တူဝ်တႅၼ်း ၶွင်ႊသီႊႁူမ်ႈတုမ် ၵူႈၸၢဝ်းၶိူဝ်း (UNFC) တင်း ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၸွမ်သိုၵ်းယွတ်ႈသိုၵ်း ဢွၼ်ႁူဝ်ႁူပ်ႉထူပ်းၵၼ် ။ ဢုပ်ႇဢူဝ်းလွင်ႈၼႃႈၵၢၼ်တႃငၢၼ်း လႄႈ ပိူဝ်ႈတႃႇၵႄႈလိတ်ႈပၼ်ႁႃဝူင်ႈၵၢင် တပ်ႉသိုၵ်းတဢၢင်း TNLA တင်း RCSS/SSA ။ လွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ် ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းၸၢႆးငိုၼ်း ဝႆႉၼင်ႇၼႆ ။

ထၢမ် - မိူဝ်ႈ 15/12/2015 တူဝ်တႅၼ်း UNFC ႁူပ်ႉ RCSS ၼႆၶႃႈႁႃႉ ?။


တွပ်ႇ - ၸႂ်ႈၶႃႈဢေႃႈ ။ ၽူႈတၢင်တူဝ် UNFC ၶဝ် မႃးဢုပ်ႇၵၼ်တင်းမုၵ်ႉၸုမ်းႁဝ်းၶႃႈ ။


ထၢမ် - ၾၢႆႇ UNFC ပႃးၽႂ်လၢႆလၢႆၶႃႈ ?။


တွပ်ႇ - ၾၢႆႇ UNFC မႃး 3 ၵေႃႉ ၊ ၸွမ်ႁၢၼ်ပီးထူး ၽူႈပွင်ၵၢၼ်သိုၵ်း ၼႂ်းတပ်ႉသိုၵ်းၸိုင်ႈမိူင်းႁူမ်ႈတုမ် FUA ။ ထုၼ်းၸေႃႇ ၵႅမ်ၽူႈၼမ်းၼႂ်း 1 UNFC ။ ထႅင်ႈၵေႃႉၼိုင်ႈ ပဵၼ်မွၼ်း ၼၢႆႇရုၼ်ႉတဵင်း ။


ထၢမ် - ဢမ်ႇပႃးတဢၢင်းၶႃႈႁႃႉ ?။


တွပ်ႇ - ဢမ်ႇပႃး ။ မီး 3 ၵေႃႉၼၼ်ႉၵူၺ်း ၊ မွၼ်း ၊ ရၶႅင်ႇ တင်းယၢင်းလႅင် တၢင်းၸုမ်း UNFC သေမႃး ။


ထၢမ် - ၾၢႆႇ RCSS ၶႃႈလူး ?။


တွပ်ႇ - ၾၢႆႇ  RCSS ပႃးႁူဝ်ပဝ်ႈလူင် ၸဝ်ႈယွတ်ႈသိုၵ်း ၊ ၶႃႈႁဝ်းၸၢႆးငိုၼ်း ၊ ၸဝ်ႈသိုၵ်းၸၢႆးမိူင်း ။ ၾၢႆႇႁဝ်းသၢမ်ၵေႃႉ ၊ ၾၢႆႇ UNFC သၢမ်ၵေႃႉ ။


ထၢမ် - ဢုပ်ႇဢူဝ်းၵၼ်သင်ၽွင်ႈၶႃႈ ?။


တွပ်ႇ - ပိူင်လူင်မၼ်း ဢၼ်ႁဝ်းၶႃႈဢုပ်ႇၵၼ်မီး 3 လွင်ႈ - တွၼ်ႈ 1. ၵဵဝ်ႇၵပ်းၵၢၼ်မိူင်းမိူဝ်းၼႃႈ လႄႈၵၢၼ်မိူင်းဢၼ်ပူၼ်ႉမႃး ။ ၵၢၼ်မိူင်းဢၼ်ပူၼ်ႉမႃးၵေႃႈ ဢွၼ်ၵၼ်မႃးထတ်းသၢင်သေ လႅၵ်ႈလၢႆႈတၢင်းႁၼ်ထိုင်ၵၼ် ဝႃႈတေႁဵတ်းႁိုဝ်ၶိုင်ပွင်ႁဵတ်းသၢင်ႈၵႂႃႇ ။


တွၼ်ႈ 2. ၵဵဝ်ႇၵပ်းၵၢၼ်ၽွမ်ႉႁူမ်ႈၸၢဝ်းၶိူဝ်း ၊ မိူဝ်းၼႃႈ တႃႇႁႂ်ႈလွင်ႈၽွမ်ႉႁူမ်ႈၸၢဝ်းၶိူဝ်းပေႃးယိုၼ်းယၢဝ်းၼႆႉ ႁဝ်းၶႃႈတေႁဵတ်းၸိူင်ႉႁိုဝ် ၊ ႁႂ်ႈပေႃးၸၢင်ႈၸွႆႈထႅမ်ၵၼ်ၼႆႉ ႁဝ်းတေႁဵတ်းႁိုဝ် ။


ထႅင်ႈတွၼ်ႈၼိုင်ႈ 3. ဢုပ်ႇဢူဝ်းၵၼ်ၵဵဝ်ႇၵပ်း ၶွင်ႊသီႊဢဝ်ၶိုၼ်းၸိုင်ႈတႆး လႆႈပဵၼ်ပၢင်တိုၵ်းၵၼ်၊ တွၵ်ႉတႅၵ်ႉၵၼ်တင်းပီႈၼွင်ႉတဢၢင်း TNLA ၶဝ် ။


ထၢမ် - ဢၼ်လႆႈႁူပ်ႉဢုပ်ႇၵၼ်ၼႆႉ ၸွင်ႇတေပဵၼ်ငဝ်းလၢႆးလီ ပိူဝ်ႈတႃႇၵႄႈလိတ်ႈပၼ်ႁႃလႆႈၶႃႈ ?။


တွပ်ႇ - ၽူႈတၢင်တူဝ် UNFC တင်းမုၵ်ႉၸုမ်းႁဝ်းၶႃႈလႆႈၸႂ်ၵၼ်တႄႉ ၵဵဝ်ႇလူၺ်ႈပၼ်ႁႃဢၼ်ၼႆႉ ႁဝ်းတေၸႂ်ႉလၢႆးဢုပ်ႇဢူဝ်းၵၼ်သေၵႄႈၶႆၵႂႃႇ ။ ၵွပ်ႈၼၼ်လႄႈ ဢမ်ႇႁိုင်ဢမ်ႇၼၢၼ်းၼႆႉ ၽူႈဢွၼ်ႁူဝ်တင်းသွင်ၾၢႆႇတေထူပ်းၵၼ်သေ ၵႄႈၶႆ - ႁဝ်းၶႃႈလႆႈၸႂ်ၵၼ်ၵႂႃႇၼင်ႇၼႆ ။


ထၢမ် - တေႃႈလဵဝ်ၼႆႉ ဢၼ်ပဵၼ်ပၼ်ႁႃယူႇတၢင်းၸိုင်ႈတႆးပွတ်းႁွင်ႇၼႆႉ ၵွပ်ႈပိူဝ်ႈဢမ်ႇပႃးတဢၢင်းၶဝ်မႃးလႄႈ တေလႆႈဝႃႈ ဢၼ်ၵႄႈလိတ်ႈၵႂၢင်ႈၵႂၢင်ႈၶႂၢင်ၶႂၢင်တႄႉ ပႆႇၸႂ်ႈၶႃႈၼေႃႈ ?။


တွပ်ႇ - ပႆႇၸႂ်ႈၶႃႈ။ ပွင်ႇဝႃႈၸုမ်း UNFC ၵေႃႈ ဢဝ်ၶေႃႈမုလ်းတၢင်းပုၼ်ႉမႃး ၊ မႃးဢဝ်ၶေႃႈမုလ်းတၢင်းႁဝ်းသေ သမ်ႉတေၶိုၼ်းမိူဝ်းလၢတ်ႈတၢင်းပုၼ်ႉဝႃႈ ႁဝ်းၶႃႈတႄႉၶႂ်ႈဢုပ်ႇၵၼ် ၊ မွၵ်ႈၼႆႉၵူၺ်းၶႃႈ ?။


ထၢမ် - ယူႇၾၢႆႇ RCSS သေ ၸွင်ႇႁၼ်ထိုင်ဝႃႈတဢၢင်းၼႆႉ ဢဝ်မူႇၸုမ်း FUA မႃးလွၵ်ႇငိုတ်ႈသေဢုပ်ႇဢူဝ်း၊ ၸွင်ႇႁၼ်ထိုင်ၸိူင်ႉၼႆၶႃႈ ?။


တွပ်ႇ - ဢမ်ႇႁၼ်ထိုင်ၸိူင်ႉၼၼ် ။ ၵွပ်ႈပိူဝ်ႈဝႃႈ ၶဝ်ၵေႃႈပဵၼ်လုၵ်ႈၸုမ်း UNFC လႄႈ မၼ်းၵေႃႈတေပဵၼ်ၸွမ်းၼင်ႇပၢင်ၵုမ်ၶဝ် ဢၼ်ႁဵတ်းပူၼ်ႉၵႂႃႇမွၵ်ႈ 3-4 ဝၼ်းၼႆႉသေတႅပ်းတတ်းဝႆႉ ။ တေပၼ်ပုၼ်ႈၽွၼ်းဝႃႈ ႁႂ်ႈ UNFC ယူႇၼႂ်းၵၢင်မၼ်းသေမႃးၶဝ်ႈၵႄႈ ႁဵတ်းၶဵဝ်ပၼ် မွၵ်ႈၸိူင်ႉၼႆၶႃႈ ။


ၵူၺ်းၵႃႈ မုၵ်ႉၸုမ်းႁဝ်းၶႃႈၵေႃႈ လႆႈလၢတ်ႈပၼ်တီႈၽူႈတၢင်တူဝ်ၶဝ်ဝႃႈ - ပီႈၼွင်ႉတဢၢင်း ပီႈၼွင်ႉပလွင်ႈၼႆႉ ၼႂ်းပိုၼ်းၵေႃႈႁဝ်းဢမ်ႇယၢမ်ႈတွၵ်ႉတႅၵ်ႉၵၼ် ဢမ်ႇယၢမ်ႈၽိတ်းမေႃးၵၼ်မႃး ။ ၵွပ်ႈၼၼ်လႄႈ တေႃႇထိုင်ယၢမ်းလဵဝ်ၵေႃႈ ႁဝ်းဢမ်ႇမၵ်းမၼ်ႈဝႃႈပဵၼ်ၽူႈၶဵၼ်ႁဝ်း၊ ပဵၼ်ႁိုဝ်ၵေႃႈႁဝ်းပဵၼ်ပီႈပဵၼ်ၼွင်ႉၵၼ် ၊ ယၢမ်ႈယူႇၵိုၵ်းၸွမ်းႁွမ်းၵၼ်မႃးႁိုင်ယဝ်ႉ ၊ လွင်ႈၼႆႉ ႁဝ်းတေၸႂ်ႉလၢႆးၵတ်းၵတ်းယဵၼ်ယဵၼ်သေ ဢုပ်ႇဢူဝ်းၵၼ်ၵႂႃႇၵူၺ်း ။ ႁဝ်းၶႃႈလႆႈလၢတ်ႈပၼ် တီႈၽူႈတၢင်တူဝ်ၶဝ်ၸိူင်ႉၼႆ ။


ထၢမ် - မိူၼ်ၼင်ႇ ၾၢႆႇတဢၢင်းၶဝ်ဝႃႈ ပူၼ်ႉမႃးမိူဝ်ႈဝၼ်းသိုၼ်းၼႆႉ (13/12/2015) ယူႇတီႈႁူဝ်ပဝ်ႈ ၶွင်ႊသီႊဢဝ်ၶိုၼ်းၸိုင်ႈတႆး တင်း ၽူႈၵွၼ်းငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်ႇသိုၵ်း (ၸၵၶ) မၢႆ 1 ၵျွၵ်ႉမႄး ႁူပ်ႉထူပ်းၵၼ် ၊ ဢၼ်ၼႆႉၶႃႈလူး ၸွင်ႇၸႂ်ႈၶႃႈ ?။


တွပ်ႇ - ဢၼ်ၼႆႉ မၼ်းတိုၼ်းဢမ်ႇၸႂ်ႈ ၽႂ်ၵေႃႈႁူႉယူႇ ။  လွင်ႈၼႆႉၵေႃႈ ႁဝ်းလႆႈလၢတ်ႈပၼ်တီႈၽူႈတၢင်တူဝ် UNFC ၶဝ်ယူႇ ၊ လွင်ႈၾၢႆႇပိုၼ်ၽၢဝ်ႇ TNLA/PSLF ၶဝ် ဢွၵ်ႇၶၢဝ်ႇၽၢင်း ဢၼ်ဢမ်ႇၸိုဝ်ႈဢမ်ႇၸႂ်ႈၸိူဝ်းၼၼ်ႉ မၼ်းၸၢင်ႈႁဵတ်းႁႂ်ႈပၼ်ႁႃလဵၵ်ႉလဵၵ်ႉ ယႂ်ႇၵႂၢင်ႈမႃးယွၼ်ႉသႄႇယူင်းပၼ်ႁႃၼႆႉ ႁႂ်ႈၾႆးမၼ်းလုၵ်ႉႁႅင်းၶိုၼ်ႈ ။ ႁဝ်းၶႃႈၵေႃႈလႆႈလၢတ်ႈပၼ်တီႈၶဝ်ၵႂႃႇယူႇဝႃႈ ႁႂ်ႈတၵ်ႉတိူၼ်ပၼ်ၽွင်ႈဝႃႈ ဢၼ်ဢမ်ႇၸိုဝ်ႈဢမ်ႇၸႂ်ႈၼႆႉ ယႃႇပေဢဝ်မႃးပိုၼ်ၽၢဝ်ႇတိၵ်းတိၵ်း ၊ ႁဝ်းၶႃႈၵေႃႈလႆႈလၢတ်ႈပၼ်တီႈၽူႈတၢင်တူဝ် UNFC ၶဝ်ၵႂႃႇ ။


ထၢမ် - ဢိင်ၼိူဝ်ဢၼ်လႆႈပဵၼ်ပၼ်ႁႃ ၼႂ်းၸိုင်ႈတႆးပွတ်းႁွင်ႇ တင်း TNLA ၶဝ်ၵေႃႈလီ ၊ ဢၼ် RCSS လႆႈႁူပ်ႉၾၢႆႇ UNFC ၶဝ်ၵေႃႈလီ ၊ ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၶႂ်ႈမွၵ်ႇလၢတ်ႈသင်ထႅင်ႈၶႃႈ ?။


တွပ်ႇ - ၽႅၼ်ႇလိၼ်မိူင်းတႆးၼႆႉ မၼ်းပဵၼ်ၶွင်ပီႈၼွင်ႉၸၢဝ်းၶိူဝ်း ဢၼ်ယူႇၼႂ်းမိူင်းတႆး ၵူႈၵေႃႉယဝ်ႉ ။ ပဵၼ်ႁိုဝ်ၵေႃႈလီ သင်ၸိူဝ်ႉဝႃႈၼႂ်းႁဝ်းၶႃႈမီးမႃး ပၼ်ႁႃၸိူင်ႉႁိုဝ်ၵေႃႈလီ ၊ ၾၢႆႇႁဝ်းၶႃႈတႄႉ တိုၼ်းတေဢမ်ႇၸႂ်ႉလၢႆးႁုၵ်းႁၢႆႉသေၵႄႈၶႆ ၊ ႁဝ်းၶႃႈတေၸႂ်ႉလၢႆးဢုပ်ႇဢူဝ်း ယွၼ်ႇယၢၼ်းၶဝ်ႈႁႃၵၼ်သေ ၵႄႈၶႆၵႂႃႇယူႇၼႆ ႁဝ်းၶႃႈၶႂ်ႈၵၢဝ်ႇလၢတ်ႈၵႂႃႇတီႈ ပီႈၼွင်ႉၵူၼ်းမိူင်းတႆးႁဝ်း မီးၼင်ႇၼႆၶႃႈ ။