မုၵ်ႉၸုမ်းၸၢဝ်းၶိူဝ်းတႆး ၵဵင်းမႆႇ ႁူမ်ႈမိုဝ်းၵၼ်တင်း တပ်ႉသိုၵ်းထႆး ၼႃႈလိၼ်မၢႆ 7 သေ ၸတ်းပၢင်ပွႆး တၢၼ်းမွပ်ႈယွၼ်းပွလ်း ယုၵ်ႉယွင်ႈၵုၼ်းမုၼ်ငဝ်း ၸဝ်ႈမုၼ်ယႂ်ႇၶုၼ်ႁေႃၶမ်း ၸိုင်ႈမိူင်းထႆး ။

တင်ႈတႄႇဝၼ်းတီႈ 30/11/2015 ထိုင်ဝၼ်းတီႈ 07/12/2015 ၊ မုၵ်ႉၸုမ်းၸၢဝ်းၶိူဝ်းတႆး (ၵဵင်းမႆႇ) ႁူမ်ႈမိုဝ်းၵၼ် တင်းတပ်ႉသိုၵ်းထႆးသေ ၸတ်းႁဵတ်းပၢင်ပွႆး မွပ်ႈတၢၼ်းယွၼ်းပွလ်းပၼ် ၸဝ်ႈႁေႃၶမ်းထႆး ။ ယိူင်းဢၢၼ်း ပိူဝ်ႈတႃႇယုၵ်ႉယွင်ႈၵုၼ်းမုၼ်ငဝ်း ၸဝ်ႈမုၼ်ယႂ်ႇၶုၼ်ႁေႃၶမ်း ။ ထႅင်ႈလွင်ႈၼိုင်ႈ ပိူဝ်ႈတႃႇႁူမ်ၸူမ်းႁပ်ႉတွၼ်ႈ ပီမႂ်ႇတႆး 2110 ၼီႈလႄႈ သူင်ႇသင်ႇပီၵဝ်ႇ 2109 - ၼႆယဝ်ႉ ။


ၽူႈမၢႆမုၵ်ႉၸုမ်းၸၢဝ်းၶိူဝ်းတႆး ၸၢႆးလၢဝ်တွၼ်း လၢတ်ႈဝႃႈ - ပၢင်ပွႆးၼႆႉၸတ်းတီႈမႄႈရိမ်း (ၵဵင်းမႆႇ) ၊ တီႈတပ်ႉၸုမ်းလူင် တပ်ႉၼႃႈလိၼ်မၢႆ 7 (ၶၢႆႉၵွင်ၽူလ်း ထႁၢၼ်ရၢပ်ႉထိ 7) တီႈမႄႈရိမ်း ။ ပၢင်ပွႆးၼႆႉ မီးတင်းၵၢင်ဝၼ်းလႄႈၵၢင်ၶိုၼ်း ၊ မီးတၢင်းလဵၼ်ႈလၢႆၸိူဝ်ႉလၢႆပိူင် ။ ၵၢင်ဝၼ်း မီးမိူၼ်ၼင်ႇ ပၢင်ပိတ်ႉမၢၵ်ႇၼင် ။ ၵၢင်ၶိုၼ်း မီးပၢင်ႁွင်ႉၽဵင်းၵႂၢမ်း ၊ တေမီးပေႃႈၵႃႉမႄႈၶၢႆ တင်းပီႈၼွင်ႉထႆးလႄႈ ပီႈၼွင်ႉတႆး ။ လိူဝ်သေၼၼ်ႉ ပၢင်ပွႆးၼႆႉ တေမီးၵၢၼ်တူင်ႉၼိုင် ၸဝ်ႈၼႃႈတီႈၾၢႆႇၵၢၼ်ၶုၼ်ရႃၸႃၵၢၼ်ထႆး တင်းၼမ် - ဝႃႈၼႆ ။


သိုပ်ႇလၢတ်ႈဝႃႈ - ပၢင်မူၼ်ႈသိူဝ်း (လွင်ႈႁွင်ႉၽဵင်းၵႂၢမ်း) ၼၼ်ႉ ဝၼ်းတီႈ 30/11/2015 မီးဝူင်းထႆး ၶဝ်မႃးလဵၼ်ႈၵႂႃႇ ။ ဝၼ်းတီႈ 01/12/2015 မီးဝူင်းထႆးၼင်ႇၵဝ်ႇ ။ 2 ဝူင်းႁိၼ်လိၵ်းၾႆး ။ ဝၼ်းတီႈ 3 ငႃ ၶႃႊရႃႊဝၢၼ်း ။ ဝၼ်းတီႈ 4 ဢႅတ်ႉ ၶႃႊရႃႊၿၢဝ်ႊ ၊ တေမႃးလဵၼ်ႈပၼ်တင်ႈတႄႇ 4 မူင်းထိုင် 5 မူင်း ၊ သင်ပီႈၼွင်ႉႁဝ်းၶဝ် ၶႂ်ႈမႃးႁၼ်ပီႈဢႅတ်ႉႁွင်ႉၵႂၢမ်းၼႆၵေႃႈ ႁႂ်ႈမႃးၸဝ်ႉဢိတ်းၼိုင်ႈ ။ ဝၢႆးဝၼ်း 3 မူင်း တေပိုတ်ႇၽၵ်းတူ ႁပ်ႉပီႈၼွင်ႉႁဝ်းၶဝ်ယဝ်ႉ ။ ၵႃႈၶဝ်ႈပွႆးၼၼ်ႉ ၽူႈယႂ်ႇ/ၵူၼ်းလူင် ၵဵပ်းၼိုင်ႈၵေႃႉ 20 ဝၢတ်ႇ ၊ လုၵ်ႈဢွၼ်ႇၵဵပ်းၼိုင်ႈၵေႃႉ 10 ဝၢတ်ႇ ပေႃးၶဝ်ႈၵႂႃႇတူၺ်းတီႈႁွင်ႉၽဵင်းၵႂၢမ်းၵေႃႈ တေလႆႈသဵင်ႈငိုၼ်းထႅင်ႈ - ဝႃႈၼႆ ။


ဝၼ်းတီႈ 5 ပဵၼ်ၸၢႆးႁၢၼ်လႅင်း မႃးလဝ်ႇမူၼ်ႈတူၼ်ႈၸႂ်ပၼ် ။ ဝၼ်းတီႈ 6 ပဵၼ်ၸုမ်းၸိူင်းလႅဝ်း လႄႈ မီးၵၢၼ်ၶႄႉၶႅင်ႇ (ပရႃႊၵူတ်ႇ) ၼၢင်းငၢမ်း ၊ ၼၢင်းငၢမ်းသၢဝ်တႆး မီးယူႇ 24 ၵေႃႉ ၊ ၾၢႆႇတၢင်းႁၢင်ႈလီ ၊ လွင်ႈယဵၼ်ႇငႄႈ ၊ ၵၢၼ်တႅင်ႇတူဝ်ၼုင်ႈသိူဝ်ႈၶူဝ်း လႄႈလွင်ႈတၢင်းလၢတ်ႈၸႃ ။ ၼႂ်းၶမ်ႈဝၼ်းတီႈ 5-6-7 တႃႇ 3 ၶိုၼ်းၼႆႉ တေမီးၸၢတ်ႈၸိူင်းတႆးပၢၼ်ႇၵဝ်ႇ (ၵဵင်းမႆႇ) မႃးလဝ်ႇမူၼ်ႈတူၼ်ႈၸႂ်ပၼ် ။ ဝၼ်းတီႈ 7 တေမီးၸၢႆးၽွမ်ႉသႅင်မိူင်း ၊ ၸၢႆးထႅၼ်ႈလႅဝ်း လႄႈ ၸုမ်းပၢၼ်မႂ်ႇၼႂ်းၵဵင်းမႆႇ 3-4 ၸုမ်း မႃးလဝ်ႇမူၼ်ႈတူၼ်ႈၸႂ်ပၼ် - ၼႆယဝ်ႉ ။


ၸၢႆးလၢဝ်တွၼ်း လၢတ်ႈတုၵ်းယွၼ်းဝႃႈ - ယွၼ်းၵၢဝ်ႇလၢတ်ႈထိုင် ပီႈၼွင်ႉတႆးႁဝ်းၶဝ်ၵူႈတီႈၵူႈတၢင်း ၊ ဢမ်ႇၵွမ်ႉၵႃႈၼႂ်းမိူင်းၵဵင်းမႆႇၵူၺ်း ။ ၸဵမ်ၽူႈယႂ်ႇၵူၼ်းလူင် သၢမ်ပၢၼ်ၸဵတ်းသႅၼ်း ၵူႈၵေႃႉၵူႈၸဝ်ႈ ၊ မီးတီႈလႂ်ၼႆၵေႃႈ သင်ၶႂ်ႈမႃးမူၼ်ႈသိူဝ်းၸွမ်းပွႆးႁဝ်းၶႃႈ ၵႃႈၶဝ်ႈမၼ်းၵေႃႈဢမ်ႇၵႃႈ ၊ 20 ၵူၺ်း ၊ ဢွၼ်ၵၼ်မႃးမူၼ်ႈသိူဝ်း ပၼ်ဢဵၼ်ပၼ်ႁႅင်းႁဝ်းၶႃႈ ။ ၼႂ်းပၢင်ပွႆးဝၼ်းတီႈ 05/12/2015 ၸဝ်ႈႁူဝ်ပဝ်ႈလူင်ၵေႃႈ တေမႃးၵၢဝ်ႇလၢတ်ႈၵႂၢမ်း တွၼ်ႈထိုင်ပီႈၼွင်ႉႁဝ်းၶဝ်ယူႇ ၊ ၶႅၼ်းတေႃႈဢွၼ်ၵၼ်မႃးၼမ်ၼမ် - ဝႃႈၼႆ ။