ဢိင်ၼိူဝ် လူင်ပွင်ၸိုင်ႈမၢၼ်ႈ တင်း ပႃႊတီႊမႂ်ႇသုင်ၸိုင်ႈတႆး (SSPP/SSA) လႆႈႁူပ်ႉဢုပ်ႇၵၼ် မိူဝ်ႈဝၼ်းသုၵ်း ၊ ပိူဝ်ႈတႃႇႁူမ်ႈၵၼ်ၵႄႈလိတ်ႈ ပၼ်ႁႃပၢင်တိုၵ်းၼၼ်ႉ ၾၢႆႇ SSPP/SSA လႆႈတင်ႈၶွမ်ႊမတီႊသေ ၵႂႃႇႁူပ်ႉဢုပ်ႇမၢၼ်ႈ တီႈဝဵင်းတႃႈၵုင်ႈ ။

ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၶွတ်ႇၽွတ်ႈၶွမ်ႊမတီႊသေ ဝၼ်းတီႈ 23/11/2015 (မိူဝ်ႈၼႆႉ) ၵႂႃႇႁူပ်ႉထူပ်း ဢူးတဵင်းၸေႃႇ ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ၶွင်လူင်ပွင်ၸိုင်ႈ တီႈဝဵင်းတႃႈၵုင်ႈ ။  ၼႂ်းၶွမ်ႊမတီႊ ဢၼ်ၶွတ်ႇၽွတ်ႈၼႆႉ မီးၵႅမ်ၽူႈၼမ်းၼႂ်း 2 ၸဝ်ႈၶမ်းတီႇ ဢွၼ်ႁူဝ် ။ ၼႂ်းၼၼ်ႉ ပႃးၸဝ်ႈၶိူဝ်းမၢဝ်း ၊ ၸဝ်ႈၼေႃႇလဵၵ်း ၊ ၸဝ်ႈၸၢႆးသု လႄႈၽူႈၼင်ႈလုမ်း ၸၢႆးၼေႃႇသႅင်မိူင်း ၊ ႁူမ်ႈၵၼ် 4 ၵေႃႉ ။


လွင်ႈတၢင်း ဢၼ်လႆႈၶွတ်ႇၽွတ်ႈၶွမ်ႊမတီႊသေ ၵႂႃႇႁူပ်ႉဢုပ်ႇ လူင်ပွင်ၸိုင်ႈမၢၼ်ႈပွၵ်ႈၼႆႉ ဢိင်ၼိူဝ်ၵေႃႉပဵၼ်ၽွင်းလူင် ၾၢႆႇၾႆးၾႃႉ ဢူးၶိၼ်ႇမွင်ႇၸူဝ်း ၊ ၵေႃႉဢၼ်ၶဝ်ႈပႃးၼႂ်း ၸုမ်းၶိုင်ပွင် လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) တႅမ်ႈလိၵ်ႈထိုင်မႃး တီႈ SSPP/SSA ၊ ပိူဝ်ႈတႃႇၵႄႈလိတ်ႈပၼ်ႁႃပၢင်တိုၵ်း ဢၼ်တပ်ႉသိုၵ်းမၢၼ်ႈ ႁၢင်ႈႁႅင်းသိုၵ်းလေႃႇတိုၵ်း တင်ႈတႄႇဝၼ်းတီႈ 06/10/2015 မႃး တေႃႇထိုင်ယၢမ်းလဵဝ် ။ ပိူဝ်ႈတႃႇၸွႆႈၵႄႈလိတ်ႈ ပၼ်ႁႃပၢင်တိုၵ်းသိုၵ်းသိူဝ်ႁႂ်ႈယဝ်ႉတူဝ်ႈ ၊ ႁႂ်ႈၵူၼ်းဝၢၼ်ႈၵူၼ်းမိူင်း လႆႈပွၵ်ႈမိူဝ်းယူႇၶိုၼ်းႁိူၼ်းယေးတူဝ်ၵဝ်ႇၼႆသေ တႅမ်ႈလိၵ်ႈမႃးလႄႈ တူဝ်တႅၼ်း SSPP/SSA လႆႈၵႂႃႇႁူပ်ႉၵၼ် မိူဝ်ႈဝၼ်းသုၵ်းတီႈ 20/11/2015 ပူၼ်ႉမႃး ။ ဢိင်ၼိူဝ် ၶေႃႈလႆႈၸႂ် ၵၢၼ်ဢုပ်ႇဢူဝ်းၵၼ်သေ လႆႈၶွတ်ႇၽွတ်ႈၶွမ်ႊမတီႊ ပိူဝ်ႈတႃႇႁူပ်ႉဢုပ်ႇဢူဝ်းၵၼ် ဝၼ်း (23/11/2015) ၼႆႉ ။


ၾၢႆႇၼိုင်ႈၵေႃႈ မိူဝ်ႈၽွင်းငဝ်ႈငုၼ်း SSPP/SSA သူင်ႇတူဝ်တႅၼ်း ၵႂႃႇႁူပ်ႉဢုပ်ႇဢူဝ်း ၽူႈမီးပုၼ်ႈၽွၼ်း ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ၶွင်လူင်ပွင်ၸိုင်ႈၼႆႉ တၢင်းငဝ်ႈငုၼ်းဝၢၼ်ႈႁႆးၵေႃႈ သိုၵ်းမၢၼ်ႈၽိူမ်ႉထႅမ်ႁႅင်းသိုၵ်းသေ သွင်ၾၢႆႇတိုၵ်ႉၶဵင်ႈၶႅင်ၵၢၼ်သိုၵ်း တေႃႇၵၼ်ယူႇ ။


မီးၶၢဝ်ႇၼႂ်းပိုၼ်ႉတီႈလၢတ်ႈဝႃႈ - ဝၼ်းမိူဝ်ႈၼႆႉ သိုၵ်းမၢၼ်ႈတိုၵ်ႉႁၢင်ႈႁႅၼ်းသိုၵ်းသေ ၶိုၼ်ႈလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) ပွတ်းဝၢၼ်ႈလူၺ် မိူင်းဢၢၵ်ႇ ။ ငဝ်းလၢႆးပၢင်တိုၵ်း တေပဵၼ်မႃးၸိူင်ႉႁိုဝ်ပႆႇႁူႉလႄႈ ပၢင်ဢုပ်ႇဢူဝ်း ဢၼ်ၵႂႃႇဢုပ်ႇၵၼ်ပွၵ်ႈၵမ်းၼႆႉၵေႃႈ တေၶိုပ်ႈၼႃႈႁိုဝ် ဢမ်ႇၶိုပ်ႈၼႃႈၼၼ်ႉ ယင်းပႆႇၸၢင်ႈဝႃႈ ။