ။


ၽူႈၶၢၼ်ပၢၵ်ႇ TNLA မၢႆႇဢၢႆႈၵျေႃႇ လၢတ်ႈတီႈၸုမ်းသိုဝ်ႇ မိၸ်ႉၸိမ ဝၼ်းတီႈ 19/01/2016 (မိူဝ်ႈၼႆႉ) ဝႃႈ - ၼႃႈလိၼ်ၼႆႉ မၼ်းဢမ်ႇၸႂ်ႈၼႃႈလိၼ် RCSS ၊ RCSS ပူၼ်ႉပႅၼ်ၶဝ်ႈမႃးၼႂ်းၼႃႈလိၼ်ၼႆႉ မိူဝ်ႈလိူၼ်ၼူဝ်ႊဝႅမ်ႊၿိူဝ်ႊ ဝူင်ႈတီႈ 2 ဝၢႆးၶဝ်ၵႂႃႇလူင်းလၢႆးမိုဝ်း ၵၢၼ်ၵိုတ်းတိုၵ်းတူဝ်ႈမိူင်း (NCA) ၵူၺ်း ။ ၼွၵ်ႈသေၼၼ်ႉ ယင်းလၢတ်ႈဝႃႈ မိူဝ်ႈလဵဝ်ၼႆႉ လွင်ႈၶဵင်ႈၶႅင်ၵၢၼ်သိုၵ်းတေႃႇၵၼ်ၵေႃႈႁၢဝ်ႈႁႅင်းဝႆႉ ၊ ၵွပ်ႈၼၼ် ပၢင်တိုၵ်းၵေႃႈ ယင်းတေသိုပ်ႇမီးၵႂႃႇထႅင်ႈၵွၼ်ႇ - ဝႃႈၼႆ ။