ၸွမ်သိုၵ်းပၢင်ႇၾႃႉ တႅမ်ႈလိၵ်ႈၶွပ်ႈၸႂ်ထိုင် ၽူႈၸိူဝ်းၸွႆႈထႅမ်ၵူၼ်းပၢႆႈၽေးသိုၵ်းသိူဝ်လႄႈ ၽူႈၸိူဝ်းပိုၼ်ႉပွႆႇ ပုၼ်ႈလီသုၼ်ႇတူဝ် ၸိူဝ်းယူႇၼႃႈသိုၵ်းတင်းသဵင်ႈ ။

ၸွမ်သိုၵ်းပၢင်ႇၾႃႉ

မိူဝ်ႈဝၼ်းတီႈ 21/11/2015 ၼၼ်ႉ ႁူဝ်ပဝ်ႈ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၸွမ်သိုၵ်းပၢင်ႇၾႃႉ တႅမ်ႈလိၵ်ႈၽိုၼ်ၼိုင်ႈ ၊ လူင်းလၢႆးမိုဝ်းသေ ယိၼ်းၸူမ်းၶွပ်ႈၸႂ် ၽူႈၸိူဝ်းပိုၼ်ႉပွႆႇ ပႅတ်ႈသုၼ်ႇလီတူဝ်ၵဝ်ႇသေ ဢဝ်ႁႅင်းငိုၼ်းတွင်း ႁႅင်းတူဝ်ႁႅင်းၸႂ်ၸဝ်ႈၵဝ်ႇ ၸွႆႈထႅမ်ၵူၼ်းပၢႆႈၽေးသိုၵ်း ဢိၵ်ႇတင်း ၽူႈၸိူဝ်းၵမ်ႉထႅမ် ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) တင်းသဵင်ႈ ။


တင်ႈတႄႇ တပ်ႉသိုၵ်းမၢၼ်ႈ ႁၢင်ႈႁႅၼ်းသိုၵ်းလေႃႇတိုၵ်း SSPP/SSA ဝၼ်းတီႈ 06/10/2015 မႃးၼႆႉ မီးၵူၼ်းဝၢၼ်ႈၵူၼ်းမိူင်း ပၢႆႈၽေးသိုၵ်းသိူဝ် ၼပ်ႉႁူဝ်ႁဵင် ။


ယိၼ်းၸူမ်းၶွပ်ႈၸႂ်ထိုင် ဢၼ်သႂ်ႇႁႅင်းတူဝ်ႁႅင်းၸႂ်ၵူၺ်းပႆႇပေႃး ၊ ယိၼ်းၸူမ်းၶွပ်ႈၸႂ်ထိုင်ပႃး ၽူႈၸိူဝ်းၸွႆႈထႅမ်ႁႅင်းတူဝ် ႁႅင်းၺၢၼ်ႇတင်းသဵင်ႈ လႄႈတင်း ယွင်ႈၵုၼ်းမုၼ်ၽူႈႁၵ်ႉၸၢတ်ႈ ၸိူဝ်းဢၼ်လႆႈလူႉႁၢႆတၢႆၵႂႃႇၼႃႈသိုၵ်း တင်းသဵင်ႈ ၊ ဢိၵ်ႇပႃးၽူႈၵွၼ်းသိုၵ်း ၵေႃႉသိုၵ်းၵေႃႉႁၢၼ်တင်းသဵင်ႈ ။ ၶႃႈႁဝ်း ၸွမ်သိုၵ်းပၢင်ၾႃႉ ႁူဝ်ပဝ်ႈ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ယိၼ်းၸူမ်းၶွပ်ႈၸႂ်ထိုင်ယႂ်ႇၼမ် ။


ဢၼ်ပဵၼ်သိုၵ်းၵၼ်ၼႆႉ မၼ်းပဵၼ်သိုၵ်းဢၼ်ဢမ်ႇၶဝ်ႈပိူင်ထမ်း (တြႃး) ၊ ဢၼ်မႃးပူၼ်ႉပႅၼ်ပိုၼ်ႉတီႈၼႃႈလိၼ် ႁဝ်းၶႃႈယူႇသဝ်း ၊ မႃးပူၼ်ႉပႅၼ်ၼိူဝ်ၵူၼ်းဝၢၼ်ႈၵူၼ်းမိူင်းႁဝ်းလႄႈ ငဝ်းလၢႆးပဵၼ်ၸိူင်ႉႁိုဝ်မႃးၵေႃႈ ႁဝ်းၶႃႈသၢၼ်မိုဝ်းၵၼ်သေ ၵႅတ်ႇၶႄႁႄႉၵင်ႈၽေးၶဵၼ် ဢၼ်မႃးတဵၵ်းတဵင်ႁဝ်းၼၼ်ႉၵႂႃႇ - ဝႃႈၼႆ ။


တပ်ႉသိုၵ်းၸိုင်ႈတႆး (SSPP/SSA) ၼႆႉ လႆႈထုၵ်ႇသိုၵ်းမၢၼ်ႈ ႁၢင်ႈႁႅၼ်းသိုၵ်းလေႃႇတိုၵ်း တင်ႈတႄႇဝၼ်းတီႈ 06/10/2015 မႃးတေႃႇထိုင်ယၢမ်းလဵဝ် ။ ယွၼ်ႉပိူဝ်ႈပဵၼ်ပၢင်တိုၵ်းၼႆႉလႄႈၵူၼ်းဝၢၼ်ႈ 25 ဝၢၼ်ႈ ၼႂ်းၸႄႈဝဵင်းမိူင်းသူႈ မိူင်းၼွင် ၵေးသီး လႆႈပၢႆႈယၢၼ်ႁိူၼ်းယေးတီႈယူႇ 1 မိုၼ်ႇပၢႆ ။ ၸူဝ်ႈပၢင်တိုၵ်းၼႆႉ  ၾၢႆႇသိုၵ်းမၢၼ်ႈဢဝ်ႁိူဝ်းဝိၼ်သိုၵ်း မႃးလေႃႇတိုၵ်း 8 ဝၼ်း ၊ မၢင်ဝၼ်း 1-2 ပွၵ်ႈ ၊ မၢင်ဝၼ်း 2-3 ပွၵ်ႈ ။ ဢၼ်ၸႂ်ႉႁႅင်းသိုၵ်းတၢင်းလိၼ်သေ ၶိုၼ်ႈလေႃႇတိုၵ်း တပ်ႉပၢင်သဝ်း SSPP/SSA တင်းမူတ်း 40 ပွၵ်ႈပၢႆ - ၼႆယဝ်ႉ ။