ငဝ်ႈငုၼ်းတီႊမွၵ်ႊၶရေႊသီႊၸိူဝ်ႉၶိူဝ်းတႆး SNLD ႁိုဝ် ပႃႊတီႊႁူဝ်သိူဝ် ၸတ်းႁဵတ်းပၢင်ၵုမ်လူင် တီႈဝဵင်းၵျွၵ်ႉမႄး ႁၢင်ႈႁႅၼ်းၼႃႈၵၢၼ်တႃငၢၼ်း ၶၢဝ်းတၢင်းမိူဝ်းၼႃႈ 5 ပီ လႄႈ ၽႅၼ်ၵၢၼ် ၶၢဝ်းယၢဝ်း တေႃႇၵႂႃႇ ဝၢႆးပၢင်လိူၵ်ႈတင်ႈ ပီ 2020 ။

ဝၼ်းတီႈ 28-30/11/2015 ပႃႊတီႊငဝ်ႈငုၼ်းတီႊမွၵ်ႊၶရေႊသီႊၸိူဝ်ႉၶိူဝ်းတႆးႁိုဝ် ပႃႊတီႊ ႁူဝ်သိူဝ် ၸတ်းႁဵတ်း ပၢင်ၵုမ် တီႈႁူင်းၵၢၼ်ယႃႈယႃသိူဝ်ႁႃႈတူဝ် ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ။ ဢုပ်ႇၵုမ် လွင်ႈၼႃႈၵၢၼ်ပုၼ်ႈၽွၼ်း တႃႇ ၽူႈတႅၼ်းၸိူဝ်းပေႉပၢင်လိူၵ်ႈတင်ႈ ၊ ပေႃးထိုင်ၼႂ်းသၽႃးတေလႆႈႁဵတ်းသင် ၊ ၸိူဝ်းဢမ်ႇလႆႈၶဝ်ႈသၽႃးသမ်ႉ တေယူႇၼွၵ်ႈသၽႃးသေ တေႁဵတ်းသင် ။


ၸဝ်ႈၶုၼ်ထုၼ်းဢူး ႁူဝ်ပဝ်ႈပႃႊတီႊႁူဝ်သိူဝ် မွၵ်ႇလၢတ်ႈတီႈပၢင်ၵုမ် ၼၼ်ႉဝႃႈ - “ ဢၼ်ႁဝ်းၶႃႈႁူမ်ႈ ၵၼ် ႁဵတ်း SSJAC ၊ CSSU ၊ UNA  ၸိူဝ်းၼႆႉ မၼ်းဢမ်ႇၸႂ်ႈဝႃႈ လွင်ႈၵၢၼ်ပႃႊတီႊ ႁဝ်း ၸၢဝ်းၶိူဝ်း ႁဝ်း ၵူၺ်းဢမ်ႇၵႃး တၢင်ႇၶိူဝ်းၵေႃႈ ႁႂ်ႈၽွမ်ႉ ႁူမ်ႈၵၼ်သေ ၸၢင်ႈသၢၼ်မိုဝ်း ႁဵတ်းၵၢၼ် ၵႂႃႇ ၸွမ်းၵၼ် ။ ဢၼ်ၼႆႉမၼ်းပဵၼ်လွင်ႈ လမ်ႇလွင်ႈတႄႉတႄႉ ” - ဝႃႈၼႆ ။


ၸၢႆးၼုတ်း ၽူႈၼမ်းၼႂ်းၵူႈလွင်ႈလွင်ႈပႃႊတီႊႁူဝ်သိူဝ် မွၵ်ႇလၢတ်ႈဝႃႈ - “ ပိူင်လူင်မၼ်းတႄႉ ဢၼ် ႁူဝ် ပဝ်ႈ ႁဝ်းလၢတ်ႈၵႂႃႇၸိူဝ်းၼၼ်ႉ ၶႂ်ႈႁႂ်ႈတႆးႁဝ်းၽွမ်ႉႁူမ်ႈၵၼ်ဢွၼ်တင်း  ၼႆႉပဵၼ်ပိူင်လူင် ယဝ်ႉ ” ဝႃႈၼႆ ။


ၽူႈၶၢၼ်ပၢၵ်ႇပႃႊတီႊႁူဝ်သိူဝ် ၸၢႆးလဵၵ်ႉလၢတ်ႈဝႃႈ - “ ၵူၼ်းၼုမ်ႇၼႆႉ လမ်ႇလွင်ႈတႃႇ ဢဵၼ်ႁႅင်းမိူင်း မိူဝ်းၼႃႈ လႄႈ တေၶွတ်ႇၽွတ်ႈၶိုၼ်း ၵေႃႇမတီႇ ၵူၼ်းၼုမ်ႇၼႆၵေႃႈ  ႁႂ်ႈမုၼ်းလႅင်းၶိုၼ်ႈမႃး ၊ ၾၢႆႇၵၢပ်း သၢၼ်တင်း ၸုမ်း CSO/CBO ႁဝ်းၶႃႈတေႁၢင်ႈႁႅၼ်း ၊ ၾၢႆႇၵေႃႇမတီႇၾၢႆႇပၵ်းပိူင်ၸိူဝ်ႉၼႆႉၵေႃႈ ႁဝ်းၶႃႈၶိုၼ်းတေၽွတ်ႈႁႅၼ်းၵႂႃႇ ထႅင်ႈ ၊ ၾၢႆႇၵေႃႇမတီႇၼၢင်းယိင်းၵေႃႈ တိုၼ်းမီးဝႆႉယူႇယဝ်ႉ ၵူၺ်းၵႃႈ ႁဝ်းလူဝ်ႇၶိုၼ်းၽိူမ်ႉသႂ်ႇထႅင်ႈ ႁႂ်ႈမၼ်းမီးႁႅင်းမႃးလိူဝ်ၵဝ်ႇ ” - ၼႆႉ ဝႃႈၼႆ ။


ၼၢင်းၼူၼ်း ၼေႃႇၽူႈတႅၼ်း ၸႄႈဝဵင်းမိူင်းပဵင်း လၢတ်ႈဝႃႈ “ ပၢင်ၵုမ်ၵမ်းၼႆႉ ႁဝ်းၶႃႈၶွတ်ႇၽွတ်ႈဝႆႉ ၵေႃႇမ တီႇၵဵဝ်ႇၵၢပ်းလွင်ႈသၽႃး ၊ မၼ်းတေပႃး ၽူႈတႅၼ်းသၽႃးၸိူဝ်ႉၸၢတ်ႈ 1 ၵေႃႉ ၊ ၽူႈတႅၼ်း သၽႃးၵူၼ်း မိူင်း 1 ၵေႃႉ ၊ ၽူႈတႅၼ်းသၽႃးၸႄႈမိူင်း 2 ၵေႃႉ ၊ ၵေႃႇမတီႇငဝ်ႈငုၼ်း 3 ၵေႃႉ ၊ ႁႂ်ႈၵုမ်းၵမ် ၼႃႈၵၢၼ် ဢၼ်ထုၵ်ႇႁဵတ်းထုၵ်ႇသၢင်ႈ ၼႂ်းသၽႃး ” ဝႃႈၼႆ ။


ပၢင်လိူၵ်ႈတင်ႈ 2015ၼႆႉပႃႊတီႊႁူဝ်သိူဝ် ပေႉ 40 တီႈၼင်ႈ ၊ သၽႃးၸိူဝ်ႉၸၢတ်ႈ 3 တီႈၼင်ႈ ၊ သၽႃးၵူၼ်းမိူင်း 12 တီႈၼင်ႈလႄႈ သၽႃးၸႄႈမိူင်း 25တီႈၼင်ႈ ၼႆယဝ်ႉ ။