သႃႊထိတ်ႉ ပုၼ်ႊထွင်ႊ ၽူႈၵွၼ်းၸုမ်းၼၢၼ်ႉ ဢဵပ်ႉသီႊ (Nan FC) ယွၼ်းတၢင်းၸွႆႈလိူဝ်မုၵ်ႉၸုမ်း ဢၼ်ၵဵဝ်ႇၶွင်ႈ ၵဵဝ်ႇၵပ်းပၼ်ႁႃ ၵူၼ်းၼုမ်ႇတႆး 2 ၵေႃႉ ဢၼ်မီးၼမ်ႉၵတ်ႉ တၢင်းၶႅၼ်ႇလဵၼ်ႈမၢၵ်ႇၼင် ၊ ၵူၺ်းၵႃႈ သမ်ႉဢမ်ႇမီးတိုဝ်ႉတၢင်း တႃႇတေပဵၼ်ၽူႈလဵၼ်မၢၵ်ႇၼင်လႆႈ ယွၼ်ႉပိူဝ်ႈပၵ်းပိူင်မၢႆမီႈမိူင်းထႆးႁၢမ်ႈဝႆႉ ။

ၸၢႆးၼုမ်ႇ 2 ၵေႃႉၼႆႉ ပဵၼ်ၵူၼ်းတႆး ဢၼ်မႃးယူႇမိူင်းထႆးႁိုင်သေ ၵေႃႉၼိုင်ႈယိပ်းဝႆႉဝႂ်ပိုၼ်ႉတီႈသုင် ၊ ထႅင်ႈၵေႃႉၼိုင်ႈ သမ်ႉယိပ်းဝႆႉဝႂ်ၵူၼ်းဢမ်ႇမီးသထႃႊၼတၢင်းထပဵၼ်ႊ ႁိုဝ် ဝႂ်သိပ်းပီ ။ ယွၼ်ႉပိူဝ်ႈဝႃႈ ပၵ်းပိူင်မၢႆမီႈမိူင်းထႆးမၵ်းမၢႆဝႆႉ ၵူၼ်းဢၼ်ယိပ်းဝႂ်ၸိူဝ်းၼႆႉ ႁဵတ်းၵၢၼ်လႆႈတႃႇ 27 သႅၼ်းၵူၺ်း ဝႃႈၼႆ ။ ၵွပ်ႈၼၼ် ၶဝ် 2 ၵေႃႉၼႆႉ ဢမ်ႇမီးတိုဝ်ႉတၢင်း တႃႇတေပဵၼ်ၽူႈလဵၼ်ႈမၢၵ်ႇၼင် (ဢၼ်ႁဵတ်းၵိၼ် ပဵၼ်ၵၢၼ်လဵင်ႉတွင်ႉလႆႈ) လႆႈ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ယူႇတီႈၸုမ်းမၢႆမီႈၸုမ်းၼၢၼ်ႉ ဢဵပ်ႉသီႊ (Nan FC) ၵေႃႈ ၶတ်းၸႂ်ၸွႆႈထႅမ် ၼင်ႇႁိူဝ်ၶဝ် 2 ၵေႃႉၼႆႉ တေလႆႈမႃးပဵၼ်ၽူႈလဵၼ်ႈမၢၵ်ႇၼင်ၸွမ်းၸုမ်းၶဝ် ၊ ၵူၺ်းၵႃႈႁဵတ်းႁိုဝ်ၵေႃႈၶဝ် 2 ၵေႃႉၼႆႉ ဢမ်ႇမီးသုၼ်ႇလႆႈ တႃႇတေပဵၼ်ၽူႈလဵၼ်ႈမၢၵ်ႇၼင်ၶွင်ၸုမ်းၶဝ်လႆႈ ။


ၽူႈၵွၼ်းၸုမ်းယင်းလၢတ်ႈဝႃႈ - ပေႃးဢဝ်ပိူင်ဝႃႈၼႆၸိုင် ၶဝ်သွင်ၵေႃႉၼႆႉ ပဵၼ်ၵူၼ်းမီးဝႂ်ၵပ်းတူဝ် ဢၼ်မီးမၢႆတူဝ် 13 တူဝ်ယူႇ ။ ယူႇတီႈၸုမ်းၼၢၼ်ႉ ဢဵပ်ႉသီႊ (Nan FC) တႄႉ တူဝ်ႈတၼ်းတႃႇတေလူင်းလၢႆးမိုဝ်းႁပ်ႉၶဝ် 2 ၵေႃႉၼႆႉပဵၼ်လုၵ်ႈၸုမ်း ၊ ၵူၺ်းၵႃႈမၢႆမီႈႁၢမ်ႈဝႆႉ ။ ၶဝ် 2 ၵေႃႉပဵၼ်ၵူၼ်းလဵၼ်ႈၶႅၼ်ႇသေ ၸၢင်ႈပဵၼ်ၵူၼ်းလဵၼ်ႈမၢၵ်ႇၼင်ၸၼ်ႉၵုၼ်ဢေးသျိူဝ်ႊလူးၵွၼ်ႇ - ဝႃႈၼႆ ။