ဢိင်ၼိူဝ်ပၢင်တိုၵ်းယဵၼ်ၵႂႃႇသေ ၵူၼ်းပၢႆႈၽေးသိုၵ်းသိူဝ် ၼႂ်းၸႄႈဝဵင်းမိူင်းသူႈ ၸႄႈတွၼ်ႈလွႆလႅမ် ၼႂ်းၸိုင်ႈတႆးပွတ်းၸၢၼ်း ၊ ပွၵ်ႈမိူဝ်းယူႇႁိူၼ်းၶိုၼ်း ထုၵ်ႇသိုၵ်းမၢၼ်ႈလိုပ်ႈႁေႃႈ ႁႂ်ႈပွၵ်ႈၶိုၼ်းၵႂႃႇယူႇ တီႈၼႂ်းပၢင်သဝ်းၵူၼ်းပၢႆႈၽေး ။

ၵူၼ်းဝၢၼ်ႈၵူၼ်းမိူင်းပၢႆႈၽေးသိုၵ်း ဢၼ်ႁွတ်ႈဝႆႉတီႈ ဝတ်ႉမုၼ်ၸဝ်ႈ တီႈႁၢႆးပႃ

မိူဝ်ႈဝၼ်းတီႈ 13/12/2015 ၵူၼ်းဝၢၼ်ႈၵုင်းၼိမ် ဢၼ်ပၢႆႈၽေးမႃးယူႇတီႈႁၢႆးပႃ (ပၢင်သဝ်းၵူၼ်းပၢႆႈၽေး တီႈႁၢႆးပႃ) ဢိူင်ႇႁၢႆးပႃ ၸႄႈဝဵင်းမိူင်းသူႈ ပွၵ်ႈမိူဝ်းႁိူၼ်းၶိုၼ်း တီႈဝၢၼ်ႈၵုင်းၼိမ် ၊ ပေႃးဝႃႈမိူဝ်းထိုင်ဝၢၼ်ႈယဝ်ႉ သိုၵ်းမၢၼ်ႈၸိူဝ်းတူင်ႉၼိုင်ယူႇၸွမ်း ႁိမ်းႁွမ်းဝၢၼ်ႈၵုင်းၼိမ်ၼၼ်ႉ ႁွင်ႉၶဝ်ၵႂႃႇၼင်ႈတီႈၵၢင်ပၢင်ႇ ၼႂ်းဝတ်ႉမုၼ်ၸဝ်ႈၵုင်းၼိမ်သေ ၵုမ်းၶင်ၶဝ်ဝႆႉႁိုင်မွၵ်ႈ 2-3 ၸူဝ်ႈမူင်း ။ လၢတ်ႈတီႈၶဝ်ဝႃႈ “ ၽႂ်ႁွင်ႉသူမႃး ၊ ပေႃးဢမ်ႇႁွင်ႉယႃႇမႃး ။ တီႈဢေႇသုတ်း တေလႆႈၵႂႃႇယူႇတီႈ ပၢင်သဝ်းၵူၼ်းပၢႆႈၽေးထႅင်ႈမွၵ်ႈ သွင်လိူၼ် ၊ ပေႃးႁွင်ႉၸင်ႇၵွႆႈမႃးလႄႈ ”။ ၵူၼ်းပၢႆႈၽေးသိုၵ်းၶဝ်ၵေႃႈ ၵႃႈလႆႈပွၵ်ႈၶိုၼ်းမႃးတီႈႁၢႆးပႃ ။


ဝၢၼ်ႈၵုင်းၼိမ်ၼႆႉ လင်ႁိူၼ်းၵူၼ်း ဢၼ်ၵိၼ်ဢၼ်ထၢမ်းမီးမွၵ်ႈ 70 ပၢႆ ၊ ၼႃႈႁိူၼ်းမီး 130 ပၢႆ ၊ ႁူဝ်ၵူၼ်းမီး 500 ပၢႆ ။ တီႈဝၢၼ်ႈၼႆႉ ပဵၼ်ၸၢဝ်းပလွင်ႈ / တဢၢင်း ယူႇသဝ်းၵမ်ႈၼမ် ။


ၵဵဝ်ႇၵပ်းလွင်ႈၼႆႉ ၵူၼ်းပၢႆႈၽေးသိုၵ်း ဢၼ်ပၢႆႈမႃးတီႈႁၢႆးပႃ ၵေႃႉၼိုင်ႈလၢတ်ႈဝႃႈ - ဝၢၼ်ႈမိူင်းၵတ်းယဵၼ်ယဝ်ႉလႄႈ ႁဝ်းၶႃႈဢၢၼ်းပွၵ်ႈမိူဝ်းယူႇၶိုၼ်းႁိူၼ်းသေ မိူဝ်းႁဵတ်းၵိၼ်ႁႆႈၵိၼ်ၼႃးၶိုၼ်း ။ ၽိူဝ်ႇမိူဝ်းထိုင်တီႈဝၢၼ်ႈ လႆႈႁၼ်လုပ်ႇဝူဝ်းၶႃဝူဝ်း ပဵၼ်ၵေႃႇပဵၼ်ၵွင် ၊ မူ ၵႆႇၸိူဝ်းၼႆႉၵေႃႈဢမ်ႇမီးယဝ်ႉ ၊ ၵိုတ်းမူဢွၼ်ႇတူဝ်လဵၵ်ႉလဵၵ်ႉ လႅၼ်ႈၸွမ်းတၢင်းဢွတ်ႈဢွတ်ႈဢႅတ်ႈဢႅတ်ႈ ၵူၺ်းယဝ်ႉ ။ ၾၢႆႇၼိုင်ႈၵေႃႈ သိုၵ်းမၢၼ်ႈ သမ်ႉႁွင်ႉၵႂႃႇလၢတ်ႈဝႃႈ - ယႃႇပေမႃးယူႇ ပေႃးႁဝ်းဢမ်ႇႁွင်ႉ ၊ ႁႂ်ႈပွၵ်ႈၵႂႃႇယူႇၶိုၼ်း တီႈပၢင်သဝ်းၵူၼ်းပၢႆႈၽေးၼႆလႄႈ ၸင်ႇလႆႈပွၵ်ႈမႃးယူႇၶိုၼ်း တီႈႁၢႆးပႃၼႆႉ - ဝႃႈၼႆ ။


ၶွမ်ႊမတီႊၾၢႆႇၸွႆႈထႅမ်ၵူၼ်းပၢႆႈၽေး ဢၼ်ယူႇတီႈႁၢႆးပႃ ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈ ၵေႃႈလၢတ်ႈဝႃႈ - ၵူၼ်းပၢႆႈၽေးၶဝ် ဢၼ်မႃးယူႇသဝ်းတီႈႁၢႆးပႃ 1,500 ပၢႆၼႆႉ ပေႃးဝႃႈတေဢဝ်ၶဝ်ယူႇၵိၼ်ၵႂႃႇ ၸွမ်းဝတ်ႉမုၼ်ၸဝ်ႈတိၵ်းတိၵ်းႁဵတ်းၼႆ မၼ်းမီးပၼ်ႁႃ ။ ၵွပ်ႈၼၼ် မိူဝ်ႈဝႃးၼႆႉ (13/12/2015) ပဵၼ်ဝၼ်းလီဝၼ်းထၼ်းၼႆလႄႈဢၢၼ်းၵႂႃႇတႅၵ်ႈလွၵ်ႈလိၼ် တီႈဝၢၼ်ႈၵဝ်ႇဝၢၼ်ႈႁၢမ်း ဢၼ်ၸိုဝ်ႈဝႃႈဝၢၼ်ႈၵွင်းသေ ႁႂ်ႈၶဝ်ၵႂႃႇယူႇသဝ်းတီႈၼၼ်ႈ ၊ ႁႂ်ႈၸၢင်ႈႁဵတ်းၵိၼ်ႁႃၵိၼ်ၸွမ်းသူၼ်ၸွမ်းႁိူၵ်ႈ ။ တေၵႂႃႇတႅၵ်ႈလွၵ်းလိၼ်ပၼ်ၶဝ်သေ ႁႂ်ႈၶဝ်ယူႇတီႈၼၼ်ႈ - ဝႃႈၼႆ ။


ၵူၼ်းဝၢၼ်ႈၵုင်းၼိမ် ၼႃႈႁိူၼ်း 130 ပၢႆၼႆႉ မီးၶူဝ်းၶွင် / သတ်းလဵင်ႉ ၵႂၢႆး 262 တူဝ် ၊ ဝူဝ်း 239 တူဝ် ၊ မူ 289 တူဝ် ၊ ၵႆႇ 117 တူဝ် ၊ ရူတ်ႉၶိူင်ႈ 19 လမ်း ၊ ႁူင်းၸၢၵ်ႈတမ်ၶဝ် 6 လင် ၊ ၶဝ်ႈပိူၵ်ႇၶဝ်ႈသၢၼ် ဢၼ်ဢဝ်မႃးဝႆႉၵိုၵ်းဝၢၼ်ႈၵိုၵ်းသူၼ် 500 တၢင်ပၢႆ ၊ ၶဝ်ႈၵၢပ်ႇ 1,000 တၢင်ပၢႆၸိူဝ်းၼႆႉ လႆႈလူႉသုမ်းၵွႆၵႂႃႇသဵင်ႈမူတ်း ၊ မိူဝ်ႈပၢႆႈၽေးသိုၵ်းသိူဝ်ၼၼ်ႉ ဢမ်ႇတၼ်းလႆႈဢဝ်ၵႂႃႇ ။ ၵွပ်ႈၼၼ် ပိူဝ်ႈတႃႇၶဝ်တေမိူဝ်းယူႇၶိုၼ်းႁိူၼ်းသေ ပူၵ်းပွင်ၽဝၶဝ်ၶိုၼ်း ႁႂ်ႈပေႃးယူႇၵိၼ်ၵႂႃႇလႆႈၼႂ်းပီ 2016 တင်းပီၼၼ်ႉ လွင်ႈတိုၼ်းၵၢၼ်ၽုၵ်ႇသွမ်ႈၸိူဝ်းၼႆႉၵေႃႈ တေထူပ်းတၢင်းယၢပ်ႇၽိုတ်ႇ - ၼႆယဝ်ႉ ။


တပ်ႉသိုၵ်းမၢၼ်ႈ ႁၢင်ႈႁႅၼ်းသိုၵ်းလေႃႇတိုၵ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ဢၼ်လူင်းလၢႆးမိုဝ်း တင်းလူင်ပွင်ၸိုင်ႈမၢၼ်ႈဝႆႉ ၸၼ်ႉၸိုင်ႈမိူင်းႁူမ်ႈတုမ် တင်ႈတႄႇဝၼ်းတီႈ 06 လိူၼ်ဢွၵ်ႊထူဝ်ႊၿိူဝ်ႊ မႃးတေႃႇထိုင်ႁၢင်လိူၼ်ၼူဝ်ႊဝႅမ်ႊၿိူဝ်ႊ (2015) ၊ ႁဵတ်းႁႂ်ႈမီးၵူၼ်းဝၢၼ်ႈၵူၼ်းမိူင်း လႆႈပၢႆႈၽေးသိုၵ်း ၽၢတ်ႇယၢၼ်ႁိူၼ်းယေးတီႈယူႇ မိုၼ်ႇပၢႆ ။


ၵူၺ်းၵႃႈ ၼႂ်းပိုၼ်ႉတီႈၼႃႈလိၼ်ဢၼ် SSPP/SSA ၵုမ်းၵမ်ၼၼ်ႉ ၵူၼ်းဝၢၼ်ႈၵူၼ်းမိူင်း ပွၵ်ႈမိူဝ်းယူႇၶိုၼ်းႁိူၼ်းယဝ်ႉ ။ တီႈဝၢၼ်ႈသေႃႉ ၵေႃႈမိူဝ်းယူႇၶိုၼ်း ၊ တီႈဝၢၼ်ႈလူၺ် မိူင်းဢၢၵ်ႇ ၸိူဝ်းၼႆႉၵေႃႈပွၵ်ႈမိူဝ်းယူႇၶိုၼ်းယဝ်ႉ - ၼႆယဝ်ႉ ။


ထႅင်ႈလွင်ႈၼိုင်ႈ ပဵၵ်ႉသမ်ႉဝႃႈသိုၵ်းမၢၼ်ႈတင်းသိုၵ်းတႆး သွင်ၾၢႆႇဢုပ်ႇဢူဝ်းတူၵ်းလူင်းၵၼ်ဝႃႈ တေထွၼ်သိုၵ်းတင်းသွင်ၾၢႆႇ ဝႃႈၼႆသေတႃႉ ႁၢၼ်ႉတေႃႇမိူဝ်ႈလဵဝ် ၾၢႆႇသိုၵ်းမၢၼ်ႈၵေႃႈဢမ်ႇထွၼ် ၊ ၾၢႆႇ SSPP/SSA ၵေႃႈဢမ်ႇထွၼ်လႄႈ သဵင်ၵွင်ႈၸၢင်ႈတႅၵ်ႇၶိုၼ်း ။ ၾၢႆႇၼိုင်ႈ သိုၵ်းမၢၼ်ႈၵေႃႈ လၢတ်ႈတီႈၵူၼ်းဝၢၼ်ႈၸိူဝ်းပွၵ်ႈမိူဝ်း ယူႇႁိူၼ်းၶိုၼ်း တီႈဝၢၼ်ႈၵုင်းၼိမ်ဝႃႈ ႁႂ်ႈၵႂႃႇယူႇၶိုၼ်းတီႈပၢင်သဝ်းၵူၼ်းပၢႆႈၽေးထႅင်ႈ 2 လိူၼ်ၼႆလႄႈ မၢင်ၽဝ်ႇၵေႃႈပၢင်တိုၵ်းၸၢင်ႈၵိူတ်ႇၶိုၼ်ႈထႅင်ႈႁိုဝ် ၵူၼ်းဝၢၼ်ႈၵူၼ်းမိူင်းဢွၼ်ၵၼ်မႆႈၸႂ် - ၼႆယဝ်ႉ ။