ဢိင်ၼိူဝ်ငဝ်းလၢႆးၵၢၼ်မိူင်း တီႈၼေႇပျီႇတေႃႇ ဢုပ်ႇဢူဝ်းလွင်ႈငမ်းယဵၼ် ၊ လွင်ႈယူင်ႉၶၢပ်ႈၵၢၼ်မိူင်းသေ ၼင်ႇႁိုဝ်ၵူၼ်းမိူင်းတေ ႁူႉငဝ်းလၢႆးၵၢၼ်မိူင်းၶိုတ်းတၼ်းၼၼ်ႉ ယူႇတီႈမေႃတႅမ်ႈလိၵ်ႈ လႄႈၽူႈထတ်းထွင်လိၵ်ႈ ၽိုၼ်ၶၢဝ်ႇတႆး “ သႅၼ်ပၢႆး ” ႁိုၼ်း ၵႃယၢင်း လႆႈပၼ်တၢင်းႁူႉလႄႈ ထတ်းသၢင်ဝႆႉၼင်ႇၼႆ ။

လိူၼ်ၼႆႉ ဝၼ်းတီႈ 14 လႄႈ 15 တီႈၼေႇပျီႇတေႃႇၼၼ်ႉ ၽူႈပွင်ၵၢၼ်ၾၢႆႇငမ်းယဵၼ်ၶဝ် ဢုပ်ႇဢူဝ်း ပိူဝ်ႈတႃႇတေလူင်းလၢႆးမိုဝ်း ၵိုတ်းတိုၵ်းတူဝ်ႈမိူင်း ။ ၵၢၼ်ၵိုတ်းတိုၵ်းတူဝ်ႈမိူင်းၼၼ်ႉ ပေႃးဝႃႈတႄႉမၼ်း ၸဵမ်မိူဝ်ႈလိူၼ်ဢွၵ်ႊထူဝ်ႊၿိူဝ်ႊ 15 ဝၼ်း ပူၼ်ႉမႃးၼၼ်ႉ ၸုမ်းယိပ်းၵွင်ႈၵၢင်ႇၶဝ် 8 ၸုမ်း ႁူမ်ႈလူင်းလၢႆးမိုဝ်း တင်းလူင်ပွင်ၸိုင်ႈယဝ်ႉလႄႈ ပွင်ႇဝႃႈ NCA ဢၼ်ႁွင်ႉဝႃႈလိၵ်ႈႁူမ်ႈမၢႆ ၵိုတ်းတိုၵ်းတူဝ်ႈမိူင်းၼၼ်ႉ မီးၸႂ်မႃးယဝ်ႉ ၊ ၶဝ်ႈတၢင်းၵၢၼ်မႃးယဝ်ႉ ၊ ပေႃးဝႃႈလူင်းလၢႆးမိုဝ်းယဝ်ႉ ၶၢဝ်းတၢင်း 60 ဝၼ်း သမ်ႉတေလႆႈၶဵၼ်ႇတႅမ်ႈ ပိူင်ယုၵ်းယၢင်ႇယူင်ႉၶၢပ်ႈ ပၢင်ဢုပ်ႇၵုမ်ၵၢၼ်မိူင်း ဝႃႈဝႆႉၼင်ႇၼၼ် ။


ၵွပ်ႈပိူဝ်ႈၸိူင်ႉၼႆ မိူဝ်ႈဝၼ်းတီႈ 14-15 ၼၼ်ႉ ၸုမ်း UPDJC ( ၶွမ်ႊမတီႊႁူမ်ႈသၢင်ႈၵၢၼ်ဢုပ်ႇဢူဝ်း လွင်ႈငမ်းယဵၼ်မိူင်းႁူမ်ႈတုမ် ) ၶဝ်ၸိူဝ်းမီးပုၼ်ႈၽွၼ်း ၾၢႆႇၶဵၼ်ႇတႅမ်ႈယူင်ႉၶၢပ်ႈ ပၢင်ဢုပ်ႇၵုမ်ၵၢၼ်မိူင်းၼၼ်ႉ ၸင်ႇမႃးဢုပ်ႇၵုမ်ၵၼ်သေ လႆႈၸႂ်ၵၼ် တူၵ်းလူင်းၵၼ်ၵႂႃႇ ။ ဝၼ်းတီႈ 16 ၶဝ်ဢဝ်ၶေႃႈလႆႈၸႂ် တူၵ်းလူင်းၵၼ် ဢၼ်ၶဝ်ၶဵၼ်ႇတႅမ်ႈဝႆႉၼၼ်ႉ ယိုၼ်ႈမွပ်ႈပၼ်ၸွမ်ၸိုင်ႈ ။ ယူႇတီႈၸွမ်ၸိုင်ႈသမ်ႉ တေလႆႈလဵပ်ႈႁဵၼ်းတူၺ်းသေယဝ်ႉ ၼႂ်းၶၢဝ်းတၢင်း 1 လိူၼ် ၵွၼ်ႇပႆႇထိုင်လိူၼ်ၵျႅၼ်ႊၼိဝ်ႊရီႊ (2016) 15 ဝၼ်းၼၼ်ႉ တေလႆႈၶိုင်ႁွင်ႉပဵၼ်ပၢင်ၵုမ်လူင် ဢၼ်ဝႃႈပၢင်ဢုပ်ႇၵုမ် လွင်ႈငမ်းယဵၼ်မိူင်းႁူမ်ႈတုမ် ။


ပေႃးဝၢႆးၼၼ်ႉသမ်ႉ တေလႆႈသိုပ်ႇႁဵတ်းပၢင်ဢုပ်ႇၵုမ်ၵၢၼ်မိူင်း ၶၵ်ႉတွၼ်ႈၸိူဝ်ႉၸၢတ်ႈ / ၸၼ်ႉၸိုင်ႈမိူင်း ။ ၸိူဝ်းၼႆႉတႄႉ ပဵၼ်ၶၵ်ႉၵၢၼ်ဢၼ်မီးပႃးၸွမ်းၼႂ်း NCA လိၵ်ႈႁူမ်ႈမၢႆၵိုတ်းတိုၵ်း ၸွမ်းၼင်ႇၶဝ်လႆႈၶိုင်လႆႈႁဵတ်းယဝ်ႉၵႂႃႇၼၼ်ႉ ။ ႁဝ်းၶႃႈလႆႈႁူႉၸွမ်းတႄႉ ပၢင်ဢုပ်ႇၵုမ်ၵၢၼ်မိူင်း ဢၼ်တေဢုပ်ႇၵုမ်ၵၼ်ၼၼ်ႉ ၵူၼ်းၶဝ်ႈႁူမ်ႈပႃးၸွမ်းမၼ်း ၶဝ်မႃးၸႅၵ်ႇမႅင်ႇဝႆႉ ပဵၼ်ၵႂႃႇ 5 ၵိပ်ႇ 5 ၶၵ်ႉတွၼ်ႈ ။


ၵိပ်ႇၼိုင်ႈ ၾၢႆႇပၢႆးမိူင်း (ပႃႊတီႊၵၢၼ်မိူင်း) ၵေႃႈ ၶဝ်ႈပႃးၸွမ်းၵူၼ်း 150 ၵေႃႉ ။ ၾၢႆႇတပ်ႉသိုၵ်း တပ်ႉမတေႃႇမၢၼ်ႈၵေႃႈ သမ်ႉတေလႆႈပႃးၸွမ်းၵူၼ်း 150 ။ ၸုမ်းၸၢဝ်းၶိူဝ်းမႅၵ်ႇၵွင်ႈ 150 ။  ၾၢႆႇၽွင်းတႅၼ်းသၽႃးလႄႈတင်း လူင်ပွင်ၸိုင်ႈသမ်ႉ ၼိုင်ႈၸုမ်းလႂ် 75 ၵေႃႉ ၊ ႁူမ်ႈၵၼ်မီးၵူၼ်း 150 ၼင်ႇၵဝ်ႇ ။ လိူဝ်သေၼၼ်ႉ မီးထႅင်ႈၵိပ်ႇၼိုင်ႈ ဢၼ်ဝႃႈၸုမ်းၸၢဝ်းၶိူဝ်း ဢိၵ်ႇပႃးတင်း ၸိူဝ်းဢၼ်ထုၵ်ႇၽိတ်ႈမွၵ်ႇဢဝ်ၼၼ်ႉ ၸုမ်းလႂ် 50 ႁူမ်ႈၵၼ်ပဵၼ်ၵႂႃႇ 100 ၊ ႁူမ်ႈၵၼ်တင်းမူတ်းတေမီးၵူၼ်း 700 ၵေႃႉ ၊ တေလႆႈႁူမ်ႈဢုပ်ႇၵုမ်ၵၼ် ပိူဝ်ႈတႃႇလွင်ႈငမ်းယဵၼ်မိူဝ်းၼႃႈ ၊ ပိူဝ်ႈတႃႇသၢင်ႈၵၢၼ်မိူင်းၵႂႃႇမိူဝ်းၼႃႈ ၊ တေၵေႃႇသၢင်ႈ မိူင်းႁူမ်ႈတုမ်ၵႂႃႇမိူဝ်းၼႃႈ ။


ၵူၺ်းၵႃႈတီႈၼႆႈ ႁဝ်းမႃးတူၺ်း ယူႇတီႈတပ်ႉသိုၵ်းမၢၼ်ႈ ( တပ်ႉမတေႃႇ ) လႆႈ 150 ၵေႃႉ ။ တပ်ႉမတေႃႇ ဢၼ်ႁွင်ႉဝႃႈတပ်ႉသိုၵ်းမၢၼ်ႈၼႆႉ ႁဝ်းၶႃႈပွင်ႇၸႂ်ဝႆႉတႄႉ မၼ်းတေလႆႈပဵၼ်ၵိင်ႇၽႄ ဢၼ်ယူႇတႂ်ႈလူင်ပွင်ၸိုင်ႈ ဢၼ်ၼိုင်ႈၵူၺ်း ၊ ၽွင်းတႅၼ်းၵေႃႈတေႃႈၼင်ႇၼၼ် ။ လူင်ပွင်ၸိုင်ႈ ၽွင်းတႅၼ်း တပ်ႉသိုၵ်း 3 ဢၼ်ၼႆႉ တေလႆႈပဵၼ်မူႇၼိုင်ႈ ၵိင်ႇ / ၵိပ်ႇလဵဝ်ၵူၺ်းလႄႈ ႁဵတ်းသင်ၶဝ်သမ်ႉ မႃးၸႅၵ်ႇဢဝ်ၸိူင်ႉၼၼ် - ၼႆႉၸဵမ်မိူဝ်ႈပႆႇတႄႇၵၢၼ် ပေႃးႁၼ်လၢႆးယုင်ႈမၼ်းယဝ်ႉ ၊ ႁဝ်းၶႃႈထတ်းႁၼ်ၼင်ႇၼႆ ။


ယူႇတီႈတူဝ်တႅၼ်းၾၢႆႇႁူဝ်သိူဝ် ၸၢႆးၵျေႃႇၺုၼ်ႉ လုၵ်ႉတၢင်ႇၵႂႃႇတႄႉ လွင်ႈပၢင်ဢုပ်ႇၵုမ်ၵၢၼ်မိူင်းၵႂႃႇမိူဝ်းၼႃႈၼႆႉ ထုၵ်ႇလီမီး 3 ၵိပ်ႇၵူၺ်း ။ 1. လူင်ပွင်ၸိုင်ႈ ၊ တႂ်ႈလူင်ပွင်ၸိုင်ႈၼႆႉ တေပဵၼ်ပႃးၽွင်းတႅၼ်းလႄႈ တပ်ႉသိုၵ်း ။ 2. ၸုမ်းၸၢဝ်းၶိူဝ်းမႅၵ်ႇၵွင်ႈ ။ 3. ပႃႊတီႊၵၢၼ်မိူင်း ။ တေလႆႈမီး 3 မူႇ 3 ၵိပ်ႇၼႆႉ ႁူပ်ႉထူပ်းတေႃႇၼႃႈဢုပ်ႇၵုမ်ၵၼ်ၵူၺ်း တၢင်ႇလၢတ်ႈၵႂႃႇၼင်ႇၼၼ် ။


ယူႇတီႈပႃႊတီႊၸိူဝ်ႉၸၢတ်ႈရၶႅင်ႇၶဝ် ဢၼ်ၻွၵ်ႊတိူဝ်ႊဢေးမွင်ႇ ဢွၼ်ႁူဝ်ၶိုၼ်ႈၼၼ်ႉၵေႃႈ ၵမ်ႉထႅမ်ၸွမ်းယူႇ ။ သမ်ႉယူႇတီႈၸုမ်းယိပ်းၵွင်ႈၵၢင်ႇ တင်းမူတ်းတင်းသဵင်ႈ ဢၼ်ၶဝ် 8 ၸုမ်း ႁူမ်ႈၵၼ်လူင်းလၢႆးမိုဝ်းဝႆႉၼၼ်ႉၵေႃႈ ၽွမ်ႉၸွမ်းၶေႃႈဢၼ် ၸၢႆးၵျေႃႇၺုၼ်ႉ တၢင်ႇလၢတ်ႈၵႂႃႇၼၼ်ႉတင်းမူတ်းယူႇ။ ၵူၺ်းၵႃႈ တူဝ်တႅၼ်းၾၢႆႇ NLD ဢၼ်ဢူးၺၢၼ်ႇဝိၼ်း လႄႈ ဢူးထုၼ်းထုၼ်းလုၼ်ႇ ဢၼ်မႃးၶိုၼ်ႈၼၼ်ႉ သမ်ႉၵိုင်ႉၵၢင်ႉလႅၵ်ႈလၢႆႈပဵၼ်ၵႂႃႇဝႃႈ ၾၢႆႇတပ်ႉမတေႃႇလႆႈ 150 ၵေႃႈ ႁႂ်ႈမိူၼ်ၵၼ်တင်းၾၢႆႇၸုမ်းၸၢဝ်းၶိူဝ်းမႅၵ်ႇၵွင်ႈၶဝ်လႆႈ 150 ၼင်ႇၵၼ် ။ ဢၼ်ၼၼ်ႉ မိူၼ်တင်းမၵ်းမၼ်ႈဝႃႈ တပ်ႉမတေႃႇၼႆႉပဵၼ်ၵႂႃႇမူႇၼိုင်ႈ ၵိပ်ႇၼိုင်ႈႁင်းမၼ်း ၊ ၸင်ႇဝႃႈလႆႈၸႅၵ်ႇပဵၼ်ၵႂႃႇ 5 ၵိပ်ႇ 5 မူႇ ၊ တႃႇတေဢုပ်ႇၵုမ်ၵၼ် ။


ပေႃးပဵၼ်မႃး 5 မူႇ 5 ၵိပ်ႇၸိူင်ႉၼင်ႇၼၼ် ၊ ၵွပ်ႈသင်လႄႈၶဝ်လႆႈႁပ်ႉၸိူင်ႉၼၼ် ပေႃးမႃးထတ်းတူၺ်း ၸုမ်း NLD ၼႆႉ ဢွင်ႇပေႉၵၢၼ်လိူၵ်ႈတင်ႈမႃးယဝ်ႉသေတႃႉ ၶဝ်တိုၼ်းပႆႇယုမ်ႇတူဝ်ဝႃႈ လူင်ပွင်ၸိုင်ႈၵဝ်ႇ ဢၼ်ယင်ႇႁၢၵ်ႈတီႈတပ်ႉသိုၵ်းမႃးၼၼ်ႉ တေလွႆးဢၢပ်ႈဢႃႇၼႃႇတီႈၸုမ်းၶဝ် ။ ၵွပ်ႈၼႆလႄႈ ပေႃးဝႃႈတပ်ႉသိုၵ်းဢမ်ႇၽွမ်ႉၸွမ်း ၊ တပ်ႉသိုၵ်းဢမ်ႇလႆႈၸႂ် တႃႇၶဝ်တေပဵၼ်မႃးလူင်ပွင်ၸိုင်ႈ ဢမ်ႇမီးတိုဝ်ႉတၢင်းလႄႈ ၸင်ႇဝႃႈတင်ႈၸႂ်ယွမ်းပၼ်ၾၢႆႇတပ်ႉသိုၵ်း ၊ တပ်ႉသိုၵ်းၶႂ်ႈလႆႈၶႂ်ႈပဵၼ်ၼၼ်ႉ ၶဝ်ယိူၼ်ႉယွၼ်ႇၸွမ်းၸႂ်ၵမ်းၼိုင်ႈသေယဝ်ႉ ၸင်ႇဝႃႈလႆႈပဵၼ်မႃး 5 မူႇ 5 ၵိပ်ႇၼႆႉ ။


ပေႃးၼႆ ၵွပ်ႈပိူဝ်ႈတပ်ႉသိုၵ်းၽွမ်ႉၸွမ်းၶဝ်ယဝ်ႉလႄႈ လွင်ႈ NCA တႄႉ ပဵၼ်ၵၢၼ်ၵႂႃႇၶၵ်ႉတွၼ်ႈၼိုင်ႈယဝ်ႉ ။ တႄႇဢဝ်ယၢမ်းဢၼ် NOB ၶိုၼ်ႈပဵၼ်လူင်ပွင်ၸိုင်ႈမႃးၼၼ်ႉၸိုင် ၶၵ်ႉတွၼ်ႈၵၢၼ် NCA ၼႆႉ တေႁဵတ်းႁိုဝ်ပႆယၢင်ႈၵႂႃႇ ပေႃးမႃးတူၺ်းၼႆ တႃႇတေၶိုပ်ႈၼႃႈပဵၼ်ၵၢၼ်ၵႂႃႇမိူဝ်းၼႃႈၼၼ်ႉ ဢမ်ႇပေႃးႁၼ်တိုဝ်ႉတၢင်းလီ ။ ၵွပ်ႈသင်လႄႈဝႃႈၼၼ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်းမီး 21 ၸုမ်းၼၼ်ႉ ဢၼ်လႆႈလူင်းလၢႆးမိုဝ်းမီး 8 ၸုမ်းၵူၺ်း ၊ မိူဝ်ႈလဵဝ် ယူႇၾၢႆႇၸုမ်းၸၢဝ်းၶိူဝ်းမႅၵ်ႇၵွင်ႈတင်းသဵင်ႈ လႆႈဝႆႉတီႈၼင်ႈ 150 ၵေႃႉ တႃႇတေၶဝ်ႈဢုပ်ႇၵုမ်ၸွမ်း ။ တႃႇ 8 ၸုမ်းၸိူဝ်းလူင်းလၢႆးမိုဝ်းယဝ်ႉၼၼ်ႉ လႆႈဝႆႉ150 ၵေႃႉသေတႃႉၵေႃႈ ၵိုတ်းထႅင်ႈၸုမ်းၸိူဝ်းပႆႇလူင်းလၢႆးမိုဝ်း 13 ၸုမ်းၼၼ်ႉ သုတ်ႉၶဝ်ႈမႃးထႅင်ႈၵေႃႈ သမ်ႉတေလႆႈၸႅၵ်ႇမႅင်ႇတီႈၼင်ႈၼႂ်းတႃႇ 150 ၼႆႉၵူၺ်း ။ ၵွပ်ႈၼႆလႄႈ ယူႇတီႈၸုမ်းၸၢဝ်းၶိူဝ်းၶဝ် ၸိူဝ်းလူင်းလၢႆးမိုဝ်းယဝ်ႉလႄႈ ပႆႇလူင်းလၢႆးမိုဝ်း လီဢုပ်ႇၵုမ်ၵၼ် ။


ထႅင်ႈတွၼ်ႈၼိုင်ႈ ပေႃးဢဝ်လၢႆးတၢင်း 5 ၵိပ်ႇၼႆႉၵႂႃႇၼႃႈၼႆၸိုင် ယူႇတီႈၾၢႆႇတပ်ႉသိုၵ်း တိုၼ်းယူႇၾၢႆႇပေႉပုၼ်ႈဝႆႉတႃႇသေႇ ။ ႁဵတ်းသင်လႄႈဝႃႈၼၼ် ၸုမ်းၸၢဝ်းၶိူဝ်းတင်း 21 ၸုမ်းႁူမ်ႈၵၼ် တေလႆႈ 150 ၵေႃႉၵူၺ်း ၊ ယူႇတီႈတပ်ႉသိုၵ်းမၢၼ်ႈ (တပ်ႉမတေႃႇ) သမ်ႉ ပဵၼ်မုၵ်ႉလဵဝ်ၵွၼ်ႈလဵဝ် သမ်ႉလႆႈဝႆႉယူႇ 150 ။ တပ်ႉမတေႃႇၼႆႉ ပဵၼ်ၶေႃႈလဵဝ်သဵင်လဵဝ် ယူႇတႂ်ႈၶေႃႈၸီႉသင်ႇဢၼ်လဵဝ်ၵၼ်လႄႈ ၸၢင်ႈဢွၵ်ႇပဵၼ်လႆႈၶေႃႈလဵဝ်သဵင်လဵဝ်ၵၼ်တႃႇသေႇ ။ ၸုမ်းၸၢဝ်းၶိူဝ်း 21 ၸုမ်း တေပဵၼ်ၶေႃႈလဵဝ်သဵင်လဵဝ်ၵၼ် ဢၼ်ဝႃႈၼၼ်ႉ ဢမ်ႇပေႃးမီးတၢင်းမုင်ႈမွင်း ။


ၸုမ်းၸၢဝ်းၶိူဝ်းလႄႈ ၽူႈၸိူဝ်းဢၼ်ထုၵ်ႇလီၽိတ်ႈမွၵ်ႇႁွင်ႉပႃး ၼိုင်ႈၸုမ်းလႂ် 50 ႁူမ်ႈၵၼ်မီး 100 ၵေႃႉ ။ ၸုမ်းၸၢဝ်းၶိူဝ်းၼၼ်ႉ ပဵၼ်ၸိူဝ်းဢၼ်ဢမ်ႇပႃးၼႂ်းပႃႊတီႊၵၢၼ်မိူင်းလႄႈ ၼႂ်းၸုမ်းယိပ်းၵွင်ႈၵၢင်ႇ ၊ တေႁွင်ႉဢဝ်မႃးၾၢႆႇ 50 ၵေႃႉ ။ သမ်ႉၽူႈၸိူဝ်းဢၼ်ထုၵ်ႇလီႁွင်ႉ ဢၼ်ဝႃႈၼၼ်ႉၵေႃႈ ပဵၼ်ၽႂ်လၢႆလၢႆ ဢမ်ႇၼႄပႃးဝႆႉ ၊ ဢမ်ႇတူၵ်ႇၸိုဝ်ႈတူၵ်ႇသဵင် ၊ ဢမ်ႇၼႄတၼ်းႁဵင်းမၼ်းဝႆႉလႄႈ ၸိူဝ်းၼၼ်ႉၵေႃႈ သမ်ႉတေပဵၼ်ဢၼ်တပ်ႉသိုၵ်းလႆႈၸႂ်ႁိုဝ် ၊ ဢမ်ႇၼၼ်ၵေႃႈ ၾၢႆႇလူင်ပွင်ၸိုင်ႈလႆႈၸႂ်ႁိုဝ် ၼၼ်ႉၵေႃႈႁဝ်းၶႃႈဢမ်ႇၸၢင်ႈလၢမ်းၸွမ်း ။


လွင်ႈၸိူဝ်းၼႆႉ မၼ်းတေပဵၼ်လွၵ်းႁႅင်းဢူၼ်ႈ တႃႇၸုမ်းၸၢဝ်းၶိူဝ်းၶဝ်ၵူၺ်းလႄႈ တိူၵ်ႈတီႈဢုပ်ႇၵုမ်တူၵ်းလူင်းၵၼ်မႃး ၊ လႆႈၶေႃႈလႆႈၸႂ်ၵၼ်မႃးၵေႃႈ တႃႇၸၢဝ်းၶိူဝ်းတေႁၢၼ်ႉၸႂ်ပဵင်းပေႃးၸႂ်ၸွမ်း ၊ တႃႇၸၢဝ်းၶိူဝ်းတေယူႇၾၢႆႇလွၵ်းၶႅင်သေ ဢုပ်ႇဢူဝ်းၸွမ်းဢၼ်ဝႃႈၼၼ်ႉ ဢမ်ႇပေႃးမီး ၊ ဢမ်ႇႁၼ်တၢင်းတေပဵၼ်လႆႈ ။


ၵွပ်ႈပိူဝ်ႈၸိူင်ႉၼႆ ပၢင်ဢုပ်ႇၵုမ်ၵၢၼ်မိူင်း ဢၼ်တေၵႂႃႇမိူဝ်းၼႃႈၼၼ်ႉ ၼင်ႇၸုမ်းၸၢဝ်းၶိူဝ်းမုင်ႈမွင်းဝႃႈ တေပဵၼ်မႃးမိူင်းႁူမ်ႈတုမ်ၾႅတ်ႊၻရႄႊလ်ၸိုၼ်ႈၸၢင်ႇ ဢၼ်ဝႃႈၼၼ်ႉ ႁဝ်းၶႃႈတႄႉဢမ်ႇပေႃးႁၼ်တၢင်းမၼ်း ။ ၵွပ်ႈပိူဝ်ႈယူႇတီႈတပ်ႉသိုၵ်း တိုၵ်ႉပႆႇယွမ်းတူဝ်ဝႃႈ တေၽိုတ်ႉဢွၵ်ႇၼႂ်းၵၢၼ်မိူင်းသေယဝ်ႉ မိူဝ်းႁဵတ်းၵၢၼ်ၵႅတ်ႇၶႄႁႄႉၵင်ႈဝၢၼ်ႈမိူင်းလၢႆလၢႆၼၼ်ႉ ၶဝ်ပႆႇမီးၼမ်ႉၸႂ်ဢၼ်ၼၼ်ႉ ။ ယူႇတီႈၽွင်းတႅၼ်း ၊ ယူႇတီႈလူင်ပွင်ၸိုင်ႈ ၼူၵ်ႉယုင်းဢွၼ်ႁူဝ်ၼၼ်ႉၵေႃႈ တေပႆႇၸၢင်ႈႁူမ်ႇငုမ်းလႆႈၼိူဝ်တပ်ႉသိုၵ်း ၊ ပေႃးတင်းဝႃႈ လူင်ပွင်ၸိုင်ႈပႆႇႁူမ်ႇငုမ်းလႆႈၼိူဝ်တပ်ႉသိုၵ်းၸိုင် တႃႇၸုမ်းၸၢဝ်းၶိူဝ်းတေမီးတိုဝ်ႉတၢင်း ၵေႃႇသၢင်ႈလႆႈမိူင်းႁူမ်ႈတုမ်ၸိုၼ်ႈၸၢင်ႇၼၼ်ႉၵေႃႈ ပႆႇပဵၼ်လႆႈ ။ ၵွပ်ႈပိူဝ်ႈဝႃႈပိူင်ငဝ်ႈပိုင်းမိူင်း (လၵ်းမိူင်း) 2008 ပၼ်ဝႆႉတီႈတပ်ႉသိုၵ်း ႁႂ်ႈလႆႈပေႉပုၼ်ႈတေႃႇၵူၼ်းမိူင်း ၊ ႁႂ်ႈလႆႈပေႉပုၼ်ႈတေႃႇလူင်ပွင်ၸိုင်ႈဝႆႉ ။ ၵႃႈႁဝ်းၶႃႈပႆႇမူၼ်ႉမႄးလႆႈ ပၵ်းပိူင်လၵ်းမိူင်း 2008 ၼႆႉတႄႉ ပႆႇၸၢင်ႈမုင်ႈမွင်း တႃႇတေၵေႃႇသၢင်ႈလႆႈမိူင်းႁူမ်ႈတုမ် ၊ ပႆႇၸၢင်ႈမုင်ႈမွင်း တႃႇတေပိၼ်ႇလႅၵ်ႈလၢႆႈ 2008 ၊ ပႆႇၸၢင်ႈမုင်ႈမွင်း တႃႇၵူၼ်းမိူင်းၸၢဝ်းၶိူဝ်းတေလႆႈယူႇၵတ်းယဵၼ်ႁိၼ်ႉၼွၼ်း ၊ ႁဝ်းၶႃႈလႆႈထတ်းသၢင်ၼင်ႇၼၼ် ။


ၸင်ႇဝႃႈ ပေႃးၵူၺ်းၸႂ်ယႂ်ႇၸႂ်ပိုင်ႈ တီႈ NCA ဢၼ်ၸုမ်းလူင်ပွင်ၸိုင်ႈတဵင်းၸဵင်ႇ ၶိုင်ဝႆႉၼႆႉသေၵႂႃႇၼႃႈၵူၺ်းတႄႉၸိုင် ႁဝ်းၶႃႈပႆႇၸၢင်ႈမုင်ႈမွင်း ပိူဝ်ႈတႃႇဝၢၼ်ႈမိူင်းတေငမ်းယဵၼ် ၊ ႁဝ်းၶႃႈထတ်းသၢင်ၼင်ႇၼႆ ။