ပၢင်လိူၵ်ႈတင်ႈ တီႈဝဵင်းၼမ်ႉၸၢင် ဢမ်ႇမီးလွင်ႈၽဵင်ႇပဵင်း / ဢမ်ႇပဵၼ်ထမ်း၊ ႁဵတ်းႁႂ်ႈပႃႊတီႊသၢင်ႇသီႈ ပေႉၵၢၼ်လိူၵ်ႈတင်ႈၼၼ်ႉ လၢႆပႃႊတီႊ ႁူမ်ႈၵၼ်တႅမ်ႈလိၵ်ႈသၢၼ်ၶတ်းထိုင် ၶွမ်ႊမသျိၼ်ႊ ၵၢၼ်လိူၵ်ႈတင်ႈ ။

ပၢင်လိူၵ်ႈတင်ႈ တီႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းၼၼ်ႉ ႁူင်းတွတ်ႈၶႅပ်းၵၢင်ၸႂ် ၼႂ်းတပ်ႉသိုၵ်းၼၼ်ႉ ဢမ်ႇမီးလွင်ႈၽဵင်ႇပဵင်း ၊ ဢမ်ႇပဵၼ်ထမ်း။ လွင်ႈၼႆႉ လၢႆပႃႊတီႊႁူမ်ႈၵၼ်တႅမ်ႈလိၵ်ႈ ထိုင်ၶွမ်ႊမသျိၼ်ႊ ၵၢၼ်လိူၵ်ႈတင်ႈယဝ်ႉ - ၽူႈမီးပုၼ်ႈၽွၼ်း ပႃႊတီႊၼူၵ်ႉယုင်း NLD လၢတ်ႈ ။


ၼႂ်းၸႄႈဝဵင်းၼမ်ႉၸၢင်ၼႆႉ ပႃႊတီႊၸိူဝ်းၶေႉၶႅင်ႇၵၢၼ်လိူၵ်ႈတင်ႈ မီး 4 ပႃႊတီႊ ။ ၼႂ်းၼၼ်ႉမီး ပႃႊတီႊသၢင်ႇသီႈ (USDP) ၊ ပႃႊတီႊႁူဝ်သိူဝ် (SNLD) ၊ ပႃႊတီႊသိူဝ်ၽိူၵ်ႇ (SNDP) ၊ ပႃႊၼူၵ်ႉယုင်း (NLD) ၸိူဝ်းၼႆႉ ။


တီႈႁူင်းတွတ်ႈၶႅပ်းၵၢင်ၸႂ် ၼႂ်းတပ်ႉသိုၵ်းၼႆႉ ၶႅပ်းၵၢင်ၸႂ်ၼႆႉ ၸႂ်ႉဝႆႉလၢႆးၵူတ်ႉလၢႆးငေႃး ။ ယူႇတီႈႁဝ်းၶႃႈသေ ဢမ်ႇႁၢၼ်ႉၸႂ် ။ ၼႂ်းတပ်ႉသိုၵ်းၼႆႉ သဵၼ်ႈမၢႆႁူဝ်ၵူၼ်းဢၼ်မီးသုၼ်ႇတွတ်ႈၶႅပ်းၵၢင်ၸႂ်လႄႈ  ၵူၼ်းဢၼ်မႃးတွတ်ႈၶႅပ်းၵၢင်ၸႂ် မၼ်းဢမ်ႇၽဵင်ႇၵၼ် ။ မိူၼ်ၼင်ႇ တီႈၼႂ်းသိုၵ်းၼႆႉ ၵူၼ်းသိုၵ်းဢၼ်ၵႂႃႇယူႇတီႈ ၵုၼ်ႁဵင်ၵေႃႈ ၶႅပ်းၵၢင်ၸႂ်ၶဝ်မႃးၶိုၼ်ႈတီႈၼမ်ႉၸၢင် ။ တီႈတႄႉမၼ်း တီႈၵုၼ်ႁဵင်ၵေႃႈ ၶဝ်တွတ်ႈၶႅပ်းယူႇ - ဢူးၼေႇၸေႃႇၼၢႆႇ လၢတ်ႈ ။


မိူၼ်ၸိူင်ႉၼင်ႇ ၽူႈမီးပုၼ်ႈၽွၼ်း ပၢင်တွတ်ႈၶႅပ်းၵၢင်ၸႂ်ၼႂ်းသိုၵ်းၼႆႉ မၼ်းၵေႃႉလဵဝ်ၵူၺ်း တွၵ်ႇၸုမ်ႈသေသႂ်ႇပၼ်ၵႂႃႇတင်းမူတ်း ။ ၵဵဝ်ႇၵပ်းလွင်ႈၼႆႉ ႁဝ်းၶႃႈဢမ်ႇႁၢၼ်ႉၸႂ် ။ ၵွပ်ႈၼၼ်လႄႈ လႆႈတႅမ်ႈလိၵ်ႈထိုင် ၶွမ်ႊမသျိၼ်ႊ ၵၢၼ်လိူၵ်ႈတင်ႈယဝ်ႉ - ဢူးၼေႇၸေႃႇၼၢႆႇ လၢတ်ႈ ။


တီႈၸႄႈဝဵင်းၼမ်ႉၸၢင်ၼႆႉ ယွၼ်ႉၶႅပ်းၵၢင်ၸႂ်ဢၼ်ဢမ်ႇပဵၼ်ထမ်း ၊ ၶႅပ်းၵၢင်ၸႂ်ၵူတ်ႉငေႃးတေႃႇၵၼ်ၼႆႉသေ ပႃႊတီႊသၢင်ႇသီႈ လႆႈပေႉၵႂႃႇၵမ်ႈၼမ် ။ ၵူၺ်းၵႃႈ ပေႉဝႆႉသေတႃႉ တၢင်ႇပႃႊတီႊၸိူဝ်းၼၼ်ႉ ဢမ်ႇယွမ်းလူင်းလၢႆးမိုဝ်းယွမ်းၵၢၼ်ႉပၼ်  ၸွမ်းၼင်ႇပိူင်ဝႅပ်ႊၾွမ်ႊမၢႆ 19 ။


ပၢင်လိူၵ်ႈတင်ႈ ဢၼ်ပေႉၵႂႃႇ ၼႂ်းၸႄႈဝဵင်းၼမ်ႉၸၢင်ၼႆႉ ပဵၼ်ပႃႊတီႊႁူဝ်သိူဝ် (SNLD) 1 တီႈၵူၺ်း။ လိူဝ်သေၼၼ်ႉ ပဵၼ်သၢင်ႇသီႈတင်းမူတ်း ။ ၵွပ်ႈၼၼ်လႄႈ ၼႂ်းၸႄႈဝဵင်းၼမ်ႉၸၢင်ၼႆႉ သင်ဢမ်ႇၵူတ်ႉတေႃႇၵၼ်ၸိူင်ႉၼႆၸိုင် ဢၼ်တေပေႉၼႆႉ ပဵၼ်ပႃႊတီႊၼူၵ်ႉယုင်း (NLD) လႄႈ ပဵၼ်ပႃႊတီႊႁူဝ်သိူဝ်ၵူၺ်း - ဢူးၼေႇၸေႃႇၼၢႆႇ လၢတ်ႈ ။