ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) ဢၼ်မီးလုၵ်ႈၸုမ်း ၸုမ်းယိပ်းၵွင်ႈၵၢင်ႇလၢႆၸုမ်း ႁဵတ်းပၢင်ၵုမ်ၵၼ် ၊ ၶိုၼ်းၶွတ်ႇၽွတ်ႈ 5 ႁွင်ႈၵၢၼ်လႄႈ တင်ႈၵေႃၵမ်ၵၢၼ် 9 ၵေႃႉ ။

တင်ႈတႄႇဝၼ်းတီႈ 07/12/2015 မႃး တေႃႇထိုင်ဝၼ်းတီႈ 11/12/2015 (မိူဝ်ႈၼႆႉ) ၶွင်ႊသီႊႁူမ်ႈတုမ် ၵူႈၸၢဝ်းၶိူဝ်း (UNFC) လႆႈႁဵတ်းပၢင်ၵုမ်ၵၼ် တီႈၼႂ်းၵဵင်းမႆႇ မိူင်းထႆး ၊ ၶိုၼ်းပတ်းပူလူမႄးၶိုၼ်း မူႇၸုမ်း UNFC ၊ ယွၼ်ႉပိူဝ်ႈဢွၼ်ၼႃႈၼႆႉ ဢၼ်ပဵၼ်လုၵ်ႈၸုမ်း UNFC တႃႇ 2 ၸုမ်း မိူၼ်ၼင်ႇ တႅဝ်းႁူမ်ႈၸိူဝ်ႉၸၢတ်ႈၶျၢင်း (CNF) လႄႈ ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO) ၵႂႃႇႁူမ်ႈလူင်းလၢႆးမိုဝ်း ၶေႃႈၵိၼ်ၵႅၼ်ႇ ၵၢၼ်ၵိုတ်းတိုၵ်းပတ်းပိုၼ်ႉ တူဝ်ႈမိူင်း (NCA) သေ ယူႇတီႈ UNFC ၵေႃႈ လႆႈသင်ႇယင်ႉၵၢၼ်ဢၼ်တူင်ႉၼိုင်ၼႂ်း UNFC ဝႆႉ - ၼႆယဝ်ႉ ။


ယူႇတီႈ UNFC လႆႈၶွတ်ႇၽွတ်ႈၶိုၼ်း 5 ႁွင်ႈၵၢၼ် - မိူၼ်ၼင်ႇ ႁွင်ႈၵၢၼ်ၾၢႆႇၼွၵ်ႈမိူင်း ၊ ၾၢႆႇမၢႆမီႈ ၊ ၾၢႆႇပူၵ်းပွင် ၊ ၾၢႆႇသိုၵ်း ၊ ၾၢႆႇႁပ်ႉ / ပွင်ႇၶၢဝ်ႇ ၊ ၾၢႆႇငိုၼ်းတွင်းၸိူဝ်းၼႆႉ ။ ၾၢႆႇၼိုင်ႈၵေႃႈ တမ်းဝႆႉလၵ်းၵၢၼ်လူင် 5 လၵ်းၵၢၼ် -  ၽူႈၸမ်ၸႂ် ၽူႈယႂ်ႇၵူၼ်းလူင်ၼႂ်း UNFC လၢတ်ႈ ။


ဢၼ်ၶွတ်ႇၽွတ်ႈမူႇၸုမ်း / ႁွင်ႈၵၢၼ်ဝႆႉၼႆႉ လႆႈတင်ႈၵေႃၵမ်ၵၢၼ် 9 ၵေႃႉ ၊ ၼႂ်းၼၼ်ႉ 1. ၼၢႆႁူင်သႃ ၊ 2. ၶူးဢူးရႄႇ ၊ 3. ၸွမ်ႁၢၼ်ပီးထူး ၊ 4. ထုၼ်းၸေႃႇ ၊ 5. တႃႉဢၢႆႈၽူင်း ၊ 6. ၸိၼ်ႇဝႃး ၊ 7. ထုၼ်းမျၢတ်ႉလိၼ်း ၊ 8. ၸေႃးလမုၼ်ႇ ၊ 9. ၸဝ်ႈၸၢႆးထူး ။ ၸဝ်ႈၸၢႆးထူးၼႆႉ ၶဝ်ႈဝႆႉၼႂ်းပိူင် တၢင်ႇယိုၼ်ႈၸိုဝ်ႈဝႆႉ ၊ ပႆႇပဵၼ်တၢင်းၵၢၼ် ၊ ၵွပ်ႈဝႃႈတေလႆႈပွၵ်ႈမိူဝ်းဢဝ်ၶေႃႈလႆႈၸႂ်တီႈငဝ်ႈငုၼ်း SSPP/SSA ၊ ပေႃးငဝ်ႈငုၼ်းလႆႈၸႂ်ယဝ်ႉ ၸင်ႇတေပဵၼ်မႃးၽူႈတႅၼ်း SSPP/SSA ဢၼ်ႁပ်ႉၼႃႈတီႈပုၼ်ႈၽွၼ်းတဵမ်ထူၼ်ႈ - ၼႆယဝ်ႉ ။


ၼွၵ်ႈသေၼၼ်ႉ လႆႈငိၼ်းဝႃႈ ၸုမ်းယၢင်း DKBA ဢၼ်သၢၼ်းဢွင်ႇဢွၼ်ႁူဝဝ်ၵေႃႈ မႃးယွၼ်းၶဝ်ႈပဵၼ် လုၵ်ႈၸုမ်း UNFC ၊ လွင်ႈတေႁပ်ႉဢမ်ႇႁပ်ႉၼၼ်ႉ UNFC တေထတ်းသၢင်ၵႂႃႇ - ၼႆယဝ်ႉ ။


လႆႈငိၼ်းထႅင်ႈဝႃႈ ၼႂ်းလိူၼ်ၼႃႈၼႆႉ UNFC ႁၢင်ႈႁႅၼ်းတႃႇတေဢွၵ်ႇၶၢဝ်းတၢင်းၵႂႃႇ ၼွၵ်ႈမိူင်း ။ တႃႇတေၵႂႃႇၼႆႉ တူဝ်တႅၼ်းၼိုင်ႈၸုမ်းၼိုင်ႈၵေႃႉ ၊ တေၵႂႃႇတီႈမိူင်းသဝိတ်ႊသိူဝ်ႊလႅၼ်ႊသေ တေၵႂႃႇဢုပ်ႇဢူဝ်းလွင်ႈ ငဝ်းလၢႆးဝၢၼ်ႈမိူင်းပၢၼ်မိူဝ်ႈလဵဝ် ။


ၾၢႆႇၼိုင်ႈတၢင်းၼိုင်ႈၵေႃႈ တေတင်ႈၵေႃၵမ်ၵၢၼ်သေဢုပ်ႇဢူဝ်းၵႄႈၶႆပၼ်ႁႃ  ၼႂ်းဝူင်ႈၵၢင် တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) တင်း ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) - ၼႆယဝ်ႉ ။