ႁူဝ်ပဝ်ႈ RCSS/SSA ၸွမ်သိုၵ်းယွတ်ႈသိုၵ်း ပဵၼ်ၵဝ်ႉၵၼ်းသေ ႁပ်ႉၸွႆႈထႅမ်ၵူၼ်းၵဝ်ႇ MTA 23 ၵေႃႉ ၸိူဝ်းၶႃပုတ်းၼၼ်ႉ လူင်းသႂ်ႇၶႃပွမ်ၼႂ်းမိူင်းတႆး ။

တႄႇဢဝ်ဝၼ်းတီႈ 29/11-3/12/2015 ယၢမ်းၵၢင်ၼႂ်ထိုင်ႁူဝ်ၶမ်ႈ ႁူင်းၵၢၼ်မူလၼိထိၶႃထဵမ်းလႄႈ ႁူင်းၵၢၼ်မူလၼိထိပၢင်းရၵ်းတီႈဢိူင်ႇ ဢုမ်ႉၽၢင်ၸႄႈတွၼ်ႈတၢၵ်ႇၸိုင်ႈထႆး ဢၼ်ပဵၼ်ၶူင်းၵၢၼ်ၶိူဝ်းၸဝ်ႈႁေႃၶမ်း ႁပ်ႉႁဵတ်းပၼ် ၶႃထဵမ်း (ပွမ်) တႃႇၵူၼ်း 200 ၵေႃႉ ၊ ၼႂ်းၼၼ်ႉ ပီႈၼွင်ႉတႆး ၵူၼ်းၵဝ်ႇ MTA ပႃး 23 ၵေႃႉ ။


ၸၢႆးၶိတ်ႉၵႅမ် ႁူဝ်ပဝ်ႈမုၵ်ႉၸုမ်းၸၢဝ်းၶိူဝ်းတႆး လၢတ်ႈဝႃႈမိူဝ်ႈတႄႇ မၼ်းတႄႉႁဝ်းလႆႈသၢႆမၢႆ ပီႈၼွင်ႉတႆးႁဝ်းၸိူဝ်းၶႃပုတ်း တင်းမူတ်း 60 ၵေႃႉ ၊ ၽိူဝ်ႇထိုင်မႃးဝၼ်းတီႈ 28 သမ်ႉ မီးပီႈၼွင်ႉၸိူဝ်းၶႃပုတ်းၼၼ်ႉမႃး 23 ၵေႃႉၵူၺ်း ။ ၸဝ်ႈယွတ်ႈသိုၵ်းၸွႆႈထႅမ်ပၼ်ၵႃႈရူတ်ႉတူႈ 2 လမ်း ၊ ၼိုင်ႈလမ် 1800 ဝၢတ်ႇ တႃႇၸဵတ်းဝၼ်း တႃႇၶဝ်မႃးယႃတူဝ် သႂ်ႇၶႃပွမ် ဝႃႈၼႆ ။


ဢၼ်ပီႈၼွင်ႉတႆးၸိူဝ်းၶႃပုတ်းမႃးပၼ်သၢႆမၢႆဝႆႉတႄႉလွႆၵေႃႇဝၼ်း 32 ၵေႃႉ ၊ လွႆတႆးလႅင်း 16 ၵေႃႉလႄႈမႄႈသၢႆ 12 ၵေႃႉ ။


ႁူင်းၵၢၼ်မူလၼိထိၶႃထဵမ်း (ပွမ်) လႄႈႁူင်းၵၢၼ်မူလၼိထိပၢင်းရၵ်း ႁပ်ႉပုၼ်ႈၽွၼ်းတူၺ်းထိုင်ၵူၼ်းၸိူဝ်း ၶႃပုတ်ႉဢမ်ႇဝႃႈၸၢဝ်းၶိူဝ်းလႂ် ၸဵမ်ၵႃႈၼမ်ႉမၼ်းရူတ်ႉ ၊ ၵႃႈၵိၼ်လႄႈလွင်ႈယူႇသဝ်းၵိၼ်သၢင်ႈၽွင်းၵူတ်ႇထတ်းတႃႇသႂ်ႇၶႃပွမ် ။


ပီႈၼွင်ႉတႆးၸိူဝ်းဢၼ်ၵႂႃႇသႂ်ႇၶႃပွမ်တီႈဢုမ်ႉၽၢင် ၸႄႈတွၼ်ႈတၢၵ်ႇ မိူင်းထႆး 23 ၵေႃႉ  ဢႃယု 35-58 ပီ ။


ယိူင်းဢၢၼ်းႁွင်ႈၵၢၼ်မူလၼိထိတႄႉၼႂ်းၶၢဝ်းတၢင်း 5 ဝၼ်းၼႆႉတေႁပ်ႉသႂ်ႇပၼ်ၵူၼ်းၶႃပွမ် 200 ၵေႃႉဢမ်ႇဝႃႈၸၢဝ်းၶိူဝ်းလႂ် ၸိူဝ်းၶႃပုတ်းၼၼ်ႉ တေသႂ်ႇပၼ်ၵူႈၵေႃႉ ၼႆယဝ်ႉ ။


ႁွင်ႈၵၢၼ်မူလၼိထိၸတ်းႁဵတ်းပၼ်ၶႃႈပွမ်ၼိုင်ႈၵေႃႉလႂ် 2 ၵူႈ ၊ ၵူႈၼိုင်ႈတႃႇႁဵတ်းၵၢၼ် ၊ ၵူႈၼိုင်ႈသမ်ႉ တႃႇသႂ်ႇႁၢင်ႈလီ ၵႂႃႇမႃးဢွၵ်ႇၼႃႈဢွၵ်ႇတႃ ။ ပေႃးပုတ်း 1 ၶွၼ်ၵေႃႈ ႁဵတ်းပၼ်တႃႇ 2 ၶွၼ် ပေႃးပုတ်း တင်း 2 ၶွၼ်သမ်ႉ ႁဵတ်းပၼ်တႃႇ 2 ၵူႈ 4 ၶွၼ် ဝႃႈၼႆ ။