ၼႂ်းၸိုင်ႈတႆးပွတ်းႁွင်ႇ 3 ၸႄႈဝဵင်းၼႆႉ သိုၵ်းတဢၢင်း TNLA လႆႈပဵၼ်ပၢင်တိုၵ်း ယိုဝ်းၵၼ်တင်း သိုၵ်းမၢၼ်ႈႁၢဝ်ႈႁႅင်းလႄႈ ပဵၼ်ပၢင်တိုၵ်းၵၼ် တင်းသိုၵ်းတႆး RCSS/SSA ၊ ဝၼ်းလဵဝ်ၵူၺ်း 5 ပွၵ်ႈ ။

ႁွင်ႈၵၢၼ်ၾၢႆႇပိုၼ်ၽၢဝ်ႇ TNLA ဢွၵ်ႇၶၢဝ်ႇဝၼ်းတီႈ 17/12/2015 (မိူဝ်ႈၼႆႉ) ပွတ်းၼႂ်ဝႃႈ - ၼႂ်းၸႄႈဝဵင်းၵူတ်ႉၶၢႆ ၊ ၵျွၵ်ႉမႄး ၊ ဝၢၼ်ႈတူင်ႈၼႆႉ မိူဝ်ႈဝၼ်းတီႈ 16/12/2015 ( မိူဝ်ႈဝႃး ) ဝၼ်းလဵဝ်ၵူၺ်း ၊  သိုၵ်းမၢၼ်ႈတင်း တပ်ႉသိုၵ်းၸိုင်ႈတႆး (RCSS/SSA) ႁူမ်ႈၵၼ်သေ တိုၵ်းယိုဝ်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း 5 ပွၵ်ႈ ။ ထိုင်မႃးၵၢင်ၼႂ် ဝၼ်းတီႈ 17/12/2015 မိူဝ်ႈၼႆႉၵေႃႈ တိုၵ်ႉယိုဝ်းၵၼ်ထႅင်ႈယူႇ ။


ၵဵဝ်ႇၵပ်းလွင်ႈပၢင်တိုၵ်းၼႆႉ ၼႂ်းသိုဝ်ႇၶၢဝ်ႇတဢၢင်း လၢတ်ႈၼႄႁူဝ်ယွႆႈမၼ်းဝႃႈ - ၼႂ်းၸႄႈဝဵင်းဝၢၼ်ႈတူင်ႈၼႆႉ တပ်ႉမႁႃႇမၢႆ 3 သိုၵ်းတဢၢင်း လႄႈတင်းသိုၵ်းမၢၼ်ႈ တပ်ႉမ 77 လႆႈပဵၼ်ပၢင်တိုၵ်းၵၼ် တင်ႈတႄႇၵၢင်ၼႂ်ယၢမ်း 03:00 မူင်းတေႃႇထိုင် 03:30 မူင်းၵမ်းၼိုင်ႈ ။ ဝၢႆးဝၼ်း 14:10 မူင်းတေႃႇထိုင် 17:25 မူင်းၵမ်းၼိုင်ႈ ။ ၼႂ်းၸႄႈဝဵင်းၵူတ်ႉၶၢႆ သမ်ႉလႆႈပဵၼ်ပၢင်တိုၵ်းၵၼ် တင်းသိုၵ်းမၢၼ်ႈတပ်ႉမ 99 တင်ႈတႄႇယၢမ်း 16:00 မူင်းတေႃႇထိုင် 17:30 မူင်းၵမ်းၼိုင်ႈ - ၼႆယဝ်ႉ ။


ၼႂ်းၸႄႈဝဵင်းၵူတ်ႉၶၢႆ တၢင်းဝၢၼ်ႈပၢင်ႇလေႃႉသမ်ႉ တပ်ႉၵွင် 227 သိုၵ်းတဢၢင်း တင်းသိုၵ်းမၢၼ်ႈ တပ်ႉၸုမ်းလူင် (တပ်ႉမ) 99 လႆႈပဵၼ်ပၢင်တိုၵ်းၵၼ် တင်ႈတႄႇယၢမ်း 12:45 မိၼိတ်ႊၵမ်းၼိုင်ႈ ။


ၼႂ်းၸႄႈဝဵင်းၵျွၵ်ႉမႄးသမ်ႉ တပ်ႉသိုၵ်းတဢၢင်း တပ်ႉၵွင် 987 တင်းသိုၵ်းတႆး RCSS/SSA ပဵၼ်ပၢင်တိုၵ်းၵၼ်  တီႈဝၢၼ်ႈၺွင်ႇပၢၼ်းလႃႉ တၢင်းတေႃႉသၢင်ႇ ယၢမ်း 15:20 မူင်းတေႃႇထိုင် 15:40 မူင်းၵမ်းၼိုင်ႈ - ၼႆယဝ်ႉ ။


ဢၼ်ပဵၼ်ပၢင်တိုၵ်းၵၼ်ၼႆႉ ၾၢႆႇတပ်ႉသိုၵ်းမၢၼ်ႈလႄႈ RCSS/SSA လူႉသုမ်းတၢႆဝၢတ်ႇၵႃႈႁိုဝ် ဢမ်ႇလႆႈႁူႉ ။ ၾၢႆႇတပ်ႉသိုၵ်းတဢၢင်း ဢမ်ႇမီးလွင်ႈလူသုမ်းတိူဝ်ႉဝၢတ်ႇသင် - သိုဝ်ႇၶၢဝ်ႇတဢၢင်း ဢွၵ်ႇၵႂႃႇၼင်ႇၼႆ ။