ၶူင်းၵၢၼ်ငဝ်ႈတိုၼ်းငမ်းယဵၼ်ၸၢဝ်းၶိူဝ်း EPRP ႁူပ်ႉထူပ်းဢုပ်ႇၵုမ်ၵၼ် ႁႃတၢင်းၵႄႈလိတ်ႈ ပၼ်ႁႃၵူၼ်းပၢႆႈၽေးသိုၵ်း လႄႈပူၵ်းပွင်ပၼ်ၸၢတ်ႈပၢၼ် ၵူၼ်းပၢႆႈၽေး ။ ၾၢႆႇၼိုင်ႈၵေႃႈ ႁႂ်ႈၵၢၼ်ၸွႆႈထႅမ်လႄႈ ၵၢၼ်ႁပ်ႉလွင်ႈၸွႆႈထႅမ် လီတိူဝ်းလိူဝ်ၵဝ်ႇ ။

မိူဝ်ႈဝၼ်းတီႈ 16-17/12/2015 ၶူင်းၵၢၼ်ငဝ်ႈတိုၼ်းငမ်းယဵၼ်ၸၢဝ်းၶိူဝ်း (Ethnic Peace Resource Project- EPRP) ႁပ်ႉပဵၼ်ၸဝ်ႈတႃႇၼသေ ႁွင်ႉမွၵ်ႇဢဝ်မူႇၸုမ်းၼႂ်းတူင်ႇဝူင်း ဢၼ်ၸွႆႈထႅမ်ၵူၼ်းပၢႆႈၽေး ႁဵတ်းပၢင်ႁူပ်ႉထူပ်းၵုမ်ၵၼ် တီႈႁူင်းႁႅမ်းၵွင်းလုၼ်း ဝဵင်းလူင်တူၼ်ႈတီး ။ တီႈပၢင်ႁူပ်ႉထူပ်းဢုပ်ႇၵုမ်ၵၼ်ၼၼ်ႉ မီးၸုမ်းတူင်ႇဝူင်းၵူၼ်း မိူင်းတႆးပွတ်းႁွင်ႇ ပွတ်းၸၢၼ်း ဢိၵ်ႇ ၸုမ်းဢၼ်ၵႂႃႇၸွႆႈထႅမ် ၵူၼ်းပၢႆႈၽေးသိုၵ်းၼႂ်းမိူင်းၶၢင် ၸိူဝ်းၼႆႉမႃးၶဝ်ႈႁူမ်ႈ မီးၵူၼ်း 20 ပၢႆ - ၼႆယဝ်ႉ ။


ၼႂ်းမိူင်းၸိုင်ႈတႆး ပဵၼ်ပၢင်တိုၵ်းသိုၵ်းသိူဝ် မႃး 2 လိူၼ်ပၢႆသေ ၼႂ်းၵွၼ်ၵၢင်ၸိုင်ႈတႆးၼႆႉ ပၢင်တိုၵ်းယဵၼ်ၵႂႃႇၽွင်ႈ ဝႃႈသေတႃႉ ဢိင်ၼိူဝ်လွင်ႈတုမ်ႉယွၼ်ႈပၢင်တိုၵ်းသေ ၵူၼ်းဝၢၼ်ႈၵူၼ်းမိူင်းတင်းၼမ် လႆႈႁူပ်ႉထူပ်းတၢင်းယၢပ်ႇၽိုတ်ႇ ။


ၵဵဝ်ႇၵပ်းလွင်ႈၼႆႉ ၼၢင်းၼူၼ်းမူဝ် လၢတ်ႈဝႃႈ - ပေႃးတူၺ်းၼႂ်းၸုမ်း ဢၼ်မႃးၸွႆႈထႅမ်ၵူၼ်း ပၢႆႈၽေးသိုၵ်းၸိူဝ်းၼႆႉ ၸုမ်းလႂ်ၵေႃႈ ဢမ်ႇပေႃးၸွႆႈထႅမ်လႆႈထိုင်တီႈထိုင်လႅၼ် ။ ၾၢႆႇၼိုင်ႈၵေႃႈ ၵူၼ်းဢၼ်လႆႈႁပ်ႉတၢင်းၸွႆႈထႅမ်ၵေႃႈ ဢမ်ႇပေႃးလႆႈႁပ်ႉထိုင်တီႈထိုင်လႅၼ် ။ ၵွပ်ႈၼၼ်လႄႈ ၼႂ်းၵူႈမူႇၵူႈၸုမ်း လၢႆဝၢၼ်ႈလၢႆဝဵင်းၼႆႉ ပေႃးမႃးႁူမ်ႈၵၼ်သေႁဵတ်းသၢင်ႈၵႂႃႇၸိုင် တေၸၢင်ႈၸွႆႈထႅမ်ၶဝ်လႆႈ ၊ ပူၵ်းပွင်ၽဝလွင်ႈယူႇသဝ်းၵိၼ်သၢင်ႈၶဝ်လႆႈ ထိုင်တီႈထိုင်လႅၼ်လိူဝ်ၵဝ်ႇ - ဝႃႈၼႆ ။


ၵေႃႁူမ်ႈသၢင်ႈၵူၼ်းၼုမ်ႇတႆး (TYN) ၸၢႆးသႅင်မိူင်း ၵေႃႈလၢတ်ႈဝႃႈ - တွၼ်ႈတႃႇၸွႆႈထႅမ်ၵူၼ်းဝၢၼ်ႈၵူၼ်းမိူင်း ႁႂ်ႈၶဝ်လႆႈမိူဝ်းပူၵ်းပွင်ၶိုၼ်းၽဝၶဝ် ၊ လႆႈမိူဝ်းယူႇၶိုၼ်း တီႈဝၢၼ်ႈၵဝ်ႇမိူင်းၼွၼ်းၶဝ်ၶိုၼ်းၸိူဝ်းၼႆႉ ၶဝ်ၶႂ်ႈလႆႈဢီႈသင်ၵေႃႈ ႁဝ်းတေလႆႈႁူႉလွင်ႈတၢင်းၶဝ် ၶႂ်ႈလႆႈၶႂ်ႈပဵၼ်ၵွၼ်ႇ ၊ ႁဝ်းၸင်ႇတေၸၢင်ႈၸွႆႈၶဝ်လႆႈ ထိုင်တီႈထိုင်လႅၼ် ။ ၵွပ်ႈၼၼ်လႄႈ ထုၵ်ႇလီလႆႈလူင်းၵႂႃႇၵဵပ်းၶေႃႈမုလ်း ဢၼ်ၶဝ်ၶႂ်ႈလႆႈၸိူဝ်းၼႆႉသေ ၸုမ်းတူင်ႇဝူင်းၵူၼ်းၸိူဝ်းဢၼ်ၸွႆႈထႅမ်ၸိူဝ်းၼႆႉၵေႃႈ ထုၵ်ႇလီသၢၼ်မိုဝ်းၵၼ်သေၸွႆႈထႅမ်ၵႂႃႇ - ဝႃႈၼႆ ။