ႁူဝ်ပဝ်ႈပႃႊတီႊသိူဝ်ၽိူၵ်ႇ (SNDP) လုင်းၸၢႆးဢၢႆႈပဝ်း လၢတ်ႈဝႃႈ တႃႇဝၢၼ်ႈမိူင်းၶိုၼ်ႈယႂ်ႇမႂ်ႇသုင် တေလႆႈမီးဢဵၼ်းဢၢၼ်း ဢၼ်လဵဝ် ။ လွင်ႈၽွမ်ႉႁူမ်ႈပႃႊတီႊတႆးၼၼ်ႉ မီးၽႅၼ်ၵၢၼ်ဝႆႉယဝ်ႉ ၊ တမ်းပိူင်မၼ်းဝႆႉယဝ်ႉ ။ လွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉၼင်ႇၼႆ ။

ထၢမ် - ၵဵဝ်ႇၵပ်းလွင်ႈၵၢၼ်ၽွမ်ႉႁူမ်ႈပႃႊတီႊ ဢမ်ႇဝႃႈၼႂ်းမိူင်းတႆး ႁၼ်ထိုင်ၸိူင်ႉႁိုဝ်ၶႃႈ ?။


တွပ်ႇ - ဝၢၼ်ႈမိူင်းၼႆႉ ဝၢၼ်ႈမိူင်းႁဝ်း ၼင်ႇႁိုဝ်တေၶိုၼ်ႈယႂ်ႇမႂ်ႇသုင် ႁဝ်းတေႁဵတ်းႁိုဝ် ၸုင်ၸၼ်မိုဝ်းၵၼ်ၵႂႃႇ ႁႂ်ႈမီးဢဵၼ်းဢၢၼ်းဢၼ်လဵဝ်။ တီႈ 1 ႁႂ်ႈဝၢၼ်ႈမိူင်းၵတ်းယဵၼ်။ တီႈ 2 ႁဝ်းတေႁဵတ်းႁိုဝ် ပူၵ်းပွင်ဝၢၼ်ႈမိူင်း ႁႂ်ႈၶိုၼ်ႈယႂ်ႇမႂ်ႇသုင် ၊ ႁဝ်းတေလႆႈမီးဢဵၼ်းဢၢၼ်းဢၼ်လဵဝ် ။ ပေႃးၵုမ်ႇမႃးထတ်းသၢင်ၵၼ် ၊ သႄႉသွမ်းၵၼ်ယူႇတိၵ်းတိၵ်း ဢမ်ႇမီးသဵၼ်ႈတၢင်းမၼ်း တႃႇတေႁူမ်ႈႁွမ်းၵၼ်သေ ၶိုၼ်ႈယႂ်ႇမႂ်ႇသုင်ၵႂႃႇမိူဝ်းၼႃႈ ၊ မၼ်းဢမ်ႇပဵၼ်လႆႈ ။


ထၢမ် - ၼႂ်းပႃႊတီႊသိူဝ်ၽိူၵ်ႇၶႃႈလူး လွင်ႈၽွမ်ႉႁူမ်ႈ ပဵၼ်ၸိူင်ႉႁိုဝ်ၶႃႈ ႁႂ်ႈမၼ်းႁူမ်ႈၵၼ်ၶႃႈ ?။


တွပ်ႇ - ၼႂ်းပႃႊတီႊႁဝ်းတႄႉႁူမ်ႈႁွမ်းလီၼႅၼ်ႇယဝ်ႉ ။


ထၢမ် - လွင်ႈၽွမ်ႉႁူမ်ႈ တင်းပႃႊတီႊတၢင်ႇဢၼ်ၶႃႈလူး ?။


တွပ်ႇ - တင်းပႃႊတီႊတၢင်ႇဢၼ်တႄႉ ႁဝ်းၸင်ႇဝႃႈ ပေႃးဝႃႈထႅင်ႈ 3 လိူၼ် ၊ ပေႃးလူင်ပွင်ၸိုင်ႈမႂ်ႇၶိုၼ်ႈမႃး ႁဝ်းတေႁဵတ်းပၢင်ၵုမ်လူင်ယဝ်ႉ ။ ႁဝ်းတေမွပ်ႈပၼ်ႁႂ်ႈၶဝ်ႁဵတ်း ။ ပေႃးမီးၵၢၼ်လိူၵ်ႈမႃး လုင်းႁဝ်းတေပဵၼ်ႁူဝ်ပဝ်ႈၶိုၼ်း ဢမ်ႇပဵၼ်တႄႉပႆႇၸၢင်ႈဝႃႈ ၊ ႁဝ်းတေတွတ်ႈၶႅပ်းၵၢင်ၸႂ်လပ်ႉလပ်ႉ ၊ ဢဝ်ၵၢင်ၸႂ်လွတ်ႈလွတ်ႈလႅဝ်းလႅဝ်း ၊ ႁဝ်းတေႁွင်ႉၵူႈဝဵင်း ။


ထၢမ် - ၵူႈဝဵင်းၼႆႉ ၼႂ်းမိူင်းတႆးၶႃႈႁႃႉ ?။


တွပ်ႇ - ၼႂ်းမိူင်းတႆးၵေႃႈပႃး ၼႂ်းမိူင်းၶၢင်ၵေႃႈပႃး။ ၼႂ်းမိူင်းတႆး မိူင်းၶၢင် တီႈဝဵင်းဢၼ်မီးပႃႊတီႊသိူဝ်ၽိူၵ်ႇၼၼ်ႉ တေႁွင်ႉတင်းမူတ်း ။


ထၢမ် - ၸွင်ႇပႃႊတီႊသိူဝ်ၽိူၵ်ႇ မီးၽႅၼ်ၵၢၼ်ႁူမ်ႈႁွမ်း တင်းပႃႊတီႊတၢင်ႇဢၼ် ၼႂ်းမိူင်းတႆးၶႃႈႁႃႉ ၊ မိူၼ်ၼင်ႇပႃႊတီႊတႆးၵေႃႈ မီးထႅင်ႈ ?။


တွပ်ႇ - ပႃႊတီႊတႆးတႄႉ ၼႂ်းမိူင်းတႆးမိူဝ်ႈလဵဝ် မီး 3 ဢၼ်။ ပႃႊတီႊတီႈၵဵင်းတုင် (ၵွင်ၸႆး) ၵေႃႈမီး ၊ ပႃႊတီႊသိူဝ်ၽိူၵ်ႇႁဝ်းၵေႃႈမီး၊ ပႃႊတီႊႁူဝ်သိူဝ်ၵေႃႈမီး ။ တႃႇႁူမ်ႈႁွမ်းၵၼ်ၼႆႉ ႁဝ်းမီးၽႅၼ်ၵၢၼ်ဝႆႉယဝ်ႉ ၊ ပိူဝ်ႈတႃႇဢုပ်ႇဢူဝ်းၵၼ် ႁဝ်းပေႃးၽွတ်ႈႁႅၼ်းဝႆႉၶွမ်ႊမတီႊ 5 ၵေႃႉယဝ်ႉ ၊ ႁဝ်းယင်းပႆႇယႃႉမၼ်း ။ ၶွမ်ႊမတီႊမႂ်ႇဢၼ်တေပဵၼ်မႃးၼႆႉ တေႁဵတ်းႁိုဝ် ၶဝ်တေတႅပ်းတတ်းၸိူင်ႉႁိုဝ် ႁဝ်းဢမ်ႇၸၢင်ႈလၢတ်ႈ ၊ ႁဝ်းတႄႉတမ်းဝႆႉပိူင်မၼ်းယဝ်ႉ ။